పోతన తెలుగు భాగవతము

10-1-శ్లో.

శ్రీశుక ఉవాచ
సుఖం స్వపుర్యాం నివసన్ద్వారకాయాం శ్రియః పతిః
సర్వసమ్పత్సమృద్ధాయాం జుష్టాయాం వృష్ణిపుఙ్గవైః

10-2-శ్లో.

స్త్రీభిశ్చోత్తమవేషాభిర్నవయౌవనకాన్తిభిః
కన్దుకాదిభిర్హర్మ్యేషు క్రీడన్తీభిస్తడిద్ద్యుభిః

10-3-శ్లో.

నిత్యం సఙ్కులమార్గాయాం మదచ్యుద్భిర్మతఙ్గజైః

10-4-శ్లో.

స్వలఙ్కృతైర్భటైరశ్వై రథైశ్చ కనకోజ్జ్వలైః
ఉద్యానోపవనాఢ్యాయాం పుష్పితద్రుమరాజిషు

10-5-శ్లో.

నిర్విశద్భృఙ్గవిహగైర్నాదితాయాం సమన్తతః
రేమే షోడశసాహస్ర పత్నీనాం ఏకవల్లభః

10-6-శ్లో.

తావద్విచిత్రరూపోऽసౌ తద్గేహేషు మహర్ద్ధిషు
ప్రోత్ఫుల్లోత్పలకహ్లార కుముదామ్భోజరేణుభిః

10-7-శ్లో.

వాసితామలతోయేషు కూజద్ద్విజకులేషు చ
విజహార విగాహ్యామ్భో హ్రదినీషు మహోదయః
కుచకుఙ్కుమలిప్తాఙ్గః పరిరబ్ధశ్చ యోషితామ్

10-8-శ్లో.

ఉపగీయమానో గన్ధర్వైర్మృదఙ్గపణవానకాన్
వాదయద్భిర్ముదా వీణాం సూతమాగధవన్దిభిః

10-9-శ్లో.

సిచ్యమానోऽచ్యుతస్తాభిర్హసన్తీభిః స్మ రేచకైః
ప్రతిషిఞ్చన్విచిక్రీడే యక్షీభిర్యక్షరాడివ

10-10-శ్లో.

తాః క్లిన్నవస్త్రవివృతోరుకుచప్రదేశాః
సిఞ్చన్త్య ఉద్ధృతబృహత్కవరప్రసూనాః
కాన్తం స్మ రేచకజిహీర్షయయోపగుహ్య
జాతస్మరోత్స్మయలసద్వదనా విరేజుః

10-11-శ్లో.

కృష్ణస్తు తత్స్తనవిషజ్జితకుఙ్కుమస్రక్
క్రీడాభిషఙ్గధుతకున్తలవృన్దబన్ధః
సిఞ్చన్ముహుర్యువతిభిః ప్రతిషిచ్యమానో
రేమే కరేణుభిరివేభపతిః పరీతః

10-12-శ్లో.

నటానాం నర్తకీనాం చ గీతవాద్యోపజీవినామ్
క్రీడాలఙ్కారవాసాంసి కృష్ణోऽదాత్తస్య చ స్త్రియః

10-13-శ్లో.

కృష్ణస్యైవం విహరతో గత్యాలాపేక్షితస్మితైః
నర్మక్ష్వేలిపరిష్వఙ్గైః స్త్రీణాం కిల హృతా ధియః

10-14-శ్లో.

ఊచుర్ముకున్దైకధియో గిర ఉన్మత్తవజ్జడమ్
చిన్తయన్త్యోऽరవిన్దాక్షం తాని మే గదతః శృణు

10-15-శ్లో.

మహిష్య ఊచుః
కురరి విలపసి త్వం వీతనిద్రా న శేషే
స్వపితి జగతి రాత్ర్యామీశ్వరో గుప్తబోధః
వయమివ సఖి కచ్చిద్గాఢనిర్విద్ధచేతా
నలిననయనహాసోదారలీలేక్షితేన

10-16-శ్లో.

నేత్రే నిమీలయసి నక్తమదృష్టబన్ధుస్
త్వం రోరవీషి కరుణం బత చక్రవాకి
దాస్యం గత వయమివాచ్యుతపాదజుష్టాం
కిం వా స్రజం స్పృహయసే కవరేణ వోఢుమ్

10-17-శ్లో.

భో భోః సదా నిష్టనసే ఉదన్వన్నలబ్ధనిద్రోऽధిగతప్రజాగరః
కిమ్వా ముకున్దాపహృతాత్మలాఞ్ఛనః ప్రాప్తాం దశాం త్వం చ గతో దురత్యయామ్

10-18-శ్లో.

త్వం యక్ష్మణా బలవతాసి గృహీత ఇన్దో
క్షీణస్తమో న నిజదీధితిభిః క్షిణోషి
కచ్చిన్ముకున్దగదితాని యథా వయం త్వం
విస్మృత్య భోః స్థగితగీరుపలక్ష్యసే నః

10-19-శ్లో.

కిం న్వాచరితమస్మాభిర్మలయానిల తేऽప్రియమ్
గోవిన్దాపాఙ్గనిర్భిన్నే హృదీరయసి నః స్మరమ్

10-20-శ్లో.

మేఘ శ్రీమంస్త్వమసి దయితో యాదవేన్ద్రస్య నూనం
శ్రీవత్సాఙ్కం వయమివ భవాన్ధ్యాయతి ప్రేమబద్ధః
అత్యుత్కణ్ఠః శవలహృదయోऽస్మద్విధో బాష్పధారాః
స్మృత్వా స్మృత్వా విసృజసి ముహుర్దుఃఖదస్తత్ప్రసఙ్గః

10-21-శ్లో.

ప్రియరావపదాని భాషసే మృతసఞ్జీవికయానయా గిరా
కరవాణి కిమద్య తే ప్రియం వద మే వల్గితకణ్ఠ కోకిల

10-22-శ్లో.

న చలసి న వదస్యుదారబుద్ధే క్షితిధర చిన్తయసే మహాన్తమర్థమ్
అపి బత వసుదేవనన్దనాఙ్ఘ్రిం వయమివ కామయసే స్తనైర్విధర్తుమ్

10-23-శ్లో.

శుష్యద్ధ్రదాః కరశితా బత సిన్ధుపత్న్యః
సమ్ప్రత్యపాస్తకమలశ్రియ ఇష్టభర్తుః
యద్వద్వయం మధుపతేః ప్రణయావలోకమ్
అప్రాప్య ముష్టహృదయాః పురుకర్శితాః స్మ

10-24-శ్లో.

హంస స్వాగతమాస్యతాం పిబ పయో బ్రూహ్యఙ్గ శౌరేః కథాం
దూతం త్వాం ను విదామ కచ్చిదజితః స్వస్త్యాస్త ఉక్తం పురా
కిం వా నశ్చలసౌహృదః స్మరతి తం కస్మాద్భజామో వయం
క్షౌద్రాలాపయ కామదం శ్రియమృతే సైవైకనిష్ఠా స్త్రియామ్

10-25-శ్లో.

శ్రీశుక ఉవాచ
ఇతీదృశేన భావేన కృష్ణే యోగేశ్వరేశ్వరే
క్రియమాణేన మాధవ్యో లేభిరే పరమాం గతిమ్

10-26-శ్లో.

శ్రుతమాత్రోऽపి యః స్త్రీణాం ప్రసహ్యాకర్షతే మనః
ఉరుగాయోరుగీతో వా పశ్యన్తీనాం చ కిం పునః

10-27-శ్లో.

యాః సమ్పర్యచరన్ప్రేమ్ణా పాదసంవాహనాదిభిః
జగద్గురుం భర్తృబుద్ధ్యా తాసాం కిమ్వర్ణ్యతే తపః

10-28-శ్లో.

ఏవం వేదోదితం ధర్మమనుతిష్ఠన్సతాం గతిః
గృహం ధర్మార్థకామానాం ముహుశ్చాదర్శయత్పదమ్

10-29-శ్లో.

ఆస్థితస్య పరం ధర్మం కృష్ణస్య గృహమేధినామ్
ఆసన్షోడశసాహస్రం మహిష్యశ్చ శతాధికమ్

10-30-శ్లో.

తాసాం స్త్రీరత్నభూతానామష్టౌ యాః ప్రాగుదాహృతాః
రుక్మిణీప్రముఖా రాజంస్తత్పుత్రాశ్చానుపూర్వశః

10-31-శ్లో.

ఏకైకస్యాం దశ దశ కృష్ణోऽజీజనదాత్మజాన్
యావత్య ఆత్మనో భార్యా అమోఘగతిరీశ్వరః

10-32-శ్లో.

తేషాముద్దామవీర్యాణామష్టాదశ మహారథాః
ఆసన్నుదారయశసస్తేషాం నామాని మే శృణు

10-33-శ్లో.

ప్రద్యుమ్నశ్చానిరుద్ధశ్చ దీప్తిమాన్భానురేవ చ
సామ్బో మధుర్బృహద్భానుశ్చిత్రభానుర్వృకోऽరుణః

10-34-శ్లో.

పుష్కరో వేదబాహుశ్చ శ్రుతదేవః సునన్దనః
చిత్రబాహుర్విరూపశ్చ కవిర్న్యగ్రోధ ఏవ చ

10-35-శ్లో.

ఏతేషామపి రాజేన్ద్ర తనుజానాం మధుద్విషః
ప్రద్యుమ్న ఆసీత్ప్రథమః పితృవద్రుక్మిణీసుతః

10-36-శ్లో.

స రుక్మిణో దుహితరముపయేమే మహారథః
తస్యాం తతోऽనిరుద్ధోऽభూత్నాగాయతబలాన్వితః

10-37-శ్లో.

స చాపి రుక్మిణః పౌత్రీం దౌహిత్రో జగృహే తతః
వజ్రస్తస్యాభవద్యస్తు మౌషలాదవశేషితః

10-38-శ్లో.

ప్రతిబాహురభూత్తస్మాత్సుబాహుస్తస్య చాత్మజః
సుబాహోః శాన్తసేనోऽభూచ్ఛతసేనస్తు తత్సుతః

10-39-శ్లో.

న హ్యేతస్మిన్కులే జాతా అధనా అబహుప్రజాః
అల్పాయుషోऽల్పవీర్యాశ్చ అబ్రహ్మణ్యాశ్చ జజ్ఞిరే

10-40-శ్లో.

యదువంశప్రసూతానాం పుంసాం విఖ్యాతకర్మణామ్
సఙ్ఖ్యా న శక్యతే కర్తుమపి వర్షాయుతైర్నృప

10-41-శ్లో.

తిస్రః కోట్యః సహస్రాణామష్టాశీతిశతాని చ
ఆసన్యదుకులాచార్యాః కుమారాణామితి శ్రుతమ్

10-42-శ్లో.

సఙ్ఖ్యానం యాదవానాం కః కరిష్యతి మహాత్మనామ్
యత్రాయుతానామయుత లక్షేణాస్తే స ఆహుకః

10-43-శ్లో.

దేవాసురాహవహతా దైతేయా యే సుదారుణాః
తే చోత్పన్నా మనుష్యేషు ప్రజా దృప్తా బబాధిరే

10-44-శ్లో.

తన్నిగ్రహాయ హరిణా ప్రోక్తా దేవా యదోః కులే
అవతీర్ణాః కులశతం తేషామేకాధికం నృప

10-45-శ్లో.

తేషాం ప్రమాణం భగవాన్ప్రభుత్వేనాభవద్ధరిః
యే చానువర్తినస్తస్య వవృధుః సర్వయాదవాః

10-46-శ్లో.

శయ్యాసనాటనాలాప క్రీడాస్నానాదికర్మసు
న విదుః సన్తమాత్మానం వృష్ణయః కృష్ణచేతసః

10-47-శ్లో.

తీర్థం చక్రే నృపోనం యదజని యదుషు స్వఃసరిత్పాదశౌచం
విద్విట్స్నిగ్ధాః స్వరూపం యయురజితపర శ్రీర్యదర్థేऽన్యయత్నః
యన్నామామఙ్గలఘ్నం శ్రుతమథ గదితం యత్కృతో గోత్రధర్మః
కృష్ణస్యైతన్న చిత్రం క్షితిభరహరణం కాలచక్రాయుధస్య

10-48-శ్లో.

జయతి జననివాసో దేవకీజన్మవాదో
యదువరపరిషత్స్వైర్దోర్భిరస్యన్నధర్మమ్
స్థిరచరవృజినఘ్నః సుస్మితశ్రీముఖేన
వ్రజపురవనితానాం వర్ధయన్కామదేవమ్

10-49-శ్లో.

ఇత్థం పరస్య నిజవర్త్మరిరక్షయాత్త
లీలాతనోస్తదనురూపవిడమ్బనాని
కర్మాణి కర్మకషణాని యదూత్తమస్య
శ్రూయాదముష్య పదయోరనువృత్తిమిచ్ఛన్

10-50-శ్లో.

మర్త్యస్తయానుసవమేధితయా ముకున్ద
శ్రీమత్కథాశ్రవణకీర్తనచిన్తయైతి
తద్ధామ దుస్తరకృతాన్తజవాపవర్గం
గ్రామాద్వనం క్షితిభుజోऽపి యయుర్యదర్థాః

10-51-శ్లో.

ॐ ॐ ॐ