పోతన తెలుగు భాగవతము

పోతన తెలుగు భాగవతము

తృతీయ స్కంధః : వింశోఽధ్యాయః - 20

3-20-1
శౌనక ఉవాచ
మహీం ప్రతిష్ఠామధ్యస్య సౌతే స్వాయంభువో మనుః .
కాన్యన్వతిష్ఠద్ద్వారాణి మార్గాయావరజన్మనాం

3-20-2
క్షత్తా మహాభాగవతః కృష్ణస్యైకాంతికః సుహృత్ .
యస్తత్యాజాగ్రజం కృష్ణే సాపత్యమఘవానితి

3-20-3
ద్వైపాయనాదనవరో మహిత్వే తస్య దేహజః .
సర్వాత్మనా శ్రితః కృష్ణం తత్పరాంశ్చాప్యనువ్రతః

3-20-4
కిమన్వపృచ్ఛన్మైత్రేయం విరజాస్తీర్థసేవయా .
ఉపగమ్య కుశావర్త ఆసీనం తత్త్వవిత్తమం

3-20-5
తయోః సంవదతోః సూత ప్రవృత్తా హ్యమలాః కథాః .
ఆపో గాంగా ఇవాఘఘ్నీర్హరేః పాదాంబుజాశ్రయాః

3-20-6
తా నః కీర్తయ భద్రం తే కీర్తన్యోదారకర్మణః .
రసజ్ఞః కో ను తృప్యేత హరిలీలామృతం పిబన్

3-20-7
ఏవముగ్రశ్రవాః పృష్టః ఋషిభిర్నైమిషాయనైః .
భగవత్యర్పితాధ్యాత్మస్తానాహ శ్రూయతామితి

3-20-8
సూత ఉవాచ
హరేర్ధృతక్రోడతనోః స్వమాయయా
నిశమ్య గోరుద్ధరణం రసాతలాత్ .
లీలాం హిరణ్యాక్షమవజ్ఞయా హతం
సంజాతహర్షో మునిమాహ భారతః

3-20-9
విదుర ఉవాచ
ప్రజాపతిపతిః సృష్ట్వా ప్రజాసర్గే ప్రజాపతీన్ .
కిమారభత మే బ్రహ్మన్ ప్రబ్రూహ్యవ్యక్తమార్గవిత్

3-20-10
యే మరీచ్యాదయో విప్రా యస్తు స్వాయంభువో మనుః .
తే వై బ్రహ్మణ ఆదేశాత్కథమేతదభావయన్

3-20-11
సద్వితీయాః కిమసృజన్ స్వతంత్రా ఉత కర్మసు .
ఆహోస్విత్సంహతాః సర్వ ఇదం స్మ సమకల్పయన్

3-20-12
మైత్రేయ ఉవాచ
దైవేన దుర్వితర్క్యేణ పరేణానిమిషేణ చ .
జాతక్షోభాద్భగవతో మహానాసీద్గుణత్రయాత్

3-20-13
రజఃప్రధానాన్ మహతస్త్రిలింగో దైవచోదితాత్ .
జాతః ససర్జ భూతాదిర్వియదాదీని పంచశః

3-20-14
తాని చైకైకశః స్రష్టుమసమర్థాని భౌతికం .
సంహత్య దైవయోగేన హైమమండమవాసృజన్

3-20-15
సోఽశయిష్టాబ్ధిసలిలే ఆండకోశో నిరాత్మకః .
సాగ్రం వై వర్షసాహస్రమన్వవాత్సీత్తమీశ్వరః

3-20-16
తస్య నాభేరభూత్పద్మం సహస్రార్కోరుదీధితి .
సర్వజీవనికాయౌకో యత్ర స్వయమభూత్స్వరాట్

3-20-17
సోఽనువిష్టో భగవతా యః శేతే సలిలాశయే .
లోకసంస్థాం యథాపూర్వం నిర్మమే సంస్థయా స్వయా

3-20-18
ససర్జచ్ఛాయయా విద్యాం పంచ పర్వాణమగ్రతః .
తామిస్రమంధతామిస్రం తమో మోహో మహాతమః

3-20-19
విససర్జాత్మనః కాయం నాభినందంస్తమోమయం .
జగృహుర్యక్షరక్షాంసి రాత్రిం క్షుత్తృట్సముద్భవాం

3-20-20
క్షుత్తృడ్భ్యాముపసృష్టాస్తే తం జగ్ధుమభిదుద్రువుః .
మా రక్షతైనం జక్షధ్వమిత్యూచుః క్షుత్తృడర్దితాః

3-20-21
దేవస్తానాహ సంవిగ్నో మా మాం జక్షత రక్షత .
అహో మే యక్షరక్షాంసి ప్రజా యూయం బభూవిథ

3-20-22
దేవతాః ప్రభయా యా యా దీవ్యన్ ప్రముఖతోఽసృజత్ .
తే అహార్షుర్దేవయంతో విసృష్టాం తాం ప్రభామహః

3-20-23
దేవోఽదేవాంజఘనతః సృజతి స్మాతిలోలుపాన్ .
త ఏనం లోలుపతయా మైథునాయాభిపేదిరే

3-20-24
తతో హసన్ స భగవానసురైర్నిరపత్రపైః .
అన్వీయమానస్తరసా క్రుద్ధో భీతః పరాపతత్

3-20-25
స ఉపవ్రజ్య వరదం ప్రపన్నార్తిహరం హరిం .
అనుగ్రహాయ భక్తానామనురూపాత్మదర్శనం

3-20-26
పాహి మాం పరమాత్మంస్తే ప్రేషణేనాసృజం ప్రజాః .
తా ఇమా యభితుం పాపా ఉపాక్రామంతి మాం ప్రభో

3-20-27
త్వమేకః కిల లోకానాం క్లిష్టానాం క్లేశనాశనః .
త్వమేకః క్లేశదస్తేషామనాసన్నపదాం తవ

3-20-28
సోఽవధార్యాస్య కార్పణ్యం వివిక్తాధ్యాత్మదర్శనః .
విముంచాత్మతనుం ఘోరామిత్యుక్తో విముమోచ హ

3-20-29
తాం క్వణచ్చరణాంభోజాం మదవిహ్వలలోచనాం .
కాంచీకలాపవిలసద్దుకూలచ్ఛన్నరోధసం

3-20-30
అన్యోన్యశ్లేషయోత్తుంగనిరంతరపయోధరాం .
సునాసాం సుద్విజాం స్నిగ్ద్ధహాసలీలావలోకనాం

3-20-31
గూహంతీం వ్రీడయాఽఽత్మానం నీలాలకవరూథినీం .
ఉపలభ్యాసురా ధర్మ సర్వే సమ్ముముహుః స్త్రియం

3-20-32
అహో రూపమహో ధైర్యమహో అస్యా నవం వయః .
మధ్యే కామయమానానామకామేవ విసర్పతి

3-20-33
వితర్కయంతో బహుధా తాం సంధ్యాం ప్రమదాకృతిం .
అభిసంభావ్య విశ్రంభాత్పర్యపృచ్ఛన్ కుమేధసః

3-20-34
కాసి కస్యాసి రంభోరు కో వార్థస్తేఽత్ర భామిని .
రూపద్రవిణపణ్యేన దుర్భగాన్నో విబాధసే

3-20-35
యా వా కాచిత్త్వమబలే దిష్ట్యా సందర్శనం తవ .
ఉత్సునోషీక్షమాణానాం కందుకక్రీడయా మనః

3-20-36
నైకత్ర తే జయతి శాలిని పాదపద్మం
ఘ్నంత్యా ముహుః కరతలేన పతత్పతంగం .
మధ్యం విషీదతి బృహత్స్తనభారభీతం
శాంతేవ దృష్టిరమలా సుశిఖాసమూహః

3-20-37
ఇతి సాయంతనీం సంధ్యామసురాః ప్రమదాయతీం .
ప్రలోభయంతీం జగృహుర్మత్వా మూఢధియః స్త్రియం

3-20-38
ప్రహస్య భావగంభీరం జిఘ్రంత్యాత్మానమాత్మనా .
కాంత్యా ససర్జ భగవాన్ గంధర్వాప్సరసాం గణాన్

3-20-39
విససర్జ తనుం తాం వై జ్యోత్స్నాం కాంతిమతీం ప్రియాం .
త ఏవ చాదదుః ప్రీత్యా విశ్వావసుపురోగమాః

3-20-40
సృష్ట్వా భూతపిశాచాంశ్చ భగవానాత్మతంద్రిణా .
దిగ్వాససో ముక్తకేశాన్ వీక్ష్య చామీలయద్దృశౌ

3-20-41
జగృహుస్తద్విసృష్టాం తాం జృంభణాఖ్యాం తనుం ప్రభోః .
నిద్రామింద్రియవిక్లేదో యయా భూతేషు దృశ్యతే .
యేనోచ్ఛిష్టాన్ ధర్షయంతి తమున్మాదం ప్రచక్షతే

3-20-42
ఊర్జస్వంతం మన్యమాన ఆత్మానం భగవానజః .
సాధ్యాన్ గణాన్ పితృగణాన్ పరోక్షేణాసృజత్ప్రభుః

3-20-43
త ఆత్మసర్గం తం కాయం పితరః ప్రతిపేదిరే .
సాధ్యేభ్యశ్చ పితృభ్యశ్చ కవయో యద్వితన్వతే

3-20-44
సిద్ధాన్ విద్యాధరాంశ్చైవ తిరోధానేన సోఽసృజత్ .
తేభ్యోఽదదాత్తమాత్మానమంతర్ధానాఖ్యమద్భుతం

3-20-45
స కిన్నరాన్ కింపురుషాన్ ప్రత్యాత్మ్యేనాసృజత్ప్రభుః .
మానయన్నాత్మనాఽఽత్మానమాత్మాభాసం విలోకయన్

3-20-46
తే తు తజ్జగృహూ రూపం త్యక్తం యత్పరమేష్ఠినా .
మిథునీభూయ గాయంతస్తమేవోషసి కర్మభిః

3-20-47
దేహేన వై భోగవతా శయానో బహుచింతయా .
సర్గేఽనుపచితే క్రోధాదుత్ససర్జ హ తద్వపుః

3-20-48
యేఽహీయంతాముతః కేశా అహయస్తేఽఙ్గ జజ్ఞిరే .
సర్పాః ప్రసర్పతః క్రూరా నాగా భోగోరుకంధరాః

3-20-49
స ఆత్మానం మన్యమానః కృతకృత్యమివాత్మభూః .
తదా మనూన్ ససర్జాంతే మనసా లోకభావనాన్

3-20-50
తేభ్యః సోఽసృజత్స్వీయం పురం పురుషమాత్మవాన్ .
తాన్ దృష్ట్వా యే పురా సృష్టాః ప్రశశంసుః ప్రజాపతిం

3-20-51
అహో ఏతజ్జగత్స్రష్టః సుకృతం బత తే కృతం .
ప్రతిష్ఠితాః క్రియా యస్మిన్ సాకమన్నమదామహే

3-20-52
తపసా విద్యయా యుక్తో యోగేన సుసమాధినా .
ఋషీన్ ఋషిర్హృషీకేశః ససర్జాభిమతాః ప్రజాః

3-20-53
తేభ్యశ్చైకైకశః స్వస్య దేహస్యాంశమదాదజః .
యత్తత్సమాధియోగర్ద్ధితపోవిద్యావిరక్తిమత్

3-20-54
ఇతి శ్రీమద్భాగవతే మహాపురాణే పారమహంస్యాం సంహితాయాం
తృతీయస్కంధే వింశోఽధ్యాయః