పోతన తెలుగు భాగవతము

స్తుతులు స్తోత్రాలు : ధర్మరాజు కృష్ణస్తుతి (శ్రేయస్కరం)

• Print
• Email
• Share on FaceBook
• Share on Twitter

  1
"సరసిజనాభ! భవత్పద
సరసీరుహ మాశ్రయించు జను లతిసౌఖ్య
స్ఫురణం బొలుపారుచు భువిఁ
జరియింపరె! భక్త పారిజాత! మురారీ!

  2
సుమహిత స్వప్న సుషుప్తి జాగరములన్-
  మూఁడవస్థలఁ బాసి వాఁడి మిగిలి
వెలినుందు లో నుందు; విశ్వమై యుందువు-
  విశ్వంబు నీయందు వెలుఁగుచుండు;
భవదీయ మహిమచేఁ బాటిల్లు భువనంబు-
  లుదయించు నొక వేళ నుడిగి మఁడుగు;
సంచి తాఖండిత జ్ఞానివై యొప్పుచు-
  నవిహత యోగమాయాత్మఁ దనరి

  3
దురితదూరులు నిత్యముక్తులకుఁ జెంద
నలవియై పెంపు దీపింతు వంబుజాక్ష!
ఘనకృపాకర! నఖిలవికారదూర!
నీకు మ్రొక్కెద సర్వలోకైకనాథ!"

  4
ఇతి బమ్మెఱ పోతనామాత్య కృత శ్రీమత్తెలుగు భాగవత దశమస్కంధ ఉత్తరభాగ అంతర్గత ధర్మరాజు కృష్ణస్తుతి (శ్రేయస్కరం)