ప్రధమ స్కంధము : దక్షుఁడు రజతగిరి కరుగుట
- ఉపకరణాలు:
ఘనుఁ డగు శంభుఁడు గొలు వయి
తనరుట విని మునులు గొలువ దక్షుఁడు వేగన్
జనియె రజతాద్రి శిఖరికిఁ
దనయంతనె యజ్ఞనాధు దర్శింపంగన్.
- ఉపకరణాలు:
చని గిరిమందిరు సన్నిధి
వినయంబున నిల్చియున్న వేడుక నతఁడున్
మునులను సంభావించిన
యనువునఁ దనుఁ గారవించె నప్పుడు కరుణన్.
- ఉపకరణాలు:
ఇ ట్లఖిల భువనాధీశ్వరుండు గారవించిన.
- ఉపకరణాలు:
అద్దిర శంకరుండు వినయంబున నా కెదు రేగుదెంచి నా
పెద్దతనం బెఱింగి తగఁ బెద్దఱికం బొకయించు కైనఁ దా
గ్రద్దనఁ జేయఁడయ్యె మఱి గౌరియు మన్నన సేయ దయ్యె నీ
పెద్దలు నవ్వ లాతిమునిబృందము చాడ్పునఁ జేసి రిమ్మెయిన్.
- ఉపకరణాలు:
అని తన పాలిటి కర్మము
పెనఁగొని తనుఁ జుట్టుముట్టి ప్రేరేపంగాఁ
జెనఁటి యగు దక్షుఁ డప్పుడు
మనమున గోపంబు నొంది మలహరు విడిచెన్.
- ఉపకరణాలు:
ఇట్లు దేవదేవుని మహత్వంబుఁ దెలియక వృధావైరంబున దక్షుం డటువాసి చనియె, నంత న మ్మహేశ్వరుఁ గొల్వవచ్చిన దేవేంద్రాది బృందారక సంఘంబులు పునః పునః ప్రణామంబు లాచరించి చనిరి తదనంతరంబ.
- ఉపకరణాలు:
అక్కడ దక్షుం డరుగుచుఁ
బొక్కుచు స్రుక్కుచును సిగ్గు వొందఁగఁ గోపం
బెక్కువ గా నంతంతటఁ
జిక్కుచుఁ దలపోతఁ నొంది చిత్తము గలఁగన్.
- ఉపకరణాలు:
నాకులు వచ్చిన నిచటికి
నాకును రానేల నేఁడు నా కిందులకున్
రాకున్న నేమి కొఱఁ తగుఁ
బ్రాకటముగ ధిక్కరింపఁ బడితిం గాదే.
- ఉపకరణాలు:
దేవత లందఱుఁ దమ కొక
దేవతవలె నంచుఁ దన్ను దేవర యంచున్
వావిరిఁ గొలిచిన నా కీ
దేవర వల దనుచు మాఱు తెచ్చెద ననుచున్.
- ఉపకరణాలు:
జాలిఁబడుచు నలఁగి లోలోనఁ గుందుచుఁ
జిన్నవోయి మొగము జేవురింప
నింటి కరిగి యున్న నీక్షించి యిట్లని
పలికె దక్షుఁ జూచి భార్య ప్రీతి.
- ఉపకరణాలు:
మన యల్లుని మన బిడ్డను
గనుగొంటిరె మంగళంబె కరుణన్వారే
మని మిమ్ము గారవించిరి
వినిపింపుఁడు వీనులలర వినియెద ననినన్.
- ఉపకరణాలు:
దక్షుం డిట్లనియె.
- ఉపకరణాలు:
మాకు మామ గదా యితం డని మన్ననల్ దగఁ జేయఁ డే
లోకనాథుఁడ నంచు గర్వము లోలతం బడి యున్నవాఁ
డీ కతంబుల నేమి చెప్పుదు నింతిరో! విను నాకునున్
నీకుఁ గూఁతురు నైన గౌరియు నిక్క మేమియుఁ బల్కదే.
- ఉపకరణాలు:
కాన నింకను దీనికిం బ్రతికార మే నొనరించెదన్
బూని చేసెద మేటియఙ్ఞముఁ బూజ చేసెదఁ గేశవున్
మౌనులున్ వసువుల్ దిగీశులు మర్త్యు లుండఁగ నొప్పుఁగాఁ
మానినీ! చనుదెంతు రిచ్చట మాటమాత్రనఁ బిల్చినన్.
- ఉపకరణాలు:
పిలుతు దివ్యుల నందఱిన్ వెలిబెట్టు దిప్పుడు భర్గునిన్
వెలయ నిశ్చయ మిట్టి దంచును వేదవేద్యు మహత్వమున్
దలఁ పగోచర మైనఁ దొట్టిన దామసంబునఁ బొంగి యా
ఖలుఁడు దక్షుఁడు పాపచక్షుఁడు కర్మదక్షుఁ డదక్షుఁడై.
- ఉపకరణాలు: