అష్టమస్కంధః : ద్వావింశోఽధ్యాయః - 22
8-22-1
శ్రీశుక ఉవాచ
ఏవం విప్రకృతో రాజన్ బలిర్భగవతాసురః .
భిద్యమానోఽప్యభిన్నాత్మా ప్రత్యాహావిక్లవం వచః
8-22-2
బలిరువాచ
యద్యుత్తమశ్లోక భవాన్ మమేరితం
వచో వ్యలీకం సురవర్య మన్యతే .
కరోమ్యృతం తన్న భవేత్ప్రలంభనం
పదం తృతీయం కురు శీర్ష్ణి మే నిజం
8-22-3
బిభేమి నాహం నిరయాత్పదచ్యుతో
న పాశబంధాద్వ్యసనాద్దురత్యయాత్ .
నైవార్థకృచ్ఛ్రాద్భవతో వినిగ్రహా-
దసాధువాదాద్భృశముద్విజే యథా
8-22-4
పుంసాం శ్లాఘ్యతమం మన్యే దండమర్హత్తమార్పితం .
యం న మాతా పితా భ్రాతా సుహృదశ్చాదిశంతి హి
8-22-5
త్వం నూనమసురాణాం నః పారోక్ష్యః పరమో గురుః .
యో నోఽనేకమదాంధానాం విభ్రంశం చక్షురాదిశత్
8-22-6
యస్మిన్ వైరానుబంధేన వ్యూఢేన విబుధేతరాః .
బహవో లేభిరే సిద్ధిం యాము హైకాంతయోగినః
8-22-7
తేనాహం నిగృహీతోఽస్మి భవతా భూరికర్మణా .
బద్ధశ్చ వారుణైః పాశైర్నాతివ్రీడే న చ వ్యథే
8-22-8
పితామహో మే భవదీయసమ్మతః
ప్రహ్లాద ఆవిష్కృతసాధువాదః .
భవద్విపక్షేణ విచిత్రవైశసం
సంప్రాపితస్త్వత్పరమః స్వపిత్రా
8-22-9
కిమాత్మనానేన జహాతి యోఽన్తతః
కిం రిక్థహారైః స్వజనాఖ్యదస్యుభిః .
కిం జాయయా సంసృతిహేతుభూతయా
మర్త్యస్య గేహైః కిమిహాయుషో వ్యయః
8-22-10
ఇత్థం స నిశ్చిత్య పితామహో మహా-
నగాధబోధో భవతః పాదపద్మం .
ధ్రువం ప్రపేదే హ్యకుతోభయం జనాద్భీతః
స్వపక్షక్షపణస్య సత్తమ
8-22-11
అథాహమప్యాత్మరిపోస్తవాంతికం
దైవేన నీతః ప్రసభం త్యాజితశ్రీః .
ఇదం కృతాంతాంతికవర్తి జీవితం
యయాధ్రువం స్తబ్ధమతిర్న బుధ్యతే
8-22-12
శ్రీశుక ఉవాచ
తస్యేత్థం భాషమాణస్య ప్రహ్లాదో భగవత్ప్రియః .
ఆజగామ కురుశ్రేష్ఠ రాకాపతిరివోత్థితః
8-22-13
తమింద్రసేనః స్వపితామహం శ్రియా
విరాజమానం నలినాయతేక్షణం .
ప్రాంశుం పిశంగాంబరమంజనత్విషం
ప్రలంబబాహుం సుభగం సమైక్షత
8-22-14
తస్మై బలిర్వారుణపాశయంత్రితః
సమర్హణం నోపజహార పూర్వవత్ .
ననామ మూర్ధ్నాశ్రువిలోలలోచనః
సవ్రీడనీచీనముఖో బభూవ హ
8-22-15
స తత్ర హాసీనముదీక్ష్య సత్పతిం
సునందనందాద్యనుగైరుపాసితం .
ఉపేత్య భూమౌ శిరసా మహామనా
ననామ మూర్ధ్నా పులకాశ్రువిక్లవః
8-22-16
ప్రహ్లాద ఉవాచ
త్వయైవ దత్తం పదమైంద్రమూర్జితం
హృతం తదేవాద్య తథైవ శోభనం .
మన్యే మహానస్య కృతో హ్యనుగ్రహో
విభ్రంశితో యచ్ఛ్రియ ఆత్మమోహనాత్
8-22-17
యయా హి విద్వానపి ముహ్యతే యతస్తత్కో
విచష్టే గతిమాత్మనో యథా .
తస్మై నమస్తే జగదీశ్వరాయ వై
నారాయణాయాఖిలలోకసాక్షిణే
8-22-18
శ్రీశుక ఉవాచ
తస్యానుశృణ్వతో రాజన్ ప్రహ్లాదస్య కృతాంజలేః .
హిరణ్యగర్భో భగవానువాచ మధుసూదనం
8-22-19
బద్ధం వీక్ష్య పతిం సాధ్వీ తత్పత్నీ భయవిహ్వలా .
ప్రాంజలిః ప్రణతోపేంద్రం బభాషేఽవాఙ్ముఖీ నృప
8-22-20
వింధ్యావలిరువాచ
క్రీడార్థమాత్మన ఇదం త్రిజగత్కృతం తే
స్వామ్యం తు తత్ర కుధియోఽపర ఈశ కుర్యుః .
కర్తుః ప్రభోస్తవ కిమస్యత ఆవహంతి
త్యక్తహ్రియస్త్వదవరోపితకర్తృవాదాః
8-22-21
బ్రహ్మోవాచ
భూతభావన భూతేశ దేవదేవ జగన్మయ .
ముంచైనం హృతసర్వస్వం నాయమర్హతి నిగ్రహం
8-22-22
కృత్స్నా తేఽనేన దత్తా భూర్లోకాః కర్మార్జితాశ్చ యే .
నివేదితం చ సర్వస్వమాత్మావిక్లవయా ధియా
8-22-23
యత్పాదయోరశఠధీః సలిలం ప్రదాయ
దూర్వాంకురైరపి విధాయ సతీం సపర్యాం .
అప్యుత్తమాం గతిమసౌ భజతే త్రిలోకీం
దాశ్వానవిక్లవమనాః కథమార్తిమృచ్ఛేత్
8-22-24
శ్రీభగవానువాచ
బ్రహ్మన్ యమనుగృహ్ణామి తద్విశో విధునోమ్యహం .
యన్మదః పురుషః స్తబ్ధో లోకం మాం చావమన్యతే
8-22-25
యదా కదాచిజ్జీవాత్మా సంసరన్ నిజకర్మభిః .
నానాయోనిష్వనీశోఽయం పౌరుషీం గతిమావ్రజేత్
8-22-26
జన్మకర్మవయోరూపవిద్యైశ్వర్యధనాదిభిః .
యద్యస్య న భవేత్స్తంభస్తత్రాయం మదనుగ్రహః
8-22-27
మానస్తంభనిమిత్తానాం జన్మాదీనాం సమంతతః .
సర్వశ్రేయఃప్రతీపానాం హంత ముహ్యేన్న మత్పరః
8-22-28
ఏష దానవదైత్యానామగ్రణీః కీర్తివర్ధనః .
అజైషీదజయాం మాయాం సీదన్నపి న ముహ్యతి
8-22-29
క్షీణరిక్థశ్చ్యుతః స్థానాత్క్షిప్తో బద్ధశ్చ శత్రుభిః .
జ్ఞాతిభిశ్చ పరిత్యక్తో యాతనామనుయాపితః
8-22-30
గురుణా భర్త్సితః శప్తో జహౌ సత్యం న సువ్రతః .
ఛలైరుక్తో మయా ధర్మో నాయం త్యజతి సత్యవాక్
8-22-31
ఏష మే ప్రాపితః స్థానం దుష్ప్రాపమమరైరపి .
సావర్ణేరంతరస్యాయం భవితేంద్రో మదాశ్రయః
8-22-32
తావత్సుతలమధ్యాస్తాం విశ్వకర్మవినిర్మితం .
యన్నాధయో వ్యాధయశ్చ క్లమస్తంద్రా పరాభవః .
నోపసర్గా నివసతాం సంభవంతి మమేక్షయా
8-22-33
ఇంద్రసేన మహారాజ యాహి భో భద్రమస్తు తే .
సుతలం స్వర్గిభిః ప్రార్థ్యం జ్ఞాతిభిః పరివారితః
8-22-34
న త్వామభిభవిష్యంతి లోకేశాః కిముతాపరే .
త్వచ్ఛాసనాతిగాన్ దైత్యాంశ్చక్రం మే సూదయిష్యతి
8-22-35
రక్షిష్యే సర్వతోఽహం త్వాం సానుగం సపరిచ్ఛదం .
సదా సన్నిహితం వీర తత్ర మాం ద్రక్ష్యతే భవాన్
8-22-36
తత్ర దానవదైత్యానాం సంగాత్తే భావ ఆసురః .
దృష్ట్వా మదనుభావం వై సద్యః కుంఠో వినంక్ష్యతి
8-22-37
ఇతి శ్రీమద్భాగవతే మహాపురాణే పారమహంస్యాం సంహితాయా-
మష్టమస్కంధే వామనప్రాదుర్భావే బలివామనసంవాదో నామ
ద్వావింశోఽధ్యాయః