పోతన తెలుగు భాగవతము

10-60-శ్లో.

అధ్యాయము – 86

10-1-శ్లో.

శ్రీబాదరాయణిరువాచ
అథైకదాత్మజౌ ప్రాప్తౌ కృతపాదాభివన్దనౌ
వసుదేవోऽభినన్ద్యాహ ప్రీత్యా సఙ్కర్షణాచ్యుతౌ

10-2-శ్లో.

మునీనాం స వచః శ్రుత్వా పుత్రయోర్ధామసూచకమ్
తద్వీర్యైర్జాతవిశ్రమ్భః పరిభాష్యాభ్యభాషత

10-3-శ్లో.

కృష్ణ కృష్ణ మహాయోగిన్సఙ్కర్షణ సనాతన
జానే వామస్య యత్సాక్షాత్ప్రధానపురుషౌ పరౌ

10-4-శ్లో.

యత్ర యేన యతో యస్య యస్మై యద్యద్యథా యదా
స్యాదిదం భగవాన్సాక్షాత్ప్రధానపురుషేశ్వరః

10-5-శ్లో.

ఏతన్నానావిధం విశ్వమాత్మసృష్టమధోక్షజ
ఆత్మనానుప్రవిశ్యాత్మన్ప్రాణో జీవో బిభర్ష్యజ

10-6-శ్లో.

ప్రాణాదీనాం విశ్వసృజాం శక్తయో యాః పరస్య తాః
పారతన్త్ర్యాద్వైసాదృష్యాద్ద్వయోశ్చేష్టైవ చేష్టతామ్

10-7-శ్లో.

కాన్తిస్తేజః ప్రభా సత్తా చన్ద్రాగ్న్యర్కర్క్షవిద్యుతామ్
యత్స్థైర్యం భూభృతాం భూమేర్వృత్తిర్గన్ధోऽర్థతో భవాన్

10-8-శ్లో.

తర్పణం ప్రాణనమపాం దేవ త్వం తాశ్చ తద్రసః
ఓజః సహో బలం చేష్టా గతిర్వాయోస్తవేశ్వర

10-9-శ్లో.

దిశాం త్వమవకాశోऽసి దిశః ఖం స్ఫోట ఆశ్రయః
నాదో వర్ణస్త్వమోంకార ఆకృతీనాం పృథక్కృతిః

10-10-శ్లో.

ఇన్ద్రియం త్విన్ద్రియాణాం త్వం దేవాశ్చ తదనుగ్రహః
అవబోధో భవాన్బుద్ధేర్జీవస్యానుస్మృతిః సతీ

10-11-శ్లో.

భూతానామసి భూతాదిరిన్ద్రియాణాం చ తైజసః
వైకారికో వికల్పానాం ప్రధానమనుశాయినమ్

10-12-శ్లో.

నశ్వరేష్విహ భావేషు తదసి త్వమనశ్వరమ్
యథా ద్రవ్యవికారేషు ద్రవ్యమాత్రం నిరూపితమ్

10-13-శ్లో.

సత్త్వమ్రజస్తమ ఇతి గుణాస్తద్వృత్తయశ్చ యాః
త్వయ్యద్ధా బ్రహ్మణి పరే కల్పితా యోగమాయయా

10-14-శ్లో.

తస్మాన్న సన్త్యమీ భావా యర్హి త్వయి వికల్పితాః
త్వం చామీషు వికారేషు హ్యన్యదావ్యావహారికః

10-15-శ్లో.

గుణప్రవాహ ఏతస్మిన్నబుధాస్త్వఖిలాత్మనః
గతిం సూక్ష్మామబోధేన సంసరన్తీహ కర్మభిః

10-16-శ్లో.

యదృచ్ఛయా నృతాం ప్రాప్య సుకల్పామిహ దుర్లభామ్
స్వార్థే ప్రమత్తస్య వయో గతం త్వన్మాయయేశ్వర

10-17-శ్లో.

అసావహమ్మమైవైతే దేహే చాస్యాన్వయాదిషు
స్నేహపాశైర్నిబధ్నాతి భవాన్సర్వమిదం జగత్

10-18-శ్లో.

యువాం న నః సుతౌ సాక్షాత్ప్రధానపురుషేశ్వరౌ
భూభారక్షత్రక్షపణ అవతీర్ణౌ తథాత్థ హ

10-19-శ్లో.

తత్తే గతోऽస్మ్యరణమద్య పదారవిన్దమ్
ఆపన్నసంసృతిభయాపహమార్తబన్ధో
ఏతావతాలమలమిన్ద్రియలాలసేన
మర్త్యాత్మదృక్త్వయి పరే యదపత్యబుద్ధిః

10-20-శ్లో.

సూతీగృహే నను జగాద భవానజో నౌ
సఞ్జజ్ఞ ఇత్యనుయుగం నిజధర్మగుప్త్యై
నానాతనూర్గగనవద్విదధజ్జహాసి
కో వేద భూమ్న ఉరుగాయ విభూతిమాయామ్

10-21-శ్లో.

శ్రీశుక ఉవాచ
ఆకర్ణ్యేత్థం పితుర్వాక్యం భగవాన్సాత్వతర్షభః
ప్రత్యాహ ప్రశ్రయానమ్రః ప్రహసన్శ్లక్ష్ణయా గిరా

10-22-శ్లో.

శ్రీభగవానువాచ
వచో వః సమవేతార్థం తాతైతదుపమన్మహే
యన్నః పుత్రాన్సముద్దిశ్య తత్త్వగ్రామ ఉదాహృతః

10-23-శ్లో.

అహం యూయమసావార్య ఇమే చ ద్వారకాకసః
సర్వేऽప్యేవం యదుశ్రేష్ఠ విమృగ్యాః సచరాచరమ్

10-24-శ్లో.

ఆత్మా హ్యేకః స్వయంజ్యోతిర్నిత్యోऽన్యో నిర్గుణో గుణైః
ఆత్మసృష్టైస్తత్కృతేషు భూతేషు బహుధేయతే

10-25-శ్లో.

ఖం వాయుర్జ్యోతిరాపో భూస్తత్కృతేషు యథాశయమ్
ఆవిస్తిరోऽల్పభూర్యేకో నానాత్వం యాత్యసావపి

10-26-శ్లో.

శ్రీశుక ఉవాచ
ఏవం భగవతా రాజన్వసుదేవ ఉదాహృతః
శ్రుత్వా వినష్టనానాధీస్తూష్ణీం ప్రీతమనా అభూత్

10-27-శ్లో.

అథ తత్ర కురుశ్రేష్ఠ దేవకీ సర్వదేవతా
శ్రుత్వానీతం గురోః పుత్రమాత్మజాభ్యాం సువిస్మితా

10-28-శ్లో.

కృష్ణరామౌ సమాశ్రావ్య పుత్రాన్కంసవిహింసితాన్
స్మరన్తీ కృపణం ప్రాహ వైక్లవ్యాదశ్రులోచనా

10-29-శ్లో.

శ్రీదేవక్యువాచ
రామ రామాప్రమేయాత్మన్కృష్ణ యోగేశ్వరేశ్వర
వేదాహం వాం విశ్వసృజామీశ్వరావాదిపూరుషౌ

10-30-శ్లో.

కలవిధ్వస్తసత్త్వానాం రాజ్ఞాముచ్ఛాస్త్రవర్తినామ్
భూమేర్భారాయమాణానామవతీర్ణౌ కిలాద్య మే

10-31-శ్లో.

యస్యాంశాంశాంశభాగేన విశ్వోత్పత్తిలయోదయాః
భవన్తి కిల విశ్వాత్మంస్తం త్వాద్యాహం గతిం గతా

10-32-శ్లో.

చిరాన్మృతసుతాదానే గురుణా కిల చోదితౌ
ఆనిన్యథుః పితృస్థానాద్గురవే గురుదక్షిణామ్

10-33-శ్లో.

తథా మే కురుతం కామం యువాం యోగేశ్వరేశ్వరౌ
భోజరాజహతాన్పుత్రాన్కామయే ద్రష్టుమాహృతాన్

10-34-శ్లో.

ఋషిరువాచ
ఏవం సఞ్చోదితౌ మాత్రా రామః కృష్ణశ్చ భారత
సుతలం సంవివిశతుర్యోగమాయాముపాశ్రితౌ

10-35-శ్లో.

తస్మిన్ప్రవిష్టావుపలభ్య దైత్యరాడ్
విశ్వాత్మదైవం సుతరాం తథాత్మనః
తద్దర్శనాహ్లాదపరిప్లుతాశయః
సద్యః సముత్థాయ ననామ సాన్వయః

10-36-శ్లో.

తయోః సమానీయ వరాసనం ముదా నివిష్టయోస్తత్ర మహాత్మనోస్తయోః
దధార పాదావవనిజ్య తజ్జలం సవృన్ద ఆబ్రహ్మ పునద్యదమ్బు హ

10-37-శ్లో.

సమర్హయామాస స తౌ విభూతిభిర్మహార్హవస్త్రాభరణానులేపనైః
తామ్బూలదీపామృతభక్షణాదిభిః స్వగోత్రవిత్తాత్మసమర్పణేన చ

10-38-శ్లో.

స ఇన్ద్రసేనో భగవత్పదామ్బుజం బిభ్రన్ముహుః ప్రేమవిభిన్నయా ధియా
ఉవాచ హానన్దజలాకులేక్షణః ప్రహృష్టరోమా నృప గద్గదాక్షరమ్

10-39-శ్లో.

బలిరువాచ
నమోऽనన్తాయ బృహతే నమః కృష్ణాయ వేధసే
సాఙ్ఖ్యయోగవితానాయ బ్రహ్మణే పరమాత్మనే

10-40-శ్లో.

దర్శనం వాం హి భూతానాం దుష్ప్రాపం చాప్యదుర్లభమ్
రజస్తమఃస్వభావానాం యన్నః ప్రాప్తౌ యదృచ్ఛయా

10-41-శ్లో.

దైత్యదానవగన్ధర్వాః సిద్ధవిద్యాధ్రచారణాః
యక్షరక్షఃపిశాచాశ్చ భూతప్రమథనాయకాః

10-42-శ్లో.

విశుద్ధసత్త్వధామ్న్యద్ధా త్వయి శాస్త్రశరీరిణి
నిత్యం నిబద్ధవైరాస్తే వయం చాన్యే చ తాదృశాః

10-43-శ్లో.

కేచనోద్బద్ధవైరేణ భక్త్యా కేచన కామతః
న తథా సత్త్వసంరబ్ధాః సన్నికృష్టాః సురాదయః

10-44-శ్లో.

ఇదమిత్థమితి ప్రాయస్తవ యోగేశ్వరేశ్వర
న విదన్త్యపి యోగేశా యోగమాయాం కుతో వయమ్

10-45-శ్లో.

తన్నః ప్రసీద నిరపేక్షవిమృగ్యయుష్మత్
పాదారవిన్దధిషణాన్యగృహాన్ధకూపాత్
నిష్క్రమ్య విశ్వశరణాఙ్ఘ్ర్యుపలబ్ధవృత్తిః
శాన్తో యథైక ఉత సర్వసఖైశ్చరామి

10-46-శ్లో.

శాధ్యస్మానీశితవ్యేశ నిష్పాపాన్కురు నః ప్రభో
పుమాన్యచ్ఛ్రద్ధయాతిష్ఠంశ్చోదనాయా విముచ్యతే

10-47-శ్లో.

శ్రీభగవానువాచ
ఆసన్మరీచేః షట్పుత్రా ఊర్ణాయాం ప్రథమేऽన్తరే
దేవాః కం జహసుర్వీక్ష్య సుతం యభితుముద్యతమ్

10-48-శ్లో.

తేనాసురీమగన్యోనిమధునావద్యకర్మణా
హిరణ్యకశిపోర్జాతా నీతాస్తే యోగమాయయా

10-49-శ్లో.

దేవక్యా ఉదరే జాతా రాజన్కంసవిహింసితాః
సా తాన్శోచత్యాత్మజాన్స్వాంస్త ఇమేऽధ్యాసతేऽన్తికే

10-50-శ్లో.

ఇత ఏతాన్ప్రణేష్యామో మాతృశోకాపనుత్తయే
తతః శాపాద్వినిర్మక్తా లోకం యాస్యన్తి విజ్వరాః

10-51-శ్లో.

స్మరోద్గీథః పరిష్వఙ్గః పతఙ్గః క్షుద్రభృద్ఘృణీ
షడిమే మత్ప్రసాదేన పునర్యాస్యన్తి సద్గతిమ్

10-52-శ్లో.

ఇత్యుక్త్వా తాన్సమాదాయ ఇన్ద్రసేనేన పూజితౌ
పునర్ద్వారవతీమేత్య మాతుః పుత్రానయచ్ఛతామ్

10-53-శ్లో.

తాన్దృష్ట్వా బాలకాన్దేవీ పుత్రస్నేహస్నుతస్తనీ
పరిష్వజ్యాఙ్కమారోప్య మూర్ధ్న్యజిఘ్రదభీక్ష్ణశః

10-54-శ్లో.

అపాయయత్స్తనం ప్రీతా సుతస్పర్శపరిస్నుతమ్
మోహితా మాయయా విష్ణోర్యయా సృష్టిః ప్రవర్తతే

10-55-శ్లో.

పీత్వామృతం పయస్తస్యాః పీతశేషం గదాభృతః
నారాయణాఙ్గసంస్పర్శ ప్రతిలబ్ధాత్మదర్శనాః

10-56-శ్లో.

తే నమస్కృత్య గోవిన్దం దేవకీం పితరం బలమ్
మిషతాం సర్వభూతానాం యయుర్ధామ దివౌకసామ్

10-57-శ్లో.

తం దృష్ట్వా దేవకీ దేవీ మృతాగమననిర్గమమ్
మేనే సువిస్మితా మాయాం కృష్ణస్య రచితాం నృప

10-58-శ్లో.

ఏవంవిధాన్యద్భుతాని కృష్ణస్య పరమాత్మనః
వీర్యాణ్యనన్తవీర్యస్య సన్త్యనన్తాని భారత

10-59-శ్లో.

శ్రీసూత ఉవాచ
య ఇదమనుశృణోతి శ్రావయేద్వా మురారేశ్
చరితమమృతకీర్తేర్వర్ణితం వ్యాసపుత్రైః
జగదఘభిదలం తద్భక్తసత్కర్ణపూరం
భగవతి కృతచిత్తో యాతి తత్క్షేమధామ