స్తుతులు స్తోత్రాలు : గోపికల తాదాత్మ్యత (మధురభక్తి ప్రదం)
1
పూతన యై యొక్క పొలఁతి చరింపంగ-
శౌరి యై యొక కాంత చన్నుగుడుచు;
బాలుఁడై యొక భామ పాలకు నేడ్చుచో-
బండి నే నను లేమఁ బాఱఁదన్ను;
సుడిగాలి నని యొక్క సుందరి గొనిపోవ-
హరి నని వర్తించు నబ్జముఖియు;
బకుఁడ నే నని యొక్క పడఁతి సంరంభింపఁ-
బద్మాక్షుఁడను కొమ్మ పరిభవించు;
2
నెలమి రామకృష్ణు లింతు లిద్దఱు గాఁగ
గోపవత్సగణము కొంద ఱగుదు
రసురవైరి ననుచు నబల యొక్కతె చీరుఁ
బసుల మనెడి సతుల భరతముఖ్య!
3
"లోకమెల్లఁ గుక్షిలోపల నున్నది
మాధవుండ నేను మాత వీవు
చూడు"మనుచు నొక్క సుందరి యొకతెకు
ముఖము దెఱచి చూపు ముఖ్యచరిత!
4
"వెన్నలు దొంగిలి తినియెడి
వెన్నుఁడ"నని యొకతె నుడువ వేఱొక్కతె చే
సన్నల యశోద నంచునుఁ
గ్రన్ననఁ గుసుమముల దండఁ గట్టు నిలేశా!
5
"కాళియఫణి యిది వీరలు
కాళియఫణి సతులు మ్రొక్కఁ గడఁగిరి నే గో
పాలకుమారుఁడ"ననుచును
లీలాగతి నాడు నొక్క లేమ నరేంద్రా!
6
"తరుణులు గోపకు లందఱు
హరిహయుఁ డిదె వాన గురిసె హరి నే"నని భా
సుర చేలాంచల మొక్కతె
గిరి నెత్తెద ననుచు నెత్తుఁ గెంగేల నృపా!
7
"మీరలు గోపకు లే నసు
రారిని దావాగ్ని వచ్చె నటు చూడకుఁడీ
వారించెద"నని యొక్కతె
చేరి బయల్ కబళనంబు చేయు నరేంద్రా!
8
ఇతి బమ్మెఱ పోతనామాత్య కృత శ్రీమత్తెలుగు భాగవత దశమస్కంధ పూర్వభాగ అంతర్గత గోపికల తాదాత్మ్యత (మధురభక్తి ప్రదం)