అష్టమస్కంధః : వింశోఽధ్యాయః - 20
8-20-1
శ్రీశుక ఉవాచ
బలిరేవం గృహపతిః కులాచార్యేణ భాషితః .
తూష్ణీం భూత్వా క్షణం రాజన్నువాచావహితో గురుం
8-20-2
బలిరువాచ
సత్యం భగవతా ప్రోక్తం ధర్మోఽయం గృహమేధినాం .
అర్థం కామం యశో వృత్తిం యో న బాధేత కర్హిచిత్
8-20-3
స చాహం విత్తలోభేన ప్రత్యాచక్షే కథం ద్విజం .
ప్రతిశ్రుత్య దదామీతి ప్రాహ్లాదిః కితవో యథా
8-20-4
న హ్యసత్యాత్పరోఽధర్మ ఇతి హోవాచ భూరియం .
సర్వం సోఢుమలం మన్యే ఋతేఽలీకపరం నరం
8-20-5
నాహం బిభేమి నిరయాన్నాధన్యాదసుఖార్ణవాత్ .
న స్థానచ్యవనాన్మృత్యోర్యథా విప్రప్రలంభనాత్
8-20-6
యద్యద్ధాస్యతి లోకేఽస్మిన్ సంపరేతం ధనాదికం .
తస్య త్యాగే నిమిత్తం కిం విప్రస్తుష్యేన్న తేన చేత్
8-20-7
శ్రేయః కుర్వంతి భూతానాం సాధవో దుస్త్యజాసుభిః .
దధ్యఙ్ శిబిప్రభృతయః కో వికల్పో ధరాదిషు
8-20-8
యైరియం బుభుజే బ్రహ్మన్ దైత్యేంద్రైరనివర్తిభిః .
తేషాం కాలోఽగ్రసీల్లోకాన్ న యశోఽధిగతం భువి
8-20-9
సులభా యుధి విప్రర్షే హ్యనివృత్తాస్తనుత్యజః .
న తథా తీర్థ ఆయాతే శ్రద్ధయా యే ధనత్యజః
8-20-10
మనస్వినః కారుణికస్య శోభనం
యదర్థికామోపనయేన దుర్గతిః .
కుతః పునర్బ్రహ్మవిదాం భవాదృశాం
తతో వటోరస్య దదామి వాంఛితం
8-20-11
యజంతి యజ్ఞక్రతుభిర్యమాదృతా
భవంత ఆమ్నాయవిధానకోవిదాః .
స ఏవ విష్ణుర్వరదోఽస్తు వా పరో
దాస్యామ్యముష్మై క్షితిమీప్సితాం మునే
8-20-12
యద్యప్యసావధర్మేణ మాం బధ్నీయాదనాగసం .
తథాప్యేనం న హింసిష్యే భీతం బ్రహ్మతనుం రిపుం
8-20-13
ఏష వా ఉత్తమశ్లోకో న జిహాసతి యద్యశః .
హత్వా మైనాం హరేద్యుద్ధే శయీత నిహతో మయా
8-20-14
శ్రీశుక ఉవాచ
ఏవమశ్రద్ధితం శిష్యమనాదేశకరం గురుః .
శశాప దైవప్రహితః సత్యసంధం మనస్వినం
8-20-15
దృఢం పండితమాన్యజ్ఞః స్తబ్ధోఽస్యస్మదుపేక్షయా .
మచ్ఛాసనాతిగో యస్త్వమచిరాద్భ్రశ్యసే శ్రియః
8-20-16
ఏవం శప్తః స్వగురుణా సత్యాన్న చలితో మహాన్ .
వామనాయ దదావేనామర్చిత్వోదకపూర్వకం
8-20-17
వింధ్యావలిస్తదాఽఽగత్య పత్నీ జాలకమాలినీ .
ఆనిన్యే కలశం హైమమవనేజన్యపాం భృతం
8-20-18
యజమానః స్వయం తస్య శ్రీమత్పాదయుగం ముదా .
అవనిజ్యావహన్మూర్ధ్ని తదపో విశ్వపావనీః
8-20-19
తదాసురేంద్రం దివి దేవతాగణాః
గంధర్వవిద్యాధరసిద్ధచారణాః .
తత్కర్మ సర్వేఽపి గృణంత ఆర్జవం
ప్రసూనవర్షైర్వవృషుర్ముదాన్వితాః
8-20-20
నేదుర్ముహుర్దుందుభయః సహస్రశో
గంధర్వకింపూరుషకిన్నరా జగుః .
మనస్వినానేన కృతం సుదుష్కరం
విద్వానదాద్యద్రిపవే జగత్త్రయం
8-20-21
తద్వామనం రూపమవర్ధతాద్భుతం
హరేరనంతస్య గుణత్రయాత్మకం .
భూః ఖం దిశో ద్యౌర్వివరాః పయోధయ-
స్తిర్యఙ్ నృదేవా ఋషయో యదాసత
8-20-22
కాయే బలిస్తస్య మహావిభూతేః
సహర్త్విగాచార్యసదస్య ఏతత్ .
దదర్శ విశ్వం త్రిగుణం గుణాత్మకే
భూతేంద్రియార్థాశయజీవయుక్తం
8-20-23
రసామచష్టాంఘ్రితలేఽథ పాదయోర్మహీం
మహీధ్రాన్ పురుషస్య జంఘయోః .
పతత్త్రిణో జానుని విశ్వమూర్తే-
రూర్వోర్గణం మారుతమింద్రసేనః
8-20-24
సంధ్యాం విభోర్వాససి గుహ్య ఐక్ష-
త్ప్రజాపతీన్ జఘనే ఆత్మముఖ్యాన్ .
నాభ్యాం నభః కుక్షిషు సప్తసింధూ-
నురుక్రమస్యోరసి చర్క్షమాలాం
8-20-25
హృద్యంగ ధర్మం స్తనయోర్మురారేః
ఋతం చ సత్యం చ మనస్యథేందుం .
శ్రియం చ వక్షస్యరవిందహస్తాం
కంఠే చ సామాని సమస్తరేఫాన్
8-20-26
ఇంద్రప్రధానానమరాన్ భుజేషు
తత్కర్ణయోః కకుభో ద్యౌశ్చ మూర్ధ్ని .
కేశేషు మేఘాన్ శ్వసనం నాసికాయా-
మక్ష్ణోశ్చ సూర్యం వదనే చ వహ్నిం
8-20-27
వాణ్యాం చ ఛందాంసి రసే జలేశం
భ్రువోర్నిషేధం చ విధిం చ పక్ష్మసు .
అహశ్చ రాత్రిం చ పరస్య పుంసో
మన్యుం లలాటేఽధర ఏవ లోభం
8-20-28
స్పర్శే చ కామం నృప రేతసోఽమ్భః
పృష్ఠే త్వధర్మం క్రమణేషు యజ్ఞం .
ఛాయాసు మృత్యుం హసితే చ మాయాం
తనూరుహేష్వోషధిజాతయశ్చ
8-20-29
నదీశ్చ నాడీషు శిలా నఖేషు
బుద్ధావజం దేవగణాన్ ఋషీంశ్చ .
ప్రాణేషు గాత్రే స్థిరజంగమాని
సర్వాణి భూతాని దదర్శ వీరః
8-20-30
సర్వాత్మనీదం భువనం నిరీక్ష్య
సర్వేఽసురాః కశ్మలమాపురంగ .
సుదర్శనం చక్రమసహ్యతేజో
ధనుశ్చ శార్ఙ్గం స్తనయిత్నుఘోషం
8-20-31
పర్జన్యఘోషో జలజః పాంచజన్యః
కౌమోదకీ విష్ణుగదా తరస్వినీ .
విద్యాధరోఽసిః శతచంద్రయుక్త-
స్తూణోత్తమావక్షయసాయకౌ చ
8-20-32
సునందముఖ్యా ఉపతస్థురీశం
పార్షదముఖ్యాః సహలోకపాలాః .
స్ఫురత్కిరీటాంగదమీనకుండల-
శ్రీవత్సరత్నోత్తమమేఖలాంబరైః
8-20-33
మధువ్రతస్రగ్వనమాలయా వృతో
రరాజ రాజన్ భగవానురుక్రమః .
క్షితిం పదైకేన బలేర్విచక్రమే
నభః శరీరేణ దిశశ్చ బాహుభిః
8-20-34
పదం ద్వితీయం క్రమతస్త్రివిష్టపం
న వై తృతీయాయ తదీయమణ్వపి .
ఉరుక్రమస్యాంఘ్రిరుపర్యుపర్యథో
మహర్జనాభ్యాం తపసః పరం గతః
8-20-35
ఇతి శ్రీమద్భాగవతే మహాపురాణే పారమహంస్యాం సమ్హితాయా-
మష్టమస్కంధే విశ్వరూపదర్శనం నామ వింశోఽధ్యాయః