పోతన తెలుగు భాగవతము

నవమ స్కంధః : ఏకోనవింశోఽధ్యాయః - 19

• Print
• Email
• Share on FaceBook
• Share on Twitter

9-19-2
శృణు భార్గవ్యమూం గాథాం మద్విధాచరితాం భువి .
ధీరా యస్యానుశోచంతి వనే గ్రామనివాసినః

9-19-3
బస్త ఏకో వనే కశ్చిద్విచిన్వన్ ప్రియమాత్మనః .
దదర్శ కూపే పతితాం స్వకర్మవశగామజాం

9-19-4
తస్యా ఉద్ధరణోపాయం బస్తః కామీ విచింతయన్ .
వ్యధత్త తీర్థముద్ధృత్య విషాణాగ్రేణ రోధసీ

9-19-5
సోత్తీర్య కూపాత్సుశ్రోణీ తమేవ చకమే కిల .
తయా వృతం సముద్వీక్ష్య బహ్వ్యోఽజాః కాంతకామినీః

9-19-6
పీవానం శ్మశ్రులం ప్రేష్ఠం మీఢ్వాంసం యాభకోవిదం .
స ఏకోఽజవృషస్తాసాం బహ్వీనాం రతివర్ధనః .
రేమే కామగ్రహగ్రస్త ఆత్మానం నావబుధ్యత

9-19-7
తమేవ ప్రేష్ఠతమయా రమమాణమజాన్యయా .
విలోక్య కూపసంవిగ్నా నామృష్యద్బస్తకర్మ తత్

9-19-8
తం దుర్హృదం సుహృద్రూపం కామినం క్షణసౌహృదం .
ఇంద్రియారామముత్సృజ్య స్వామినం దుఃఖితా యయౌ

9-19-9
సోఽపి చానుగతః స్త్రైణః కృపణస్తాం ప్రసాదితుం .
కుర్వన్నిడవిడాకారం నాశక్నోత్పథి సంధితుం

9-19-10
తస్యాస్తత్ర ద్విజః కశ్చిదజాస్వామ్యచ్ఛినద్రుషా .
లంబంతం వృషణం భూయః సందధేఽర్థాయ యోగవిత్

9-19-11
సంబద్ధవృషణః సోఽపి హ్యజయా కూపలబ్ధయా .
కాలం బహుతిథం భద్రే కామైర్నాద్యాపి తుష్యతి

9-19-12
తథాహం కృపణః సుభ్రు భవత్యాః ప్రేమయంత్రితః .
ఆత్మానం నాభిజానామి మోహితస్తవ మాయయా

9-19-13
యత్పృథివ్యాం వ్రీహియవం హిరణ్యం పశవః స్త్రియః .
న దుహ్యంతి మనఃప్రీతిం పుంసః కామహతస్య తే

9-19-14
న జాతు కామః కామానాముపభోగేన శామ్యతి .
హవిషా కృష్ణవర్త్మేవ భూయ ఏవాభివర్ధతే

9-19-15
యదా న కురుతే భావం సర్వభూతేష్వమంగలం .
సమదృష్టేస్తదా పుంసః సర్వాః సుఖమయా దిశః

9-19-16
యా దుస్త్యజా దుర్మతిభిర్జీర్యతో యా న జీర్యతే .
తాం తృష్ణాం దుఃఖనివహాం శర్మకామో ద్రుతం త్యజేత్

9-19-17
మాత్రా స్వస్రా దుహిత్రా వా నావివిక్తాసనో భవేత్ .
బలవానింద్రియగ్రామో విద్వాంసమపి కర్షతి

9-19-18
పూర్ణం వర్షసహస్రం మే విషయాన్ సేవతోఽసకృత్ .
తథాపి చానుసవనం తృష్ణా తేషూపజాయతే

9-19-19
తస్మాదేతామహం త్యక్త్వా బ్రహ్మణ్యాధాయ మానసం .
నిర్ద్వంద్వో నిరహంకారశ్చరిష్యామి మృగైః సహ

9-19-20
దృష్టం శ్రుతమసద్బుద్ధ్వా నానుధ్యాయేన్న సంవిశేత్ .
సంసృతిం చాత్మనాశం చ తత్ర విద్వాన్ స ఆత్మదృక్

9-19-21
ఇత్యుక్త్వా నాహుషో జాయాం తదీయం పూరవే వయః .
దత్త్వా స్వాం జరసం తస్మాదాదదే విగతస్పృహః

9-19-22
దిశి దక్షిణపూర్వస్యాం ద్రుహ్యుం దక్షిణతో యదుం .
ప్రతీచ్యాం తుర్వసుం చక్ర ఉదీచ్యామనుమీశ్వరం

9-19-23
భూమండలస్య సర్వస్య పూరుమర్హత్తమం విశాం .
అభిషిచ్యాగ్రజాంస్తస్య వశే స్థాప్య వనం యయౌ

9-19-24
ఆసేవితం వర్షపూగాన్ షడ్వర్గం విషయేషు సః .
క్షణేన ముముచే నీడం జాతపక్ష ఇవ ద్విజః

9-19-25
స తత్ర నిర్ముక్తసమస్తసంగ
ఆత్మానుభూత్యా విధుతత్రిలింగః .
పరేఽమలే బ్రహ్మణి వాసుదేవే
లేభే గతిం భాగవతీం ప్రతీతః

9-19-26
శ్రుత్వా గాథాం దేవయానీ మేనే ప్రస్తోభమాత్మనః .
స్త్రీపుంసోః స్నేహవైక్లవ్యాత్పరిహాసమివేరితం

9-19-27
సా సన్నివాసం సుహృదాం ప్రపాయామివ గచ్ఛతాం .
విజ్ఞాయేశ్వరతంత్రాణాం మాయావిరచితం ప్రభోః

9-19-28
సర్వత్ర సంగముత్సృజ్య స్వప్నౌపమ్యేన భార్గవీ .
కృష్ణే మనః సమావేశ్య వ్యధునోల్లింగమాత్మనః

9-19-29
నమస్తుభ్యం భగవతే వాసుదేవాయ వేధసే .
సర్వభూతాధివాసాయ శాంతాయ బృహతే నమః

9-19-30
ఇతి శ్రీమద్భాగవతే మహాపురాణే పారమహంస్యాం సంహితాయాం
నవమస్కంధే ఏకోనవింశోఽధ్యాయః