అష్టమస్కంధః : ద్వాదశోఽధ్యాయః - 12
8-12-1
శ్రీబాదరాయణిరువాచ
వృషధ్వజో నిశమ్యేదం యోషిద్రూపేణ దానవాన్ .
మోహయిత్వా సురగణాన్ హరిః సోమమపాయయత్
8-12-2
వృషమారుహ్య గిరిశః సర్వభూతగణైర్వృతః .
సహ దేవ్యా యయౌ ద్రష్టుం యత్రాస్తే మధుసూదనః
8-12-3
సభాజితో భగవతా సాదరం సోమయా భవః .
సూపవిష్ట ఉవాచేదం ప్రతిపూజ్య స్మయన్ హరిం
8-12-4
శ్రీమహాదేవ ఉవాచ
దేవదేవ జగద్వ్యాపిన్ జగదీశ జగన్మయ .
సర్వేషామపి భావానాం త్వమాత్మా హేతురీశ్వరః
8-12-5
ఆద్యంతావస్య యన్మధ్యమిదమన్యదహం బహిః .
యతోఽవ్యయస్య నైతాని తత్సత్యం బ్రహ్మ చిద్భవాన్
8-12-6
తవైవ చరణాంభోజం శ్రేయస్కామా నిరాశిషః .
విసృజ్యోభయతః సంగం మునయః సముపాసతే
8-12-7
త్వం బ్రహ్మ పూర్ణమమృతం విగుణం విశోక-
మానందమాత్రమవికారమనన్యదన్యత్ .
విశ్వస్య హేతురుదయస్థితిసంయమానా-
మాత్మేశ్వరశ్చ తదపేక్షతయానపేక్షః
8-12-8
ఏకస్త్వమేవ సదసద్ద్వయమద్వయం చ
స్వర్ణం కృతాకృతమివేహ న వస్తుభేదః .
అజ్ఞానతస్త్వయి జనైర్విహితో వికల్పో
యస్మాద్గుణవ్యతికరో నిరుపాధికస్య
8-12-9
త్వాం బ్రహ్మ కేచిదవయంత్యుత ధర్మమేకే
ఏకే పరం సదసతోః పురుషం పరేశం .
అన్యేఽవయంతి నవశక్తియుతం పరం త్వాం
కేచిన్మహాపురుషమవ్యయమాత్మతంత్రం
8-12-10
నాహం పరాయురృషయో న మరీచిముఖ్యా
జానంతి యద్విరచితం ఖలు సత్త్వసర్గాః .
యన్మాయయా ముషితచేతస ఈశ దైత్యమర్త్యాదయః
కిముత శశ్వదభద్రవృత్తాః
8-12-11
స త్వం సమీహితమదః స్థితిజన్మనాశం
భూతేహితం చ జగతో భవబంధమోక్షౌ .
వాయుర్యథా విశతి ఖం చ చరాచరాఖ్యం
సర్వం తదాత్మకతయావగమోఽవరుంత్సే
8-12-12
అవతారా మయా దృష్టా రమమాణస్య తే గుణైః .
సోఽహం తద్ద్రష్టుమిచ్ఛామి యత్తే యోషిద్వపుర్ధృతం
8-12-13
యేన సమ్మోహితా దైత్యాః పాయితాశ్చామృతం సురాః .
తద్దిదృక్షవ ఆయాతాః పరం కౌతూహలం హి నః
8-12-14
శ్రీశుక ఉవాచ
ఏవమభ్యర్థితో విష్ణుర్భగవాన్ శూలపాణినా .
ప్రహస్య భావగంభీరం గిరిశం ప్రత్యభాషత
8-12-15
శ్రీభగవానువాచ
కౌతూహలాయ దైత్యానాం యోషిద్వేషో మయా కృతః .
పశ్యతా సురకార్యాణి గతే పీయూషభాజనే
8-12-16
తత్తేఽహం దర్శయిష్యామి దిదృక్షోః సురసత్తమ .
కామినాం బహు మంతవ్యం సంకల్పప్రభవోదయం
8-12-17
శ్రీశుక ఉవాచ
ఇతి బ్రువాణో భగవాంస్తత్రైవాంతరధీయత .
సర్వతశ్చారయంశ్చక్షుర్భవ ఆస్తే సహోమయా
8-12-18
తతో దదర్శోపవనే వరస్త్రియం
విచిత్రపుష్పారుణపల్లవద్రుమే .
విక్రీడతీం కందుకలీలయా
లసద్దుకూలపర్యస్తనితంబమేఖలాం
8-12-19
ఆవర్తనోద్వర్తనకంపితస్తన-
ప్రకృష్టహారోరుభరైః పదే పదే .
ప్రభజ్యమానామివ మధ్యతశ్చల-
త్పదప్రవాలం నయతీం తతస్తతః
8-12-20
దిక్షు భ్రమత్కందుకచాపలైర్భృశం
ప్రోద్విగ్నతారాయతలోలలోచనాం .
స్వకర్ణవిభ్రాజితకుండలోల్లస-
త్కపోలనీలాలకమండితాననాం
8-12-21
శ్లథద్దుకూలం కబరీం చ విచ్యుతాం
సన్నహ్యతీం వామకరేణ వల్గునా .
వినిఘ్నతీమన్యకరేణ కందుకం
విమోహయంతీం జగదాత్మమాయయా
8-12-22
తాం వీక్ష్య దేవ ఇతి కందుకలీలయేష-
ద్వ్రీడాస్ఫుటస్మితవిసృష్టకటాక్షముష్టః .
స్త్రీప్రేక్షణప్రతిసమీక్షణవిహ్వలాత్మా
నాత్మానమంతిక ఉమాం స్వగణాంశ్చ వేద
8-12-23
తస్యాః కరాగ్రాత్స తు కందుకో యదా
గతో విదూరం తమనువ్రజత్స్త్రియాః .
వాసః ససూత్రం లఘు మారుతోఽహర-
ద్భవస్య దేవస్య కిలానుపశ్యతః
8-12-24
ఏవం తాం రుచిరాపాంగీం దర్శనీయాం మనోరమాం .
దృష్ట్వా తస్యాం మనశ్చక్రే విషజ్జంత్యాం భవః కిల
8-12-25
తయాపహృతవిజ్ఞానస్తత్కృతస్మరవిహ్వలః .
భవాన్యా అపి పశ్యంత్యా గతహ్రీస్తత్పదం యయౌ
8-12-26
సా తమాయాంతమాలోక్య వివస్త్రా వ్రీడితా భృశం .
నిలీయమానా వృక్షేషు హసంతీ నాన్వతిష్ఠత
8-12-27
తామన్వగచ్ఛద్భగవాన్ భవః ప్రముషితేంద్రియః .
కామస్య చ వశం నీతః కరేణుమివ యూథపః
8-12-28
సోఽనువ్రజ్యాతివేగేన గృహీత్వానిచ్ఛతీం స్త్రియం .
కేశబంధ ఉపానీయ బాహుభ్యాం పరిషస్వజే
8-12-29
సోపగూఢా భగవతా కరిణా కరిణీ యథా .
ఇతస్తతః ప్రసర్పంతీ విప్రకీర్ణశిరోరుహా
8-12-30
ఆత్మానం మోచయిత్వాంగ సురర్షభభుజాంతరాత్ .
ప్రాద్రవత్సా పృథుశ్రోణీ మాయా దేవవినిర్మితా
8-12-31
తస్యాసౌ పదవీం రుద్రో విష్ణోరద్భుతకర్మణః .
ప్రత్యపద్యత కామేన వైరిణేవ వినిర్జితః
8-12-32
తస్యానుధావతో రేతశ్చస్కందామోఘరేతసః .
శుష్మిణో యూథపస్యేవ వాసితామనుధావతః
8-12-33
యత్ర యత్రాపతన్మహ్యాం రేతస్తస్య మహాత్మనః .
తాని రూప్యస్య హేమ్నశ్చ క్షేత్రాణ్యాసన్ మహీపతే
8-12-34
సరిత్సరఃసు శైలేషు వనేషూపవనేషు చ .
యత్ర క్వ చాసన్నృషయస్తత్ర సన్నిహితో హరః
8-12-35
స్కన్నే రేతసి సోఽపశ్యదాత్మానం దేవమాయయా .
జడీకృతం నృపశ్రేష్ఠ సన్న్యవర్తత కశ్మలాత్
8-12-36
అథావగతమాహాత్మ్య ఆత్మనో జగదాత్మనః .
అపరిజ్ఞేయవీర్యస్య న మేనే తదు హాద్భుతం
8-12-37
తమవిక్లవమవ్రీడమాలక్ష్య మధుసూదనః .
ఉవాచ పరమప్రీతో బిభ్రత్స్వాం పౌరుషీం తనుం
8-12-38
శ్రీభగవానువాచ
దిష్ట్యా త్వం విబుధశ్రేష్ఠ స్వాం నిష్ఠామాత్మనా స్థితః .
యన్మే స్త్రీరూపయా స్వైరం మోహితోఽప్యంగ మాయయా
8-12-39
కో ను మేఽతితరేన్మాయాం విషక్తస్త్వదృతే పుమాన్ .
తాంస్తాన్ విసృజతీం భావాన్ దుస్తరామకృతాత్మభిః
8-12-40
సేయం గుణమయీ మాయా న త్వామభిభవిష్యతి .
మయా సమేతా కాలేన కాలరూపేణ భాగశః
8-12-41
శ్రీశుక ఉవాచ
ఏవం భగవతా రాజన్ శ్రీవత్సాంకేన సత్కృతః .
ఆమంత్ర్య తం పరిక్రమ్య సగణః స్వాలయం యయౌ
8-12-42
ఆత్మాంశభూతాం తాం మాయాం భవానీం భగవాన్ భవః .
శంసతామృషిముఖ్యానాం ప్రీత్యాచష్టాథ భారత
8-12-43
అపి వ్యపశ్యస్త్వమజస్య మాయాం
పరస్య పుంసః పరదేవతాయాః .
అహం కలానామృషభో విముహ్యే
యయావశోఽన్యే కిముతాస్వతంత్రాః
8-12-44
యం మామపృచ్ఛస్త్వముపేత్య
యోగాత్సమాసహస్రాంత ఉపారతం వై .
స ఏష సాక్షాత్పురుషః పురాణో
న యత్ర కాలో విశతే న వేదః
8-12-45
శ్రీశుక ఉవాచ
ఇతి తేఽభిహితస్తాత విక్రమః శార్ఙ్గధన్వనః .
సింధోర్నిర్మథనే యేన ధృతః పృష్ఠే మహాచలః
8-12-46
ఏతన్ముహుః కీర్తయతోఽనుశృణ్వతో
న రిష్యతే జాతు సముద్యమః క్వచిత్ .
యదుత్తమశ్లోకగుణానువర్ణనం
సమస్తసంసారపరిశ్రమాపహం
8-12-47
అసదవిషయమంఘ్రిం భావగమ్యం ప్రపన్నా-
నమృతమమరవర్యానాశయత్సింధుమథ్యం .
కపటయువతివేషో మోహయన్ యః సురారీన్
తమహముపసృతానాం కామపూరం నతోఽస్మి
8-12-48
ఇతి శ్రీమద్భాగవతే మహాపురాణే పారమహంస్యాం సంహితాయా-
మష్టమస్కంధే శంకరమోహనం నామ ద్వాదశోఽధ్యాయః