పోతన తెలుగు భాగవతము

చతుర్థ స్కంధః : దశమోఽధ్యాయః - 10

• Print
• Email
• Share on FaceBook
• Share on Twitter

4-10-2
ఇలాయామపి భార్యాయాం వాయోః పుత్ర్యాం మహాబలః .
పుత్రముత్కలనామానం యోషిద్రత్నమజీజనత్

4-10-3
ఉత్తమస్త్వకృతోద్వాహో మృగయాయాం బలీయసా .
హతః పుణ్యజనేనాద్రౌ తన్మాతాస్య గతిం గతా

4-10-4
ధ్రువో భ్రాతృవధం శ్రుత్వా కోపామర్షః శుచార్పితః .
జైత్రం స్యందనమాస్థాయ గతః పుణ్యజనాలయం

4-10-5
గత్వోదీచీం దిశం రాజా రుద్రానుచరసేవితాం .
దదర్శ హిమవద్ద్రోణ్యాం పురీం గుహ్యకసంకులాం

4-10-6
దధ్మౌ శంఖం బృహద్బాహుః ఖం దిశశ్చానునాదయన్ .
యేనోద్విగ్నదృశః క్షత్తరుపదేవ్యోఽత్రసన్ భృశం

4-10-7
తతో నిష్క్రమ్య బలిన ఉపదేవమహాభటాః .
అసహంతస్తన్నినాదమభిపేతురుదాయుధాః

4-10-8
స తానాపతతో వీర ఉగ్రధన్వా మహారథః .
ఏకైకం యుగపత్సర్వానహన్ బాణైస్త్రిభిస్త్రిభిః

4-10-9
తే వై లలాటలగ్నైస్తైరిషుభిః సర్వ ఏవ హి .
మత్వా నిరస్తమాత్మానమాశంసన్ కర్మ తస్య తత్

4-10-10
తేఽపి చాముమమృష్యంతః పాదస్పర్శమివోరగాః .
శరైరవిధ్యన్ యుగపద్ద్విగుణం ప్రచికీర్షవః

4-10-11
తతః పరిఘనిస్త్రింశైః ప్రాసశూలపరశ్వధైః .
శక్త్యృష్టిభిర్భుశుండీభిశ్చిత్రవాజైః శరైరపి

4-10-12
అభ్యవర్షన్ ప్రకుపితాః సరథం సహ సారథిం .
ఇచ్ఛంతస్తత్ప్రతీకర్తుమయుతాని త్రయోదశ

4-10-13
ఔత్తానపాదిః స తదా శస్త్రవర్షేణ భూరిణా .
న ఉపాదృశ్యతచ్ఛన్న ఆసారేణ యథా గిరిః

4-10-14
హాహాకారస్తదైవాసీత్సిద్ధానాం దివి పశ్యతాం .
హతోఽయం మానవః సూర్యో మగ్నః పుణ్యజనార్ణవే

4-10-15
నదత్సు యాతుధానేషు జయకాశిష్వథో మృధే .
ఉదతిష్ఠద్రథస్తస్య నీహారాదివ భాస్కరః

4-10-16
ధనుర్విస్ఫూర్జయన్ దివ్యం ద్విషతాం ఖేదముద్వహన్ .
అస్త్రౌఘం వ్యధమద్బాణైర్ఘనానీకమివానిలః

4-10-17
తస్య తే చాపనిర్ముక్తా భిత్త్వా వర్మాణి రక్షసాం .
కాయానావివిశుస్తిగ్మా గిరీనశనయో యథా

4-10-18
భల్లైః సంఛిద్యమానానాం శిరోభిశ్చారుకుండలైః .
ఊరుభిర్హేమతాలాభైర్దోర్భిర్వలయవల్గుభిః

4-10-19
హారకేయూరముకుటైరుష్ణీషైశ్చ మహాధనైః .
ఆస్తృతాస్తా రణభువో రేజుర్వీర మనోహరాః

4-10-20
హతావశిష్టా ఇతరే రణాజిరా-
ద్రక్షోగణాః క్షత్రియవర్యసాయకైః .
ప్రాయో వివృక్ణావయవా విదుద్రువుః
మృగేంద్రవిక్రీడితయూథపా ఇవ

4-10-21
అపశ్యమానః స తదాతతాయినం
మహామృధే కంచన మానవోత్తమః .
పురీం దిదృక్షన్నపి నావిశద్ద్విషాం
న మాయినాం వేద చికీర్షితం జనః
ఇతి బ్రువంశ్చిత్రరథః స్వసారథిం
యత్తః పరేషాం ప్రతియోగశంకితః .
శుశ్రావ శబ్దం జలధేరివేరితం
నభస్వతో దిక్షు రజోఽన్వదృశ్యత

4-10-22
క్షణేనాచ్ఛాదితం వ్యోమ ఘనానీకేన సర్వతః .
విస్ఫురత్తడితా దిక్షు త్రాసయత్స్తనయిత్నునా

4-10-23
వవృషూ రుధిరౌఘాసృక్పూయవిణ్మూత్రమేదసః .
నిపేతుర్గగనాదస్య కబంధాన్యగ్రతోఽనఘ

4-10-24
తతః ఖేఽదృశ్యత గిరిర్నిపేతుః సర్వతోదిశం .
గదాపరిఘనిస్త్రింశముసలాః సాశ్మవర్షిణః

4-10-25
అహయోఽశనినిఃశ్వాసా వమంతోఽగ్నిం రుషాక్షిభిః .
అభ్యధావన్ గజా మత్తాః సింహవ్యాఘ్రాశ్చ యూథశః

4-10-26
సముద్ర ఊర్మిభిర్భీమః ప్లావయన్ సర్వతోభువం .
ఆససాద మహాహ్రాదః కల్పాంత ఇవ భీషణః

4-10-27
ఏవం విధాన్యనేకాని త్రాసనాన్యమనస్వినాం .
ససృజుస్తిగ్మగతయ ఆసుర్యా మాయయాసురాః

4-10-28
ధ్రువే ప్రయుక్తామసురైస్తాం మాయామతిదుస్తరాం .
నిశామ్య తస్య మునయః సమాశంసన్ సమాగతాః

4-10-29
మునయ ఊచుః
ఔత్తానపాదే భగవాంస్తవ శార్ఙ్గధన్వా
దేవః క్షిణోత్వవనతార్తిహరో విపక్షాన్ .
యన్నామధేయమభిధాయ నిశమ్య చాద్ధా
లోకోఽఞ్జసా తరతి దుస్తరమంగ మృత్యుం

4-10-30
ఇతి శ్రీమద్భాగవతే మహాపురాణే పారమహంస్యాం సంహితాయాం
చతుర్థస్కంధే దశమోఽధ్యాయః