అష్టమస్కంధః : త్రయోదశోఽధ్యాయః - 13
8-13-1
శ్రీశుక ఉవాచ
మనుర్వివస్వతః పుత్రః శ్రాద్ధదేవ ఇతి శ్రుతః .
సప్తమో వర్తమానో యస్తదపత్యాని మే శృణు
8-13-2
ఇక్ష్వాకుర్నభగశ్చైవ ధృష్టః శర్యాతిరేవ చ .
నరిష్యంతోఽథ నాభాగః సప్తమో దిష్ట ఉచ్యతే
8-13-3
కరూషశ్చ పృషధ్రశ్చ దశమో వసుమాన్ స్మృతః .
మనోర్వైవస్వతస్యైతే దశపుత్రాః పరంతప
8-13-4
ఆదిత్యా వసవో రుద్రా విశ్వేదేవా మరుద్గణాః .
అశ్వినావృభవో రాజన్నింద్రస్తేషాం పురందరః
8-13-5
కశ్యపోఽత్రిర్వసిష్ఠశ్చ విశ్వామిత్రోఽథ గౌతమః .
జమదగ్నిర్భరద్వాజ ఇతి సప్తర్షయః స్మృతాః
8-13-6
అత్రాపి భగవజ్జన్మ కశ్యపాదదితేరభూత్ .
ఆదిత్యానామవరజో విష్ణుర్వామనరూపధృక్
8-13-7
సంక్షేపతో మయోక్తాని సప్తమన్వంతరాణి తే .
భవిష్యాణ్యథ వక్ష్యామి విష్ణోః శక్త్యాన్వితాని చ
8-13-8
వివస్వతశ్చ ద్వే జాయే విశ్వకర్మసుతే ఉభే .
సంజ్ఞా ఛాయా చ రాజేంద్ర యే ప్రాగభిహితే తవ
8-13-9
తృతీయాం వడవామేకే తాసాం సంజ్ఞాసుతాస్త్రయః .
యమో యమీ శ్రాద్ధదేవశ్ఛాయాయాశ్చ సుతాంఛృణు
8-13-10
సావర్ణిస్తపతీ కన్యా భార్యా సంవరణస్య యా .
శనైశ్చరస్తృతీయోఽభూదశ్వినౌ వడవాత్మజౌ
8-13-11
అష్టమేఽన్తర ఆయాతే సావర్ణిర్భవితా మనుః .
నిర్మోకవిరజస్కాద్యాః సావర్ణితనయా నృప
8-13-12
తత్ర దేవాః సుతపసో విరజా అమృతప్రభాః .
తేషాం విరోచనసుతో బలిరింద్రో భవిష్యతి
8-13-13
దత్త్వేమాం యాచమానాయ విష్ణవే యః పదత్రయం .
రాద్ధమింద్రపదం హిత్వా తతః సిద్ధిమవాప్స్యతి
8-13-14
యోఽసౌ భగవతా బద్ధః ప్రీతేన సుతలే పునః .
నివేశితోఽధికే స్వర్గాదధునాఽఽస్తే స్వరాడివ
8-13-15
గాలవో దీప్తిమాన్ రామో ద్రోణపుత్రః కృపస్తథా .
ఋష్యశృంగః పితాస్మాకం భగవాన్ బాదరాయణః
8-13-16
ఇమే సప్తర్షయస్తత్ర భవిష్యంతి స్వయోగతః .
ఇదానీమాసతే రాజన్ స్వే స్వ ఆశ్రమమండలే
8-13-17
దేవగుహ్యాత్సరస్వత్యాం సార్వభౌమ ఇతి ప్రభుః .
స్థానం పురందరాద్ధృత్వా బలయే దాస్యతీశ్వరః
8-13-18
నవమో దక్షసావర్ణిర్మనుర్వరుణసంభవః .
భూతకేతుర్దీప్తకేతురిత్యాద్యాస్తత్సుతా నృప
8-13-19
పారా మరీచిగర్భాద్యా దేవా ఇంద్రోఽద్భుతః స్మృతః .
ద్యుతిమత్ప్రముఖాస్తత్ర భవిష్యంత్యృషయస్తతః
8-13-20
ఆయుష్మతోఽమ్బుధారాయామృషభో భగవత్కలా .
భవితా యేన సంరాద్ధాం త్రిలోకీం భోక్ష్యతేఽద్భుతః
8-13-21
దశమో బ్రహ్మసావర్ణిరుపశ్లోకసుతో మహాన్ .
తత్సుతా భూరిషేణాద్యా హవిష్మత్ప్రముఖా ద్విజాః
8-13-22
హవిష్మాన్ సుకృతిః సత్యో జయో మూర్తిస్తదా ద్విజాః .
సువాసనవిరుద్ధాద్యా దేవాః శంభుః సురేశ్వరః
8-13-23
విష్వక్సేనో విషూచ్యాం తు శంభోః సఖ్యం కరిష్యతి .
జాతః స్వాంశేన భగవాన్ గృహే విశ్వసృజో విభుః
8-13-24
మనుర్వై ధర్మసావర్ణిరేకాదశమ ఆత్మవాన్ .
అనాగతాస్తత్సుతాశ్చ సత్యధర్మాదయో దశ
8-13-25
విహంగమాః కామగమా నిర్వాణరుచయః సురాః .
ఇంద్రశ్చ వైధృతస్తేషామృషయశ్చారుణాదయః
8-13-26
ఆర్యకస్య సుతస్తత్ర ధర్మసేతురితి స్మృతః .
వైధృతాయాం హరేరంశస్త్రిలోకీం ధారయిష్యతి
8-13-27
భవితా రుద్రసావర్ణీ రాజన్ ద్వాదశమో మనుః .
దేవవానుపదేవశ్చ దేవశ్రేష్ఠాదయః సుతాః
8-13-28
ఋతధామా చ తత్రేంద్రో దేవాశ్చ హరితాదయః .
ఋషయశ్చ తపోమూర్తిస్తపస్వ్యాగ్నీధ్రకాదయః
8-13-29
స్వధామాఖ్యో హరేరంశః సాధయిష్యతి తన్మనోః .
అంతరం సత్యసహసః సూనృతాయాః సుతో విభుః
8-13-30
మనుస్త్రయోదశో భావ్యో దేవసావర్ణిరాత్మవాన్ .
చిత్రసేనవిచిత్రాద్యా దేవసావర్ణిదేహజాః
8-13-31
దేవాః సుకర్మసుత్రామసంజ్ఞా ఇంద్రో దివస్పతిః .
నిర్మోకతత్త్వదర్శాద్యా భవిష్యంత్యృషయస్తదా
8-13-32
దేవహోత్రస్య తనయ ఉపహర్తా దివస్పతేః .
యోగేశ్వరో హరేరంశో బృహత్యాం సంభవిష్యతి
8-13-33
మనుర్వా ఇంద్రసావర్ణిశ్చతుర్దశమ ఏష్యతి .
ఉరుగంభీరబుద్ధ్యాద్యా ఇంద్రసావర్ణివీర్యజాః
8-13-34
పవిత్రాశ్చాక్షుషా దేవాః శుచిరింద్రో భవిష్యతి .
అగ్నిర్బాహుః శుచిః శుద్ధో మాగధాద్యాస్తపస్వినః
8-13-35
సత్రాయణస్య తనయో బృహద్భానుస్తదా హరిః .
వితానాయాం మహారాజ క్రియాతంతూన్ వితాయితా
8-13-36
రాజంశ్చతుర్దశైతాని త్రికాలానుగతాని తే .
ప్రోక్తాన్యేభిర్మితః కల్పో యుగసాహస్రపర్యయః
8-13-37
ఇతి శ్రీమద్భాగవతే మహాపురాణే పారమహంస్యాం సంహితాయా-
మష్టమస్కంధే మన్వంతరానువర్ణనం నామ త్రయోదశోఽధ్యాయః