పోతన తెలుగు భాగవతము

10-1-శ్లో.

శ్రీశుక ఉవాచ
ఇన్ద్రస్తదాత్మనః పూజాం విజ్ఞాయ విహతాం నృప
గోపేభ్యః కృష్ణనాథేభ్యో నన్దాదిభ్యశ్చుకోప హ

10-2-శ్లో.

గణం సాంవర్తకం నామ మేఘానాం చాన్తకారీణామ్
ఇన్ద్రః ప్రచోదయత్క్రుద్ధో వాక్యం చాహేశమాన్యుత

10-3-శ్లో.

అహో శ్రీమదమాహాత్మ్యం గోపానాం కాననౌకసామ్
కృష్ణం మర్త్యముపాశ్రిత్య యే చక్రుర్దేవహేలనమ్

10-4-శ్లో.

యథాదృఢైః కర్మమయైః క్రతుభిర్నామనౌనిభైః
విద్యామాన్వీక్షికీం హిత్వా తితీర్షన్తి భవార్ణవమ్

10-5-శ్లో.

వాచాలం బాలిశం స్తబ్ధమజ్ఞం పణ్డితమానినమ్
కృష్ణం మర్త్యముపాశ్రిత్య గోపా మే చక్రురప్రియమ్

10-6-శ్లో.

ఏషాం శ్రియావలిప్తానాం కృష్ణేనాధ్మాపితాత్మనామ్
ధునుత శ్రీమదస్తమ్భం పశూన్నయత సఙ్క్షయమ్

10-7-శ్లో.

అహం చైరావతం నాగమారుహ్యానువ్రజే వ్రజమ్
మరుద్గణైర్మహావేగైర్నన్దగోష్ఠజిఘాంసయా

10-8-శ్లో.

శ్రీశుక ఉవాచ
ఇత్థం మఘవతాజ్ఞప్తా మేఘా నిర్ముక్తబన్ధనాః
నన్దగోకులమాసారైః పీడయామాసురోజసా

10-9-శ్లో.

విద్యోతమానా విద్యుద్భిః స్తనన్తః స్తనయిత్నుభిః
తీవ్రైర్మరుద్గణైర్నున్నా వవృషుర్జలశర్కరాః

10-10-శ్లో.

స్థూణాస్థూలా వర్షధారా ముఞ్చత్స్వభ్రేష్వభీక్ష్ణశః
జలౌఘైః ప్లావ్యమానా భూర్నాదృశ్యత నతోన్నతమ్

10-11-శ్లో.

అత్యాసారాతివాతేన పశవో జాతవేపనాః
గోపా గోప్యశ్చ శీతార్తా గోవిన్దం శరణం యయుః

10-12-శ్లో.

శిరః సుతాంశ్చ కాయేన ప్రచ్ఛాద్యాసారపీడితాః
వేపమానా భగవతః పాదమూలముపాయయుః

10-13-శ్లో.

కృష్ణ కృష్ణ మహాభాగ త్వన్నాథం గోకులం ప్రభో
త్రాతుమర్హసి దేవాన్నః కుపితాద్భక్తవత్సల

10-14-శ్లో.

శిలావర్షాతివాతేన హన్యమానమచేతనమ్
నిరీక్ష్య భగవాన్మేనే కుపితేన్ద్రకృతం హరిః

10-15-శ్లో.

అపర్త్వత్యుల్బణం వర్షమతివాతం శిలామయమ్
స్వయాగే విహతేऽస్మాభిరిన్ద్రో నాశాయ వర్షతి

10-16-శ్లో.

తత్ర ప్రతివిధిం సమ్యగాత్మయోగేన సాధయే
లోకేశమానినాం మౌఢ్యాద్ధనిష్యే శ్రీమదం తమః

10-17-శ్లో.

న హి సద్భావయుక్తానాం సురాణామీశవిస్మయః
మత్తోऽసతాం మానభఙ్గః ప్రశమాయోపకల్పతే

10-18-శ్లో.

తస్మాన్మచ్ఛరణం గోష్ఠం మన్నాథం మత్పరిగ్రహమ్
గోపాయే స్వాత్మయోగేన సోऽయం మే వ్రత ఆహితః

10-19-శ్లో.

ఇత్యుక్త్వైకేన హస్తేన కృత్వా గోవర్ధనాచలమ్
దధార లీలయా విష్ణుశ్ఛత్రాకమివ బాలకః

10-20-శ్లో.

అథాహ భగవాన్గోపాన్హేऽమ్బ తాత వ్రజౌకసః
యథోపజోషం విశత గిరిగర్తం సగోధనాః

10-21-శ్లో.

న త్రాస ఇహ వః కార్యో మద్ధస్తాద్రినిపాతనాత్
వాతవర్షభయేనాలం తత్త్రాణం విహితం హి వః

10-22-శ్లో.

తథా నిర్వివిశుర్గర్తం కృష్ణాశ్వాసితమానసః
యథావకాశం సధనాః సవ్రజాః సోపజీవినః

10-23-శ్లో.

క్షుత్తృడ్వ్యథాం సుఖాపేక్షాం హిత్వా తైర్వ్రజవాసిభిః
వీక్ష్యమాణో దధారాద్రిం సప్తాహం నాచలత్పదాత్

10-24-శ్లో.

కృష్ణయోగానుభావం తం నిశమ్యేన్ద్రోऽతివిస్మితః
నిస్తమ్భో భ్రష్టసఙ్కల్పః స్వాన్మేఘాన్సన్న్యవారయత్

10-25-శ్లో.

ఖం వ్యభ్రముదితాదిత్యం వాతవర్షం చ దారుణమ్
నిశమ్యోపరతం గోపాన్గోవర్ధనధరోऽబ్రవీత్

10-26-శ్లో.

నిర్యాత త్యజత త్రాసం గోపాః సస్త్రీధనార్భకాః
ఉపారతం వాతవర్షం వ్యుదప్రాయాశ్చ నిమ్నగాః

10-27-శ్లో.

తతస్తే నిర్యయుర్గోపాః స్వం స్వమాదాయ గోధనమ్
శకటోఢోపకరణం స్త్రీబాలస్థవిరాః శనైః

10-28-శ్లో.

భగవానపి తం శైలం స్వస్థానే పూర్వవత్ప్రభుః
పశ్యతాం సర్వభూతానాం స్థాపయామాస లీలయా

10-29-శ్లో.

తం ప్రేమవేగాన్నిర్భృతా వ్రజౌకసో
యథా సమీయుః పరిరమ్భణాదిభిః
గోప్యశ్చ సస్నేహమపూజయన్ముదా
దధ్యక్షతాద్భిర్యుయుజుః సదాశిషః

10-30-శ్లో.

యశోదా రోహిణీ నన్దో రామశ్చ బలినాం వరః
కృష్ణమాలిఙ్గ్య యుయుజురాశిషః స్నేహకాతరాః

10-31-శ్లో.

దివి దేవగణాః సిద్ధాః సాధ్యా గన్ధర్వచారణాః
తుష్టువుర్ముముచుస్తుష్టాః పుష్పవర్షాణి పార్థివ

10-32-శ్లో.

శఙ్ఖదున్దుభయో నేదుర్దివి దేవప్రచోదితాః
జగుర్గన్ధర్వపతయస్తుమ్బురుప్రముఖా నృప

10-33-శ్లో.

తతోऽనురక్తైః పశుపైః పరిశ్రితో రాజన్స్వగోష్ఠం సబలోऽవ్రజద్ధరిః
తథావిధాన్యస్య కృతాని గోపికా గాయన్త్య ఈయుర్ముదితా హృదిస్పృశః