అష్టమస్కంధః : అష్టమోఽధ్యాయః -8
8-8-1
శ్రీశుక ఉవాచ
పీతే గరే వృషాంకేణ ప్రీతాస్తేఽమరదానవాః .
మమంథుస్తరసా సింధుం హవిర్ధానీ తతోఽభవత్
8-8-2
తామగ్నిహోత్రీమృషయో జగృహుర్బ్రహ్మవాదినః .
యజ్ఞస్య దేవయానస్య మేధ్యాయ హవిషే నృప
8-8-3
తత ఉచ్చైఃశ్రవా నామ హయోఽభూచ్చంద్రపాండురః .
తస్మిన్ బలిః స్పృహాం చక్రే నేంద్ర ఈశ్వరశిక్షయా
8-8-4
తత ఐరావతో నామ వారణేంద్రో వినిర్గతః .
దంతైశ్చతుర్భిః శ్వేతాద్రేర్హరన్ భగవతో మహిం
8-8-5
(ఐరావణాదయస్త్వష్టౌ దిగ్గజా అభవంస్తతః .
అభ్రప్రభృతయోఽష్టౌ చ కరిణ్యస్త్వభవన్ నృప
కౌస్తుభాఖ్యమభూద్రత్నం పద్మరాగో మహోదధేః .
తస్మిన్ హరిః స్పృహాం చక్రే వక్షోఽలంకరణే మణౌ
8-8-6
తతోఽభవత్పారిజాతః సురలోకవిభూషణం .
పూరయత్యర్థినో యోఽర్థైః శశ్వద్భువి యథా భవాన్
8-8-7
తతశ్చాప్సరసో జాతా నిష్కకంఠ్యః సువాససః .
రమణ్యః స్వర్గిణాం వల్గుగతిలీలావలోకనైః
8-8-8
తతశ్చావిరభూత్సాక్షాచ్ఛ్రీ రమా భగవత్పరా .
రంజయంతీ దిశః కాంత్యా విద్యుత్సౌదామనీ యథా
8-8-9
తస్యాం చక్రుః స్పృహాం సర్వే ససురాసురమానవాః .
రూపౌదార్యవయోవర్ణమహిమాక్షిప్తచేతసః
8-8-10
తస్యా ఆసనమానిన్యే మహేంద్రో మహదద్భుతం .
మూర్తిమత్యః సరిచ్ఛ్రేష్ఠా హేమకుంభైర్జలం శుచి
8-8-11
ఆభిషేచనికా భూమిరాహరత్సకలౌషధీః .
గావః పంచ పవిత్రాణి వసంతో మధుమాధవౌ
8-8-12
ఋషయః కల్పయాంచక్రురభిషేకం యథావిధి .
జగుర్భద్రాణి గంధర్వా నట్యశ్చ ననృతుర్జగుః
8-8-13
మేఘా మృదంగపణవమురజానకగోముఖాన్ .
వ్యనాదయన్ శంఖవేణువీణాస్తుములనిఃస్వనాన్
8-8-14
తతోఽభిషిషిచుర్దేవీం శ్రియం పద్మకరాం సతీం .
దిగిభాః పూర్ణకలశైః సూక్తవాక్యైర్ద్విజేరితైః
8-8-15
సముద్రః పీతకౌశేయవాససీ సముపాహరత్ .
వరుణః స్రజం వైజయంతీం మధునా మత్తషట్ పదాం
8-8-16
భూషణాని విచిత్రాణి విశ్వకర్మా ప్రజాపతిః .
హారం సరస్వతీ పద్మమజో నాగాశ్చ కుండలే
8-8-17
తతః కృతస్వస్త్యయనోత్పలస్రజం
నదద్ద్విరేఫాం పరిగృహ్య పాణినా .
చచాల వక్త్రం సుకపోలకుండలం
సవ్రీడహాసం దధతీ సుశోభనం
8-8-18
స్తనద్వయం చాతికృశోదరీ సమం
నిరంతరం చందనకుంకుమోక్షితం .
తతస్తతో నూపురవల్గుశింజితై-
ర్విసర్పతీ హేమలతేవ సా బభౌ
8-8-19
విలోకయంతీ నిరవద్యమాత్మనః
పదం ధ్రువం చావ్యభిచారిసద్గుణం .
గంధర్వయక్షాసురసిద్ధచారణ-
త్రైవిష్టపేయాదిషు నాన్వవిందత
8-8-20
నూనం తపో యస్య న మన్యునిర్జయో
జ్ఞానం క్వచిత్తచ్చ న సంగవర్జితం .
కశ్చిన్మహాంస్తస్య న కామనిర్జయః
స ఈశ్వరః కిం పరతో వ్యపాశ్రయః
8-8-21
ధర్మః క్వచిత్తత్ర న భూతసౌహృదం
త్యాగః క్వచిత్తత్ర న ముక్తికారణం .
వీర్యం న పుంసోఽస్త్యజవేగనిష్కృతం
న హి ద్వితీయో గుణసంగవర్జితః
8-8-22
క్వచిచ్చిరాయుర్న హి శీలమంగలం
క్వచిత్తదప్యస్తి న వేద్యమాయుషః .
యత్రోభయం కుత్ర చ సోఽప్యమంగలః
సుమంగలః కశ్చ న కాంక్షతే హి మాం
8-8-23
ఏవం విమృశ్యావ్యభిచారిసద్గుణైర్వరం
నిజైకాశ్రయతాగుణాశ్రయం .
వవ్రే వరం సర్వగుణైరపేక్షితం
రమా ముకుందం నిరపేక్షమీప్సితం
8-8-24
తస్యాంసదేశ ఉశతీం నవకంజమాలాం
మాద్యన్మధువ్రతవరూథగిరోపఘుష్టాం .
తస్థౌ నిధాయ నికటే తదురః స్వధామ
సవ్రీడహాసవికసన్నయనేన యాతా
8-8-25
తస్యాః శ్రియస్త్రిజగతో జనకో జనన్యా
వక్షో నివాసమకరోత్పరమం విభూతేః .
శ్రీః స్వాః ప్రజాః సకరుణేన నిరీక్షణేన
యత్ర స్థితైధయత సాధిపతీంస్త్రిలోకాన్
8-8-26
శంఖతూర్యమృదంగానాం వాదిత్రాణాం పృథుః స్వనః .
దేవానుగానాం సస్త్రీణాం నృత్యతాం గాయతామభూత్
8-8-27
బ్రహ్మరుద్రాంగిరోముఖ్యాః సర్వే విశ్వసృజో విభుం .
ఈడిరేఽవితథైర్మంత్రైస్తల్లింగైః పుష్పవర్షిణః
8-8-28
శ్రియా విలోకితా దేవాః సప్రజాపతయః ప్రజాః .
శీలాదిగుణసంపన్నా లేభిరే నిర్వృతిం పరాం
8-8-29
నిఃసత్త్వా లోలుపా రాజన్ నిరుద్యోగా గతత్రపాః .
యదా చోపేక్షితా లక్ష్మ్యా బభూవుర్దైత్యదానవాః
8-8-30
అథాసీద్వారుణీ దేవీ కన్యా కమలలోచనా .
అసురా జగృహుస్తాం వై హరేరనుమతేన తే
8-8-31
అథోదధేర్మథ్యమానాత్కాశ్యపైరమృతార్థిభిః .
ఉదతిష్ఠన్మహారాజ పురుషః పరమాద్భుతః
8-8-32
దీర్ఘపీవరదోర్దండః కంబుగ్రీవోఽరుణేక్షణః .
శ్యామలస్తరుణః స్రగ్వీ సర్వాభరణభూషితః
8-8-33
పీతవాసా మహోరస్కః సుమృష్టమణికుండలః .
స్నిగ్ధకుంచితకేశాంతః సుభగః సింహవిక్రమః
8-8-34
అమృతాపూర్ణకలశం బిభ్రద్వలయభూషితః .
స వై భగవతః సాక్షాద్విష్ణోరంశాంశసంభవః
8-8-35
ధన్వంతరిరితి ఖ్యాత ఆయుర్వేదదృగిజ్యభాక్ .
తమాలోక్యాసురాః సర్వే కలశం చామృతాభృతం
8-8-36
లిప్సంతః సర్వవస్తూని కలశం తరసాహరన్ .
నీయమానేఽసురైస్తస్మిన్ కలశేఽమృతభాజనే
8-8-37
విషణ్ణమనసో దేవా హరిం శరణమాయయుః .
ఇతి తద్దైన్యమాలోక్య భగవాన్ భృత్యకామకృత్ .
మా ఖిద్యత మిథోఽర్థం వః సాధయిష్యే స్వమాయయా
8-8-38
మిథః కలిరభూత్తేషాం తదర్థే తర్షచేతసాం .
అహం పూర్వమహం పూర్వం న త్వం న త్వమితి ప్రభో
8-8-39
దేవాః స్వం భాగమర్హంతి యే తుల్యాయాసహేతవః .
సత్రయాగ ఇవైతస్మిన్నేష ధర్మః సనాతనః
8-8-40
ఇతి స్వాన్ ప్రత్యషేధన్ వై దైతేయా జాతమత్సరాః .
దుర్బలాః ప్రబలాన్ రాజన్ గృహీతకలశాన్ ముహుః
8-8-41
ఏతస్మిన్నంతరే విష్ణుః సర్వోపాయవిదీశ్వరః .
యోషిద్రూపమనిర్దేశ్యం దధార పరమాద్భుతం
8-8-42
ప్రేక్షణీయోత్పలశ్యామం సర్వావయవసుందరం .
సమానకర్ణాభరణం సుకపోలోన్నసాననం
8-8-43
నవయౌవననిర్వృత్తస్తనభారకృశోదరం .
ముఖామోదానురక్తాలి ఝంకారోద్విగ్నలోచనం
8-8-44
బిభ్రత్స్వకేశభారేణ మాలాముత్ఫుల్లమల్లికాం .
సుగ్రీవకంఠాభరణం సుభుజాంగదభూషితం
8-8-45
విరజాంబరసంవీతనితంబద్వీపశోభయా .
కాంచ్యా ప్రవిలసద్వల్గుచలచ్చరణనూపురం
8-8-46
సవ్రీడస్మితవిక్షిప్తభ్రూవిలాసావలోకనైః .
దైత్యయూథపచేతఃసు కామముద్దీపయన్ ముహుః
8-8-47
ఇతి శ్రీమద్భాగవతే మహాపురాణే పారమహంస్యాం సంహితాయాం
అష్టమస్కంధే భగవన్మాయోపలంభనం నామాష్టమోఽధ్యాయః