అష్టమస్కంధః : చతుర్దశోఽధ్యాయః - 14
8-14-1
రాజోవాచ
మన్వంతరేషు భగవన్ యథా మన్వాదయస్త్విమే .
యస్మిన్ కర్మణి యే యేన నియుక్తాస్తద్వదస్వ మే
8-14-2
ఋషిరువాచ
మనవో మనుపుత్రాశ్చ మునయశ్చ మహీపతే .
ఇంద్రాః సురగణాశ్చైవ సర్వే పురుషశాసనాః
8-14-3
యజ్ఞాదయో యాః కథితాః పౌరుష్యస్తనవో నృప .
మన్వాదయో జగద్యాత్రాం నయంత్యాభిః ప్రచోదితాః
8-14-4
చతుర్యుగాంతే కాలేన గ్రస్తాన్ శ్రుతిగణాన్ యథా .
తపసా ఋషయోఽపశ్యన్ యతో ధర్మః సనాతనః
8-14-5
తతో ధర్మం చతుష్పాదం మనవో హరిణోదితాః .
యుక్తాః సంచారయంత్యద్ధా స్వే స్వే కాలే మహీం నృప
8-14-6
పాలయంతి ప్రజాపాలా యావదంతం విభాగశః .
యజ్ఞభాగభుజో దేవా యే చ తత్రాన్వితాశ్చ తైః
8-14-7
ఇంద్రో భగవతా దత్తాం త్రైలోక్యశ్రియమూర్జితాం .
భుంజానః పాతి లోకాంస్త్రీన్ కామం లోకే ప్రవర్షతి
8-14-8
జ్ఞానం చానుయుగం బ్రూతే హరిః సిద్ధస్వరూపధృక్ .
ఋషిరూపధరః కర్మ యోగం యోగేశరూపధృక్
8-14-9
సర్గం ప్రజేశరూపేణ దస్యూన్ హన్యాత్స్వరాడ్వపుః .
కాలరూపేణ సర్వేషామభావాయ పృథగ్గుణః
8-14-10
స్తూయమానో జనైరేభిర్మాయయా నామరూపయా .
విమోహితాత్మభిర్నానాదర్శనైర్న చ దృశ్యతే
8-14-11
ఏతత్కల్పవికల్పస్య ప్రమాణం పరికీర్తితం .
యత్ర మన్వంతరాణ్యాహుశ్చతుర్దశ పురావిదః
8-14-12
ఇతి శ్రీమద్భాగవతే మహాపురాణే పారమహంస్యాం సంహితాయా-
మష్టమస్కంధే చతుర్దశోఽధ్యాయః