పోతన తెలుగు భాగవతము

పోతన తెలుగు భాగవతము

తృతీయ స్కంధః : అష్టాదశోఽధ్యాయః - 18

3-18-1
మైత్రేయ ఉవాచ
తదేవమాకర్ణ్య జలేశభాషితం
మహామనాస్తద్విగణయ్య దుర్మదః .
హరేర్విదిత్వా గతిమంగ నారదా-
ద్రసాతలం నిర్వివిశే త్వరాన్వితః

3-18-2
దదర్శ తత్రాభిజితం ధరాధరం
ప్రోన్నీయమానావనిమగ్రదంష్ట్రయా .
ముష్ణంతమక్ష్ణా స్వరుచోఽరుణశ్రియా
జహాస చాహో వనగోచరో మృగః

3-18-3
ఆహైనమేహ్యజ్ఞ మహీం విముంచ నో
రసౌకసాం విశ్వసృజేయమర్పితా .
న స్వస్తి యాస్యస్యనయా మమేక్షతః
సురాధమాసాదితసూకరాకృతే

3-18-4
త్వం నః సపత్నైరభవాయ కిం భృతో
యో మాయయా హంత్యసురాన్ పరోక్షజిత్ .
త్వాం యోగమాయాబలమల్పపౌరుషం
సంస్థాప్య మూఢ ప్రమృజే సుహృచ్ఛుచః

3-18-5
త్వయి సంస్థితే గదయా శీర్ణశీర్ష-
ణ్యస్మద్భుజచ్యుతయా యే చ తుభ్యం .
బలిం హరంత్యృషయో యే చ దేవాః
స్వయం సర్వే న భవిష్యంత్యమూలాః

3-18-6
స తుద్యమానోఽరిదురుక్తతోమరై-
ర్దంష్ట్రాగ్రగాం గాముపలక్ష్య భీతాం .
తోదం మృషన్ నిరగాదంబుమధ్యా-
ద్గ్రాహాహతః స కరేణుర్యథేభః

3-18-7
తం నిఃసరంతం సలిలాదనుద్రుతో
హిరణ్యకేశో ద్విరదం యథా ఝషః .
కరాలదంష్ట్రోఽశనినిస్వనోఽబ్రవీ-
ద్గతహ్రియాం కిం త్వసతాం విగర్హితం

3-18-8
స గాముదస్తాత్సలిలస్య గోచరే
విన్యస్య తస్యామదధాత్స్వసత్త్వం .
అభిష్టుతో విశ్వసృజా ప్రసూనై-
రాపూర్యమాణో విబుధైః పశ్యతోఽరేః

3-18-9
పరానుషక్తం తపనీయోపకల్పం
మహాగదం కాంచనచిత్రదంశం .
మర్మాణ్యభీక్ష్ణం ప్రతుదంతం దురుక్తైః
ప్రచండమన్యుః ప్రహసంస్తం బభాషే

3-18-10
శ్రీభగవానువాచ
సత్యం వయం భో వనగోచరా మృగా
యుష్మద్విధాన్ మృగయే గ్రామసింహాన్ .
న మృత్యుపాశైః ప్రతిముక్తస్య వీరా
వికత్థనం తవ గృహ్ణంత్యభద్ర

3-18-11
ఏతే వయం న్యాసహరా రసౌకసాం
గతహ్రియో గదయా ద్రావితాస్తే .
తిష్ఠామహేఽథాపి కథంచిదాజౌ
స్థేయం క్వ యామో బలినోత్పాద్య వైరం

3-18-12
త్వం పద్రథానాం కిల యూథపాధిపో
ఘటస్వ నోఽస్వస్తయ ఆశ్వనూహః .
సంస్థాప్య చాస్మాన్ ప్రమృజాశ్రు స్వకానాం
యః స్వాం ప్రతిజ్ఞాం నాతిపిపర్త్యసభ్యః

3-18-13
మైత్రేయ ఉవాచ
సోఽధిక్షిప్తో భగవతా ప్రలబ్ధశ్చ రుషా భృశం .
ఆజహారోల్బణం క్రోధం క్రీడ్యమానోఽహిరాడివ

3-18-14
సృజన్నమర్షితః శ్వాసాన్ మన్యుప్రచలితేంద్రియః .
ఆసాద్య తరసా దైత్యో గదయాభ్యహనద్ధరిం

3-18-15
భగవాంస్తు గదావేగం విసృష్టం రిపుణోరసి .
అవంచయత్తిరశ్చీనో యోగారూఢ ఇవాంతకం

3-18-16
పునర్గదాం స్వామాదాయ భ్రామయంతమభీక్ష్ణశః .
అభ్యధావద్ధరిః క్రుద్ధః సంరంభాద్దష్టదచ్ఛదం

3-18-17
తతశ్చ గదయారాతిం దక్షిణస్యాం భ్రువి ప్రభుః .
ఆజఘ్నే స తు తాం సౌమ్య గదయా కోవిదోఽహనత్

3-18-18
ఏవం గదాభ్యాం గుర్వీభ్యాం హర్యక్షో హరిరేవ చ .
జిగీషయా సుసంరబ్ధావన్యోన్యమభిజఘ్నతుః

3-18-19
తయోః స్పృధోస్తిగ్మగదాహతాంగయోః
క్షతాస్రవఘ్రాణవివృద్ధమన్య్వోః .
విచిత్రమార్గాంశ్చరతోర్జిగీషయా
వ్యభాదిలాయామివ శుష్మిణోర్మృధః

3-18-20
దైత్యస్య యజ్ఞావయవస్య మాయా-
గృహీతవారాహతనోర్మహాత్మనః .
కౌరవ్య మహ్యాం ద్విషతోర్విమర్దనం
దిదృక్షురాగాదృషిభిర్వృతః స్వరాట్

3-18-21
ఆసన్నశౌండీరమపేతసాధ్వసం
కృతప్రతీకారమహార్యవిక్రమం .
విలక్ష్య దైత్యం భగవాన్ సహస్రణీ-
ర్జగాద నారాయణమాదిసూకరం

3-18-22
బ్రహ్మోవాచ
ఏష తే దేవ దేవానామంఘ్రిమూలముపేయుషాం .
విప్రాణాం సౌరభేయీణాం భూతానామప్యనాగసాం

3-18-23
ఆగస్కృద్భయకృద్దుష్కృదస్మద్రాద్ధవరోఽసురః .
అన్వేషన్నప్రతిరథో లోకానటతి కంటకః

3-18-24
మైనం మాయావినం దృప్తం నిరంకుశమసత్తమం .
ఆక్రీడ బాలవద్దేవ యథాశీవిషముత్థితం

3-18-25
న యావదేష వర్ధేత స్వాం వేలాం ప్రాప్య దారుణః .
స్వాం దేవ మాయామాస్థాయ తావజ్జహ్యఘమచ్యుత

3-18-26
ఏషా ఘోరతమా సంధ్యా లోకచ్ఛంబట్కరీ ప్రభో .
ఉపసర్పతి సర్వాత్మన్ సురాణాం జయమావహ

3-18-27
అధునైషోఽభిజిన్నామ యోగో మౌహూర్తికో హ్యగాత్ .
శివాయ నస్త్వం సుహృదామాశు నిస్తర దుస్తరం

3-18-28
దిష్ట్యా త్వాం విహితం మృత్యుమయమాసాదితః స్వయం .
విక్రమ్యైనం మృధే హత్వా లోకానాధేహి శర్మణి

3-18-29
ఇతి శ్రీమద్భాగవతే మహాపురాణే పారమహంస్యాం సంహితాయాం
తృతీయస్కంధే హిరణ్యాక్షవధే అష్టాదశోఽధ్యాయః