పోతన తెలుగు భాగవతము

పోతన తెలుగు భాగవతము

భాగవత మహాత్మ్యము : భాగవత మహాత్మ్యము

ఓం నమో భగవతే వాసుదేవాయ

పద్మపురాణాంతర్గత శ్రీమద్భాగవత మాహాత్మ్యమ్

ప్రార్థన

1
కృష్ణం నారాయణం వన్దే కృష్ణం వన్దే వ్రజప్రియమ్ ।
కృష్ణం ద్వైపాయనం వన్దే కృష్ణం వన్దే పృథాసుతమ్ ॥

ప్రథమోఽధ్యాయః - 1

1
సచ్చిదానన్దరూపాయ విశ్వోత్పత్యాదిహేతవే ।
తాపత్రయవినాశాయ శ్రీకృష్ణాయ వయం నుమః ॥

2
యం ప్రవ్రజన్తమనపేతమపేతకృత్యం
ద్వైపాయనో విరహకాతర ఆజుహావ ।
పుత్రేతి తన్మయతయా తరవోఽభినేదుస్తం
సర్వభూతహృదయం మునిమానతోఽస్మి ॥

3
నైమిషే సూతమాసీనమభివాద్య మహామతిమ్ ।
కథామృతరసాస్వాదకుశలః శౌనకోఽబ్రవీత్ ॥

శౌనక ఉవాచ

4
అజ్ఞానధ్వాన్తవిధ్వంసకోటిసూర్యసమప్రభ ।
సూతాఖ్యాహి కథాసారం మమ కర్ణరసాయనమ్ ॥

5
భక్తిజ్ఞానవిరాగాప్తో వివేకో వర్ధతే మహాన్ ।
మాయామోహనిరాసశ్చ వైష్ణవైః క్రియతే కథమ్ ॥

6
ఇహ ఘోరే కలౌ ప్రాయో జీవశ్చాసురతాం గతః ।
క్లేశాక్రాన్తస్య తస్యైవ శోధనే కిం పరాయణమ్ ॥

7
శ్రేయసాం యద్భవేచ్ఛ్రేయః పావనానాం చ పావనమ్ ।
కృష్ణప్రాప్తికరం శశ్వత్సాధనం తద్వదాధునా ॥

8
చిన్తామణిర్లోకసుఖం సురద్రుః స్వర్గసమ్పదమ్ ।
ప్రయచ్ఛతి గురుః ప్రీతో వైకుణ్ఠం యోగిదుర్లభమ్ ॥

సూత ఉవాచ

9
ప్రీతిః శౌనక చిత్తే తే హ్యతో వచ్మి విచార్య చ ।
సర్వసిద్ధాన్తనిష్పన్నం సంసారభయనాశనమ్ ॥

10
భక్త్యోఘవర్ధనం యచ్చ కృష్ణసన్తోషహేతుకమ్ ।
తదహం తేఽభిధాస్యామి సావధానతయా శృణు ॥

11
కాలవ్యాలముఖగ్రాసత్రాసనిర్ణాశహేతవే ।
శ్రీమద్భాగవతం శాస్త్రం కలౌ కీరేణ భాషితమ్ ॥

12
ఏతస్మాదపరం కిఞ్చిన్మనఃశుద్ధ్యై న విద్యతే ।
జన్మాన్తరే భవేత్పుణ్యం తదా భాగవతం లభేత్ ॥

13
పరీక్షితే కథాం వక్తుం సభాయాం సంస్థితే శుకే ।
సుధాకుమ్భం గృహీత్వైవ దేవాస్తత్ర సమాగమన్ ॥

14
శుకం నత్వావదన్ సర్వే స్వకార్యకుశలాః సురాః ।
కథాసుధాం ప్రయచ్ఛస్వ గృహీత్వైవ సుధామిమామ్ ॥

15
ఏవం వినిమయే జాతే సుధా రాజ్ఞా ప్రపీయతామ్ ।
ప్రపాస్యామో వయం సర్వే శ్రీమద్భాగవతామృతమ్ ॥

16
క్వ సుధా క్వ కథా లోకే క్వ కాచః క్వ మణిర్మహాన్ ।
బ్రహ్మరాతో విచార్యైవం తదా దేవాన్ జహాస హ ॥

17
అభక్తాంస్తాంశ్చ విజ్ఞాయ న దదౌ స కథామృతమ్ ।
శ్రీమద్భాగవతీ వార్తా సురాణామపి దుర్లభా ॥

18
రాజ్ఞో మోక్షం తథా వీక్ష్య పురా ధాతాపి విస్మితః ।
సత్యలోకే తులాం బద్ధ్వాతోలయత్సాధనాన్యజః ॥

19
లఘూన్యన్యాని జాతాని గౌరవేణ ఇదం మహత్ ।
తదా ఋషిగణాః సర్వే విస్మయం పరమం యయుః ॥

20
మేనిరే భగవద్రూపం శాస్త్రం భాగవతం కలౌ ।
పఠనాచ్ఛ్రవణాత్సద్యో వైకుణ్ఠఫలదాయకమ్ ॥

21
సప్తాహేన శ్రుతం చైతత్సర్వథా ముక్తిదాయకమ్ ।
సనకాద్యైః పురా ప్రోక్తం నారదాయ దయాపరైః ॥

22
యద్యపి బ్రహ్మసంబన్ధాచ్ఛ్రుతమేతత్సురర్షిణా ।
సప్తాహశ్రవణవిధిః కుమారైస్తస్య భాషితః ॥

శౌనక ఉవాచ

23
లోకవిగ్రహముక్తస్య నారదస్యాస్థిరస్య చ ।
విధిశ్రవే కుతః ప్రీతిః సంయోగః కుత్ర తైః సహ ॥

సూత ఉవాచ

24
అత్ర తే కీర్తయిష్యామి భక్తియుక్తం కథానకమ్ ।
శుకేన మమ యత్ప్రోక్తం రహః శిష్యం విచార్య చ ॥

25
ఏకదా హి విశాలాయాం చత్వార ఋషయోఽమలాః ।
సత్సంగార్థం సమాయాతా దదృశుస్తత్ర నారదమ్ ॥

కుమారా ఊచుః

26
కథం బ్రహ్మన్ దీనముఖః కుతశ్చిన్తాతురో భవాన్ ।
త్వరితం గమ్యతే కుత్ర కుతశ్చాగమనం తవ ॥

27
ఇదానీం శూన్యచిత్తోఽసి గతవిత్తో యథా జనః ।
తవేదం ముక్తసంగస్య నోచితం వద కారణమ్ ॥

నారద ఉవాచ

28
అహం తు పృథివీం యాతో జ్ఞాత్వా సర్వోత్తమామితి ।
పుష్కరం చ ప్రయాగం చ కాశీం గోదావరీం తథా ॥

29
హరిక్షేత్రం కురుక్షేత్రం శ్రీరంగం సేతుబన్ధనమ్ ।
ఏవమాదిషు తీర్థేషు భ్రమమాణ ఇతస్తతః ॥

30
నాపశ్యం కుత్రచిచ్ఛర్మ మనఃసన్తోషకారకమ్ ।
కలినాధర్మమిత్రేణ ధరేయం బాధితాధునా ॥

31
సత్యం నాస్తి తపః శౌచం దయా దానం న విద్యతే ।
ఉదరమ్భరిణో జీవా వరాకాః కూటభాషిణః ॥

32
మన్దాః సుమన్దమతయో మన్దభాగ్యా హ్యుపద్రుతాః ।
పాఖణ్డనిరతాః సన్తో విరక్తాః సపరిగ్రహాః ॥

33
తరుణీప్రభుతా గేహే శ్యాలకో బుద్ధిదాయకః ।
కన్యావిక్రయిణో లోభాద్దమ్పతీనాం చ కల్కనమ్ ॥

34
ఆశ్రమా యవనై రుద్ధాస్తీర్థాని సరితస్తథా ।
దేవతాయతనాన్యత్ర దుష్టైర్నష్టాని భూరిశః ॥

35
న యోగీ నైవ సిద్ధో వా న జ్ఞానీ సత్క్రియో నరః ।
కలిదావానలేనాద్య సాధనం భస్మతాం గతమ్ ॥

36
అట్టశూలా జనపదాః శివశూలా ద్విజాతయః ।
కామిన్యః కేశశూలిన్యః సమ్భవన్తి కలావిహ ॥

37
ఏవం పశ్యన్ కలేర్దోషాన్ పర్యటన్నవనీమహమ్ ।
యామునం తటమాపన్నో యత్ర లీలా హరేరభూత్ ॥

38
తత్రాశ్చర్యం మయా దృష్టం శ్రూయతాం తన్మునీశ్వరాః ।
ఏకా తు తరుణీ తత్ర నిషణ్ణా ఖిన్నమానసా ॥

39
వృద్ధౌ ద్వౌ పతితౌ పార్శ్వే నిఃశ్వసన్తావచేతనౌ ।
శుశ్రూషన్తీ ప్రబోధన్తీ రుదతీ చ తయోః పురః ॥

40
దశ దిక్షు నిరీక్షన్తీ రక్షితారం నిజం వపుః ।
వీజ్యమానా శతస్త్రీభిర్బోధ్యమానా ముహుర్ముహుః ॥

41
దృష్ట్వా దూరాద్గతః సోఽహం కౌతుకేన తదన్తికమ్ ।
మాం దృష్ట్వా చోత్థితా బాలా విహ్వలా చాబ్రవీద్వచః ॥

బాలోవాచ

42
భో భోః సాధో క్షణం తిష్ఠ మచ్చిన్తామపి నాశయ ।
దర్శనం తవ లోకస్య సర్వథాఘహరం పరమ్ ॥

43
బహుథా తవ వాక్యేన దుఃఖశాన్తిర్భవిష్యతి ।
యదా భాగ్యం భవేద్భూరి భవతో దర్శనం తదా ॥

నారద ఉవాచ

44
కాసి త్వం కావిమౌ చేమా నార్యః కాః పద్మలోచనాః ।
వద దేవి సవిస్తారం స్వస్య దుఃఖస్య కారణమ్ ॥

బాలోవాచ

45
అహం భక్తిరితి ఖ్యాతా ఇమౌ మే తనయౌ మతౌ ।
జ్ఞానవైరాగ్యనామానౌ కాలయోగేన జర్జరౌ ॥

46
గఙ్గాద్యాః సరితశ్చేమా మత్సేవార్థం సమాగతాః ।
తథాపి న చ మే శ్రేయః సేవితాయాః సురైరపి ॥

47
ఇదానీం శృణు మద్వార్తాం సచిత్తస్త్వం తపోధన ।
వార్తా మే వితతాప్యస్తి తాం శ్రుత్వా సుఖమావహ ॥

48
ఉత్పన్నా ద్రవిడే సాహం వృద్ధిం కర్ణాటకే గతా ।
క్వచిత్క్వచిన్మహారాష్ట్రే గుర్జరే జీర్ణతాం గతా ॥

49
తత్ర ఘోరకలేర్యోగాత్పాఖణ్డైః ఖణ్డితాఙ్గకా ।
దుర్బలాహం చిరం యాతా పుత్రాభ్యాం సహ మన్దతామ్ ॥

50
వృన్దావనం పునః ప్రాప్య నవీనేవ సురూపిణీ ।
జాతాహం యువతీ సమ్యక్ప్రేష్ఠరూపా తు సామ్ప్రతమ్ ॥

51
ఇమౌ తు శయితావత్ర సుతౌ మే క్లిశ్యతః శ్రమాత్ ।
ఇదం స్థానం పరిత్యజ్య విదేశం గమ్యతే మయా ॥

52
జరఠత్వం సమాయాతౌ తేన దుఃఖేన దుఃఖితా ।
సాహం తు తరుణీ కస్మాత్సుతౌ వృద్ధావిమౌ కుతః ॥

53
త్రయాణాం సహచారిత్వాద్వైపరీత్యం కుతః స్థితమ్ ।
ఘటతే జరఠా మాతా తరుణౌ తనయావితి ॥

54
అతః శోచామి చాత్మానం విస్మయావిష్టమానసా ।
వద యోగనిధే ధీమన్ కారణం చాత్ర కిం భవేత్ ॥

నారద ఉవాచ

55
జ్ఞానేనాత్మని పశ్యామి సర్వమేతత్తవానఘే ।
న విషాదస్త్వయా కార్యో హరిః శం తే కరిష్యతి ॥

సూత ఉవాచ

56
క్షణమాత్రేణ తజ్జ్ఞాత్వా వాక్యమూచే మునీశ్వరః ॥

నారద ఉవాచ

57
శృణుష్వావహితా బాలే యుగోఽయం దారుణః కలిః ।
తేన లుప్తః సదాచారో యోగమార్గస్తపాంసి చ ॥

58
జనా అఘాసురాయన్తే శాఠ్యదుష్కర్మకారిణః ।
ఇహ సన్తో విషీదన్తి ప్రహృష్యన్తి హ్యసాధవః ।
ధత్తే ధైర్యం తు యో ధీమాన్ స ధీరః పణ్డితోఽథవా ॥

59
అస్పృశ్యానవలోక్యేయం శేషభారకరీ ధరా ।
వర్షే వర్షే క్రమాజ్జాతా మఙ్గలం నాపి దృశ్యతే ॥

60
న త్వామపి సుతైః సాకం కోఽపి పశ్యతి సామ్ప్రతమ్ ।
ఉపేక్షితానురాగాన్ధైర్జర్జరత్వేన సంస్థితా ॥

61
వృన్దావనస్య సంయోగాత్పునస్త్వం తరుణీ నవా ।
ధన్యం వృన్దావనం తేన భక్తిర్నృత్యతి యత్ర చ ॥

62
అత్రేమౌ గ్రాహకాభావాన్న జరామపి ముఞ్చతః ।
కిఞ్చిదాత్మసుఖేనేహ ప్రసుప్తిర్మన్యతేఽనయోః ॥

భక్తిరువాచ

63
కథం పరీక్షితా రాజ్ఞా స్థాపితో హ్యశుచిః కలిః ।
ప్రవృత్తే తు కలౌ సర్వసారః కుత్ర గతో మహాన్ ॥

64
కరుణాపరేణ హరిణాప్యధర్మః కథమీక్ష్యతే ।
ఇమం మే సంశయం ఛిన్ధి త్వద్వాచా సుఖితాస్మ్యహమ్ ॥

నారద ఉవాచ

65
యది పృష్టస్త్వయా బాలే ప్రేమతః శ్రవణం కురు ।
సర్వం వక్ష్యామి తే భద్రే కశ్మలం తే గమిష్యతి ॥

66
యదా ముకున్దో భగవాన్ క్ష్మాం త్యక్త్వా స్వపదం గతః ।
తద్దినాత్కలిరాయాతః సర్వసాధనబాధకః ॥

67
దృష్టో దిగ్విజయే రాజ్ఞా దీనవచ్ఛరణం గతః ।
న మయా మారణీయోఽయం సారఙ్గ ఇవ సారభుక్ ॥

68
యత్ఫలం నాస్తి తపసా న యోగేన సమాధినా ।
తత్ఫలం లభతే సమ్యక్కలౌ కేశవకీర్తనాత్ ॥

69
ఏకాకారం కలిం దృష్ట్వా సారవత్సారనీరసమ్ ।
విష్ణురాతః స్థాపితవాన్ కలిజానాం సుఖాయ చ ॥

70
కుకర్మాచరణాత్సారః సర్వతో నిర్గతోఽధునా ।
పదార్థాః సంస్థితా భూమౌ బీజహీనాస్తుషా యథా ॥

71
విప్రైర్భాగవతీ వార్తా గేహే గేహే జనే జనే ।
కారితా కణలోభేన కథాసారస్తతో గతః ॥

72
అత్యుగ్రభూరికర్మాణో నాస్తికా రౌరవా జనాః ।
తేఽపి తిష్ఠన్తి తీర్థేషు తీర్థసారస్తతో గతః ॥

73
కామక్రోధమహాలోభతృష్ణావ్యాకులచేతసః ।
తేఽపి తిష్ఠన్తి తపసి తపఃసారస్తతో గతః ॥

74
మనసశ్చాజయాల్లోభాద్దంభాత్పాఖణ్డసంశ్రయాత్ ।
శాస్త్రానభ్యసనాచ్చైవ ధ్యానయోగఫలం గతమ్ ॥

75
పణ్డితాస్తు కలత్రేణ రమన్తే మహిషా ఇవ ।
పుత్రస్యోత్పాదనే దక్షా అదక్షా ముక్తిసాధనే ॥

76
న హి వైష్ణవతా కుత్ర సమ్ప్రదాయపురఃసరా ।
ఏవం ప్రలయతాం ప్రాప్తో వస్తుసారః స్థలే స్థలే ॥

77
అయం తు యుగధర్మో హి వర్తతే కస్య దూషణమ్ ।
అతస్తు పుణ్డరీకాక్షః సహతే నికటే స్థితః ॥

సూత ఉవాచ

78
ఇతి తద్వచనం శ్రుత్వా విస్మయం పరమం గతా ।
భక్తిరూచే వచో భూయః శ్రూయతాం తచ్చ శౌనక ॥

భక్తిరువాచ

79
సురర్షే త్వం హి ధన్యోఽసి మద్భాగ్యేన సమాగతః ।
సాధూనాం దర్శనం లోకే సర్వసిద్ధికరం పరమ్ ॥

జయతి జగతి మాయాం యస్య కాయాధవస్తే
వచనరచనమేకం కేవలం చాకలయ్య ।

80
ధ్రువపదమపి యాతో యత్కృపాతో ధ్రువోఽయం
సకలకుశలపాత్రం బ్రహ్మపుత్రం నతాస్మి ॥

81
ఇతి శ్రీపద్మపురాణే ఉత్తరఖణ్డే శ్రీమద్భాగవతమాహాత్మ్యే
భక్తినారదసమాగమో నామ ప్రథమోఽధ్యాయః ॥

ఓం నమో భగవతే వాసుదేవాయ

ద్వితీయోఽధ్యాయః - 2

నారద ఉవాచ

1
వృథా ఖేదయసే బాలే అహో చిన్తాతురా కథమ్ ।
శ్రీకృష్ణచరణామ్భోజం స్మర దుఃఖం గమిష్యతి ॥

2
ద్రౌపదీ చ పరిత్రాతా యేన కౌరవకశ్మలాత్ ।
పాలితా గోపసున్దర్యః స కృష్ణః క్వాపి నో గతః ॥

3
త్వం తు భక్తిః ప్రియా తస్య సతతం ప్రాణతోఽధికా ।
త్వయాఽఽహూతస్తు భగవాన్ యాతి నీచగృహేష్వపి ॥

4
సత్యాదిత్రియుగే బోధవైరాగ్యౌ ముక్తిసాధకౌ ।
కలౌ తు కేవలా భక్తిర్బ్రహ్మసాయుజ్యకారిణీ ॥

5
ఇతి నిశ్చిత్య చిద్రూపః సద్రూపాం త్వాం ససర్జ హ ।
పరమానన్దచిన్మూర్తిః సున్దరీం కృష్ణవల్లభామ్ ॥

6
బద్ధ్వాఞ్జలిం త్వయా పృష్టం కిం కరోమీతి చైకదా ।
త్వాం తదాఽఽజ్ఞాపయత్కృష్ణో మద్భక్తాన్ పోషయేతి చ ॥

7
అఙ్గీకృతం త్వయా తద్వై ప్రసన్నోఽభూద్ధరిస్తదా ।
ముక్తిం దాసీం దదౌ తుభ్యం జ్ఞానవైరాగ్యకావిమౌ ॥

8
పోషణం స్వేన రూపేణ వైకుణ్ఠే త్వం కరోషి చ ।
భూమౌ భక్తవిపోషాయ ఛాయారూపం త్వయా కృతమ్ ॥

9
ముక్తిం జ్ఞానం విరక్తిం చ సహ కృత్వా గతా భువి ।
కృతాదిద్వాపరస్యాన్తం మహానన్దేన సంస్థితా ॥

10
కలౌ ముక్తిః క్షయం ప్రాప్తా పాఖణ్డామయపీడితా ।
త్వదాజ్ఞయా గతా శీఘ్రం వైకుణ్ఠం పునరేవ సా ॥

11
స్మృతా త్వయాపి చాత్రైవ ముక్తిరాయాతి యాతి చ ।
పుత్రీకృత్య త్వయేమౌ చ పార్శ్వే స్వస్యైవ రక్షితౌ ॥

12
ఉపేక్షాతః కలౌ మన్దౌ వృద్ధౌ జాతౌ సుతౌ తవ ।
తథాపి చిన్తాం ముఞ్జ త్వముపాయం చిన్తయామ్యహమ్ ॥

13
కలినా సదృశః కోఽపి యుగో నాస్తి వరాననే ।
తస్మింస్త్వాం స్థాపయిష్యామి గేహే గేహే జనే జనే ॥

14
అన్యధర్మాంస్తిరస్కృత్య పురస్కృత్య మహోత్సవాన్ ।
తదా నాహం హరేర్దాసో లోకే త్వాం న ప్రవర్తయే ॥

15
త్వదన్వితాశ్చ యే జీవా భవిష్యన్తి కలావిహ ।
పాపినోఽపి గమిష్యన్తి నిర్భయం కృష్ణమన్దిరమ్ ॥

16
యేషాం చిత్తే వసేద్భక్తిః సర్వదా ప్రేమరూపిణీ ।
న తే పశ్యన్తి కీనాశం స్వప్నేఽప్యమలమూర్తయః ॥

17
న ప్రేతో న పిశాచో వా రాక్షసో వాసురోఽపి వా ।
భక్తియుక్తమనస్కానాం స్పర్శనే న ప్రభుర్భవేత్ ॥

18
న తపోభిర్న వేదైశ్చ న జ్ఞానేనాపి కర్మణా ।
హరిర్హి సాధ్యతే భక్త్యా ప్రమాణం తత్ర గోపికాః ॥

19
నృణాం జన్మసహస్రేణ భక్తౌ ప్రీతిర్హి జాయతే ।
కలౌ భక్తిః కలౌ భక్తిర్భక్త్యా కృష్ణః పురః స్థితః ॥

20
భక్తిద్రోహకరా యే చ తే సీదన్తి జగత్త్రయే ।
దుర్వాసా దుఃఖమాపన్నః పురా భక్తవినిన్దకః ॥

21
అలం వ్రతైరలం తీర్థైరలం యోగైరలం మఖైః ।
అలం జ్ఞానకథాలాపైర్భక్తిరేకైవ ముక్తిదా ॥

సూత ఉవాచ

22
ఇతి నారదనిర్ణీతం స్వమాహాత్మ్యం నిశమ్య సా ।
సర్వాఙ్గపుష్టిసంయుక్తా నారదం వాక్యమబ్రవీత్ ॥

భక్తిరువాచ

23
అహో నారద ధన్యోఽసి ప్రీతిస్తే మయి నిశ్చలా ।
న కదాచిద్విముఞ్జామి చిత్తే స్థాస్యామి సర్వదా ॥

24
కృపాలునా త్వయా సాధో మద్బాధా ధ్వంసితా క్షణాత్ ।
పుత్రయోశ్చేతనా నాస్తి తతో బోధయ బోధయ ॥

సూత ఉవాచ

25
తస్యా వచః సమాకర్ణ్య కారుణ్యం నారదో గతః ।
తయోర్బోధనమారేభే కరాగ్రేణ విమర్దయన్ ॥

26
ముఖం సంయోజ్య కర్ణాన్తే శబ్దముచ్చైః సముచ్చరన్ ।
జ్ఞాన ప్రబుద్ధ్యాతాం శీఘ్రం రే వైరాగ్య ప్రబుద్ధ్యాతామ్ ॥

27
వేదవేదాన్తఘోషైశ్చ గీతాపాఠైర్ముహుర్ముహుః ।
బోధ్యమానౌ తదా తేన కథంచిచ్చోత్థితౌ బలాత్ ॥

28
నేత్రైరనవలోకన్తౌ జృమ్భన్తౌ సాలసావుభౌ ।
బకవత్పలితౌ ప్రాయః శుష్కకాష్ఠసమాఙ్గకౌ ॥

29
క్షుత్క్షామౌ తౌ నిరీక్ష్యైవ పునః స్వాపపరాయణౌ ।
ఋషిశ్చిన్తాపరో జాతః కిం విధేయం మయేతి చ ॥

30
అహో నిద్రా కథం యాతి వృద్ధత్వం చ మహత్తరమ్ ।
చిన్తయన్నితి గోవిన్దం స్మారయామాస భార్గవ ॥

31
వ్యోమవాణీ తదైవాభూన్మా ఋషే ఖిద్యతామితి ।
ఉద్యమః సఫలస్తేఽయం భవిష్యతి న సంశయః ॥

32
ఏతదర్థం తు సత్కర్మ సురర్షే త్వం సమాచర ।
తత్తే కర్మాభిధాస్యన్తి సాధవః సాధుభూషణాః ॥

33
సత్కర్మణి కృతే తస్మిన్ సనిద్రా వృద్ధతానయోః ।
గమిష్యతి క్షణాద్భక్తిః సర్వతః ప్రసరిష్యతి ॥

34
ఇత్యాకాశవచః స్పష్టం తత్సర్వైరపి విశ్రుతమ్ ।
నారదో విస్మయం లేభే నేదం జ్ఞాతమితి బ్రువన్ ॥

నారద ఉవాచ

35
అనయాఽఽకాశవాణ్యాపి గోప్యత్వేన నిరూపితమ్ ।
కిం వా తత్సాధనం కార్యం యేన కార్యం భవేత్తయోః ॥

36
క్వ భవిష్యన్తి సన్తస్తే కథం దాస్యన్తి సాధనమ్ ।
మయాత్ర కిం ప్రకర్తవ్యం యదుక్తం వ్యోమభాషయా ॥

సూత ఉవాచ

37
తత్ర ద్వావపి సంస్థాప్య నిర్గతో నారదో మునిః ।
తీర్థం తీర్థం వినిష్క్రమ్య పృచ్ఛన్మార్గే మునీశ్వరాన్ ॥

వృత్తాన్తః శ్రూయతే సర్వైః కించిన్నిశ్చిత్య నోచ్యతే ।

38
అసాధ్యం కేచన ప్రోచుర్దుర్జ్ఞేయమితి చాపరే ।
మూకీభూతాస్తథాన్యే తు కియన్తస్తు పలాయితాః ॥

39
హాహాకారో మహానాసీత్త్రైలోక్యే విస్మయావహః ।
వేదవేదాన్తఘోషైశ్చ గీతాపాఠైర్విబోధితమ్ ॥

40
భక్తిజ్ఞానవిరాగాణాం నోదతిష్ఠత్త్రికం యదా ।
ఉపాయో నాపరోఽస్తీతి కర్ణే కర్ణేఽజపఞ్జనాః ॥

41
యోగినా నారదేనాపి స్వయం న జ్ఞాయతే తు యత్ ।

42
తత్కథం శక్యతే వక్తుమితరైరిహ మానుషైః ॥

ఏవమృషిగణైః పృష్టైర్నిర్ణీయోక్తం దురాసదమ్ ॥

43
తతశ్చిన్తాతురస్సోఽథ బదరీవనమాగతః ।
తపశ్చరామి చాత్రేతి తదర్థం కృతనిశ్చయః ॥

44
తావద్దదర్శ పురతః సనకాదీన్మునీశ్వరాన్ ।
కోటిసూర్యసమాభాసానువాచ మునిసత్తమః ॥

నారద ఉవాచ

45
ఇదానీం భూరిభాగ్యేన భవద్భిః సఙ్గమోఽభవత్ ।
కుమారా బ్రూయతాం శీఘ్రం కృపాం కృత్వా మమోపరి ॥

46
భవన్తో యోగినః సర్వే బుద్ధిమన్తో బహుశ్రుతాః ।
పఞ్చహాయనసంయుక్తాః పూర్వేషామపి పూర్వజాః ॥

47
సదా వైకుణ్ఠనిలయా హరికీర్తనతత్పరాః ।
లీలామృతరసోన్మత్తాః కథామాత్రైకజీవినః ॥

48
హరిః శరణమేవం హి నిత్యం యేషాం ముఖే వచః ।
అతః కాలసమాదిష్టా జరా యుష్మాన్న బాధతే ॥

49
యేషాం భ్రూభఙ్గమాత్రేణ ద్వారపాలౌ హరేః పురా ।
భూమౌ నిపతితౌ సద్యో యత్కృపాతః పురం గతౌ ॥

50
అహో భాగ్యస్య యోగేన దర్శనం భవతామిహ
అనుగ్రహస్తు కర్తవ్యో మయి దీనే దయాపరైః ॥

51
అశరీరగిరోక్తం యత్తత్కిం సాధనముచ్యతాం
అనుష్ఠేయం కథం తావత్ప్రబ్రువన్తు సవిస్తరమ్ ॥

52
భక్తిజ్ఞానవిరాగాణాం సుఖముత్పద్యతే కథమ్ ।
స్థాపనం సర్వవర్ణేషు ప్రేమపూర్వం ప్రయత్నతః ॥

కుమారా ఊచుః

53
మా చిన్తాం కురు దేవర్షే హర్షం చిత్తే సమావహ ।
ఉపాయః సుఖసాధ్యోఽత్ర వర్తతే పూర్వ ఏవ హి ॥

54
అహో నారద ధన్యోఽసి విరక్తానాం శిరోమణిః
సదా శ్రీకృష్ణదాసానామగ్రణీర్యోగభాస్కరః ॥

55
త్వయి చిత్రం న మన్తవ్యం భక్త్యర్థమనువర్తిని ।
ఘటతే కృష్ణదాసస్య భక్తేః సంస్థాపనా సదా ॥

56
ఋషిభిర్బహవో లోకే పన్థానః ప్రకటీకృతాః ।
శ్రమసాధ్యాశ్చ తే సర్వే ప్రాయః స్వర్గఫలప్రదాః ॥

57
వైకుణ్ఠసాధకః పన్థా స తు గోప్యో హి వర్తతే ।
తస్యోపదేష్టా పురుషః ప్రాయో భాగ్యేన లభ్యతే ॥

58
సత్కర్మ తవ నిర్దిష్టం వ్యోమవాచా తు యత్పురా ।
తదుచ్యతే శృణుష్వాద్య స్థిరచిత్తః ప్రసన్నధీః ॥

59
ద్రవ్యయజ్ఞాస్తపోయజ్ఞా యోగయజ్ఞాస్తథాపరే ।
స్వాధ్యాయజ్ఞానయజ్ఞాశ్చ తే తు కర్మవిసూచకాః ॥

60
సత్కర్మసూచకో నూనం జ్ఞానయజ్ఞః స్మృతో బుధైః ।
శ్రీమద్భాగవతాలాపః స తు గీతః శుకాదిభిః ॥

61
భక్తిజ్ఞానవిరాగాణాం తద్ఘోషేణ బలం మహత్ ।
వ్రజిష్యతి ద్వయోః కష్టం సుఖం భక్తేర్భవిష్యతి ॥

62
ప్రలయం హి గమిష్యన్తి శ్రీమద్భాగవతధ్వనేః ।
కలేర్దోషా ఇమే సర్వే సింహశబ్దాద్వృకా ఇవ ॥

63
జ్ఞానవైరాగ్యసంయుక్తా భక్తిః ప్రేమరసావహా ।
ప్రతిగేహం ప్రతిజనం తతః క్రీడాం కరిష్యతి ॥

నారద ఉవాచ

64
వేదవేదాన్తఘోషైశ్చ గీతాపాఠైః ప్రబోధితమ్ ।
భక్తిజ్ఞానవిరాగాణాం నోదతిష్ఠత్త్రికం యదా ॥

65
శ్రీమద్భాగవతాలాపాత్తత్కథం బోధమేష్యతి ।
తత్కథాసు తు వేదార్థః శ్లోకే శ్లోకే పదే పదే ॥

66
ఛిన్దన్తు సంశయం హ్యేనం భవన్తోఽమోఘదర్శనాః ।
విలమ్బో నాత్ర కర్తవ్యః శరణాగతవత్సలాః ॥

కుమారా ఊచుః

67
వేదోపనిషదాం సారాజ్జాతా భాగవతీ కథా ।
అత్యుత్తమా తతో భాతి పృథగ్భూతా ఫలాకృతిః ॥

68
ఆమూలాగ్రం రసస్తిష్ఠన్నాస్తే న స్వాద్యతే యథా ।
స భూయః సంపృథగ్భూతః ఫలే విశ్వమనోహరః ॥

69
యథా దుగ్ధే స్థితం సర్పిర్న స్వాదాయోపకల్పతే ।
పృథగ్భూతం హి తద్గవ్యం దేవానాం రసవర్ధనమ్ ॥

70
ఇక్షూణామాదిమధ్యాన్తం శర్కరా వ్యాప్య తిష్ఠతి ।
పృథగ్భూతా చ సా మిష్టా తథా భాగవతీ కథా ॥

71
ఇదం భాగవతం నామ పురాణం బ్రహ్మసమ్మితమ్ ।
భక్తిజ్ఞానవిరాగాణాం స్థాపనాయ ప్రకాశితమ్ ॥

72
వేదాన్తవేదసుస్నాతే గీతాయా అపి కర్తరి ।
పరితాపవతీ వ్యాసే ముహ్యత్యజ్ఞానసాగరే ॥

73
తదా త్వయా పురా ప్రోక్తం చతుఃశ్లోకసమన్వితమ్ ।
తదీయశ్రవణాత్సద్యో నిర్బాధో బాదరాయణః ॥

74
తత్ర తే విస్మయః కేన యతః ప్రశ్నకరో భవాన్ ।
శ్రీమద్భాగవతం శ్రావ్యం శోకదుఃఖవినాశనమ్ ॥

నారద ఉవాచ

75
యద్దర్శనం చ వినిహన్త్యశుభాని సద్యః
శ్రేయస్తనోతి భవదుఃఖదవార్దితానామ్ ।
నిఃశేషశేషముఖగీతకథైకపానాః
ప్రేమప్రకాశకృతయే శరణం గాతోఽస్మి ॥

76
భాగ్యోదయేన బహుజన్మసమార్జితేన
సత్సఙ్గమం చ లభతే పురుషో యదా వై ।
అజ్ఞానహేతుకృతమోహమదాన్ధకారనాశం
విధాయ హి తదోదయతే వివేకః ॥

77
ఇతి శ్రీపద్మపురాణే ఉత్తరఖణ్డే శ్రీమద్భాగవతమాహాత్మ్యే
కుమారనారదసంవాదో నామ ద్వితీయోఽధ్యాయః ॥

ఓం నమో భగవతే వాసుదేవాయ

తృతీయోఽధ్యాయః - 3

నారద ఉవాచ

1
జ్ఞానయజ్ఞం కరిష్యామి శుకశాస్త్రకథోజ్జ్వలమ్ ।
భక్తిజ్ఞానవిరాగాణాం స్థాపనార్థం ప్రయత్నతః ॥

2
కుత్ర కార్యో మయా యజ్ఞః స్థలం తద్వాచ్యతామిహ ।
మహిమా శుకశాస్త్రస్య వక్తవ్యో వేదపారగైః ॥

3
కియద్భిర్దివసైః శ్రావ్యా శ్రీమద్భాగవతీ కథా ।
కో విధిస్తత్ర కర్తవ్యో మమేదం బ్రువతామితః ॥

కుమారా ఊచుః

4
శృణు నారద వక్ష్యామో వినమ్రాయ వివేకినే ।
గఙ్గాద్వారసమీపే తు తటమానన్దనామకమ్ ॥

5
నానాఋషిగణైర్జుష్టం దేవసిద్ధనిషేవితమ్ ।
నానాతరులతాకీర్ణం నవకోమలవాలుకమ్ ॥

6
రమ్యమేకాన్తదేశస్థం హేమపద్మసుసౌరభమ్ ।
యత్సమీపస్థజీవానాం వైరం చేతసి న స్థితమ్ ॥

7
జ్ఞానయజ్ఞస్త్వయా తత్ర కర్తవ్యో హ్యప్రయత్నతః ।
అపూర్వరసరూపా చ కథా తత్ర భవిష్యతి ॥

8
పురఃస్థం నిర్బలం చైవ జరాజీర్ణకలేవరమ్ ।
తద్ద్వయం చ పురస్కృత్య భక్తిస్తత్రాగమిష్యతి ॥

9
యత్ర భాగవతీ వార్తా తత్ర భక్త్యాదికం వ్రజేత్ ।
కథాశబ్దం సమాకర్ణ్య తత్త్రికం తరుణాయతే ॥

సూత ఉవాచ

10
ఏవముక్త్వా కుమారాస్తే నారదేన సమం తతః ।
గఙ్గాతటం సమాజగ్ముః కథాపానాయ సత్వరాః ॥

11
యదా యాతాస్తటం తే తు తదా కోలాహలోఽప్యభూత్
భూర్లోకే దేవలోకే చ బ్రహ్మలోకే తథైవ చ ॥

12
శ్రీమద్భాగవతపీయూషపానాయ రసలమ్పటాః ।
ధావన్తోఽప్యాయయుః సర్వే ప్రథమం యే చ వైష్ణవాః ॥

13
భృగుర్వసిష్ఠశ్చ్యవనశ్చ గౌతమో
మేధాతిథిర్దేవలదేవరాతౌ ।
రామస్తథా గాధిసుతశ్చ శాకలో
మృకణ్డుపుత్రాత్రిజపిప్పలాదాః ॥

14
యోగేశ్వరౌ వ్యాసపరాశరౌ చ
ఛాయాశుకో జాజలిజహ్నుముఖ్యాః ।
సర్వేఽప్యమీ మునిగణాః సహపుత్రశిష్యాః
స్వస్త్రీభిరాయయురతిప్రణయేన యుక్తాః ॥

15
వేదాన్తాని చ వేదాశ్చ మన్త్రాస్తన్త్రాః సమూర్తయః ।
దశసప్తపురాణాని షట్శాస్త్రాణి తథాఽఽయయుః ॥

16
గఙ్గాద్యాః సరితస్తత్ర పుష్కరాదిసరాంసి చ ।
క్షేత్రాణి చ దిశః సర్వా దణ్డకాదివనాని చ ॥

17
నగాదయో యయుస్తత్ర దేవగన్ధర్వదానవాః ।
గురుత్వాత్తత్ర నాయాతాన్ భృగుః సమ్బోధ్య చానయత్ ॥

18
దీక్షితా నారదేనాథ దత్తమాసనముత్తమమ్ ।
కుమారా వన్దితా సర్వైర్నిషేదుః కృష్ణతత్పరాః ॥

19
వైష్ణవాశ్చ విరక్తాశ్చ న్యాసినో బ్రహ్మచారిణః ।
ముఖభాగే స్థితాస్తే చ తదగ్రే నారదః స్థితః ॥

20
ఏకభాగే ఋషిగణాస్తదన్యత్ర దివౌకసః ।
వేదోపనిషదోఽన్యత్ర తీర్థాన్యత్ర స్త్రియోఽన్యతః ॥

21
జయశబ్దో నమఃశబ్దః శఙ్ఖశబ్దస్తథైవ చ ।
చూర్ణలాజా ప్రసూనానాం నిక్షేపః సుమహానభూత్ ॥

22
విమానాని సమారుహ్య కియన్తో దేవనాయకాః ।
కల్పవృక్షప్రసూనైస్తాన్ సర్వాంస్తత్ర సమాకిరన్ ॥

సూత ఉవాచ

23
ఏవం తేష్వేకచిత్తేషు శ్రీమద్భాగవతస్య చ ।
మాహాత్మ్యమూచిరే స్పష్టం నారదాయ మహాత్మనే ॥

కుమారా ఊచుః

24
అథ తే వర్ణ్యతేఽస్మాభిర్మహిమా శుకశాస్త్రజః ।
యస్య శ్రవణమాత్రేణ ముక్తిః కరతలే స్థితా ॥

25
సదా సేవ్యా సదా సేవ్యా శ్రీమద్భాగవతీ కథా ।
యస్యాః శ్రవణమాత్రేణ హరిశ్చిత్తం సమాశ్రయేత్ ॥

26
గ్రన్థోఽష్టాదశసాహస్రో ద్వాదశస్కన్ధసమ్మితః ।
పరీక్షిచ్ఛుకసంవాదః శృణు భాగవతం చ యత్ ॥

27
తావత్సంసారచక్రేఽస్మిన్ భ్రమతేఽజ్ఞానతః పుమాన్ ।
యావత్కర్ణగతా నాస్తి శుకశాస్త్రకథా క్షణమ్ ॥

28
కిం శ్రుతైర్బహుభిః శాస్త్రైః పురాణైశ్చ భ్రమావహైః ।
ఏకం భాగవతం శాస్త్రం ముక్తిదానేన గర్జతి ॥

29
కథా భాగవతస్యాపి నిత్యం భవతి యద్గృహే ।
తద్గృహం తీర్థరూపం హి వసతాం పాపనాశనమ్ ॥

30
అశ్వమేధసహస్రాణి వాజపేయశతాని చ ।
శుకశాస్త్రకథాయాశ్చ కలాం నార్హన్తి షోడశీమ్ ॥

31
తావత్పాపాని దేహేఽస్మిన్నివసన్తి తపోధనాః ।
యావన్న శ్రూయతే సమ్యక్ శ్రీమద్భాగవతం నరైః ॥

32
న గఙ్గా న గయా కాశీ పుష్కరం న ప్రయాగకమ్ ।
శుకశాస్త్రకథాయాశ్చ ఫలేన సమతాం నయేత్ ॥

33
శ్లోకార్ధం శ్లోకపాదం వా నిత్యం భాగవతోద్భవమ్ ।
పఠస్వ స్వముఖేనైవ యదీచ్ఛసి పరాం గతిమ్ ॥

34
వేదాదిర్వేదమాతా చ పౌరుషం సూక్తమేవ చ ।
త్రయీ భాగవతం చైవ ద్వాదశాక్షర ఏవ చ ॥

35
ద్వాదశాత్మా ప్రయాగశ్చ కాలః సంవత్సరాత్మకః ।
బ్రాహ్మణాశ్చాగ్నిహోత్రం చ సురభిర్ద్వాదశీ తథా ॥

36
తులసీ చ వసన్తశ్చ పురుషోత్తమ ఏవ చ ।
ఏతేషాం తత్త్వతః ప్రాజ్ఞైర్న పృథగ్భావ ఇష్యతే ॥

37
యశ్చ భాగవతం శాస్త్రం వాచయేదర్థతోఽనిశమ్ ।
జన్మకోటికృతం పాపం నశ్యతే నాత్ర సంశయః ॥

38
శ్లోకార్ధం శ్లోకపాదం వా పఠేద్భాగవతం చ యః ।
నిత్యం పుణ్యమవాప్నోతి రాజసూయాశ్వమేధయోః ॥

39
ఉక్తం భాగవతం నిత్యం కృతం చ హరిచిన్తనమ్ ।
తులసీపోషణం చైవ ధేనూనాం సేవనం సమమ్ ॥

40
అన్తకాలే తు యేనైవ శ్రూయతే శుకశాస్త్రవాక్ ।
ప్రీత్యా తస్యైవ వైకుణ్ఠం గోవిన్దోఽపి ప్రయచ్ఛతి ॥

41
హేమసింహయుతం చైతద్వైష్ణవాయ దదాతి యః ।
కృష్ణేన సహ సాయుజ్యం స పుమాఁల్లభతే ధ్రువమ్ ॥

42
ఆజన్మమాత్రమపి యేన శఠేన కిఞ్చిత్
చిత్తం విధాయ శుకశాస్త్రకథా న పీతా ।
చాణ్డాలవచ్చ ఖరవద్బత తేన నీతం
మిథ్యా స్వజన్మ జననీజనిదుఃఖభాజా ॥

43
జీవచ్ఛవో నిగదితః స తు పాపకర్మా
యేన శ్రుతం శుకకథావచనం న కిఞ్చిత్ ।
ధిక్ తం నరం పశుసమం భువి భారరూపం
ఏవం వదన్తి దివి దేవసమాజముఖ్యాః ॥

44
దుర్లభైవ కథా లోకే శ్రీమద్భాగవతోద్భవా ।
కోటిజన్మసముత్థేన పుణ్యేనైవ తు లభ్యతే ॥

45
తేన యోగనిధే ధీమన్ శ్రోతవ్యా సా ప్రయత్నతః ।
దినానాం నియమో నాస్తి సర్వదా శ్రవణం మతమ్ ॥

46
సత్యేన బ్రహ్మచర్యేణ సర్వదా శ్రవణం మతమ్ ।
అశక్యత్వాత్కలౌ బోధ్యో విశేషోఽత్ర శుకాజ్ఞయా ॥

47
మనోవృత్తిజయశ్చైవ నియమాచరణం తథా ।
దీక్షాం కర్తుమశక్యత్వాత్సప్తాహశ్రవణం మతమ్ ॥

48
శ్రద్ధాతః శ్రవణే నిత్యం మాఘే తావద్ధి యత్ఫలమ్ ।
తత్ఫలం శుకదేవేన సప్తాహశ్రవణే కృతమ్ ॥

49
మనసశ్చాజయాద్రోగాత్పుంసాం చైవాయుషః క్షయాత్ ।
కలేర్దోషబహుత్వాచ్చ సప్తాహశ్రవణం మతమ్ ॥

50
యత్ఫలం నాస్తి తపసా న యోగేన సమాధినా ।
అనాయాసేన తత్సర్వం సప్తాహశ్రవణే లభేత్ ॥

51
యజ్ఞాద్గర్జతి సప్తాహః సప్తాహో గర్జతి వ్రతాత్ ।
తపసో గర్జతి ప్రోచ్చైస్తీర్థాన్నిత్యం హి గర్జతి ॥

52
యోగాద్గర్జతి సప్తాహో ధ్యానాజ్జ్ఞానాచ్చ గర్జతి ।
కిం బ్రూమో గర్జనం తస్య రే రే గర్జతి గర్జతి ॥

శౌనక ఉవాచ

53
సాశ్చర్యమేతత్కథితం కథానకం
జ్ఞానాదిధర్మాన్ విగణయ్య సామ్ప్రతమ్ ।
నిఃశ్రేయసే భాగవతం పురాణం
జాతం కుతో యోగవిదాదిసూచకమ్ ॥

సూత ఉవాచ

54
యదా కృష్ణో ధరాం త్యక్త్వా స్వపదం గన్తుముద్యతః ।
ఏకాదశం పరిశ్రుత్యాప్యుద్ధవో వాక్యమబ్రవీత్ ॥

ఉద్ధవ ఉవాచ

55
త్వం తు యాస్యసి గోవిన్ద భక్తకార్యం విధాయ చ ।
మచ్చిత్తే మహతీ చిన్తా తాం శ్రుత్వా సుఖమావహ ॥

56
ఆగతోఽయం కలిర్ఘోరో భవిష్యన్తి పునః ఖలాః ।
సత్సఙ్గేనైవ సన్తోఽపి గమిష్యన్త్యుగ్రతాం యదా ॥

57
తదా భారవతీ భూమిర్గోరూపేయం కమాశ్రయేత్ ।
అన్యో న దృశ్యతే త్రాతా త్వత్తః కమలలోచన ॥

58
అతః సత్సు దయాం కృత్వా భక్తవత్సల మా వ్రజ ।
భక్తార్థం సగుణో జాతో నిరాకారోఽపి చిన్మయః ॥

59
త్వద్వియోగేన తే భక్తాః కథం స్థాస్యన్తి భూతలే ।
నిర్గుణోపాసనే కష్టమతః కించిద్విచారయ ॥

60
ఇత్యుద్ధవవచః శ్రుత్వా ప్రభాసేఽచిన్తయద్ధరిః ।
భక్తావలమ్బనార్థాయ కిం విధేయం మయేతి చ ॥

61
స్వకీయం యద్భవేత్తేజస్తచ్చ భాగవతేఽదధాత్ ।
తిరోధాయ ప్రవిష్టోఽయం శ్రీమద్భాగవతార్ణవమ్ ॥

62
తేనేయం వాఙ్మయీ మూర్తిః ప్రత్యక్షా వర్తతే హరేః ।
సేవనాచ్ఛ్రవణాత్పాఠాద్దర్శనాత్పాపనాశినీ ॥

63
సప్తాహశ్రవణం తేన సర్వేభ్యోఽప్యధికం కృతమ్ ।
సాధనాని తిరస్కృత్య కలౌ ధర్మోఽయమీరితః ॥

64
దుఃఖదారిద్ర్యదౌర్భాగ్యపాపప్రక్షాలనాయ చ ।
కామక్రోధజయార్థం హి కలౌ ధర్మోఽయమీరితః ॥

65
అన్యథా వైష్ణవీ మాయా దేవైరపి సుదుస్త్యజా ।
కథం త్యాజ్యా భవేత్పుంభిః సప్తాహోఽతః ప్రకీర్తితః ॥

సూత ఉవాచ

66
ఏవం నగాహశ్రవణోరుధర్మే
ప్రకాశ్యమానే ఋషిభిః సభాయామ్ ।
ఆశ్చర్యమేకం సమభూత్తదానీం
తదుచ్యతే సంశృణు శౌనక త్వమ్ ॥

67
భక్తిః సుతౌ తౌ తరుణౌ గృహీత్వా
ప్రేమైకరూపా సహసాఽఽవిరాసీత్ ।
శ్రీకృష్ణ గోవిన్ద హరే మురారే
నాథేతి నామాని ముహుర్వదన్తీ ॥

68
తాం చాగతాం భాగవతార్థభూషాం
సుచారువేషాం దదృశుః సదస్యాః ।
కథం ప్రవిష్టా కథమాగతేయం
మధ్యే మునీనామితి తర్కయన్తః ॥

69
ఊచుః కుమారా వచనం తదానీం
కథార్థతో నిష్పతితాధునేయమ్ ।
ఏవం గిరః సా ససుతా నిశమ్య
సనత్కుమారం నిజగాద నమ్రా ॥

భక్తిరువాచ

70
భవద్భిరద్యైవ కృతాస్మి పుష్టా
కలిప్రణష్టాపి కథారసేన ।
క్వాహం తు తిష్ఠామ్యధునా బ్రువన్తు
బ్రాహ్మా ఇదం తాం గిరమూచిరే తే ॥

71
భక్తేషు గోవిన్దసరూపకర్త్రీ
ప్రేమైకధర్త్రీ భవరోగహన్త్రీ ।
సా త్వం చ తిష్ఠస్వ సుధైర్యసంశ్రయా
నిరన్తరం వైష్ణవమానసాని ॥

72
తతోఽపి దోషాః కలిజా ఇమే త్వాం
ద్రష్టుం న శక్తాః ప్రభవోఽపి లోకే ।
ఏవం తదాజ్ఞావసరేఽపి భక్తిస్తదా
నిషణ్ణా హరిదాసచిత్తే ॥

73
సకలభువనమధ్యే నిర్ధనాస్తేఽపి ధన్యాః
నివసతి హృది యేషాం శ్రీహరేర్భక్తిరేకా ।
హరిరపి నిజలోకం సర్వథాతో విహాయ
ప్రవిశతి హృది తేషాం భక్తిసూత్రోపనద్ధః ॥

74
బ్రూమోఽద్య తే కిమధికం మహిమానమేవం
బ్రహ్మాత్మకస్య భువి భాగవతాభితస్య ।
యత్సంశ్రయాన్నిగదితే లభతే సువక్తా
శ్రోతాపి కృష్ణసమతామలమన్యధర్మైః ॥

75
ఇతి శ్రీపద్మపురాణే ఉత్తరఖణ్డే శ్రీమద్భాగవతమాహాత్మ్యే
భక్తికష్టనివర్తనం నామ తృతీయోఽధ్యాయః ॥

ఇంకా ఉంది.....