అష్టమస్కంధః : చతుర్థోఽధ్యాయః - 4
8-4-1
శ్రీశుక ఉవాచ
తదా దేవర్షిగంధర్వా బ్రహ్మేశానపురోగమాః .
ముముచుః కుసుమాసారం శంసంతః కర్మ తద్ధరేః
8-4-2
నేదుర్దుందుభయో దివ్యా గంధర్వా ననృతుర్జగుః .
ఋషయశ్చారణాః సిద్ధాస్తుష్టువుః పురుషోత్తమం
8-4-3
యోఽసౌ గ్రాహః స వై సద్యః పరమాశ్చర్యరూపధృక్ .
ముక్తో దేవలశాపేన హూహూర్గంధర్వసత్తమః
8-4-4
ప్రణమ్య శిరసాధీశముత్తమశ్లోకమవ్యయం .
అగాయత యశోధామ కీర్తన్యగుణసత్కథం
8-4-5
సోఽనుకంపిత ఈశేన పరిక్రమ్య ప్రణమ్య తం .
లోకస్య పశ్యతో లోకం స్వమగాన్ముక్తకిల్బిషః
8-4-6
గజేంద్రో భగవత్స్పర్శాద్విముక్తోఽజ్ఞానబంధనాత్ .
ప్రాప్తో భగవతో రూపం పీతవాసాశ్చతుర్భుజః
8-4-7
స వై పూర్వమభూద్రాజా పాండ్యో ద్రవిడసత్తమః .
ఇంద్రద్యుమ్న ఇతి ఖ్యాతో విష్ణువ్రతపరాయణః
8-4-8
స ఏకదాఽఽరాధనకాల ఆత్మవాన్
గృహీతమౌనవ్రత ఈశ్వరం హరిం .
జటాధరస్తాపస ఆప్లుతోఽచ్యుతం
సమర్చయామాస కులాచలాశ్రమః
8-4-9
యదృచ్ఛయా తత్ర మహాయశా మునిః
సమాగమచ్ఛిష్యగణైః పరిశ్రితః .
తం వీక్ష్య తూష్ణీమకృతార్హణాదికం
రహస్యుపాసీనమృషిశ్చుకోప హ
8-4-10
తస్మా ఇమం శాపమదాదసాధురయం
దురాత్మాకృతబుద్ధిరద్య .
విప్రావమంతా విశతాం తమోఽన్ధం
యథా గజః స్తబ్ధమతిః స ఏవ
8-4-11
శ్రీశుక ఉవాచ
ఏవం శప్త్వా గతోఽగస్త్యో భగవాన్ నృప సానుగః .
ఇంద్రద్యుమ్నోఽపి రాజర్షిర్దిష్టం తదుపధారయన్
8-4-12
ఆపన్నః కౌంజరీం యోనిమాత్మస్మృతివినాశినీం .
హర్యర్చనానుభావేన యద్గజత్వేఽప్యనుస్మృతిః
8-4-13
ఏవం విమోక్ష్య గజయూథపమబ్జనాభస్తేనాపి
పార్షదగతిం గమితేన యుక్తః .
గంధర్వసిద్ధవిబుధైరుపగీయమానకర్మాద్భుతం
స్వభవనం గరుడాసనోఽగాత్
8-4-14
ఏతన్మహారాజ తవేరితో మయా
కృష్ణానుభావో గజరాజమోక్షణం .
స్వర్గ్యం యశస్యం కలికల్మషాపహం
దుఃస్వప్ననాశం కురువర్య శృణ్వతాం
8-4-15
యథానుకీర్తయంత్యేతచ్ఛ్రేయస్కామా ద్విజాతయః .
శుచయః ప్రాతరుత్థాయ దుఃస్వప్నాద్యుపశాంతయే
8-4-16
ఇదమాహ హరిః ప్రీతో గజేంద్రం కురుసత్తమ .
శృణ్వతాం సర్వభూతానాం సర్వభూతమయో విభుః
8-4-17
శ్రీభగవానువాచ
యే మాం త్వాం చ సరశ్చేదం గిరికందరకాననం .
వేత్రకీచకవేణూనాం గుల్మాని సురపాదపాన్
8-4-18
శృంగాణీమాని ధిష్ణ్యాని బ్రహ్మణో మే శివస్య చ .
క్షీరోదం మే ప్రియం ధామ శ్వేతద్వీపం చ భాస్వరం
8-4-19
శ్రీవత్సం కౌస్తుభం మాలాం గదాం కౌమోదకీం మమ .
సుదర్శనం పాంచజన్యం సుపర్ణం పతగేశ్వరం
8-4-20
శేషం చ మత్కలాం సూక్ష్మాం శ్రియం దేవీం మదాశ్రయాం .
బ్రహ్మాణం నారదమృషిం భవం ప్రహ్లాదమేవ చ
8-4-21
మత్స్యకూర్మవరాహాద్యైరవతారైః కృతాని మే .
కర్మాణ్యనంతపుణ్యాని సూర్యం సోమం హుతాశనం
8-4-22
ప్రణవం సత్యమవ్యక్తం గోవిప్రాన్ ధర్మమవ్యయం .
దాక్షాయణీర్ధర్మపత్నీః సోమకశ్యపయోరపి
8-4-23
గంగాం సరస్వతీం నందాం కాలిందీం సితవారణం .
ధ్రువం బ్రహ్మఋషీన్ సప్త పుణ్యశ్లోకాంశ్చ మానవాన్
8-4-24
ఉత్థాయాపరరాత్రాంతే ప్రయతాః సుసమాహితాః .
స్మరంతి మమ రూపాణి ముచ్యంతే హ్యేనసోఽఖిలాత్
8-4-25
యే మాం స్తువంత్యనేనాంగ ప్రతిబుధ్య నిశాత్యయే .
తేషాం ప్రాణాత్యయే చాహం దదామి విమలాం మతిం
8-4-26
శ్రీశుక ఉవాచ
ఇత్యాదిశ్య హృషీకేశః ప్రధ్మాయ జలజోత్తమం .
హర్షయన్ విబుధానీకమారురోహ ఖగాధిపం
8-4-27
ఇతి శ్రీమద్భాగవతే మహాపురాణే పారమహంస్యాం సంహితాయాం
అష్టమస్కంధే గజేంద్రమోక్షణం నామ చతుర్థోఽధ్యాయః