పోతన తెలుగు భాగవతము

8-1-శ్లో.

శ్రీశుక ఉవాచ
మనుర్వివస్వతః పుత్రః శ్రాద్ధదేవ ఇతి శ్రుతః
సప్తమో వర్తమానో యస్తదపత్యాని మే శృణు

8-2-శ్లో.

ఇక్ష్వాకుర్నభగశ్చైవ ధృష్టః శర్యాతిరేవ చ
నరిష్యన్తోऽథ నాభాగః సప్తమో దిష్ట ఉచ్యతే

8-3-శ్లో.

తరూషశ్చ పృషధ్రశ్చ దశమో వసుమాన్స్మృతః
మనోర్వైవస్వతస్యైతే దశపుత్రాః పరన్తప

8-4-శ్లో.

ఆదిత్యా వసవో రుద్రా విశ్వేదేవా మరుద్గణాః
అశ్వినావృభవో రాజన్నిన్ద్రస్తేషాం పురన్దరః

8-5-శ్లో.

కశ్యపోऽత్రిర్వసిష్ఠశ్చ విశ్వామిత్రోऽథ గౌతమః
జమదగ్నిర్భరద్వాజ ఇతి సప్తర్షయః స్మృతాః

8-6-శ్లో.

అత్రాపి భగవజ్జన్మ కశ్యపాదదితేరభూత్
ఆదిత్యానామవరజో విష్ణుర్వామనరూపధృక్

8-7-శ్లో.

సఙ్క్షేపతో మయోక్తాని సప్తమన్వన్తరాణి తే
భవిష్యాణ్యథ వక్ష్యామి విష్ణోః శక్త్యాన్వితాని చ

8-8-శ్లో.

వివస్వతశ్చ ద్వే జాయే విశ్వకర్మసుతే ఉభే
సంజ్ఞా ఛాయా చ రాజేన్ద్ర యే ప్రాగభిహితే తవ

8-9-శ్లో.

తృతీయాం వడవామేకే తాసాం సంజ్ఞాసుతాస్త్రయః
యమో యమీ శ్రాద్ధదేవశ్ఛాయాయాశ్చ సుతాన్ఛృణు

8-10-శ్లో.

సావర్ణిస్తపతీ కన్యా భార్యా సంవరణస్య యా
శనైశ్చరస్తృతీయోऽభూదశ్వినౌ వడవాత్మజౌ

8-11-శ్లో.

అష్టమేऽన్తర ఆయాతే సావర్ణిర్భవితా మనుః
నిర్మోకవిరజస్కాద్యాః సావర్ణితనయా నృప

8-12-శ్లో.

తత్ర దేవాః సుతపసో విరజా అమృతప్రభాః
తేషాం విరోచనసుతో బలిరిన్ద్రో భవిష్యతి

8-13-శ్లో.

దత్త్వేమాం యాచమానాయ విష్ణవే యః పదత్రయమ్
రాద్ధమిన్ద్రపదం హిత్వా తతః సిద్ధిమవాప్స్యతి

8-14-శ్లో.

యోऽసౌ భగవతా బద్ధః ప్రీతేన సుతలే పునః
నివేశితోऽధికే స్వర్గాదధునాస్తే స్వరాడివ

8-15-శ్లో.

గాలవో దీప్తిమాన్రామో ద్రోణపుత్రః కృపస్తథా
ఋష్యశృఙ్గః పితాస్మాకం భగవాన్బాదరాయణః

8-16-శ్లో.

ఇమే సప్తర్షయస్తత్ర భవిష్యన్తి స్వయోగతః
ఇదానీమాసతే రాజన్స్వే స్వ ఆశ్రమమణ్డలే

8-17-శ్లో.

దేవగుహ్యాత్సరస్వత్యాం సార్వభౌమ ఇతి ప్రభుః
స్థానం పురన్దరాద్ధృత్వా బలయే దాస్యతీశ్వరః

8-18-శ్లో.

నవమో దక్షసావర్ణిర్మనుర్వరుణసమ్భవః
భూతకేతుర్దీప్తకేతురిత్యాద్యాస్తత్సుతా నృప

8-19-శ్లో.

పారామరీచిగర్భాద్యా దేవా ఇన్ద్రోऽద్భుతః స్మృతః
ద్యుతిమత్ప్రముఖాస్తత్ర భవిష్యన్త్యృషయస్తతః

8-20-శ్లో.

ఆయుష్మతోऽమ్బుధారాయామృషభో భగవత్కలా
భవితా యేన సంరాద్ధాం త్రిలోకీం భోక్ష్యతేऽద్భుతః

8-21-శ్లో.

దశమో బ్రహ్మసావర్ణిరుపశ్లోకసుతో మనుః
తత్సుతా భూరిషేణాద్యా హవిష్మత్ప్రముఖా ద్విజాః

8-22-శ్లో.

హవిష్మాన్సుకృతః సత్యో జయో మూర్తిస్తదా ద్విజాః
సువాసనవిరుద్ధాద్యా దేవాః శమ్భుః సురేశ్వరః

8-23-శ్లో.

విష్వక్సేనో విషూచ్యాం తు శమ్భోః సఖ్యం కరిష్యతి
జాతః స్వాంశేన భగవాన్గృహే విశ్వసృజో విభుః

8-24-శ్లో.

మనుర్వై ధర్మసావర్ణిరేకాదశమ ఆత్మవాన్
అనాగతాస్తత్సుతాశ్చ సత్యధర్మాదయో దశ

8-25-శ్లో.

విహఙ్గమాః కామగమా నిర్వాణరుచయః సురాః
ఇన్ద్రశ్చ వైధృతస్తేషామృషయశ్చారుణాదయః

8-26-శ్లో.

ఆర్యకస్య సుతస్తత్ర ధర్మసేతురితి స్మృతః
వైధృతాయాం హరేరంశస్త్రిలోకీం ధారయిష్యతి

8-27-శ్లో.

భవితా రుద్రసావర్ణీ రాజన్ద్వాదశమో మనుః
దేవవానుపదేవశ్చ దేవశ్రేష్ఠాదయః సుతాః

8-28-శ్లో.

ఋతధామా చ తత్రేన్ద్రో దేవాశ్చ హరితాదయః
ఋషయశ్చ తపోమూర్తిస్తపస్వ్యాగ్నీధ్రకాదయః

8-29-శ్లో.

స్వధామాఖ్యో హరేరంశః సాధయిష్యతి తన్మనోః
అన్తరం సత్యసహసః సునృతాయాః సుతో విభుః

8-30-శ్లో.

మనుస్త్రయోదశో భావ్యో దేవసావర్ణిరాత్మవాన్
చిత్రసేనవిచిత్రాద్యా దేవసావర్ణిదేహజాః

8-31-శ్లో.

దేవాః సుకర్మసుత్రామ సంజ్ఞా ఇన్ద్రో దివస్పతిః
నిర్మోకతత్త్వదర్శాద్యా భవిష్యన్త్యృషయస్తదా

8-32-శ్లో.

దేవహోత్రస్య తనయ ఉపహర్తా దివస్పతేః
యోగేశ్వరో హరేరంశో బృహత్యాం సమ్భవిష్యతి

8-33-శ్లో.

మనుర్వా ఇన్ద్రసావర్ణిశ్చతుర్దశమ ఏష్యతి
ఉరుగమ్భీరబుధాద్యా ఇన్ద్రసావర్ణివీర్యజాః

8-34-శ్లో.

పవిత్రాశ్చాక్షుషా దేవాః శుచిరిన్ద్రో భవిష్యతి
అగ్నిర్బాహుః శుచిః శుద్ధో మాగధాద్యాస్తపస్వినః

8-35-శ్లో.

సత్రాయణస్య తనయో బృహద్భానుస్తదా హరిః
వితానాయాం మహారాజ క్రియాతన్తూన్వితాయితా

8-36-శ్లో.

రాజంశ్చతుర్దశైతాని త్రికాలానుగతాని తే
ప్రోక్తాన్యేభిర్మితః కల్పో యుగసాహస్రపర్యయః