పోతన తెలుగు భాగవతము

పోతన తెలుగు భాగవతము

తృతీయ స్కంధః : ఏకోనవింశోఽధ్యాయః - 19

3-19-1
మైత్రేయ ఉవాచ
అవధార్య విరించస్య నిర్వ్యలీకామృతం వచః .
ప్రహస్య ప్రేమగర్భేణ తదపాంగేన సోఽగ్రహీత్

3-19-2
తతః సపత్నం ముఖతశ్చరంతమకుతోభయం .
జఘానోత్పత్య గదయా హనావసురమక్షజః

3-19-3
సా హతా తేన గదయా విహతా భగవత్కరాత్ .
విఘూర్ణితాపతద్రేజే తదద్భుతమివాభవత్

3-19-4
స తదా లబ్ధతీర్థోఽపి న బబాధే నిరాయుధం .
మానయన్ స మృధే ధర్మం విష్వక్సేనం ప్రకోపయన్

3-19-5
గదాయామపవిద్ధాయాం హాహాకారే వినిర్గతే .
మానయామాస తద్ధర్మం సునాభం చాస్మరద్విభుః

3-19-6
తం వ్యగ్రచక్రం దితిపుత్రాధమేన
స్వపార్షదముఖ్యేన విషజ్జమానం .
చిత్రా వాచోఽతద్విదాం ఖేచరాణాం
తత్ర స్మాసన్ స్వస్తి తేఽముం జహీతి

3-19-7
స తం నిశామ్యాత్తరథాంగమగ్రతో
వ్యవస్థితం పద్మపలాశలోచనం .
విలోక్య చామర్షపరిప్లుతేంద్రియో
రుషా స్వదంతచ్ఛదమాదశచ్ఛ్వసన్

3-19-8
కరాలదంష్ట్రశ్చక్షుర్భ్యాం సంచక్షాణో దహన్నివ .
అభిప్లుత్య స్వగదయా హతోఽసీత్యాహనద్ధరిం

3-19-9
పదా సవ్యేన తాం సాధో భగవాన్ యజ్ఞసూకరః .
లీలయా మిషతః శత్రోః ప్రాహరద్వాతరంహసం

3-19-10
ఆహ చాయుధమాధత్స్వ ఘటస్వ త్వం జిగీషసి .
ఇత్యుక్తః స తదా భూయస్తాడయన్ వ్యనదద్భృశం

3-19-11
తాం స ఆపతతీం వీక్ష్య భగవాన్ సమవస్థితః .
జగ్రాహ లీలయా ప్రాప్తాం గరుత్మానివ పన్నగీం

3-19-12
స్వపౌరుషే ప్రతిహతే హతమానో మహాసురః .
నైచ్ఛద్గదాం దీయమానాం హరిణా విగతప్రభః

3-19-13
జగ్రాహ త్రిశిఖం శూలం జ్వలజ్జ్వలనలోలుపం .
యజ్ఞాయ ధృతరూపాయ విప్రాయాభిచరన్ యథా

3-19-14
తదోజసా దైత్యమహాభటార్పితం
చకాసదంతఃఖ ఉదీర్ణదీధితి .
చక్రేణ చిచ్ఛేద నిశాతనేమినా
హరిర్యథా తార్క్ష్యపతత్రముజ్ఝితం

3-19-15
వృక్ణే స్వశూలే బహుధారిణా హరేః
ప్రత్యేత్య విస్తీర్ణమురో విభూతిమత్ .
ప్రవృద్ధరోషః స కఠోరముష్టినా
నదన్ ప్రహృత్యాంతరధీయతాసురః

3-19-16
తేనేత్థమాహతః క్షత్తర్భగవానాదిసూకరః .
నాకంపత మనాక్ క్వాపి స్రజా హత ఇవ ద్విపః

3-19-17
అథోరుధాఽసృజన్మాయాం యోగమాయేశ్వరే హరౌ .
యాం విలోక్య ప్రజాస్త్రస్తా మేనిరేఽస్యోపసంయమం

3-19-18
ప్రవవుర్వాయవశ్చండాస్తమః పాంసవమైరయన్ .
దిగ్భ్యో నిపేతుర్గ్రావాణః క్షేపణైః ప్రహితా ఇవ

3-19-19
ద్యౌర్నష్టభగణాభ్రౌఘైః సవిద్యుత్స్తనయిత్నుభిః .
వర్షద్భిః పూయకేశాసృగ్విణ్మూత్రాస్థీని చాసకృత్

3-19-20
గిరయః ప్రత్యదృశ్యంత నానాయుధముచోఽనఘ .
దిగ్వాససో యాతుధాన్యః శూలిన్యో ముక్తమూర్ధజాః

3-19-21
బహుభిర్యక్షరక్షోభిః పత్త్యశ్వరథకుంజరైః .
ఆతతాయిభిరుత్సృష్టా హింస్రా వాచోఽతివైశసాః

3-19-22
ప్రాదుష్కృతానాం మాయానామాసురీణాం వినాశయత్ .
సుదర్శనాస్త్రం భగవాన్ ప్రాయుంక్త దయితం త్రిపాత్

3-19-23
తదా దితేః సమభవత్సహసా హృది వేపథుః .
స్మరంత్యా భర్తురాదేశం స్తనాచ్చాసృక్ ప్రసుస్రువే

3-19-24
వినష్టాసు స్వమాయాసు భూయశ్చావ్రజ్య కేశవం .
రుషోపగూహమానోఽముం దదృశేఽవస్థితం బహిః

3-19-25
తం ముష్టిభిర్వినిఘ్నంతం వజ్రసారైరధోక్షజః .
కరేణ కర్ణమూలేఽహన్ యథా త్వాష్ట్రం మరుత్పతిః

3-19-26
స ఆహతో విశ్వజితా హ్యవజ్ఞయా
పరిభ్రమద్గాత్ర ఉదస్తలోచనః .
విశీర్ణబాహ్వంఘ్రిశిరోరుహోఽపత-
ద్యథా నగేంద్రో లులితో నభస్వతా

3-19-27
క్షితౌ శయానం తమకుంఠవర్చసం
కరాలదంష్ట్రం పరిదష్టదచ్ఛదం .
అజాదయో వీక్ష్య శశంసురాగతా
అహో ఇమం కో ను లభేత సంస్థితిం

3-19-28
యం యోగినో యోగసమాధినా రహో
ధ్యాయంతి లింగాదసతో ముముక్షయా .
తస్యైష దైత్యఋషభః పదాహతో
ముఖం ప్రపశ్యంస్తనుముత్ససర్జ హ

3-19-29
ఏతౌ తౌ పార్షదావస్య శాపాద్యాతావసద్గతిం .
పునః కతిపయైః స్థానం ప్రపత్స్యేతే హ జన్మభిః

3-19-30
దేవా ఊచుః
నమో నమస్తేఽఖిలయజ్ఞతంతవే
స్థితౌ గృహీతామలసత్త్వమూర్తయే .
దిష్ట్యా హతోఽయం జగతామరుంతుదః
త్వత్పాదభక్త్యా వయమీశ నిర్వృతాః

3-19-31
మైత్రేయ ఉవాచ
ఏవం హిరణ్యాక్షమసహ్యవిక్రమం
స సాదయిత్వా హరిరాదిసూకరః .
జగామ లోకం స్వమఖండితోత్సవం
సమీడితః పుష్కరవిష్టరాదిభిః

3-19-32
మయా యథానూక్తమవాది తే హరేః
కృతావతారస్య సుమిత్రచేష్టితం .
యథా హిరణ్యాక్ష ఉదారవిక్రమో
మహామృధే క్రీడనవన్నిరాకృతః

3-19-33
సూత ఉవాచ
ఇతి కౌషారవాఖ్యాతామాశ్రుత్య భగవత్కథాం .
క్షత్తాఽఽనందం పరం లేభే మహాభాగవతో ద్విజ

3-19-34
అన్యేషాం పుణ్యశ్లోకానాముద్దామయశసాం సతాం .
ఉపశ్రుత్య భవేన్మోదః శ్రీవత్సాంకస్య కిం పునః

3-19-35
యో గజేంద్రం ఝషగ్రస్తం ధ్యాయంతం చరణాంబుజం .
క్రోశంతీనాం కరేణూనాం కృచ్ఛ్రతోఽమోచయద్ద్రుతం

3-19-36
తం సుఖారాధ్యమృజుభిరనన్యశరణైర్నృభిః .
కృతజ్ఞః కో న సేవేత దురారాధ్యమసాధుభిః

3-19-37
యో వై హిరణ్యాక్షవధం మహాద్భుతం
విక్రీడితం కారణసూకరాత్మనః .
శృణోతి గాయత్యనుమోదతేఽఞ్జసా
విముచ్యతే బ్రహ్మవధాదపి ద్విజాః

3-19-38
ఏతన్మహాపుణ్యమలం పవిత్రం
ధన్యం యశస్యం పదమాయురాశిషాం .
ప్రాణేంద్రియాణాం యుధి శౌర్యవర్ధనం
నారాయణోఽన్తే గతిరంగ శృణ్వతాం

3-19-39
ఇతి శ్రీమద్భాగవతే మహాపురాణే పారమహంస్యాం సంహితాయాం
తృతీయస్కంధే హిరణ్యాక్షవధో నామైకోనవింశోఽధ్యాయః