పోతన తెలుగు భాగవతము

3-1-శ్లో.

బ్రహ్మోవాచ
ఇతి తద్గృణతాం తేషాం మునీనాం యోగధర్మిణామ్
ప్రతినన్ద్య జగాదేదం వికుణ్ఠనిలయో విభుః

3-2-శ్లో.

శ్రీభగవానువాచ
ఏతౌ తౌ పార్షదౌ మహ్యం జయో విజయ ఏవ చ
కదర్థీకృత్య మాం యద్వో బహ్వక్రాతామతిక్రమమ్

3-3-శ్లో.

యస్త్వేతయోర్ధృతో దణ్డో భవద్భిర్మామనువ్రతైః
స ఏవానుమతోऽస్మాభిర్మునయో దేవహేలనాత్

3-4-శ్లో.

తద్వః ప్రసాదయామ్యద్య బ్రహ్మ దైవం పరం హి మే
తద్ధీత్యాత్మకృతం మన్యే యత్స్వపుమ్భిరసత్కృతాః

3-5-శ్లో.

యన్నామాని చ గృహ్ణాతి లోకో భృత్యే కృతాగసి
సోऽసాధువాదస్తత్కీర్తిం హన్తి త్వచమివామయః

3-6-శ్లో.

యస్యామృతామలయశఃశ్రవణావగాహః
సద్యః పునాతి జగదాశ్వపచాద్వికుణ్ఠః
సోऽహం భవద్భ్య ఉపలబ్ధసుతీర్థకీర్తిశ్
ఛిన్ద్యాం స్వబాహుమపి వః ప్రతికూలవృత్తిమ్

3-7-శ్లో.

యత్సేవయా చరణపద్మపవిత్రరేణుం
సద్యః క్షతాఖిలమలం ప్రతిలబ్ధశీలమ్
న శ్రీర్విరక్తమపి మాం విజహాతి యస్యాః
ప్రేక్షాలవార్థ ఇతరే నియమాన్వహన్తి

3-8-శ్లో.

నాహం తథాద్మి యజమానహవిర్వితానే
శ్చ్యోతద్ఘృతప్లుతమదన్హుతభుఙ్ముఖేన
యద్బ్రాహ్మణస్య ముఖతశ్చరతోऽనుఘాసం
తుష్టస్య మయ్యవహితైర్నిజకర్మపాకైః

3-9-శ్లో.

యేషాం బిభర్మ్యహమఖణ్డవికుణ్ఠయోగ
మాయావిభూతిరమలాఙ్ఘ్రిరజః కిరీటైః
విప్రాంస్తు కో న విషహేత యదర్హణామ్భః
సద్యః పునాతి సహచన్ద్రలలామలోకాన్

3-10-శ్లో.

యే మే తనూర్ద్విజవరాన్దుహతీర్మదీయా
భూతాన్యలబ్ధశరణాని చ భేదబుద్ధ్యా
ద్రక్ష్యన్త్యఘక్షతదృశో హ్యహిమన్యవస్తాన్
గృధ్రా రుషా మమ కుషన్త్యధిదణ్డనేతుః

3-11-శ్లో.

యే బ్రాహ్మణాన్మయి ధియా క్షిపతోऽర్చయన్తస్
తుష్యద్ధృదః స్మితసుధోక్షితపద్మవక్త్రాః
వాణ్యానురాగకలయాత్మజవద్గృణన్తః
సమ్బోధయన్త్యహమివాహముపాహృతస్తైః

3-12-శ్లో.

తన్మే స్వభర్తురవసాయమలక్షమాణౌ
యుష్మద్వ్యతిక్రమగతిం ప్రతిపద్య సద్యః
భూయో మమాన్తికమితాం తదనుగ్రహో మే
యత్కల్పతామచిరతో భృతయోర్వివాసః

3-13-శ్లో.

బ్రహ్మోవాచ
అథ తస్యోశతీం దేవీమృషికుల్యాం సరస్వతీమ్
నాస్వాద్య మన్యుదష్టానాం తేషామాత్మాప్యతృప్యత

3-14-శ్లో.

సతీం వ్యాదాయ శృణ్వన్తో లఘ్వీం గుర్వర్థగహ్వరామ్
విగాహ్యాగాధగమ్భీరాం న విదుస్తచ్చికీర్షితమ్

3-15-శ్లో.

తే యోగమాయయారబ్ధ పారమేష్ఠ్యమహోదయమ్
ప్రోచుః ప్రాఞ్జలయో విప్రాః ప్రహృష్టాః క్షుభితత్వచః

3-16-శ్లో.

ఋషయ ఊచుః
న వయం భగవన్విద్మస్తవ దేవ చికీర్షితమ్
కృతో మేऽనుగ్రహశ్చేతి యదధ్యక్షః ప్రభాషసే

3-17-శ్లో.

బ్రహ్మణ్యస్య పరం దైవం బ్రాహ్మణాః కిల తే ప్రభో
విప్రాణాం దేవదేవానాం భగవానాత్మదైవతమ్

3-18-శ్లో.

త్వత్తః సనాతనో ధర్మో రక్ష్యతే తనుభిస్తవ
ధర్మస్య పరమో గుహ్యో నిర్వికారో భవాన్మతః

3-19-శ్లో.

తరన్తి హ్యఞ్జసా మృత్యుం నివృత్తా యదనుగ్రహాత్
యోగినః స భవాన్కిం స్విదనుగృహ్యేత యత్పరైః

3-20-శ్లో.

యం వై విభూతిరుపయాత్యనువేలమన్యైర్
అర్థార్థిభిః స్వశిరసా ధృతపాదరేణుః
ధన్యార్పితాఙ్ఘ్రితులసీనవదామధామ్నో
లోకం మధువ్రతపతేరివ కామయానా

3-21-శ్లో.

యస్తాం వివిక్తచరితైరనువర్తమానాం
నాత్యాద్రియత్పరమభాగవతప్రసఙ్గః
స త్వం ద్విజానుపథపుణ్యరజఃపునీతః
శ్రీవత్సలక్ష్మ కిమగా భగభాజనస్త్వమ్

3-22-శ్లో.

ధర్మస్య తే భగవతస్త్రియుగ త్రిభిః స్వైః
పద్భిశ్చరాచరమిదం ద్విజదేవతార్థమ్
నూనం భృతం తదభిఘాతి రజస్తమశ్చ
సత్త్వేన నో వరదయా తనువా నిరస్య

3-23-శ్లో.

న త్వం ద్విజోత్తమకులం యది హాత్మగోపం
గోప్తా వృషః స్వర్హణేన ససూనృతేన
తర్హ్యేవ నఙ్క్ష్యతి శివస్తవ దేవ పన్థా
లోకోऽగ్రహీష్యదృషభస్య హి తత్ప్రమాణమ్

3-24-శ్లో.

తత్తేऽనభీష్టమివ సత్త్వనిధేర్విధిత్సోః
క్షేమం జనాయ నిజశక్తిభిరుద్ధృతారేః
నైతావతా త్ర్యధిపతేర్బత విశ్వభర్తుస్
తేజః క్షతం త్వవనతస్య స తే వినోదః

3-25-శ్లో.

యం వానయోర్దమమధీశ భవాన్విధత్తే
వృత్తిం ను వా తదనుమన్మహి నిర్వ్యలీకమ్
అస్మాసు వా య ఉచితో ధ్రియతాం స దణ్డో
యేऽనాగసౌ వయమయుఙ్క్ష్మహి కిల్బిషేణ

3-26-శ్లో.

శ్రీభగవానువాచ
ఏతౌ సురేతరగతిం ప్రతిపద్య సద్యః
సంరమ్భసమ్భృతసమాధ్యనుబద్ధయోగౌ
భూయః సకాశముపయాస్యత ఆశు యో వః
శాపో మయైవ నిమితస్తదవేత విప్రాః

3-27-శ్లో.

బ్రహ్మోవాచ
అథ తే మునయో దృష్ట్వా నయనానన్దభాజనమ్
వైకుణ్ఠం తదధిష్ఠానం వికుణ్ఠం చ స్వయంప్రభమ్

3-28-శ్లో.

భగవన్తం పరిక్రమ్య ప్రణిపత్యానుమాన్య చ
ప్రతిజగ్ముః ప్రముదితాః శంసన్తో వైష్ణవీం శ్రియమ్

3-29-శ్లో.

భగవాననుగావాహ యాతం మా భైష్టమస్తు శమ్
బ్రహ్మతేజః సమర్థోऽపి హన్తుం నేచ్ఛే మతం తు మే

3-30-శ్లో.

ఏతత్పురైవ నిర్దిష్టం రమయా క్రుద్ధయా యదా
పురాపవారితా ద్వారి విశన్తీ మయ్యుపారతే

3-31-శ్లో.

మయి సంరమ్భయోగేన నిస్తీర్య బ్రహ్మహేలనమ్
ప్రత్యేష్యతం నికాశం మే కాలేనాల్పీయసా పునః

3-32-శ్లో.

ద్వాఃస్థావాదిశ్య భగవాన్విమానశ్రేణిభూషణమ్
సర్వాతిశయయా లక్ష్మ్యా జుష్టం స్వం ధిష్ణ్యమావిశత్

3-33-శ్లో.

తౌ తు గీర్వాణఋషభౌ దుస్తరాద్ధరిలోకతః
హతశ్రియౌ బ్రహ్మశాపాదభూతాం విగతస్మయౌ

3-34-శ్లో.

తదా వికుణ్ఠధిషణాత్తయోర్నిపతమానయోః
హాహాకారో మహానాసీద్విమానాగ్ర్యేషు పుత్రకాః

3-35-శ్లో.

తావేవ హ్యధునా ప్రాప్తౌ పార్షదప్రవరౌ హరేః
దితేర్జఠరనిర్విష్టం కాశ్యపం తేజ ఉల్బణమ్

3-36-శ్లో.

తయోరసురయోరద్య తేజసా యమయోర్హి వః
ఆక్షిప్తం తేజ ఏతర్హి భగవాంస్తద్విధిత్సతి

3-37-శ్లో.

విశ్వస్య యః స్థితిలయోద్భవహేతురాద్యో
యోగేశ్వరైరపి దురత్యయయోగమాయః
క్షేమం విధాస్యతి స నో భగవాంస్త్ర్యధీశస్
తత్రాస్మదీయవిమృశేన కియానిహార్థః