చతుర్థ స్కంధః : త్రింశోఽధ్యాయః - 30
4-30-1
విదుర ఉవాచ
యే త్వయాభిహితా బ్రహ్మన్ సుతాః ప్రాచీనబర్హిషః .
తే రుద్రగీతేన హరిం సిద్ధిమాపుః ప్రతోష్య కాం
4-30-2
కిం బార్హస్పత్యేహ పరత్ర వాథ
కైవల్యనాథప్రియపార్శ్వవర్తినః .
ఆసాద్య దేవం గిరిశం యదృచ్ఛయా
ప్రాపుః పరం నూనమథ ప్రచేతసః
4-30-3
మైత్రేయ ఉవాచ
ప్రచేతసోఽన్తరుదధౌ పితురాదేశకారిణః .
జపయజ్ఞేన తపసా పురంజనమతోషయన్
4-30-4
దశవర్షసహస్రాంతే పురుషస్తు సనాతనః .
తేషామావిరభూత్కృచ్ఛ్రం శాంతేన శమయన్ రుచా
4-30-5
సుపర్ణస్కంధమారూఢో మేరుశృంగమివాంబుదః .
పీతవాసా మణిగ్రీవః కుర్వన్ వితిమిరా దిశః
4-30-6
కాశిష్ణునా కనకవర్ణవిభూషణేన
భ్రాజత్కపోలవదనో విలసత్కిరీటః .
అష్టాయుధైరనుచరైర్మునిభిః సురేంద్రైరాసేవితో
గరుడకిన్నరగీతకీర్తిః
4-30-7
పీనాయతాష్టభుజమండలమధ్యలక్ష్మ్యా
స్పర్ధచ్ఛ్రియా పరివృతో వనమాలయాఽఽద్యః .
బర్హిష్మతః పురుష ఆహ సుతాన్ ప్రపన్నాన్
పర్జన్యనాదరుతయా సఘృణావలోకః
4-30-8
శ్రీభగవానువాచ
వరం వృణీధ్వం భద్రం వో యూయం మే నృపనందనాః .
సౌహార్దేనాపృథగ్ధర్మాస్తుష్టోఽహం సౌహృదేన వః
4-30-9
యోఽనుస్మరతి సంధ్యాయాం యుష్మాననుదినం నరః .
తస్య భ్రాతృష్వాత్మసామ్యం తథా భూతేషు సౌహృదం
4-30-10
యే తు మాం రుద్రగీతేన సాయం ప్రాతః సమాహితాః .
స్తువంత్యహం కామవరాన్ దాస్యే ప్రజ్ఞాం చ శోభనాం
4-30-11
యద్యూయం పితురాదేశమగ్రహీష్ట ముదాన్వితాః .
అథో వ ఉశతీ కీర్తిర్లోకానను భవిష్యతి
4-30-12
భవితా విశ్రుతః పుత్రోఽనవమో బ్రహ్మణో గుణైః .
య ఏతామాత్మవీర్యేణ త్రిలోకీం పూరయిష్యతి
4-30-13
కండోః ప్రమ్లోచయా లబ్ధా కన్యా కమలలోచనా .
తాం చాపవిద్ధాం జగృహుర్భూరుహా నృపనందనాః
4-30-14
క్షుత్క్షామాయా ముఖే రాజా సోమః పీయూషవర్షిణీం .
దేశినీం రోదమానాయా నిదధే స దయాన్వితః
4-30-15
ప్రజావిసర్గ ఆదిష్టాః పిత్రా మామనువర్తతా .
తత్ర కన్యాం వరారోహాం తాముద్వహత మా చిరం
4-30-16
అపృథగ్ధర్మశీలానాం సర్వేషాం వః సుమధ్యమా .
అపృథగ్ధర్మశీలేయం భూయాత్పత్న్యర్పితాశయా
4-30-17
దివ్యవర్షసహస్రాణాం సహస్రమహతౌజసః .
భౌమాన్ భోక్ష్యథ భోగాన్ వై దివ్యాంశ్చానుగ్రహాన్మమ
4-30-18
అథ మయ్యనపాయిన్యా భక్త్యా పక్వగుణాశయాః .
ఉపయాస్యథ మద్ధామ నిర్విద్య నిరయాదతః
4-30-19
గృహేష్వావిశతాం చాపి పుంసాం కుశలకర్మణాం .
మద్వార్తా యాతయామానాం న బంధాయ గృహా మతాః
4-30-20
న వ్యవద్ధృదయే యజ్జ్ఞో బ్రహ్మైతద్బ్రహ్మవాదిభిః .
న ముహ్యంతి న శోచంతి న హృష్యంతి యతో గతాః
4-30-21
మైత్రేయ ఉవాచ
ఏవం బ్రువాణం పురుషార్థభాజనం
జనార్దనం ప్రాంజలయః ప్రచేతసః .
తద్దర్శనధ్వస్తతమోరజోమలా
గిరాగృణన్ గద్గదయా సుహృత్తమం
4-30-22
ప్రచేతస ఊచుః
నమో నమః క్లేశవినాశనాయ
నిరూపితోదారగుణాహ్వయాయ .
మనోవచోవేగపురోజవాయ
సర్వాక్షమార్గైరగతాధ్వనే నమః
4-30-23
శుద్ధాయ శాంతాయ నమః స్వనిష్ఠయా
మనస్యపార్థం విలసద్ద్వయాయ .
నమో జగత్స్థానలయోదయేషు
గృహీతమాయాగుణవిగ్రహాయ
4-30-24
నమో విశుద్ధసత్త్వాయ హరయే హరిమేధసే .
వాసుదేవాయ కృష్ణాయ ప్రభవే సర్వసాత్వతాం
4-30-25
నమః కమలనాభాయ నమః కమలమాలినే .
నమః కమలపాదాయ నమస్తే కమలేక్షణ
4-30-26
నమః కమలకింజల్కపిశంగామలవాససే .
సర్వభూతనివాసాయ నమోఽయుంక్ష్మహి సాక్షిణే
4-30-27
రూపం భగవతా త్వేతదశేషక్లేశసంక్షయం .
ఆవిష్కృతం నః క్లిష్టానాం కిమన్యదనుకంపితం
4-30-28
ఏతావత్త్వం హి విభుభిర్భావ్యం దీనేషు వత్సలైః .
యదనుస్మర్యతే కాలే స్వబుద్ధ్యాభద్రరంధన
4-30-29
యేనోపశాంతిర్భూతానాం క్షుల్లకానామపీహ తాం .
అంతర్హితోఽన్తర్హృదయే కస్మాన్నో వేద నాశిషః
4-30-30
అసావేవ వరోఽస్మాకమీప్సితో జగతః పతే .
ప్రసన్నో భగవాన్ యేషామపవర్గగురుర్గతిః
4-30-31
వరం వృణీమహేఽథాపి నాథ త్వత్పరతః పరాత్ .
న హ్యంతస్త్వద్విభూతీనాం సోఽనంత ఇతి గీయసే
4-30-32
పారిజాతేఽఞ్జసా లబ్ధే సారంగోఽన్యన్న సేవతే .
త్వదంఘ్రిమూలమాసాద్య సాక్షాత్కిం కిం వృణీమహి
4-30-33
యావత్తే మాయయా స్పృష్టా భ్రమామ ఇహ కర్మభిః .
తావద్భవత్ప్రసంగానాం సంగః స్యాన్నో భవే భవే
4-30-34
తులయామ లవేనాపి న స్వర్గం నాపునర్భవం .
భగవత్సంగిసంగస్య మర్త్యానాం కిముతాశిషః
4-30-35
యత్రేడ్యంతే కథా మృష్టాస్తృష్ణాయాః ప్రశమో యతః .
నిర్వైరం యత్ర భూతేషు నోద్వేగో యత్ర కశ్చన
4-30-36
యత్ర నారాయణః సాక్షాద్భగవాన్ న్యాసినాం గతిః .
సంస్తూయతే సత్కథాసు ముక్తసంగైః పునః పునః
4-30-37
తేషాం విచరతాం పద్భ్యాం తీర్థానాం పావనేచ్ఛయా .
భీతస్య కిం న రోచేత తావకానాం సమాగమః
4-30-38
వయం తు సాక్షాద్భగవన్ భవస్య
ప్రియస్య సఖ్యుః క్షణసంగమేన .
సుదుశ్చికిత్స్యస్య భవస్య మృత్యో-
ర్భిషక్తమం త్వాద్య గతిం గతాః స్మ
4-30-39
యన్నః స్వధీతం గురవః ప్రసాదితా
విప్రాశ్చ వృద్ధాశ్చ సదానువృత్త్యా .
ఆర్యా నతాః సుహృదో భ్రాతరశ్చ
సర్వాణి భూతాన్యనసూయయైవ
4-30-40
యన్నః సుతప్తం తప ఏతదీశ
నిరంధసాం కాలమదభ్రమప్సు .
సర్వం తదేతత్పురుషస్య భూమ్నో
వృణీమహే తే పరితోషణాయ
4-30-41
మనుః స్వయంభూర్భగవాన్ భవశ్చ
యేఽన్యే తపోజ్ఞానవిశుద్ధసత్త్వాః .
అదృష్టపారా అపి యన్మహిమ్నః
స్తువంత్యథో త్వాత్మసమం గృణీమః
4-30-42
నమః సమాయ శుద్ధాయ పురుషాయ పరాయ చ .
వాసుదేవాయ సత్త్వాయ తుభ్యం భగవతే నమః
4-30-43
మైత్రేయ ఉవాచ
ఇతి ప్రచేతోభిరభిష్టుతో హరిః
ప్రీతస్తథేత్యాహ శరణ్యవత్సలః .
అనిచ్ఛతాం యానమతృప్తచక్షుషాం
యయౌ స్వధామానపవర్గవీర్యః
4-30-44
అథ నిర్యాయ సలిలాత్ప్రచేతస ఉదన్వతః .
వీక్ష్యాకుప్యన్ ద్రుమైశ్ఛన్నాం గాం గాం రోద్ధుమివోచ్ఛ్రితైః
4-30-45
తతోఽగ్నిమారుతౌ రాజన్నముంచన్ ముఖతో రుషా .
మహీం నిర్వీరుధం కర్తుం సంవర్తక ఇవాత్యయే
4-30-46
భస్మసాత్క్రియమాణాంస్తాన్ ద్రుమాన్ వీక్ష్య పితామహః .
ఆగతః శమయామాస పుత్రాన్ బర్హిష్మతో నయైః
4-30-47
తత్రావశిష్టా యే వృక్షా భీతా దుహితరం తదా .
ఉజ్జహ్రుస్తే ప్రచేతోభ్య ఉపదిష్టాః స్వయంభువా
4-30-48
తే చ బ్రహ్మణ ఆదేశాన్మారిషాముపయేమిరే .
యస్యాం మహదవజ్ఞానాదజన్యజనయోనిజః
4-30-49
చాక్షుషే త్వంతరే ప్రాప్తే ప్రాక్సర్గే కాలవిద్రుతే .
యః ససర్జ ప్రజా ఇష్టాః స దక్షో దైవచోదితః
4-30-50
యో జాయమానః సర్వేషాం తేజస్తేజస్వినాం రుచా .
స్వయోపాదత్త దాక్ష్యాచ్చ కర్మణాం దక్షమబ్రువన్
4-30-51
తం ప్రజాసర్గరక్షాయామనాదిరభిషిచ్య చ .
యుయోజ యుయుజేఽన్యాంశ్చ స వై సర్వప్రజాపతీన్
4-30-52
ఇతి శ్రీమద్భాగవతే మహాపురాణే పారమహంస్యాం సంహితాయాం
చతుర్థస్కంధే త్రింశోఽధ్యాయః