అష్టమ స్కంధము : అధ్యాయము – 15
- ఉపకరణాలు:
శ్రీరాజోవాచ
బలేః పదత్రయం భూమేః కస్మాద్ధరిరయాచత
భూతేశ్వరః కృపణవల్లబ్ధార్థోऽపి బబన్ధ తమ్
- ఉపకరణాలు:
ఏతద్వేదితుమిచ్ఛామో మహత్కౌతూహలం హి నః
యజ్ఞేశ్వరస్య పూర్ణస్య బన్ధనం చాప్యనాగసః
- ఉపకరణాలు:
శ్రీశుక ఉవాచ
పరాజితశ్రీరసుభిశ్చ హాపితో హీన్ద్రేణ రాజన్భృగుభిః స జీవితః
సర్వాత్మనా తానభజద్భృగూన్బలిః శిష్యో మహాత్మార్థనివేదనేన
- ఉపకరణాలు:
తం బ్రాహ్మణా భృగవః ప్రీయమాణా అయాజయన్విశ్వజితా త్రిణాకమ్
జిగీషమాణం విధినాభిషిచ్య మహాభిషేకేణ మహానుభావాః
- ఉపకరణాలు:
తతో రథః కాఞ్చనపట్టనద్ధో హయాశ్చ హర్యశ్వతురఙ్గవర్ణాః
ధ్వజశ్చ సింహేన విరాజమానో హుతాశనాదాస హవిర్భిరిష్టాత్
- ఉపకరణాలు:
ధనుశ్చ దివ్యం పురటోపనద్ధం తూణావరిక్తౌ కవచం చ దివ్యమ్
పితామహస్తస్య దదౌ చ మాలామమ్లానపుష్పాం జలజం చ శుక్రః
- ఉపకరణాలు:
ఏవం స విప్రార్జితయోధనార్థస్తైః కల్పితస్వస్త్యయనోऽథ విప్రాన్
ప్రదక్షిణీకృత్య కృతప్రణామః ప్రహ్రాదమామన్త్ర్య నమశ్చకార
- ఉపకరణాలు:
అథారుహ్య రథం దివ్యం భృగుదత్తం మహారథః
సుస్రగ్ధరోऽథ సన్నహ్య ధన్వీ ఖడ్గీ ధృతేషుధిః
- ఉపకరణాలు:
హేమాఙ్గదలసద్బాహుః స్ఫురన్మకరకుణ్డలః
రరాజ రథమారూఢో ధిష్ణ్యస్థ ఇవ హవ్యవాట్
- ఉపకరణాలు:
తుల్యైశ్వర్యబలశ్రీభిః స్వయూథైర్దైత్యయూథపైః
పిబద్భిరివ ఖం దృగ్భిర్దహద్భిః పరిధీనివ
- ఉపకరణాలు:
వృతో వికర్షన్మహతీమాసురీం ధ్వజినీం విభుః
యయావిన్ద్రపురీం స్వృద్ధాం కమ్పయన్నివ రోదసీ
- ఉపకరణాలు:
రమ్యాముపవనోద్యానైః శ్రీమద్భిర్నన్దనాదిభిః
కూజద్విహఙ్గమిథునైర్గాయన్మత్తమధువ్రతైః
ప్రవాలఫలపుష్పోరు భారశాఖామరద్రుమైః
- ఉపకరణాలు:
హంససారసచక్రాహ్వ కారణ్డవకులాకులాః
నలిన్యో యత్ర క్రీడన్తి ప్రమదాః సురసేవితాః
- ఉపకరణాలు:
ఆకాశగఙ్గయా దేవ్యా వృతాం పరిఖభూతయా
ప్రాకారేణాగ్నివర్ణేన సాట్టాలేనోన్నతేన చ
- ఉపకరణాలు:
రుక్మపట్టకపాటైశ్చ ద్వారైః స్ఫటికగోపురైః
జుష్టాం విభక్తప్రపథాం విశ్వకర్మవినిర్మితామ్
- ఉపకరణాలు:
సభాచత్వరరథ్యాఢ్యాం విమానైర్న్యర్బుదైర్యుతామ్
శృఙ్గాటకైర్మణిమయైర్వజ్రవిద్రుమవేదిభిః
- ఉపకరణాలు:
యత్ర నిత్యవయోరూపాః శ్యామా విరజవాససః
భ్రాజన్తే రూపవన్నార్యో హ్యర్చిర్భిరివ వహ్నయః
- ఉపకరణాలు:
సురస్త్రీకేశవిభ్రష్ట నవసౌగన్ధికస్రజామ్
యత్రామోదముపాదాయ మార్గ ఆవాతి మారుతః
- ఉపకరణాలు:
హేమజాలాక్షనిర్గచ్ఛద్ధూమేనాగురుగన్ధినా
పాణ్డురేణ ప్రతిచ్ఛన్న మార్గే యాన్తి సురప్రియాః
- ఉపకరణాలు:
ముక్తావితానైర్మణిహేమకేతుభిర్నానాపతాకావలభీభిరావృతామ్
శిఖణ్డిపారావతభృఙ్గనాదితాం వైమానికస్త్రీకలగీతమఙ్గలామ్
- ఉపకరణాలు:
మృదఙ్గశఙ్ఖానకదున్దుభిస్వనైః సతాలవీణామురజేష్టవేణుభిః
నృత్యైః సవాద్యైరుపదేవగీతకైర్మనోరమాం స్వప్రభయా జితప్రభామ్
- ఉపకరణాలు:
యాం న వ్రజన్త్యధర్మిష్ఠాః ఖలా భూతద్రుహః శఠాః
మానినః కామినో లుబ్ధా ఏభిర్హీనా వ్రజన్తి యత్
- ఉపకరణాలు:
తాం దేవధానీం స వరూథినీపతిర్బహిః సమన్తాద్రురుధే పృతన్యయా
ఆచార్యదత్తం జలజం మహాస్వనం దధ్మౌ ప్రయుఞ్జన్భయమిన్ద్రయోషితామ్
- ఉపకరణాలు:
మఘవాంస్తమభిప్రేత్య బలేః పరమముద్యమమ్
సర్వదేవగణోపేతో గురుమేతదువాచ హ
- ఉపకరణాలు:
భగవన్నుద్యమో భూయాన్బలేర్నః పూర్వవైరిణః
అవిషహ్యమిమం మన్యే కేనాసీత్తేజసోర్జితః
- ఉపకరణాలు:
నైనం కశ్చిత్కుతో వాపి ప్రతివ్యోఢుమధీశ్వరః
పిబన్నివ ముఖేనేదం లిహన్నివ దిశో దశ
దహన్నివ దిశో దృగ్భిః సంవర్తాగ్నిరివోత్థితః
- ఉపకరణాలు:
బ్రూహి కారణమేతస్య దుర్ధర్షత్వస్య మద్రిపోః
ఓజః సహో బలం తేజో యత ఏతత్సముద్యమః
- ఉపకరణాలు:
శ్రీగురురువాచ
జానామి మఘవన్ఛత్రోరున్నతేరస్య కారణమ్
శిష్యాయోపభృతం తేజో భృగుభిర్బ్రహ్మవాదిభిః
- ఉపకరణాలు:
ఓజస్వినం బలిం జేతుం న సమర్థోऽస్తి కశ్చన
భవద్విధో భవాన్వాపి వర్జయిత్వేశ్వరం హరిమ్
విజేష్యతి న కోऽప్యేనం బ్రహ్మతేజఃసమేధితమ్
నాస్య శక్తః పురః స్థాతుం కృతాన్తస్య యథా జనాః
- ఉపకరణాలు:
తస్మాన్నిలయముత్సృజ్య యూయం సర్వే త్రివిష్టపమ్
యాత కాలం ప్రతీక్షన్తో యతః శత్రోర్విపర్యయః
- ఉపకరణాలు:
ఏష విప్రబలోదర్కః సమ్ప్రత్యూర్జితవిక్రమః
తేషామేవాపమానేన సానుబన్ధో వినఙ్క్ష్యతి
- ఉపకరణాలు:
ఏవం సుమన్త్రితార్థాస్తే గురుణార్థానుదర్శినా
హిత్వా త్రివిష్టపం జగ్ముర్గీర్వాణాః కామరూపిణః
- ఉపకరణాలు:
దేవేష్వథ నిలీనేషు బలిర్వైరోచనః పురీమ్
దేవధానీమధిష్ఠాయ వశం నిన్యే జగత్త్రయమ్
- ఉపకరణాలు:
తం విశ్వజయినం శిష్యం భృగవః శిష్యవత్సలాః
శతేన హయమేధానామనువ్రతమయాజయన్
- ఉపకరణాలు:
తతస్తదనుభావేన భువనత్రయవిశ్రుతామ్
కీర్తిం దిక్షువితన్వానః స రేజ ఉడురాడివ
- ఉపకరణాలు:
బుభుజే చ శ్రియం స్వృద్ధాం ద్విజదేవోపలమ్భితామ్
కృతకృత్యమివాత్మానం మన్యమానో మహామనాః