పోతన తెలుగు భాగవతము

10-1-శ్లో.

గోప్య ఊచుః
జయతి తేऽధికం జన్మనా వ్రజః శ్రయత ఇన్దిరా శశ్వదత్ర హి
దయిత దృశ్యతాం దిక్షు తావకాస్త్వయి ధృతాసవస్త్వాం విచిన్వతే

10-2-శ్లో.

శరదుదాశయే సాధుజాతసత్ సరసిజోదరశ్రీముషా దృశా
సురతనాథ తేऽశుల్కదాసికా వరద నిఘ్నతో నేహ కిం వధః

10-3-శ్లో.

విషజలాప్యయాద్వ్యాలరాక్షసాద్వర్షమారుతాద్వైద్యుతానలాత్
వృషమయాత్మజాద్విశ్వతో భయాదృషభ తే వయం రక్షితా ముహుః

10-4-శ్లో.

న ఖలు గోపీకానన్దనో భవానఖిలదేహినామన్తరాత్మదృక్
విఖనసార్థితో విశ్వగుప్తయే సఖ ఉదేయివాన్సాత్వతాం కులే

10-5-శ్లో.

విరచితాభయం వృష్ణిధూర్య తే చరణమీయుషాం సంసృతేర్భయాత్
కరసరోరుహం కాన్త కామదం శిరసి ధేహి నః శ్రీకరగ్రహమ్

10-6-శ్లో.

వ్రజజనార్తిహన్వీర యోషితాం నిజజనస్మయధ్వంసనస్మిత
భజ సఖే భవత్కిఙ్కరీః స్మ నో జలరుహాననం చారు దర్శయ

10-7-శ్లో.

ప్రణతదేహినాం పాపకర్షణం తృణచరానుగం శ్రీనికేతనమ్
ఫణిఫణార్పితం తే పదామ్బుజం కృణు కుచేషు నః కృన్ధి హృచ్ఛయమ్

10-8-శ్లో.

మధురయా గిరా వల్గువాక్యయా బుధమనోజ్ఞయా పుష్కరేక్షణ
విధికరీరిమా వీర ముహ్యతీరధరసీధునాప్యాయయస్వ నః

10-9-శ్లో.

తవ కథామృతం తప్తజీవనం కవిభిరీడితం కల్మషాపహమ్
శ్రవణమఙ్గలం శ్రీమదాతతం భువి గృణన్తి యే భూరిదా జనాః

10-10-శ్లో.

ప్రహసితం ప్రియప్రేమవీక్షణం విహరణం చ తే ధ్యానమఙ్గలమ్
రహసి సంవిదో యా హృది స్పృశః కుహక నో మనః క్షోభయన్తి హి

10-11-శ్లో.

చలసి యద్వ్రజాచ్చారయన్పశూన్నలినసున్దరం నాథ తే పదమ్
శిలతృణాఙ్కురైః సీదతీతి నః కలిలతాం మనః కాన్త గచ్ఛతి

10-12-శ్లో.

దినపరిక్షయే నీలకున్తలైర్వనరుహాననం బిభ్రదావృతమ్
ఘనరజస్వలం దర్శయన్ముహుర్మనసి నః స్మరం వీర యచ్ఛసి

10-13-శ్లో.

ప్రణతకామదం పద్మజార్చితం ధరణిమణ్డనం ధ్యేయమాపది
చరణపఙ్కజం శన్తమం చ తే రమణ నః స్తనేష్వర్పయాధిహన్

10-14-శ్లో.

సురతవర్ధనం శోకనాశనం స్వరితవేణునా సుష్ఠు చుమ్బితమ్
ఇతరరాగవిస్మారణం నృణాం వితర వీర నస్తేऽధరామృతమ్

10-15-శ్లో.

అటతి యద్భవానహ్ని కాననం త్రుటి యుగాయతే త్వామపశ్యతామ్
కుటిలకున్తలం శ్రీముఖం చ తే జడ ఉదీక్షతాం పక్ష్మకృద్దృశామ్

10-16-శ్లో.

పతిసుతాన్వయభ్రాతృబాన్ధవానతివిలఙ్ఘ్య తేऽన్త్యచ్యుతాగతాః
గతివిదస్తవోద్గీతమోహితాః కితవ యోషితః కస్త్యజేన్నిశి

10-17-శ్లో.

రహసి సంవిదం హృచ్ఛయోదయం ప్రహసితాననం ప్రేమవీక్షణమ్
బృహదురః శ్రియో వీక్ష్య ధామ తే ముహురతిస్పృహా ముహ్యతే మనః

10-18-శ్లో.

వ్రజవనౌకసాం వ్యక్తిరఙ్గ తే వృజినహన్త్ర్యలం విశ్వమఙ్గలమ్
త్యజ మనాక్చ నస్త్వత్స్పృహాత్మనాం స్వజనహృద్రుజాం యన్నిషూదనమ్

10-19-శ్లో.

యత్తే సుజాతచరణామ్బురుహం స్తనేషు
భీతాః శనైః ప్రియ దధీమహి కర్కశేషు
తేనాటవీమటసి తద్వ్యథతే న కిం స్విత్
కూర్పాదిభిర్భ్రమతి ధీర్భవదాయుషాం నః