పోతన తెలుగు భాగవతము

చతుర్థ స్కంధః : తృతీయోఽధ్యాయః - 3

• Print
• Email
• Share on FaceBook
• Share on Twitter

4-3-2
యదాభిషిక్తో దక్షస్తు బ్రహ్మణా పరమేష్ఠినా .
ప్రజాపతీనాం సర్వేషామాధిపత్యే స్మయోఽభవత్

4-3-3
ఇష్ట్వా స వాజపేయేన బ్రహ్మిష్ఠానభిభూయ చ .
బృహస్పతిసవం నామ సమారేభే క్రతూత్తమం

4-3-4
తస్మిన్ బ్రహ్మర్షయః సర్వే దేవర్షిపితృదేవతాః .
ఆసన్ కృతస్వస్త్యయనాస్తత్పత్న్యశ్చ సభర్తృకాః

4-3-5
తదుపశ్రుత్య నభసి ఖేచరాణాం ప్రజల్పతాం .
సతీ దాక్షాయణీ దేవీ పితుర్యజ్ఞమహోత్సవం

4-3-6
వ్రజంతీః సర్వతో దిగ్భ్య ఉపదేవవరస్త్రియః .
విమానయానాః సప్రేష్ఠా నిష్కకంఠీః సువాససః

4-3-7
దృష్ట్వా స్వనిలయాభ్యాశే లోలాక్షీర్మృష్టకుండలాః .
పతిం భూతపతిం దేవమౌత్సుక్యాదభ్యభాషత

4-3-8
సత్యువాచ
ప్రజాపతేస్తే శ్వశురస్య సాంప్రతం
నిర్యాపితో యజ్ఞమహోత్సవః కిల .
వయం చ తత్రాభిసరామ వామ తే
యద్యర్థితామీ విబుధా వ్రజంతి హి

4-3-9
తస్మిన్ భగిన్యో మమ భర్తృభిః స్వకైర్ధ్రువం
గమిష్యంతి సుహృద్దిదృక్షవః .
అహం చ తస్మిన్ భవతాభికామయే
సహోపనీతం పరిబర్హమర్హితుం

4-3-10
తత్ర స్వసౄర్మే నను భర్తృసమ్మితా
మాతృష్వసౄః క్లిన్నధియం చ మాతరం .
ద్రక్ష్యే చిరోత్కంఠమనా మహర్షిభి-
రున్నీయమానం చ మృడాధ్వరధ్వజం

4-3-11
త్వయ్యేతదాశ్చర్యమజాత్మమాయయా
వినిర్మితం భాతి గుణత్రయాత్మకం .
తథాప్యహం యోషిదతత్త్వవిచ్చ తే
దీనా దిదృక్షే భవ మే భవక్షితిం

4-3-12
పశ్య ప్రయాంతీరభవాన్యయోషితో-
ఽప్యలంకృతాః కాంతసఖా వరూథశః .
యాసాం వ్రజద్భిః శితికంఠమండితం
నభో విమానైః కలహంసపాండుభిః

4-3-13
కథం సుతాయాః పితృగేహకౌతుకం
నిశమ్య దేహః సురవర్య నేంగతే .
అనాహుతా అప్యభియంతి సౌహృదం
భర్తుర్గురోర్దేహకృతశ్చ కేతనం

4-3-14
తన్మే ప్రసీదేదమమర్త్యవాంఛితం
కర్తుం భవాన్ కారుణికో బతార్హతి .
త్వయాఽఽత్మనోఽర్ధేఽహమదభ్రచక్షుషా
నిరూపితా మానుగృహాణ యాచితః

4-3-15
ఋషిరువాచ
ఏవం గిరిత్రః ప్రియయాభిభాషితః
ప్రత్యభ్యధత్త ప్రహసన్ సుహృత్ప్రియః .
సంస్మారితో మర్మభిదః కువాగిషూన్
యానాహ కో విశ్వసృజాం సమక్షతః

4-3-16
శ్రీభగవానువాచ
త్వయోదితం శోభనమేవ శోభనే
అనాహుతా అప్యభియంతి బంధుషు .
తే యద్యనుత్పాదితదోషదృష్టయో
బలీయసానాత్మ్యమదేన మన్యునా

4-3-17
విద్యాతపోవిత్తవపుర్వయఃకులైః
సతాం గుణైః షడ్భిరసత్తమేతరైః .
స్మృతౌ హతాయాం భృతమానదుర్దృశః
స్తబ్ధా న పశ్యంతి హి ధామ భూయసాం

4-3-18
నైతాదృశానాం స్వజనవ్యపేక్షయా
గృహాన్ ప్రతీయాదనవస్థితాత్మనాం .
యేఽభ్యాగతాన్ వక్రధియాభిచక్షతే
ఆరోపితభ్రూభిరమర్షణాక్షిభిః

4-3-19
తథారిభిర్న వ్యథతే శిలీముఖైః
శేతేఽర్దితాంగో హృదయేన దూయతా .
స్వానాం యథా వక్రధియాం దురుక్తిభి-
ర్దివానిశం తప్యతి మర్మతాడితః

4-3-20
వ్యక్తం త్వముత్కృష్టగతేః ప్రజాపతేః
ప్రియాఽఽత్మజానామసి సుభ్రు సమ్మతా .
అథాపి మానం న పితుః ప్రపత్స్యసే
మదాశ్రయాత్కః పరితప్యతే యతః

4-3-21
పాపచ్యమానేన హృదాఽఽతురేంద్రియః
సమృద్ధిభిః పూరుషబుద్ధిసాక్షిణాం .
అకల్ప ఏషామధిరోఢుమంజసా
పదం పరం ద్వేష్టి యథాసురా హరిం

4-3-22
ప్రత్యుద్గమప్రశ్రయణాభివాదనం
విధీయతే సాధు మిథః సుమధ్యమే .
ప్రాజ్ఞైః పరస్మై పురుషాయ చేతసా
గుహాశయాయైవ న దేహమానినే

4-3-23
సత్త్వం విశుద్ధం వసుదేవశబ్దితం
యదీయతే తత్ర పుమానపావృతః .
సత్త్వే చ తస్మిన్ భగవాన్ వాసుదేవో
హ్యధోక్షజో మే నమసా విధీయతే

4-3-24
తత్తే నిరీక్ష్యో న పితాపి దేహకృద్దక్షో
మమ ద్విట్ తదనువ్రతాశ్చ యే .
యో విశ్వసృగ్యజ్ఞగతం వరోరు
మామనాగసం దుర్వచసాకరోత్తిరః

4-3-25
యది వ్రజిష్యస్యతిహాయ మద్వచో
భద్రం భవత్యా న తతో భవిష్యతి .
సంభావితస్య స్వజనాత్పరాభవో
యదా స సద్యో మరణాయ కల్పతే

4-3-26
ఇతి శ్రీమద్భాగవతే మహాపురాణే పారమహంస్యాం సంహితాయాం
చతుర్థస్కంధే సతీరుద్రసంవాదే తృతీయోఽధ్యాయః