చతుర్థ స్కంధః : షష్ఠోఽధ్యాయః - 6
4-6-1
మైత్రేయ ఉవాచ
అథ దేవగణాః సర్వే రుద్రానీకైః పరాజితాః .
శూలపట్టిశనిస్త్రింశగదాపరిఘముద్గరైః
4-6-2
సంఛిన్నభిన్నసర్వాంగాః సర్త్విక్సభ్యా భయాకులాః .
స్వయంభువే నమస్కృత్య కార్త్స్న్యేనైతన్న్యవేదయన్
4-6-3
ఉపలభ్య పురైవైతద్భగవానబ్జసంభవః .
నారాయణశ్చ విశ్వాత్మా న కస్యాధ్వరమీయతుః
4-6-4
తదాకర్ణ్య విభుః ప్రాహ తేజీయసి కృతాగసి .
క్షేమాయ తత్ర సా భూయాన్న ప్రాయేణ బుభూషతాం
4-6-5
అథాపి యూయం కృతకిల్బిషా భవం
యే బర్హిషో భాగభాజం పరాదుః .
ప్రసాదయధ్వం పరిశుద్ధచేతసా
క్షిప్రప్రసాదం ప్రగృహీతాంఘ్రిపద్మం
4-6-6
ఆశాసానా జీవితమధ్వరస్య
లోకః సపాలః కుపితే న యస్మిన్ .
తమాశు దేవం ప్రియయా విహీనం
క్షమాపయధ్వం హృది విద్ధం దురుక్తైః
4-6-7
నాహం న యజ్ఞో న చ యూయమన్యే
యే దేహభాజో మునయశ్చ తత్త్వం .
విదుః ప్రమాణం బలవీర్యయోర్వా
యస్యాత్మతంత్రస్య క ఉపాయం విధిత్సేత్
4-6-8
స ఇత్థమాదిశ్య సురానజస్తైః
సమన్వితః పితృభిః సప్రజేశైః .
యయౌ స్వధిష్ణ్యాన్నిలయం పురద్విషః
కైలాసమద్రిప్రవరం ప్రియం ప్రభోః
4-6-9
జన్మౌషధితపోమంత్రయోగసిద్ధైర్నరేతరైః .
జుష్టం కిన్నరగంధర్వైరప్సరోభిర్వృతం సదా
4-6-10
నానామణిమయైః శృంగైర్నానాధాతువిచిత్రితైః .
నానాద్రుమలతాగుల్మైర్నానామృగగణావృతైః
4-6-11
నానామలప్రస్రవణైర్నానాకందరసానుభిః .
రమణం విహరంతీనాం రమణైః సిద్ధయోషితాం
4-6-12
మయూరకేకాభిరుతం మదాంధాలివిమూర్చ్ఛితం .
ప్లావితై రక్తకంఠానాం కూజితైశ్చ పతత్త్రిణాం
4-6-13
ఆహ్వయంతమివోద్ధస్తైర్ద్విజాన్ కామదుఘైర్ద్రుమైః .
వ్రజంతమివ మాతంగైర్గృణంతమివ నిర్ఝరైః
4-6-14
మందారైః పారిజాతైశ్చ సరలైశ్చోపశోభితం .
తమాలైః శాలతాలైశ్చ కోవిదారాసనార్జునైః
4-6-15
చూతైః కదంబైర్నీపైశ్చ నాగపున్నాగచంపకైః .
పాటలాశోకబకులైః కుందైః కురబకైరపి
4-6-16
స్వర్ణార్ణశతపత్రైశ్చ వరరేణుకజాతిభిః .
కుబ్జకైర్మల్లికాభిశ్చ మాధవీభిశ్చ మండితం
4-6-17
పనసోదుంబరాశ్వత్థప్లక్షన్యగ్రోధహింగుభిః .
భూర్జైరోషధిభిః పూగై రాజపూగైశ్చ జంబుభిః
4-6-18
ఖర్జూరామ్రాతకామ్రాద్యైః ప్రియాలమధుకేంగుదైః .
ద్రుమజాతిభిరన్యైశ్చ రాజితం వేణుకీచకైః
4-6-19
కుముదోత్పలకహ్లారశతపత్రవనర్ద్ధిభిః .
నలినీషు కలం కూజత్ఖగవృందోపశోభితం
4-6-20
మృగైః శాఖామృగైః క్రోడైర్మృగేంద్రైరృక్షశల్యకైః
గవయైః శరభైర్వ్యాఘ్రై రురుభిర్మహిషాదిభిః
4-6-21
కర్ణాంత్రైకపదాశ్వాస్యైర్నిర్జుష్టం వృకనాభిభిః .
కదలీఖండసంరుద్ధనలినీపులినశ్రియం
4-6-22
పర్యస్తం నందయా సత్యాః స్నానపుణ్యతరోదయా .
విలోక్య భూతేశగిరిం విబుధా విస్మయం యయుః
4-6-23
దదృశుస్తత్ర తే రమ్యామలకాం నామ వై పురీం .
వనం సౌగంధికం చాపి యత్ర తన్నామపంకజం
4-6-24
నందా చాలకనందా చ సరితౌ బాహ్యతః పురః .
తీర్థపాదపదాంభోజరజసాతీవ పావనే
4-6-25
యయోః సురస్త్రియః క్షత్తరవరుహ్య స్వధిష్ణ్యతః .
క్రీడంతి పుంసః సించంత్యో విగాహ్య రతికర్శితాః
4-6-26
యయోస్తత్స్నానవిభ్రష్టనవకుంకుమపింజరం .
వితృషోఽపి పిబంత్యంభః పాయయంతో గజా గజీః
4-6-27
తారహేమమహారత్నవిమానశతసంకులాం .
జుష్టాం పుణ్యజనస్త్రీభిర్యథా ఖం సతడిద్ఘనం
4-6-28
హిత్వా యక్షేశ్వరపురీం వనం సౌగంధికం చ తత్ .
ద్రుమైః కామదుఘైర్హృద్యం చిత్రమాల్యఫలచ్ఛదైః
4-6-29
రక్తకంఠఖగానీకస్వరమండితషట్పదం .
కలహంసకులప్రేష్ఠం ఖరదండజలాశయం
4-6-30
వనకుంజరసంఘృష్టహరిచందనవాయునా .
అధి పుణ్యజనస్త్రీణాం ముహురున్మథయన్ మనః
4-6-31
వైదూర్యకృతసోపానా వాప్య ఉత్పలమాలినీః .
ప్రాప్తం కింపురుషైర్దృష్ట్వా త ఆరాద్దదృశుర్వటం
4-6-32
స యోజనశతోత్సేధః పాదోనవిటపాయతః .
పర్యక్కృతాచలచ్ఛాయో నిర్నీడస్తాపవర్జితః
4-6-33
తస్మిన్ మహాయోగమయే ముముక్షుశరణే సురాః .
దదృశుః శివమాసీనం త్యక్తామర్షమివాంతకం
4-6-34
హర హర నమః పార్వతీపతయే హర హర మహాదేవ
సనందనాద్యైర్మహాసిద్ధైః శాంతైః సంశాంతవిగ్రహం .
ఉపాస్యమానం సఖ్యా చ భర్త్రా గుహ్యకరక్షసాం
4-6-35
విద్యాతపోయోగపథమాస్థితం తమధీశ్వరం .
చరంతం విశ్వసుహృదం వాత్సల్యాల్లోకమంగలం
4-6-36
లింగం చ తాపసాభీష్టం భస్మదండజటాజినం .
అంగేన సంధ్యాభ్రరుచా చంద్రలేఖాం చ బిభ్రతం
4-6-37
ఉపవిష్టం దర్భమయ్యాం బృస్యాం బ్రహ్మ సనాతనం .
నారదాయ ప్రవోచంతం పృచ్ఛతే శృణ్వతాం సతాం
4-6-38
కృత్వోరౌ దక్షిణే సవ్యం పాదపద్మం చ జానుని .
బాహుం ప్రకోష్ఠేఽక్షమాలామాసీనం తర్కముద్రయా
4-6-39
తం బ్రహ్మనిర్వాణసమాధిమాశ్రితం
వ్యుపాశ్రితం గిరిశం యోగకక్షాం .
సలోకపాలా మునయో మనూనామాద్యం
మనుం ప్రాంజలయః ప్రణేముః
4-6-40
స తూపలభ్యాగతమాత్మయోనిం
సురాసురేశైరభివందితాంఘ్రిః .
ఉత్థాయ చక్రే శిరసాభివందన-
మర్హత్తమః కస్య యథైవ విష్ణుః
4-6-41
తథాపరే సిద్ధగణా మహర్షిభిర్యే
వై సమంతాదను నీలలోహితం .
నమస్కృతః ప్రాహ శశాంకశేఖరం
కృతప్రణామం ప్రహసన్నివాత్మభూః
4-6-42
బ్రహ్మోవాచ
జానే త్వామీశం విశ్వస్య జగతో యోనిబీజయోః .
శక్తేః శివస్య చ పరం యత్తద్బ్రహ్మ నిరంతరం
4-6-43
త్వమేవ భగవన్నేతచ్ఛివశక్త్యోః స్వరూపయోః .
విశ్వం సృజసి పాస్యత్సి క్రీడన్నూర్ణపటో యథా
4-6-44
త్వమేవ ధర్మార్థదుఘాభిపత్తయే
దక్షేణ సూత్రేణ ససర్జిథాధ్వరం .
త్వయైవ లోకేఽవసితాశ్చ సేతవో
యాన్ బ్రాహ్మణాః శ్రద్దధతే ధృతవ్రతాః
4-6-45
త్వం కర్మణాం మంగలమంగలానాం
కర్తుః స్మ లోకం తనుషే స్వః పరం వా .
అమంగలానాం చ తమిస్రముల్బణం
విపర్యయః కేన తదేవ కస్యచిత్
4-6-46
న వై సతాం త్వచ్చరణార్పితాత్మనాం
భూతేషు సర్వేష్వభిపశ్యతాం తవ .
భూతాని చాత్మన్యపృథగ్దిదృక్షతాం
ప్రాయేణ రోషోఽభిభవేద్యథా పశుం
4-6-47
పృథగ్ధియః కర్మదృశో దురాశయాః
పరోదయేనార్పితహృద్రుజోఽనిశం .
పరాన్ దురుక్తైర్వితుదంత్యరుంతుదాః
తాన్ మావధీద్దైవవధాన్ భవద్విధః
4-6-48
యస్మిన్ యదా పుష్కరనాభమాయయా
దురంతయా స్పృష్టధియః పృథగ్దృశః .
కుర్వంతి తత్ర హ్యనుకంపయా కృపాం
న సాధవో దైవబలాత్కృతే క్రమం
4-6-49
భవాంస్తు పుంసః పరమస్య మాయయా
దురంతయాస్పృష్టమతిః సమస్తదృక్ .
తయా హతాత్మస్వనుకర్మచేతః-
స్వనుగ్రహం కర్తుమిహార్హసి ప్రభో
4-6-50
కుర్వధ్వరస్యోద్ధరణం హతస్య భోః
త్వయాసమాప్తస్య మనో ప్రజాపతేః .
న యత్ర భాగం తవ భాగినో దదుః
కుయజ్వినో యేన మఖో నినీయతే
4-6-51
జీవతాద్యజమానోఽయం ప్రపద్యేతాక్షిణీ భగః .
భృగోః శ్మశ్రూణి రోహంతు పూష్ణో దంతాశ్చ పూర్వవత్
4-6-52
దేవానాం భగ్నగాత్రాణాం ఋత్విజాం చాయుధాశ్మభిః .
భవతానుగృహీతానామాశు మన్యోఽస్త్వనాతురం
4-6-53
ఏష తే రుద్ర భాగోఽస్తు యదుచ్ఛిష్టోఽధ్వరస్య వై .
యజ్ఞస్తే రుద్రభాగేన కల్పతామద్య యజ్ఞహన్
4-6-54
ఇతి శ్రీమద్భాగవతే మహాపురాణే పారమహంస్యాం సంహితాయాం
చతుర్థస్కంధే రుద్రసాంత్వనం నామ షష్ఠోఽధ్యాయః