పోతన తెలుగు భాగవతము

పోతన తెలుగు భాగవతము

తృతీయ స్కంధః : చతుర్థోఽధ్యాయః - 4

3-4-1
ఉద్ధవ ఉవాచ
అథ తే తదనుజ్ఞాతా భుక్త్వా పీత్వా చ వారుణీం .
తయా విభ్రంశితజ్ఞానా దురుక్తైర్మర్మ పస్పృశుః

3-4-2
తేషాం మైరేయదోషేణ విషమీకృతచేతసాం .
నిమ్లోచతి రవావాసీద్వేణూనామివ మర్దనం

3-4-3
భగవాన్ స్వాత్మమాయాయా గతిం తామవలోక్య సః .
సరస్వతీముపస్పృశ్య వృక్షమూలముపావిశత్

3-4-4
అహం చోక్తో భగవతా ప్రపన్నార్తిహరేణ హ .
బదరీం త్వం ప్రయాహీతి స్వకులం సంజిహీర్షుణా

3-4-5
అథాపి తదభిప్రేతం జానన్నహమరిందమ .
పృష్ఠతోఽన్వగమం భర్తుః పాదవిశ్లేషణాక్షమః

3-4-6
అద్రాక్షమేకమాసీనం విచిన్వన్ దయితం పతిం .
శ్రీనికేతం సరస్వత్యాం కృతకేతమకేతనం

3-4-7
శ్యామావదాతం విరజం ప్రశాంతారుణలోచనం .
దోర్భిశ్చతుర్భిర్విదితం పీతకౌశాంబరేణ చ

3-4-8
వామ ఊరావధిశ్రిత్య దక్షిణాంఘ్రిసరోరుహం .
అపాశ్రితార్భకాశ్వత్థమకృశం త్యక్తపిప్పలం

3-4-9
తస్మిన్మహాభాగవతో ద్వైపాయనసుహృత్సఖా .
లోకాననుచరన్ సిద్ధ ఆససాద యదృచ్ఛయా

3-4-10
తస్యానురక్తస్య మునేర్ముకుందః
ప్రమోదభావానతకంధరస్య .
ఆశృణ్వతో మామనురాగహాస-
సమీక్షయా విశ్రమయన్నువాచ

3-4-11
శ్రీభగవానువాచ
వేదాహమంతర్మనసీప్సితం తే
దదామి యత్తద్దురవాపమన్యైః .
సత్రే పురా విశ్వసృజాం వసూనాం
మత్సిద్ధికామేన వసో త్వయేష్టః

3-4-12
స ఏష సాధో చరమో భవానా-
మాసాదితస్తే మదనుగ్రహో యత్ .
యన్మాం నృలోకాన్ రహ ఉత్సృజంతం
దిష్ట్యా దదృశ్వాన్ విశదానువృత్త్యా

3-4-13
పురా మయా ప్రోక్తమజాయ నాభ్యే
పద్మే నిషణ్ణాయ మమాదిసర్గే .
జ్ఞానం పరం మన్మహిమావభాసం
యత్సూరయో భాగవతం వదంతి

3-4-14
ఇత్యాదృతోక్తః పరమస్య పుంసః
ప్రతిక్షణానుగ్రహభాజనోఽహం .
స్నేహోత్థరోమా స్ఖలితాక్షరస్తం
ముంచంఛుచః ప్రాంజలిరాబభాషే

3-4-15
కో న్వీశ తే పాదసరోజభాజాం
సుదుర్లభోఽర్థేషు చతుర్ష్వపీహ .
తథాపి నాహం ప్రవృణోమి భూమన్
భవత్పదాంభోజనిషేవణోత్సుకః

3-4-16
కర్మాణ్యనీహస్య భవోఽభవస్య తే
దుర్గాశ్రయోఽథారిభయాత్పలాయనం .
కాలాత్మనో యత్ప్రమదాయుతాశ్రమః
స్వాత్మన్ రతేః ఖిద్యతి ధీర్విదామిహ

3-4-17
మంత్రేషు మాం వా ఉపహూయ యత్త్వ-
మకుంఠితాఖండసదాత్మబోధః .
పృచ్ఛేః ప్రభో ముగ్ద్ధ ఇవాప్రమత్తః
తన్నో మనో మోహయతీవ దేవ

3-4-18
జ్ఞానం పరం స్వాత్మరహఃప్రకాశం
ప్రోవాచ కస్మై భగవాన్ సమగ్రం .
అపి క్షమం నో గ్రహణాయ భర్తః
వదాంజసా యద్వృజినం తరేమ

3-4-19
ఇత్యావేదితహార్దాయ మహ్యం స భగవాన్ పరః .
ఆదిదేశారవిందాక్ష ఆత్మనః పరమాం స్థితిం

3-4-20
స ఏవమారాధితపాదతీర్థా-
దధీతతత్త్వాత్మవిబోధమార్గః .
ప్రణమ్య పాదౌ పరివృత్య దేవ-
మిహాగతోఽహం విరహాతురాత్మా

3-4-21
సోఽహం తద్దర్శనాహ్లాదవియోగార్తియుతః ప్రభో .
గమిష్యే దయితం తస్య బదర్యాశ్రమమండలం

3-4-22
యత్ర నారాయణో దేవో నరశ్చ భగవాన్ ఋషిః .
మృదు తీవ్రం తపో దీర్ఘం తేపాతే లోకభావనౌ

3-4-23
శ్రీశుక ఉవాచ
ఇత్యుద్ధవాదుపాకర్ణ్య సుహృదాం దుఃసహం వధం .
జ్ఞానేనాశమయత్క్షత్తా శోకముత్పతితం బుధః

3-4-24
స తం మహాభాగవతం వ్రజంతం కౌరవర్షభః .
విశ్రంభాదభ్యధత్తేదం ముఖ్యం కృష్ణపరిగ్రహే

3-4-25
విదుర ఉవాచ
జ్ఞానం పరం స్వాత్మరహఃప్రకాశం
యదాహ యోగేశ్వర ఈశ్వరస్తే .
వక్తుం భవాన్నోఽర్హతి యద్ధి విష్ణో-
ర్భృత్యాః స్వభృత్యార్థకృతశ్చరంతి

3-4-26
ఉద్ధవ ఉవాచ
నను తే తత్త్వసంరాధ్య ఋషిః కౌషారవోఽన్తి మే .
సాక్షాద్భగవతాఽఽదిష్టో మర్త్యలోకం జిహాసతా

3-4-27
శ్రీశుక ఉవాచ
ఇతి సహ విదురేణ విశ్వమూర్తే-
ర్గుణకథయా సుధయా ప్లావితోరుతాపః .
క్షణమివ పులినే యమస్వసుస్తాం
సముషిత ఔపగవిర్నిశాం తతోఽగాత్

3-4-28
రాజోవాచ
నిధనముపగతేషు వృష్ణిభోజే-
ష్వధిరథయూథపయూథపేషు ముఖ్యః .
స తు కథమవశిష్ట ఉద్ధవో యద్ధరిరపి
తత్యజ ఆకృతిం త్ర్యధీశః

3-4-29
శ్రీశుక ఉవాచ
బ్రహ్మశాపాపదేశేన కాలేనామోఘవాంఛితః .
సంహృత్య స్వకులం నూనం త్యక్ష్యన్ దేహమచింతయత్

3-4-30
అస్మాల్లోకాదుపరతే మయి జ్ఞానం మదాశ్రయం .
అర్హత్యుద్ధవ ఏవాద్ధా సంప్రత్యాత్మవతాం వరః

3-4-31
నోద్ధవోఽణ్వపి మన్న్యూనో యద్గుణైర్నార్దితః ప్రభుః .
అతో మద్వయునం లోకం గ్రాహయన్నిహ తిష్ఠతు

3-4-32
ఏవం త్రిలోకగురుణా సందిష్టః శబ్దయోనినా .
బదర్యాశ్రమమాసాద్య హరిమీజే సమాధినా

3-4-33
విదురోఽప్యుద్ధవాచ్ఛ్రుత్వా కృష్ణస్య పరమాత్మనః .
క్రీడయోపాత్తదేహస్య కర్మాణి శ్లాఘితాని చ

3-4-34
దేహన్యాసం చ తస్యైవం ధీరాణాం ధైర్యవర్ధనం .
అన్యేషాం దుష్కరతరం పశూనాం విక్లవాత్మనాం

3-4-35
ఆత్మానం చ కురుశ్రేష్ఠ కృష్ణేన మనసేక్షితం .
ధ్యాయన్ గతే భాగవతే రురోద ప్రేమవిహ్వలః

3-4-36
కాలింద్యాః కతిభిః సిద్ధ అహోభిర్భరతర్షభ .
ప్రాపద్యత స్వఃసరితం యత్ర మిత్రాసుతో మునిః

3-4-37
ఇతి శ్రీమద్భాగవతే మహాపురాణే పారమహంస్యాం సంహితాయాం
తృతీయస్కంధే విదురోద్ధవసంవాదే చతుర్థోఽధ్యాయః