పోతన తెలుగు భాగవతము

11-1-శ్లో.

శ్రీద్ధవ ఉవాచ
సుదుస్తరామిమాం మన్యే యోగచర్యామనాత్మనః
యథాఞ్జసా పుమాన్సిద్ధ్యేత్తన్మే బ్రూహ్యఞ్జసాచ్యుత

11-2-శ్లో.

ప్రాయశః పుణ్దరీకాక్ష యుఞ్యన్తో యోగినో మనః
విషీదన్త్యసమాధానాన్మనోనిగ్రహకర్శితాః

11-3-శ్లో.

అథాత ఆనన్దదుఘం పదామ్బుజం హంసాః శ్రయేరన్నరవిన్దలోచన
సుఖం ను విశ్వేశ్వర యోగకర్మభిస్త్వన్మాయయామీ విహతా న మానినః

11-4-శ్లో.

కిం చిత్రమచ్యుత తవైతదశేషబన్ధో దాసేష్వనన్యశరణేసు యదాత్మసాత్త్వమ్
యోऽరోచయత్సహ మృగైః స్వయమీశ్వరాణాం శ్రీమత్కిరీటతటపీడితపాదపీఠః

11-5-శ్లో.

తం త్వాఖిలాత్మదయితేశ్వరమాశ్రితానాం
సర్వార్థదం స్వకృతవిద్విసృజేత కో ను
కో వా భజేత్కిమపి విస్మృతయేऽను భూత్యై
కిం వా భవేన్న తవ పాదరజోజుషాం నః

11-6-శ్లో.

నైవోపయన్త్యపచితిం కవయస్తవేశ
బ్రహ్మాయుషాపి కృతమృద్ధముదః స్మరన్తః
యోऽన్తర్బహిస్తనుభృతామశుభం విధున్వన్న్
ఆచార్యచైత్త్యవపుషా స్వగతిం వ్యనక్తి

11-7-శ్లో.

శ్రీశుక ఉవాచ
ఇత్యుద్ధవేనాత్యనురక్తచేతసా పృష్టో జగత్క్రీడనకః స్వశక్తిభిః
గృహీతమూర్తిత్రయ ఈశ్వరేశ్వరో జగాద సప్రేమమనోహరస్మితః

11-8-శ్లో.

శ్రీభగవానువాచ
హన్త తే కథయిష్యామి మమ ధర్మాన్సుమఙ్గలాన్
యాన్శ్రద్ధయాచరన్మర్త్యో మృత్యుం జయతి దుర్జయమ్

11-9-శ్లో.

కుర్యాత్సర్వాణి కర్మాణి మదర్థం శనకైః స్మరన్
మయ్యర్పితమనశ్చిత్తో మద్ధర్మాత్మమనోరతిః

11-10-శ్లో.

దేశాన్పుణ్యానాశ్రయేత మద్భక్తైః సాధుభిః శ్రితాన్
దేవాసురమనుష్యేషు మద్భక్తాచరితాని చ

11-11-శ్లో.

పృథక్సత్రేణ వా మహ్యం పర్వయాత్రామహోత్సవాన్
కారయేద్గీతనృత్యాద్యైర్మహారాజవిభూతిభిః

11-12-శ్లో.

మామేవ సర్వభూతేషు బహిరన్తరపావృతమ్
ఈక్షేతాత్మని చాత్మానం యథా ఖమమలాశయః

11-13-శ్లో.

ఇతి సర్వాణి భూతాని మద్భావేన మహాద్యుతే
సభాజయన్మన్యమానో జ్ఞానం కేవలమాశ్రితః

11-14-శ్లో.

బ్రాహ్మణే పుక్కసే స్తేనే బ్రహ్మణ్యేऽర్కే స్ఫులిఙ్గకే
అక్రూరే క్రూరకే చైవ సమదృక్పణ్డితో మతః

11-15-శ్లో.

నరేష్వభీక్ష్ణం మద్భావం పుంసో భావయతోऽచిరాత్
స్పర్ధాసూయాతిరస్కారాః సాహఙ్కారా వియన్తి హి

11-16-శ్లో.

విసృజ్య స్మయమానాన్స్వాన్దృశం వ్రీడాం చ దైహికీమ్
ప్రణమేద్దణ్డవద్భూమావాశ్వచాణ్డాలగోఖరమ్

11-17-శ్లో.

యావత్సర్వేషు భూతేషు మద్భావో నోపజాయతే
తావదేవముపాసీత వాఙ్మనఃకాయవృత్తిభిః

11-18-శ్లో.

సర్వం బ్రహ్మాత్మకం తస్య విద్యయాత్మమనీషయా
పరిపశ్యన్నుపరమేత్సర్వతో ముతసంశయః

11-19-శ్లో.

అయం హి సర్వకల్పానాం సధ్రీచీనో మతో మమ
మద్భావః సర్వభూతేషు మనోవాక్కాయవృత్తిభిః

11-20-శ్లో.

న హ్యఙ్గోపక్రమే ధ్వంసో మద్ధర్మస్యోద్ధవాణ్వపి
మయా వ్యవసితః సమ్యఙ్నిర్గుణత్వాదనాశిషః

11-21-శ్లో.

యో యో మయి పరే ధర్మః కల్ప్యతే నిష్ఫలాయ చేత్
తదాయాసో నిరర్థః స్యాద్భయాదేరివ సత్తమ

11-22-శ్లో.

ఏషా బుద్ధిమతాం బుద్ధిర్మనీషా చ మనీషిణామ్
యత్సత్యమనృతేనేహ మర్త్యేనాప్నోతి మామృతమ్

11-23-శ్లో.

ఏష తేऽభిహితః కృత్స్నో బ్రహ్మవాదస్య సఙ్గ్రహః
సమాసవ్యాసవిధినా దేవానామపి దుర్గమః

11-24-శ్లో.

అభీక్ష్ణశస్తే గదితం జ్ఞానం విస్పష్టయుక్తిమత్
ఏతద్విజ్ఞాయ ముచ్యేత పురుషో నష్టసంశయః

11-25-శ్లో.

సువివిక్తం తవ ప్రశ్నం మయైతదపి ధారయేత్
సనాతనం బ్రహ్మగుహ్యం పరం బ్రహ్మాధిగచ్ఛతి

11-26-శ్లో.

య ఏతన్మమ భక్తేషు సమ్ప్రదద్యాత్సుపుష్కలమ్
తస్యాహం బ్రహ్మదాయస్య దదామ్యాత్మానమాత్మనా

11-27-శ్లో.

య ఏతత్సమధీయీత పవిత్రం పరమం శుచి
స పూయేతాహరహర్మాం జ్ఞానదీపేన దర్శయన్

11-28-శ్లో.

య ఏతచ్ఛ్రద్ధయా నిత్యమవ్యగ్రః శృణుయాన్నరః
మయి భక్తిం పరాం కుర్వన్కర్మభిర్న స బధ్యతే

11-29-శ్లో.

అప్యుద్ధవ త్వయా బ్రహ్మ సఖే సమవధారితమ్
అపి తే విగతో మోహః శోకశ్చాసౌ మనోభవః

11-30-శ్లో.

నైతత్త్వయా దామ్భికాయ నాస్తికాయ శఠాయ చ
అశుశ్రూషోరభక్తాయ దుర్వినీతాయ దీయతామ్

11-31-శ్లో.

ఏతైర్దోషైర్విహీనాయ బ్రహ్మణ్యాయ ప్రియాయ చ
సాధవే శుచయే బ్రూయాద్భక్తిః స్యాచ్ఛూద్రయోషితామ్

11-32-శ్లో.

నైతద్విజ్ఞాయ జిజ్ఞాసోర్జ్ఞాతవ్యమవశిష్యతే
పీత్వా పీయూషమమృతం పాతవ్యం నావశిష్యతే

11-33-శ్లో.

జ్ఞానే కర్మణి యోగే చ వార్తాయాం దణ్డధారణే
యావానర్థో నృణాం తాత తావాంస్తేऽహం చతుర్విధః

11-34-శ్లో.

మర్త్యో యదా త్యక్తసమస్తకర్మా నివేదితాత్మా విచికీర్షితో మే
తదామృతత్వం ప్రతిపద్యమానో మయాత్మభూయాయ చ కల్పతే వై

11-35-శ్లో.

శ్రీశుక ఉవాచ
స ఏవమాదర్శితయోగమార్గస్తదోత్తమఃశ్లోకవచో నిశమ్య
బద్ధాఞ్జలిః ప్రీత్యుపరుద్ధకణ్ఠో న కిఞ్చిదూచేऽశ్రుపరిప్లుతాక్షః

11-36-శ్లో.

విష్టభ్య చిత్తం ప్రణయావఘూర్ణం ధైర్యేణ రాజన్బహుమన్యమానః
కృతాఞ్జలిః ప్రాహ యదుప్రవీరం శీర్ష్ణా స్పృశంస్తచ్చరణారవిన్దమ్

11-37-శ్లో.

శ్రీద్ధవ ఉవాచ
విద్రావితో మోహమహాన్ధకారో య ఆశ్రితో మే తవ సన్నిధానాత్
విభావసోః కిం ను సమీపగస్య శీతం తమో భీః ప్రభవన్త్యజాద్య

11-38-శ్లో.

ప్రత్యర్పితో మే భవతానుకమ్పినా భృత్యాయ విజ్ఞానమయః ప్రదీపః
హిత్వా కృతజ్ఞస్తవ పాదమూలం కోऽన్యం సమీయాచ్ఛరణం త్వదీయమ్

11-39-శ్లో.

వృక్ణశ్చ మే సుదృఢః స్నేహపాశో దాశార్హవృష్ణ్యన్ధకసాత్వతేషు
ప్రసారితః సృష్టివివృద్ధయే త్వయా స్వమాయయా హ్యాత్మసుబోధహేతినా

11-40-శ్లో.

నమోऽస్తు తే మహాయోగిన్ప్రపన్నమనుశాధి మామ్
యథా త్వచ్చరణామ్భోజే రతిః స్యాదనపాయినీ

11-41-శ్లో.

శ్రీభగవానువాచ
గచ్ఛోద్ధవ మయాదిష్టో బదర్యాఖ్యం మమాశ్రమమ్
తత్ర మత్పాదతీర్థోదే స్నానోపస్పర్శనైః శుచిః

11-42-శ్లో.

ఈక్షయాలకనన్దాయా విధూతాశేషకల్మషః
వసానో వల్కలాన్యఙ్గ వన్యభుక్సుఖనిఃస్పృహః

11-43-శ్లో.

తితిక్షుర్ద్వన్ద్వమాత్రాణాం సుశీలః సంయతేన్ద్రియః
శాన్తః సమాహితధియా జ్ఞానవిజ్ఞానసంయుతః

11-44-శ్లో.

మత్తోऽనుశిక్షితం యత్తే వివిక్తమనుభావయన్
మయ్యావేశితవాక్చిత్తో మద్ధర్మనిరతో భవ
అతివ్రజ్య గతీస్తిస్రో మామేష్యసి తతః పరమ్

11-45-శ్లో.

శ్రీశుక ఉవాచ
స ఏవముక్తో హరిమేధసోద్ధవః ప్రదక్షిణం తం పరిసృత్య పాదయోః
శిరో నిధాయాశ్రుకలాభిరార్ద్రధీర్న్యషిఞ్చదద్వన్ద్వపరోऽప్యపక్రమే

11-46-శ్లో.

సుదుస్త్యజస్నేహవియోగకాతరో న శక్నువంస్తం పరిహాతుమాతురః
కృచ్ఛ్రం యయౌ మూర్ధని భర్తృపాదుకే బిభ్రన్నమస్కృత్య యయౌ పునః పునః

11-47-శ్లో.

తతస్తమన్తర్హృది సన్నివేశ్య గతో మహాభాగవతో విశాలామ్
యథోపదిష్టాం జగదేకబన్ధునా తపః సమాస్థాయ హరేరగాద్గతిమ్

11-48-శ్లో.

య ఏతదానన్దసముద్రసమ్భృతం జ్ఞానామృతం భాగవతాయ భాషితమ్
కృష్ణేన యోగేశ్వరసేవితాఙ్ఘ్రిణా సచ్ఛ్రద్ధయాసేవ్య జగద్విముచ్యతే

11-49-శ్లో.

భవభయమపహన్తుం జ్ఞానవిజ్ఞానసారం
నిగమకృదుపజహ్రే భృఙ్గవద్వేదసారమ్
అమృతముదధితశ్చాపాయయద్భృత్యవర్గాన్
పురుషమృషభమాద్యం కృష్ణసంజ్ఞం నతోऽస్మి