పోతన తెలుగు భాగవతము

11-1-శ్లో.

శ్రీద్ధవ ఉవాచ
విధిశ్చ ప్రతిషేధశ్చ నిగమో హీశ్వరస్య తే
అవేక్షతేऽరవిణ్డాక్ష గుణం దోషం చ కర్మణామ్

11-2-శ్లో.

వర్ణాశ్రమవికల్పం చ ప్రతిలోమానులోమజమ్
ద్రవ్యదేశవయఃకాలాన్స్వర్గం నరకమేవ చ

11-3-శ్లో.

గుణదోషభిదాదృష్టిమన్తరేణ వచస్తవ
నిఃశ్రేయసం కథం నౄణాం నిషేధవిధిలక్షణమ్

11-4-శ్లో.

పితృదేవమనుష్యానాం వేదశ్చక్షుస్తవేశ్వర
శ్రేయస్త్వనుపలబ్ధేऽర్థే సాధ్యసాధనయోరపి

11-5-శ్లో.

గుణదోషభిదాదృష్టిర్నిగమాత్తే న హి స్వతః
నిగమేనాపవాదశ్చ భిదాయా ఇతి హ భ్రమః

11-6-శ్లో.

శ్రీభగవానువాచ
యోగాస్త్రయో మయా ప్రోక్తా నౄణాం శ్రేయోవిధిత్సయా
జ్ఞానం కర్మ చ భక్తిశ్చ నోపాయోऽన్యోऽస్తి కుత్రచిత్

11-7-శ్లో.

నిర్విణ్ణానాం జ్ఞానయోగో న్యాసినామిహ కర్మసు
తేష్వనిర్విణ్ణచిత్తానాం కర్మయోగస్తు కామినామ్

11-8-శ్లో.

యదృచ్ఛయా మత్కథాదౌ జాతశ్రద్ధస్తు యః పుమాన్
న నిర్విణ్ణో నాతిసక్తో భక్తియోగోऽస్య సిద్ధిదః

11-9-శ్లో.

తావత్కర్మాణి కుర్వీత న నిర్విద్యేత యావతా
మత్కథాశ్రవణాదౌ వా శ్రద్ధా యావన్న జాయతే

11-10-శ్లో.

స్వధర్మస్థో యజన్యజ్ఞైరనాశీఃకామ ఉద్ధవ
న యాతి స్వర్గనరకౌ యద్యన్యన్న సమాచరేత్

11-11-శ్లో.

అస్మింల్లోకే వర్తమానః స్వధర్మస్థోऽనఘః శుచిః
జ్ఞానం విశుద్ధమాప్నోతి మద్భక్తిం వా యదృచ్ఛయా

11-12-శ్లో.

స్వర్గిణోऽప్యేతమిచ్ఛన్తి లోకం నిరయిణస్తథా
సాధకం జ్ఞానభక్తిభ్యాముభయం తదసాధకమ్

11-13-శ్లో.

న నరః స్వర్గతిం కాఙ్క్షేన్నారకీం వా విచక్షణః
నేమం లోకం చ కాఙ్క్షేత దేహావేశాత్ప్రమాద్యతి

11-14-శ్లో.

ఏతద్విద్వాన్పురా మృత్యోరభవాయ ఘటేత సః
అప్రమత్త ఇదం జ్ఞాత్వా మర్త్యమప్యర్థసిద్ధిదమ్

11-15-శ్లో.

ఛిద్యమానం యమైరేతైః కృతనీడం వనస్పతిమ్
ఖగః స్వకేతముత్సృజ్య క్షేమం యాతి హ్యలమ్పటః

11-16-శ్లో.

అహోరాత్రైశ్ఛిద్యమానం బుద్ధ్వాయుర్భయవేపథుః
ముక్తసఙ్గః పరం బుద్ధ్వా నిరీహ ఉపశామ్యతి

11-17-శ్లో.

నృదేహమాద్యం సులభం సుదుర్లభం
ప్లవం సుకల్పం గురుకర్ణధారమ్
మయానుకూలేన నభస్వతేరితం
పుమాన్భవాబ్ధిం న తరేత్స ఆత్మహా

11-18-శ్లో.

యదారమ్భేషు నిర్విణ్ణో విరక్తః సంయతేన్ద్రియః
అభ్యాసేనాత్మనో యోగీ ధారయేదచలం మనః

11-19-శ్లో.

ధార్యమాణం మనో యర్హి భ్రామ్యదశ్వనవస్థితమ్
అతన్ద్రితోऽనురోధేన మార్గేణాత్మవశం నయేత్

11-20-శ్లో.

మనోగతిం న విసృజేజ్జితప్రాణో జితేన్ద్రియః
సత్త్వసమ్పన్నయా బుద్ధ్యా మన ఆత్మవశం నయేత్

11-21-శ్లో.

ఏష వై పరమో యోగో మనసః సఙ్గ్రహః స్మృతః
హృదయజ్ఞత్వమన్విచ్ఛన్దమ్యస్యేవార్వతో ముహుః

11-22-శ్లో.

సాఙ్ఖ్యేన సర్వభావానాం ప్రతిలోమానులోమతః
భవాప్యయావనుధ్యాయేన్మనో యావత్ప్రసీదతి

11-23-శ్లో.

నిర్విణ్ణస్య విరక్తస్య పురుషస్యోక్తవేదినః
మనస్త్యజతి దౌరాత్మ్యం చిన్తితస్యానుచిన్తయా

11-24-శ్లో.

యమాదిభిర్యోగపథైరాన్వీక్షిక్యా చ విద్యయా
మమార్చోపాసనాభిర్వా నాన్యైర్యోగ్యం స్మరేన్మనః

11-25-శ్లో.

యది కుర్యాత్ప్రమాదేన యోగీ కర్మ విగర్హితమ్
యోగేనైవ దహేదంహో నాన్యత్తత్ర కదాచన

11-26-శ్లో.

స్వే స్వేऽధికారే యా నిష్ఠా స గుణః పరికీర్తితః
కర్మణాం జాత్యశుద్ధానామనేన నియమః కృతః
గుణదోషవిధానేన సఙ్గానాం త్యాజనేచ్ఛయా

11-27-శ్లో.

జాతశ్రద్ధో మత్కథాసు నిర్విణ్ణః సర్వకర్మసు
వేద దుఃఖాత్మకాన్కామాన్పరిత్యాగేऽప్యనీశ్వరః

11-28-శ్లో.

తతో భజేత మాం ప్రీతః శ్రద్ధాలుర్దృఢనిశ్చయః
జుషమాణశ్చ తాన్కామాన్దుఃఖోదర్కాంశ్చ గర్హయన్

11-29-శ్లో.

ప్రోక్తేన భక్తియోగేన భజతో మాసకృన్మునేః
కామా హృదయ్యా నశ్యన్తి సర్వే మయి హృది స్థితే

11-30-శ్లో.

భిద్యతే హృదయగ్రన్థిశ్ఛిద్యన్తే సర్వసంశయాః
క్షీయన్తే చాస్య కర్మాణి మయి దృష్టేऽఖిలాత్మని

11-31-శ్లో.

తస్మాన్మద్భక్తియుక్తస్య యోగినో వై మదాత్మనః
న జ్ఞానం న చ వైరాగ్యం ప్రాయః శ్రేయో భవేదిహ

11-32-శ్లో.

యత్కర్మభిర్యత్తపసా జ్ఞానవైరాగ్యతశ్చ యత్
యోగేన దానధర్మేణ శ్రేయోభిరితరైరపి

11-33-శ్లో.

సర్వం మద్భక్తియోగేన మద్భక్తో లభతేऽఞ్జసా
స్వర్గాపవర్గం మద్ధామ కథఞ్చిద్యది వాఞ్ఛతి

11-34-శ్లో.

న కిఞ్చిత్సాధవో ధీరా భక్తా హ్యేకాన్తినో మమ
వాఞ్ఛన్త్యపి మయా దత్తం కైవల్యమపునర్భవమ్

11-35-శ్లో.

నైరపేక్ష్యం పరం ప్రాహుర్నిఃశ్రేయసమనల్పకమ్
తస్మాన్నిరాశిషో భక్తిర్నిరపేక్షస్య మే భవేత్

11-36-శ్లో.

న మయ్యేకాన్తభక్తానాం గుణదోషోద్భవా గుణాః
సాధూనాం సమచిత్తానాం బుద్ధేః పరముపేయుషామ్

11-37-శ్లో.

ఏవమేతాన్మయా దిష్టాననుతిష్ఠన్తి మే పథః
క్షేమం విన్దన్తి మత్స్థానం యద్బ్రహ్మ పరమం విదుః