పోతన తెలుగు భాగవతము

ద్వితీయ స్కంధః : చతుర్థోఽధ్యాయః - 4

• Print
• Email
• Share on FaceBook
• Share on Twitter

2-4-2
ఆత్మజాయాసుతాగారపశుద్రవిణబంధుషు .
రాజ్యే చావికలే నిత్యం విరూఢాం మమతాం జహౌ

2-4-3
పప్రచ్ఛ చేమమేవార్థం యన్మాం పృచ్ఛథ సత్తమాః .
కృష్ణానుభావశ్రవణే శ్రద్దధానో మహామనాః

2-4-4
సంస్థాం విజ్ఞాయ సన్న్యస్య కర్మ త్రైవర్గికం చ యత్ .
వాసుదేవే భగవతి ఆత్మభావం దృఢం గతః

2-4-5
రాజోవాచ
సమీచీనం వచో బ్రహ్మన్ సర్వజ్ఞస్య తవానఘ .
తమో విశీర్యతే మహ్యం హరేః కథయతః కథాం

2-4-6
భూయ ఏవ వివిత్సామి భగవానాత్మమాయయా .
యథేదం సృజతే విశ్వం దుర్విభావ్యమధీశ్వరైః

2-4-7
యథా గోపాయతి విభుర్యథా సంయచ్ఛతే పునః .
యాం యాం శక్తిముపాశ్రిత్య పురుశక్తిః పరః పుమాన్ .
ఆత్మానం క్రీడయన్ క్రీడన్ కరోతి వికరోతి చ

2-4-8
నూనం భగవతో బ్రహ్మన్ హరేరద్భుతకర్మణః .
దుర్విభావ్యమివాభాతి కవిభిశ్చాపి చేష్టితం

2-4-9
యథా గుణాంస్తు ప్రకృతేర్యుగపత్క్రమశోఽపి వా .
బిభర్తి భూరిశస్త్వేకః కుర్వన్ కర్మాణి జన్మభిః

2-4-10
విచికిత్సితమేతన్మే బ్రవీతు భగవాన్ యథా .
శాబ్దే బ్రహ్మణి నిష్ణాతః పరస్మింశ్చ భవాన్ ఖలు

2-4-11
సూత ఉవాచ
ఇత్యుపామంత్రితో రాజ్ఞా గుణానుకథనే హరేః .
హృషీకేశమనుస్మృత్య ప్రతివక్తుం ప్రచక్రమే

2-4-12
శ్రీశుక ఉవాచ
నమః పరస్మై పురుషాయ భూయసే
సదుద్భవస్థాననిరోధలీలయా .
గృహీతశక్తిత్రితయాయ దేహినా-
మంతర్భవాయానుపలక్ష్యవర్త్మనే

2-4-13
భూయో నమః సద్వృజినచ్ఛిదేఽసతా-
మసంభవాయాఖిలసత్త్వమూర్తయే .
పుంసాం పునః పారమహంస్య ఆశ్రమే
వ్యవస్థితానామనుమృగ్యదాశుషే

2-4-14
నమో నమస్తేఽస్త్వృషభాయ సాత్వతాం
విదూరకాష్ఠాయ ముహుః కుయోగినాం .
నిరస్తసామ్యాతిశయేన రాధసా
స్వధామని బ్రహ్మణి రంస్యతే నమః

2-4-15
యత్కీర్తనం యత్స్మరణం యదీక్షణం
యద్వందనం యచ్ఛ్రవణం యదర్హణం .
లోకస్య సద్యో విధునోతి కల్మషం
తస్మై సుభద్రశ్రవసే నమో నమః

2-4-16
విచక్షణా యచ్చరణోపసాదనాత్సంగం
వ్యుదస్యోభయతోఽన్తరాత్మనః .
విందంతి హి బ్రహ్మగతిం గతక్లమాస్తస్మై
సుభద్రశ్రవసే నమో నమః

2-4-17
తపస్వినో దానపరా యశస్వినో
మనస్వినో మంత్రవిదః సుమంగలాః .
క్షేమం న విందంతి వినా యదర్పణం
తస్మై సుభద్రశ్రవసే నమో నమః

2-4-18
కిరాతహూణాంధ్రపులిందపుల్కసా
ఆభీరకంకా యవనాః ఖసాదయః .
యేఽన్యే చ పాపా యదపాశ్రయాశ్రయాః
శుధ్యంతి తస్మై ప్రభవిష్ణవే నమః

2-4-19
స ఏష ఆత్మాఽఽత్మవతామధీశ్వర-
స్త్రయీమయో ధర్మమయస్తపోమయః .
గతవ్యలీకైరజశంకరాదిభి-
ర్వితర్క్యలింగో భగవాన్ ప్రసీదతాం

2-4-20
శ్రియః పతిర్యజ్ఞపతిః ప్రజాపతిర్ధియాం
పతిర్లోకపతిర్ధరాపతిః .
పతిర్గతిశ్చాంధకవృష్ణిసాత్వతాం
ప్రసీదతాం మే భగవాన్ సతాం పతిః

2-4-21
యదంఘ్ర్యభిధ్యానసమాధిధౌతయా
ధియానుపశ్యంతి హి తత్త్వమాత్మనః .
వదంతి చైతత్కవయో యథారుచం
స మే ముకుందో భగవాన్ ప్రసీదతాం

2-4-22
ప్రచోదితా యేన పురా సరస్వతీ
వితన్వతాజస్య సతీం స్మృతిం హృది .
స్వలక్షణా ప్రాదురభూత్కిలాస్యతః
స మే ఋషీణామృషభః ప్రసీదతాం

2-4-23
భూతైర్మహద్భిర్య ఇమాః పురో విభుర్నిర్మాయ
శేతే యదమూషు పూరుషః .
భుంక్తే గుణాన్ షోడశ షోడశాత్మకః
సోఽలంకృషీష్ట భగవాన్ వచాంసి మే

2-4-24
నమస్తస్మై భగవతే వాసుదేవాయ వేధసే .
పపుర్జ్ఞానమయం సౌమ్యా యన్ముఖాంబురుహాసవం

2-4-25
ఏతదేవాత్మభూ రాజన్ నారదాయ విపృచ్ఛతే .
వేదగర్భోఽభ్యధాత్సాక్షాద్యదాహ హరిరాత్మనః

2-4-26
ఇతి శ్రీమద్భాగవతే మహాపురాణే పారమహంస్యాం సంహితాయాం
ద్వితీయస్కంధే చతుర్థోఽధ్యాయః