ద్విపదభాగవతం - మధురకాండ : శ్రీకృష్ణుఁ డు కంసుని ధనుస్సును విఱచుట
మురికొని చూడఁగ మొగశాల కడకు
నరుదెంచుచో మందిరాంతంబునందుఁ
బొలుచు మహాభోగిభోగమో1-9 యనఁగ
జలన మొందని యట్టి శైలమో యనఁగఁ
బ్రకటారిజలరాశి పటు సేతువనఁగఁ
గకుటివారణ కరకాండమో యనఁగఁ
నారూఢ గంధపుష్పార్చితం బగుచు
మేరుశైలాకృతి మెఱయు కార్ముకముఁ
గని, దాని చాపకర్కశలు వారింప
దనుజారి యమ్మహాధను వెక్కఁ ద్రోచి
వడి గుణధ్వని సేసి వారక తివిసి
పిడికిలి వదలిన ఫెళఫెళ ధ్వనులు - 80
దిక్కులు వ్రయ్యంగ దిగిభంబులగలఁ
జుక్కలు డుల్లఁగ సురలోక మదర
ధారుణి వణఁక పాతాళంబు వగుల
వారాసి పిండలివండుగాఁ గలఁగ
పిడుగులు పదివేలు పెట్టి యొక్కెడను
పడియనో యన విల్లు బ్రల్లన విఱిఁగె
అట మహాధ్వని విని యా పౌరు లెల్లఁ
బటుగతిఁ దొలఁగ భూపతి బెట్టుకలఁగి
1-9) భోగి = పాము, భోగము = శరీరము