ద్విపదభాగవతం - కల్యాణకాండ : ఇంద్రుఁడు శ్రీకృష్ణునితో యుద్ధముఁ జేయుట
అనలకృతాంత దైత్యాధీశవరుణ
యనిలకుబేర భూతాధీశవరులు
తమ వాహనముల నుద్ధతి నెక్కి పేర్చి
కమలాక్షుఁ దాఁకిరి కరముగ్రవృత్తి;
నార్పుల బొబ్బల నట్టహాసముల
దర్పించి కవిసి నాదనుజారి మీద
వ్రేసియుఁ బొడిచియు వివిధ బాణముల
నేసియు నొప్పింప నిందిరావిభుఁడు
పారిజాతముతోడఁ బక్షీంద్రు తోడ
వారిజాననుతోడ వరశక్తి దిరిగి
పటుశార్ఙ నిర్ముక్త బాణజాలముల
చటులతఁ జూపి నిర్జరసేనఁ బఱపి
యమరాధిపతి నొంచి యనలుఁజల్లార్చి
సమవర్తి గెలిచి రాక్షసుని నిర్జించి
వరుణ బీరము మాన్పి వాయువుఁ బఱవ
నరవాహు గెలిచి పినాకి సృక్కించి 650
బృందారకశ్రేణిఁ బెఱికి యందంద
యందఱి గెలిచి తా(రేఁ)గె ద్వారకకు.
పారిజాతము సత్యభామ గేహమున
నారూఢగతి నిల్పి యతి సౌఖ్యమైన
శుభముహూర్తమున భూసురులు దీవింప
నభినుతులొనరింప నంబుజోదరుఁడు
పదియాఱువేలరు పంకజాననల
వదలని వేడ్క వివాహమై వేర్చి
యందఱకును నిండ్లునారామములును
జెందిన దాసదాసీజనంబులను
గంధమాల్యాంబర ఘనభూషణములు
బంధురమైన సంపదలును నొసఁగి