పోతన తెలుగు భాగవతము

9-566-క.

"మన చారిత్రమువంటిది
విను మితిహాసంబు గలదు; వృద్ధజనములున్
మునులును మెత్తురు; నీవును
మనమున నంగీకరింపు మంజులవాణీ!

టీకా:

మన = మన యొక్క; చారిత్రంబున్ = చరిత్ర; వంటిది = లాంటిది; వినుము = వినుము; ఇతిహాసంబున్ = జరిగిన కథ; కలదు = ఉంది; వృద్దజనములున్ = జ్ఞానులు; మునులున్ = ఋషులు; మెత్తురున్ = మెచ్చుకొనెదరు; నీవునున్ = నీవుకూడ; మనమునన్ = మనసునందు; అంగీకరింప = గ్రహించుము; మంజులవాణీ = మథురభాషిణీ .

భావము:

"ఓ మథురభాషిణీ! ఒక ఇతిహాసం చెప్తాను, విను. ఇది మన చరిత్ర లాంటిదే. విజ్ఞులు, ఋషులు మెచ్చుకుంటారు. నీవు కూడ శ్రద్దగా గ్రహించుము.