షష్ఠ స్కంధః : సప్తదశోఽధ్యాయః - 17
6-17-1
శ్రీశుక ఉవాచ
యతశ్చాంతర్హితోఽనంతస్తస్యై కృత్వా దిశే నమః .
విద్యాధరశ్చిత్రకేతుశ్చచార గగనేచరః
6-17-2
స లక్షం వర్షలక్షాణామవ్యాహతబలేంద్రియః .
స్తూయమానో మహాయోగీ మునిభిః సిద్ధచారణైః
6-17-3
కులాచలేంద్రద్రోణీషు నానాసంకల్పసిద్ధిషు .
రేమే విద్యాధరస్త్రీభిర్గాపయన్ హరిమీశ్వరం
6-17-4
ఏకదా స విమానేన విష్ణుదత్తేన భాస్వతా .
గిరిశం దదృశే గచ్ఛన్ పరీతం సిద్ధచారణైః
6-17-5
ఆలింగ్యాంకీకృతాం దేవీం బాహునా మునిసంసది .
ఉవాచ దేవ్యాః శృణ్వత్యా జహాసోచ్చైస్తదంతికే
6-17-6
చిత్రకేతురువాచ
ఏష లోకగురుః సాక్షాద్ధర్మం వక్తా శరీరిణాం .
ఆస్తే ముఖ్యః సభాయాం వై మిథునీభూయ భార్యయా
6-17-7
జటాధరస్తీవ్రతపా బ్రహ్మవాదిసభాపతిః .
అంకీకృత్య స్త్రియం చాస్తే గతహ్రీః ప్రాకృతో యథా
6-17-8
ప్రాయశః ప్రాకృతాశ్చాపి స్త్రియం రహసి బిభ్రతి .
అయం మహావ్రతధరో బిభర్తి సదసి స్త్రియం
6-17-9
శ్రీశుక ఉవాచ
భగవానపి తచ్ఛ్రుత్వా ప్రహస్యాగాధధీర్నృప .
తూష్ణీం బభూవ సదసి సభ్యాశ్చ తదనువ్రతాః
6-17-10
ఇత్యతద్వీర్యవిదుషి బ్రువాణే బహ్వశోభనం .
రుషాఽఽహ దేవీ ధృష్టాయ నిర్జితాత్మాభిమానినే
6-17-11
పార్వత్యువాచ
అయం కిమధునా లోకే శాస్తా దండధరః ప్రభుః .
అస్మద్విధానాం దుష్టానాం నిర్లజ్జానాం చ విప్రకృత్
6-17-12
న వేద ధర్మం కిల పద్మయోనిర్న
బ్రహ్మపుత్రా భృగునారదాద్యాః .
న వై కుమారః కపిలో మనుశ్చ
యే నో నిషేధంత్యతివర్తినం హరం
6-17-13
ఏషామనుధ్యేయపదాబ్జయుగ్మం
జగద్గురుం మంగలమంగలం స్వయం .
యః క్షత్రబంధుః పరిభూయ సూరీన్
ప్రశాస్తి ధృష్టస్తదయం హి దండ్యః
6-17-14
నాయమర్హతి వైకుంఠపాదమూలోపసర్పణం .
సంభావితమతిః స్తబ్ధః సాధుభిః పర్యుపాసితం
6-17-15
అతః పాపీయసీం యోనిమాసురీం యాహి దుర్మతే .
యథేహ భూయో మహతాం న కర్తా పుత్ర కిల్బిషం
6-17-16
శ్రీశుక ఉవాచ
ఏవం శప్తశ్చిత్రకేతుర్విమానాదవరుహ్య సః .
ప్రసాదయామాస సతీం మూర్ధ్నా నమ్రేణ భారత
6-17-17
చిత్రకేతురువాచ
ప్రతిగృహ్ణామి తే శాపమాత్మనోఽఞ్జలినాంబికే .
దేవైర్మర్త్యాయ యత్ప్రోక్తం పూర్వదిష్టం హి తస్య తత్
6-17-18
సంసారచక్ర ఏతస్మింజంతురజ్ఞానమోహితః .
భ్రామ్యన్ సుఖం చ దుఃఖం చ భుంక్తే సర్వత్ర సర్వదా
6-17-19
నైవాత్మా న పరశ్చాపి కర్తా స్యాత్సుఖదుఃఖయోః .
కర్తారం మన్యతేఽత్రాజ్ఞ ఆత్మానం పరమేవ చ
6-17-20
గుణప్రవాహ ఏతస్మిన్ కః శాపః కో న్వనుగ్రహః .
కః స్వర్గో నరకః కో వా కిం సుఖం దుఃఖమేవ వా
6-17-21
ఏకః సృజతి భూతాని భగవానాత్మమాయయా .
ఏషాం బంధం చ మోక్షం చ సుఖం దుఃఖం చ నిష్కలః
6-17-22
న తస్య కశ్చిద్దయితః ప్రతీపో
న జ్ఞాతిబంధుర్న పరో న చ స్వః .
సమస్య సర్వత్ర నిరంజనస్య
సుఖే న రాగః కుత ఏవ రోషః
6-17-23
తథాపి తచ్ఛక్తివిసర్గ ఏషాం
సుఖాయ దుఃఖాయ హితాహితాయ .
బంధాయ మోక్షాయ చ మృత్యుజన్మనోః
శరీరిణాం సంసృతయేవ కల్పతే
6-17-24
అథ ప్రసాదయే న త్వాం శాపమోక్షాయ భామిని .
యన్మన్యసే అసాధూక్తం మమ తత్క్షమ్యతాం సతి
6-17-25
శ్రీశుక ఉవాచ
ఇతి ప్రసాద్య గిరిశౌ చిత్రకేతురరిందమ .
జగామ స్వవిమానేన పశ్యతోః స్మయతోస్తయోః
6-17-26
తతస్తు భగవాన్ రుద్రో రుద్రాణీమిదమబ్రవీత్ .
దేవర్షిదైత్యసిద్ధానాం పార్షదానాం చ శృణ్వతాం
6-17-27
శ్రీరుద్ర ఉవాచ
దృష్టవత్యసి సుశ్రోణి హరేరద్భుతకర్మణః .
మాహాత్మ్యం భృత్యభృత్యానాం నిఃస్పృహాణాం మహాత్మనాం
6-17-28
నారాయణపరాః సర్వే న కుతశ్చన బిభ్యతి .
స్వర్గాపవర్గనరకేష్వపి తుల్యార్థదర్శినః
6-17-29
దేహినాం దేహసంయోగాద్ద్వంద్వానీశ్వరలీలయా .
సుఖం దుఃఖం మృతిర్జన్మ శాపోఽనుగ్రహ ఏవ చ
6-17-30
అవివేకకృతః పుంసో హ్యర్థభేద ఇవాత్మని .
గుణదోషవికల్పశ్చ భిదేవ స్రజివత్కృతః
6-17-31
వాసుదేవే భగవతి భక్తిముద్వహతాం నృణాం .
జ్ఞానవైరాగ్యవీర్యాణాం నేహ కశ్చిద్వ్యపాశ్రయః
6-17-32
నాహం విరించో న కుమారనారదౌ
న బ్రహ్మపుత్రా మునయః సురేశాః .
విదామ యస్యేహితమంశకాంశకా
న తత్స్వరూపం పృథగీశమానినః
6-17-33
న హ్యస్యాస్తి ప్రియః కశ్చిన్నాప్రియః స్వః పరోఽపి వా .
ఆత్మత్వాత్సర్వభూతానాం సర్వభూతప్రియో హరిః
6-17-34
తస్య చాయం మహాభాగశ్చిత్రకేతుః ప్రియోఽనుగః .
సర్వత్ర సమదృక్ శాంతో హ్యహం చైవాచ్యుతప్రియః
6-17-35
తస్మాన్న విస్మయః కార్యః పురుషేషు మహాత్మసు .
మహాపురుషభక్తేషు శాంతేషు సమదర్శిషు
6-17-36
శ్రీశుక ఉవాచ
ఇతి శ్రుత్వా భగవతః శివస్యోమాభిభాషితం .
బభూవ శాంతధీ రాజన్ దేవీ విగతవిస్మయా
6-17-37
ఇతి భాగవతో దేవ్యాః ప్రతిశప్తుమలంతమః .
మూర్ధ్నా సంజగృహే శాపమేతావత్సాధులక్షణం
6-17-38
జజ్ఞే త్వష్టుర్దక్షిణాగ్నౌ దానవీం యోనిమాశ్రితః .
వృత్ర ఇత్యభివిఖ్యాతో జ్ఞానవిజ్ఞానసంయుతః
6-17-39
ఏతత్తే సర్వమాఖ్యాతం యన్మాం త్వం పరిపృచ్ఛసి .
వృత్రస్యాసురజాతేశ్చ కారణం భగవన్మతేః
6-17-40
ఇతిహాసమిమం పుణ్యం చిత్రకేతోర్మహాత్మనః .
మాహాత్మ్యం విష్ణుభక్తానాం శ్రుత్వా బంధాద్విముచ్యతే
6-17-41
య ఏతత్ప్రాతరుత్థాయ శ్రద్ధయా వాగ్యతః పఠేత్ .
ఇతిహాసం హరిం స్మృత్వా స యాతి పరమాం గతిం
6-17-42
ఇతి శ్రీమద్భాగవతే మహాపురాణే పారమహంస్యాం సంహితాయాం
షష్ఠస్కంధే చిత్రకేతుశాపో నామ సప్తదశోఽధ్యాయః