అష్టమ స్కంధము : విశ్వగర్భుని ఆవిర్భావము
- ఉపకరణాలు:
"జననస్థితిలయ దూరుని
మునినుతు నిర్వాణసుఖసముద్రుని సుగుణుం
దనుతనునిఁ బృథుల పృథులుని
ననఘాత్ము మహానుభావు నభినందింతున్.
టీకా:
జనన = సృష్టి; స్థితి = స్థితి; లయ = లయములు; దూరుని = లేనివానిని; ముని = మునులచే; నుతున్ = కీర్తింపబడువానిని; నిర్వాణ = మోక్ష; సుఖ = సౌఖ్యమునకు; సముద్రుని = సముద్రమువంటివానిని; సుగుణున్ = సుగుణములుగలవానిని; తను = సూక్ష్మమైన వానికంటె; తనున్ = సూక్ష్ముని; పృథుల = అతి పెద్దవానికంటెను; పృథులుని = పెద్దవానిని; అనఘాత్మున్ = పుణ్యాత్ముని; మహానుభావున్ = గొప్పవానిని; అభినందింతున్ = స్తుతించెదను.
భావము:
జనన మరణాదులు లేనివాడవు, మహర్షులచే కీర్తింపబడువాడవు, మోక్షసౌఖ్యాన్ని సమృద్ధిగా అందించే వాడవు, సుగుణ మయుడవు, సూక్ష్మమైన అన్నిటి కంటే బహు సూక్ష్ముడవు, మిన్నలను అన్నింటిని మించిన మిన్నవు, పుణ్యాత్ముడవు అయిన నిన్ను స్తుతిస్తున్నాము.