చతుర్థ స్కంధః : షడ్వింశోఽధ్యాయః - 26
4-26-1
నారద ఉవాచ
స ఏకదా మహేష్వాసో రథం పంచాశ్వమాశుగం .
ద్వీషం ద్విచక్రమేకాక్షం త్రివేణుం పంచబంధురం
4-26-2
ఏకరశ్మ్యేకదమనమేకనీడం ద్వికూబరం .
పంచప్రహరణం సప్తవరూథం పంచవిక్రమం
4-26-3
హైమోపస్కరమారుహ్య స్వర్ణవర్మాక్షయేషుధిః .
ఏకాదశచమూనాథః పంచప్రస్థమగాద్వనం
4-26-4
చచార మృగయాం తత్ర దృప్త ఆత్తేషుకార్ముకః .
విహాయ జాయామతదర్హాం మృగవ్యసనలాలసః
4-26-5
ఆసురీం వృత్తిమాశ్రిత్య ఘోరాత్మా నిరనుగ్రహః .
న్యహనన్నిశితైర్బాణైర్వనేషు వనగోచరాన్
4-26-6
తీర్థేషు ప్రతిదృష్టేషు రాజా మేధ్యాన్ పశూన్ వనే .
యావదర్థమలం లుబ్ధో హన్యాదితి నియమ్యతే
4-26-7
య ఏవం కర్మ నియతం విద్వాన్ కుర్వీత మానవః .
కర్మణా తేన రాజేంద్ర జ్ఞానేన న స లిప్యతే
4-26-8
అన్యథా కర్మ కుర్వాణో మానారూఢో నిబధ్యతే .
గుణప్రవాహపతితో నష్టప్రజ్ఞో వ్రజత్యధః
4-26-9
తత్ర నిర్భిన్నగాత్రాణాం చిత్రవాజైః శిలీముఖైః .
విప్లవోఽభూద్దుఃఖితానాం దుఃసహః కరుణాత్మనాం
4-26-10
శశాన్ వరాహాన్ మహిషాన్ గవయాన్ రురుశల్యకాన్ .
మేధ్యానన్యాంశ్చ వివిధాన్ వినిఘ్నన్ శ్రమమధ్యగాత్
4-26-11
తతః క్షుత్తృట్ పరిశ్రాంతో నివృత్తో గృహమేయివాన్ .
కృతస్నానోచితాహారః సంవివేశ గతక్లమః
4-26-12
ఆత్మానమర్హయాంచక్రే ధూపాలేపస్రగాదిభిః .
సాధ్వలంకృతసర్వాంగో మహిష్యామాదధే మనః
4-26-13
తృప్తో హృష్టః సుదృప్తశ్చ కందర్పాకృష్టమానసః .
న వ్యచష్ట వరారోహాం గృహిణీం గృహమేధినీం
4-26-14
అంతఃపురస్త్రియోఽపృచ్ఛద్విమనా ఇవ వేదిషత్ .
అపి వః కుశలం రామాః సేశ్వరీణాం యథా పురా
4-26-15
న తథైతర్హి రోచంతే గృహేషు గృహసంపదః .
యది న స్యాద్గృహే మాతా పత్నీ వా పతిదేవతా .
వ్యంగే రథ ఇవ ప్రాజ్ఞః కో నామాసీత దీనవత్
4-26-16
క్వ వర్తతే సా లలనా మజ్జంతం వ్యసనార్ణవే .
యా మాముద్ధరతే ప్రజ్ఞాం దీపయంతీ పదే పదే
4-26-17
రామా ఊచుః
నరనాథ న జానీమస్త్వత్ప్రియా యద్వ్యవస్యతి .
భూతలే నిరవస్తారే శయానాం పశ్య శత్రుహన్
4-26-18
నారద ఉవాచ
పురంజనః స్వమహిషీం నిరీక్ష్యావధుతాం భువి .
తత్సంగోన్మథితజ్ఞానో వైక్లవ్యం పరమం యయౌ
4-26-19
సాంత్వయన్ శ్లక్ష్ణయా వాచా హృదయేన విదూయతా .
ప్రేయస్యాః స్నేహసంరంభలింగమాత్మని నాభ్యగాత్
4-26-20
అనునిన్యేఽథ శనకైర్వీరోఽనునయకోవిదః .
పస్పర్శ పాదయుగలమాహ చోత్సంగలాలితాం
4-26-21
పురంజన ఉవాచ
నూనం త్వకృతపుణ్యాస్తే భృత్యా యేష్వీశ్వరాః శుభే .
కృతాగఃస్వాత్మసాత్కృత్వా శిక్షా దండం న యుంజతే
4-26-22
పరమోఽనుగ్రహో దండో భృత్యేషు ప్రభుణార్పితః .
బాలో న వేద తత్తన్వి బంధుకృత్యమమర్షణః
4-26-23
సా త్వం ముఖం సుదతి సుభ్ర్వనురాగభార-
వ్రీడావిలంబవిలసద్ధసితావలోకం .
నీలాలకాలిభిరుపస్కృతమున్నసం నః
స్వానాం ప్రదర్శయ మనస్విని వల్గు వాక్యం
4-26-24
తస్మిన్ దధే దమమహం తవ వీరపత్ని
యోఽన్యత్ర భూసురకులాత్కృతకిల్బిషస్తం .
పశ్యే న వీతభయమున్ముదితం త్రిలోక్యామన్యత్ర
వై మురరిపోరితరత్ర దాసాత్
4-26-25
వక్త్రం న తే వితిలకం మలినం విహర్షం
సంరంభభీమమవిమృష్టమపేతరాగం .
పశ్యే స్తనావపి శుచోపహతౌ సుజాతౌ
బింబాధరం విగతకుంకుమపంకరాగం
4-26-26
తన్మే ప్రసీద సుహృదః కృతకిల్బిషస్య
స్వైరం గతస్య మృగయాం వ్యసనాతురస్య .
కా దేవరం వశగతం కుసుమాస్త్రవేగ-
విస్రస్తపౌంస్నముశతీ న భజేత కృత్యే
4-26-27
ఇతి శ్రీమద్భాగవతే మహాపురాణే పారమహంస్యాం సంహితాయాం
చతుర్థస్కంధే పురంజనోపాఖ్యానే షడ్వింశోఽధ్యాయః