తృతీయ స్కంధః : సప్తమోఽధ్యాయః - 7
3-7-1
శ్రీశుక ఉవాచ
ఏవం బ్రువాణం మైత్రేయం ద్వైపాయనసుతో బుధః .
ప్రీణయన్నివ భారత్యా విదురః ప్రత్యభాషత
3-7-2
విదుర ఉవాచ
బ్రహ్మన్ కథం భగవతశ్చిన్మాత్రస్యావికారిణః .
లీలయా చాపి యుజ్యేరన్నిర్గుణస్య గుణాః క్రియాః
3-7-3
క్రీడాయాముద్యమోఽర్భస్య కామశ్చిక్రీడిషాన్యతః .
స్వతస్తృప్తస్య చ కథం నివృత్తస్య సదాన్యతః
3-7-4
అస్రాక్షీద్భగవాన్విశ్వం గుణమయ్యాఽఽత్మమాయయా .
తయా సంస్థాపయత్యేతద్భూయః ప్రత్యపిధాస్యతి
3-7-5
దేశతః కాలతో యోఽసావవస్థాతః స్వతోఽన్యతః .
అవిలుప్తావబోధాత్మా స యుజ్యేతాజయా కథం
3-7-6
భగవానేక ఏవైష సర్వక్షేత్రేష్వవస్థితః .
అముష్య దుర్భగత్వం వా క్లేశో వా కర్మభిః కుతః
3-7-7
ఏతస్మిన్ మే మనో విద్వన్ఖిద్యతేఽజ్ఞానసంకటే .
తన్నః పరాణుద విభో కశ్మలం మానసం మహత్
3-7-8
శ్రీశుక ఉవాచ
స ఇత్థం చోదితః క్షత్త్రా తత్త్వజిజ్ఞాసునా మునిః .
ప్రత్యాహ భగవచ్చిత్తః స్మయన్నివ గతస్మయః
3-7-9
మైత్రేయ ఉవాచ
సేయం భగవతో మాయా యన్నయేన విరుధ్యతే .
ఈశ్వరస్య విముక్తస్య కార్పణ్యముత బంధనం
3-7-10
యదర్థేన వినాముష్య పుంస ఆత్మవిపర్యయః .
ప్రతీయత ఉపద్రష్టుః స్వశిరశ్ఛేదనాదికః
3-7-11
యథా జలే చంద్రమసః కంపాదిస్తత్కృతో గుణః .
దృశ్యతేఽసన్నపి ద్రష్టురాత్మనోఽనాత్మనో గుణః
3-7-12
స వై నివృత్తిధర్మేణ వాసుదేవానుకంపయా .
భగవద్భక్తియోగేన తిరోధత్తే శనైరిహ
3-7-13
యదేంద్రియోపరామోఽథ ద్రష్ట్రాత్మని పరే హరౌ .
విలీయంతే తదా క్లేశాః సంసుప్తస్యేవ కృత్స్నశః
3-7-14
అశేషసంక్లేశశమం విధత్తే
గుణానువాదశ్రవణం మురారేః .
కుతః పునస్తచ్చరణారవింద-
పరాగసేవా రతిరాత్మలబ్ధా
3-7-15
విదుర ఉవాచ
సంఛిన్నః సంశయో మహ్యం తవ సూక్తాసినా విభో .
ఉభయత్రాపి భగవన్ మనో మే సంప్రధావతి
3-7-16
సాధ్వేతద్వ్యాహృతం విద్వన్నాత్మమాయాయనం హరేః .
ఆభాత్యపార్థం నిర్మూలం విశ్వమూలం న యద్బహిః
3-7-17
యశ్చ మూఢతమో లోకే యశ్చ బుద్ధేః పరం గతః .
తావుభౌ సుఖమేధేతే క్లిశ్యత్యంతరితో జనః
3-7-18
అర్థాభావం వినిశ్చిత్య ప్రతీతస్యాపి నాత్మనః .
తాం చాపి యుష్మచ్చరణసేవయాహం పరాణుదే
3-7-19
యత్సేవయా భగవతః కూటస్థస్య మధుద్విషః .
రతిరాసో భవేత్తీవ్రః పాదయోర్వ్యసనార్దనః
3-7-20
దురాపా హ్యల్పతపసః సేవా వైకుంఠవర్త్మసు .
యత్రోపగీయతే నిత్యం దేవదేవో జనార్దనః
3-7-21
సృష్ట్వాగ్రే మహదాదీని సవికారాణ్యనుక్రమాత్ .
తేభ్యో విరాజముద్ధృత్య తమను ప్రావిశద్విభుః
3-7-22
యమాహురాద్యం పురుషం సహస్రాంఘ్ర్యూరుబాహుకం .
యత్ర విశ్వ ఇమే లోకాః సవికాసం సమాసతే
3-7-23
యస్మిన్ దశవిధః ప్రాణః సేంద్రియార్థేంద్రియస్త్రివృత్ .
త్వయేరితో యతో వర్ణాస్తద్విభూతీర్వదస్వ నః
3-7-24
యత్ర పుత్రైశ్చ పౌత్రైశ్చ నప్తృభిః సహ గోత్రజైః .
ప్రజా విచిత్రాకృతయ ఆసన్ యాభిరిదం తతం
3-7-25
ప్రజాపతీనాం స పతిశ్చక్లృపే కాన్ ప్రజాపతీన్ .
సర్గాంశ్చైవానుసర్గాంశ్చ మనూన్మన్వంతరాధిపాన్
3-7-26
ఏతేషామపి వంశాంశ్చ వంశానుచరితాని చ .
ఉపర్యధశ్చ యే లోకా భూమేర్మిత్రాత్మజాసతే
3-7-27
తేషాం సంస్థాం ప్రమాణం చ భూర్లోకస్య చ వర్ణయ .
తిర్యఙ్మానుషదేవానాం సరీసృపపతత్త్రిణాం .
వద నః సర్గసంవ్యూహం గార్భస్వేదద్విజోద్భిదాం
3-7-28
గుణావతారైర్విశ్వస్య సర్గస్థిత్యప్యయాశ్రయం .
సృజతః శ్రీనివాసస్య వ్యాచక్ష్వోదారవిక్రమం
3-7-29
వర్ణాశ్రమవిభాగాంశ్చ రూపశీలస్వభావతః .
ఋషీణాం జన్మకర్మాది వేదస్య చ వికర్షణం
3-7-30
యజ్ఞస్య చ వితానాని యోగస్య చ పథః ప్రభో .
నైష్కర్మ్యస్య చ సాంఖ్యస్య తంత్రం వా భగవత్స్మృతం
3-7-31
పాఖండపథవైషమ్యం ప్రతిలోమనివేశనం .
జీవస్య గతయో యాశ్చ యావతీర్గుణకర్మజాః
3-7-32
ధర్మార్థకామమోక్షాణాం నిమిత్తాన్యవిరోధతః .
వార్తాయా దండనీతేశ్చ శ్రుతస్య చ విధిం పృథక్
3-7-33
శ్రాద్ధస్య చ విధిం బ్రహ్మన్ పితౄణాం సర్గమేవ చ .
గ్రహనక్షత్రతారాణాం కాలావయవసంస్థితిం
3-7-34
దానస్య తపసో వాపి యచ్చేష్టాపూర్తయోః ఫలం .
ప్రవాసస్థస్య యో ధర్మో యశ్చ పుంస ఉతాపది
3-7-35
యేన వా భగవాంస్తుష్యేద్ధర్మయోనిర్జనార్దనః .
సంప్రసీదతి వా యేషామేతదాఖ్యాహి చానఘ
3-7-36
అనువ్రతానాం శిష్యాణాం పుత్రాణాం చ ద్విజోత్తమ .
అనాపృష్టమపి బ్రూయుర్గురవో దీనవత్సలాః
3-7-37
తత్త్వానాం భగవంస్తేషాం కతిధా ప్రతిసంక్రమః .
తత్రేమం క ఉపాసీరన్ క ఉ స్విదనుశేరతే
3-7-38
పురుషస్య చ సంస్థానం స్వరూపం వా పరస్య చ .
జ్ఞానం చ నైగమం యత్తద్గురుశిష్యప్రయోజనం
3-7-39
నిమిత్తాని చ తస్యేహ ప్రోక్తాన్యనఘ సూరిభిః .
స్వతో జ్ఞానం కుతః పుంసాం భక్తిర్వైరాగ్యమేవ వా
3-7-40
ఏతాన్మే పృచ్ఛతః ప్రశ్నాన్ హరేః కర్మవివిత్సయా .
బ్రూహి మేఽజ్ఞస్య మిత్రత్వాదజయా నష్టచక్షుషః
3-7-41
సర్వే వేదాశ్చ యజ్ఞాశ్చ తపో దానాని చానఘ .
జీవాభయప్రదానస్య న కుర్వీరన్ కలామపి
3-7-42
శ్రీశుక ఉవాచ
స ఇత్థమాపృష్టపురాణకల్పః
కురుప్రధానేన మునిప్రధానః .
ప్రవృద్ధహర్షో భగవత్కథాయాం
సంచోదితస్తం ప్రహసన్నివాహ
3-7-43
ఇతి శ్రీమద్భాగవతే మహాపురాణే పారమహంస్యాం సంహితాయాం
తృతీయస్కంధే సప్తమోఽధ్యాయః