చతుర్థ స్కంధః : సప్తవింశోఽధ్యాయః - 27
4-27-1
నారద ఉవాచ
ఇత్థం పురంజనం సధ్ర్యగ్ వశమానీయ విభ్రమైః .
పురంజనీ మహారాజ రేమే రమయతీ పతిం
4-27-2
స రాజా మహిషీం రాజన్ సుస్నాతాం రుచిరాననాం .
కృతస్వస్త్యయనాం తృప్తామభ్యనందదుపాగతాం
4-27-3
తయోపగూఢః పరిరబ్ధకంధరో
రహోఽనుమంత్రైరపకృష్టచేతనః .
న కాలరంహో బుబుధే దురత్యయం
దివానిశేతి ప్రమదాపరిగ్రహః
4-27-4
శయాన ఉన్నద్ధమదో మహామనా
మహార్హతల్పే మహిషీభుజోపధిః .
తామేవ వీరో మనుతే పరం యత-
స్తమోఽభిభూతో న నిజం పరం చ యత్
4-27-5
తయైవం రమమాణస్య కామకశ్మలచేతసః .
క్షణార్ధమివ రాజేంద్ర వ్యతిక్రాంతం నవం వయః
4-27-6
తస్యామజనయత్పుత్రాన్ పురంజన్యాం పురంజనః .
శతాన్యేకాదశ విరాడాయుషోఽర్ధమథాత్యగాత్
4-27-7
దుహితౄర్దశోత్తరశతం పితృమాతృయశస్కరీః .
శీలౌదార్యగుణోపేతాః పౌరంజన్యః ప్రజాపతే
4-27-8
స పంచాలపతిః పుత్రాన్ పితృవంశవివర్ధనాన్ .
దారైః సంయోజయామాస దుహితౄః సదృశైర్వరైః
4-27-9
పుత్రాణాం చాభవన్ పుత్రా ఏకైకస్య శతం శతం .
యైర్వై పౌరంజనో వంశః పంచాలేషు సమేధితః
4-27-10
తేషు తద్రిక్థహారేషు గృహకోశానుజీవిషు .
నిరూఢేన మమత్వేన విషయేష్వన్వబధ్యత
4-27-11
ఈజే చ క్రతుభిర్ఘోరైర్దీక్షితః పశుమారకైః .
దేవాన్ పితౄన్ భూతపతీన్ నానాకామో యథా భవాన్
4-27-12
యుక్తేష్వేవం ప్రమత్తస్య కుటుంబాసక్తచేతసః .
ఆససాద స వై కాలో యోఽప్రియః ప్రియయోషితాం
4-27-13
చండవేగ ఇతి ఖ్యాతో గంధర్వాధిపతిర్నృప .
గంధర్వాస్తస్య బలినః షష్ట్యుత్తరశతత్రయం
4-27-14
గంధర్వ్యస్తాదృశీరస్య మైథున్యశ్చ సితాసితాః .
పరివృత్త్యా విలుంపంతి సర్వకామవినిర్మితాం
4-27-15
తే చండవేగానుచరాః పురంజనపురం యదా .
హర్తుమారేభిరే తత్ర ప్రత్యషేధత్ప్రజాగరః
4-27-16
స సప్తభిః శతైరేకో వింశత్యా చ శతం సమాః .
పురంజనపురాధ్యక్షో గంధర్వైర్యుయుధే బలీ
4-27-17
క్షీయమాణే స్వసంబంధే ఏకస్మిన్ బహుభిర్యుధా .
చింతాం పరాం జగామార్తః స రాష్ట్రపురబాంధవః
4-27-18
స ఏవ పుర్యాం మధుభుక్ పంచాలేషు స్వపార్షదైః .
ఉపనీతం బలిం గృహ్ణన్ స్త్రీజితో నావిదద్భయం
4-27-19
కాలస్య దుహితా కాచిత్త్రిలోకీం వరమిచ్ఛతీ .
పర్యటంతీ న బర్హిష్మన్ ప్రత్యనందత కశ్చన
4-27-20
దౌర్భాగ్యేనాత్మనో లోకే విశ్రుతా దుర్భగేతి సా .
యా తుష్టా రాజర్షయే తు వృతాదాత్పూరవే వరం
4-27-21
కదాచిదటమానా సా బ్రహ్మలోకాన్మహీం గతం .
వవ్రే బృహద్వ్రతం మాం తు జానతీ కామమోహితా
4-27-22
మయి సంరభ్య విపులమదాచ్ఛాపం సుదుఃసహం .
స్థాతుమర్హసి నైకత్ర మద్యాచ్ఞావిముఖో మునే
4-27-23
తతో విహతసంకల్పా కన్యకా యవనేశ్వరం .
మయోపదిష్టమాసాద్య వవ్రే నామ్నా భయం పతిం
4-27-24
ఋషభం యవనానాం త్వాం వృణే వీరేప్సితం పతిం .
సంకల్పస్త్వయి భూతానాం కృతః కిల న రిష్యతి
4-27-25
ద్వావిమావనుశోచంతి బాలావసదవగ్రహౌ .
యల్లోకశాస్త్రోపనతం న రాతి న తదిచ్ఛతి
4-27-26
అథో భజస్వ మాం భద్ర భజంతీం మే దయాం కురు .
ఏతావాన్ పౌరుషో ధర్మో యదార్తాననుకంపతే
4-27-27
కాలకన్యోదితవచో నిశమ్య యవనేశ్వరః .
చికీర్షుర్దేవగుహ్యం స సస్మితం తామభాషత
4-27-28
మయా నిరూపితస్తుభ్యం పతిరాత్మసమాధినా .
నాభినందతి లోకోఽయం త్వామభద్రామసమ్మతాం
4-27-29
త్వమవ్యక్తగతిర్భుంక్ష్వ లోకం కర్మవినిర్మితం .
యా హి మే పృతనా యుక్తా ప్రజానాశం ప్రణేష్యసి
4-27-30
ప్రజ్వారోఽయం మమ భ్రాతా త్వం చ మే భగినీ భవ .
చరామ్యుభాభ్యాం లోకేఽస్మిన్నవ్యక్తో భీమసైనికః
4-27-31
ఇతి శ్రీమద్భాగవతే మహాపురాణే పారమహంస్యాం సంహితాయాం
చతుర్థస్కంధే పురంజనోపాఖ్యానే సప్తవింశోఽధ్యాయః