ద్వితీయ స్కంధః : తృతీయోఽధ్యాయః - 3
2-3-1
శ్రీశుక ఉవాచ
ఏవమేతన్నిగదితం పృష్టవాన్ యద్భవాన్ మమ .
నృణాం యన్మ్రియమాణానాం మనుష్యేషు మనీషిణాం
2-3-2
బ్రహ్మవర్చసకామస్తు యజేత బ్రహ్మణః పతిం .
ఇంద్రమింద్రియకామస్తు ప్రజాకామః ప్రజాపతీన్
2-3-3
దేవీం మాయాం తు శ్రీకామస్తేజస్కామో విభావసుం .
వసుకామో వసూన్ రుద్రాన్ వీర్యకామోఽథ వీర్యవాన్
2-3-4
అన్నాద్యకామస్త్వదితిం స్వర్గకామోఽదితేః సుతాన్ .
విశ్వాన్ దేవాన్ రాజ్యకామః సాధ్యాన్ సంసాధకో విశాం
2-3-5
ఆయుష్కామోఽశ్వినౌ దేవౌ పుష్టికామ ఇలాం యజేత్ .
ప్రతిష్ఠాకామః పురుషో రోదసీ లోకమాతరౌ
2-3-6
రూపాభికామో గంధర్వాన్ స్త్రీకామోఽప్సర ఉర్వశీం .
ఆధిపత్యకామః సర్వేషాం యజేత పరమేష్ఠినం
2-3-7
యజ్ఞం యజేద్యశస్కామః కోశకామః ప్రచేతసం .
విద్యాకామస్తు గిరిశం దాంపత్యార్థ ఉమాం సతీం
2-3-8
ధర్మార్థ ఉత్తమశ్లోకం తంతుం తన్వన్ పితౄన్ యజేత్ .
రక్షాకామః పుణ్యజనానోజస్కామో మరుద్గణాన్
2-3-9
రాజ్యకామో మనూన్ దేవాన్ నిరృతిం త్వభిచరన్ యజేత్ .
కామకామో యజేత్సోమమకామః పురుషం పరం
2-3-10
అకామః సర్వకామో వా మోక్షకామ ఉదారధీః .
తీవ్రేణ భక్తియోగేన యజేత పురుషం పరం
2-3-11
ఏతావానేవ యజతామిహ నిఃశ్రేయసోదయః .
భగవత్యచలో భావో యద్భాగవతసంగతః
2-3-12
జ్ఞానం యదా ప్రతినివృత్తగుణోర్మిచక్ర-
మాత్మప్రసాద ఉత యత్ర గుణేష్వసంగః .
కైవల్యసమ్మతపథస్త్వథ భక్తియోగః
కో నిర్వృతో హరికథాసు రతిం న కుర్యాత్
2-3-13
శౌనక ఉవాచ
ఇత్యభివ్యాహృతం రాజా నిశమ్య భరతర్షభః .
కిమన్యత్పృష్టవాన్ భూయో వైయాసకిమృషిం కవిం
2-3-14
ఏతచ్ఛుశ్రూషతాం విద్వన్ సూత నోఽర్హసి భాషితుం .
కథా హరికథోదర్కాః సతాం స్యుః సదసి ధ్రువం
2-3-15
స వై భాగవతో రాజా పాండవేయో మహారథః .
బాలక్రీడనకైః క్రీడన్ కృష్ణక్రీడాం య ఆదదే
2-3-16
వైయాసకిశ్చ భగవాన్ వాసుదేవపరాయణః .
ఉరుగాయగుణోదారాః సతాం స్యుర్హి సమాగమే
2-3-17
ఆయుర్హరతి వై పుంసాముద్యన్నస్తం చ యన్నసౌ .
తస్యర్తే యత్క్షణో నీత ఉత్తమశ్లోకవార్తయా
2-3-18
తరవః కిం న జీవంతి భస్త్రాః కిం న శ్వసంత్యుత .
న ఖాదంతి న మేహంతి కిం గ్రామపశవోఽపరే
2-3-19
శ్వవిడ్వరాహోష్ట్రఖరైః సంస్తుతః పురుషః పశుః .
న యత్కర్ణపథోపేతో జాతు నామ గదాగ్రజః
2-3-20
బిలే బతోరుక్రమవిక్రమాన్ యే
న శృణ్వతః కర్ణపుటే నరస్య .
జిహ్వాసతీ దార్దురికేవ సూత
న చోపగాయత్యురుగాయగాథాః
2-3-21
భారః పరం పట్టకిరీటజుష్ట-
మప్యుత్తమాంగం న నమేన్ముకుందం .
శావౌ కరౌ నో కురుతః సపర్యాం
హరేర్లసత్కాంచనకంకణౌ వా
2-3-22
బర్హాయితే తే నయనే నరాణాం
లింగాని విష్ణోర్న నిరీక్షతో యే .
పాదౌ నృణాం తౌ ద్రుమజన్మభాజౌ
క్షేత్రాణి నానువ్రజతో హరేర్యౌ
2-3-23
జీవంఛవో భాగవతాంఘ్రిరేణుం
న జాతు మర్త్యోఽభిలభేత యస్తు .
శ్రీవిష్ణుపద్యా మనుజస్తులస్యాః
శ్వసంఛవో యస్తు న వేద గంధం
2-3-24
తదశ్మసారం హృదయం బతేదం
యద్గృహ్యమాణైర్హరినామధేయైః .
న విక్రియేతాథ యదా వికారో
నేత్రే జలం గాత్రరుహేషు హర్షః
2-3-25
అథాభిధేహ్యంగ మనోఽనుకూలం
ప్రభాషసే భాగవతప్రధానః .
యదాహ వైయాసకిరాత్మవిద్యావిశారదో
నృపతిం సాధు పృష్టః
2-3-26
ఇతి శ్రీమద్భాగవతే మహాపురాణే పారమహంస్యాం సంహితాయాం
ద్వితీయస్కంధే తృతీయోఽధ్యాయః