పోతన తెలుగు భాగవతము

పోతన తెలుగు భాగవతము

షష్ఠ స్కంధః : ద్వితీయోఽధ్యాయః - 2

6-2-1
శ్రీశుక ఉవాచ
ఏవం తే భగవద్దూతా యమదూతాభిభాషితం .
ఉపధార్యాథ తాన్ రాజన్ ప్రత్యాహుర్నయకోవిదాః

6-2-2
విష్ణుదూతా ఊచుః
అహో కష్టం ధర్మదృశామధర్మః స్పృశతే సభాం .
యత్రాదండ్యేష్వపాపేషు దండో యైర్ధ్రియతే వృథా

6-2-3
ప్రజానాం పితరో యే చ శాస్తారః సాధవః సమాః .
యది స్యాత్తేషు వైషమ్యం కం యాంతి శరణం ప్రజాః

6-2-4
యద్యదాచరతి శ్రేయానితరస్తత్తదీహతే .
స యత్ప్రమాణం కురుతే లోకస్తదనువర్తతే

6-2-5
యస్యాంకే శిర ఆధాయ లోకః స్వపితి నిర్వృతః .
స్వయం ధర్మమధర్మం వా న హి వేద యథా పశుః

6-2-6
స కథం న్యర్పితాత్మానం కృతమైత్రమచేతనం .
విస్రంభణీయో భూతానాం సఘృణో ద్రోగ్ధుమర్హతి

6-2-7
అయం హి కృతనిర్వేశో జన్మకోట్యంహసామపి .
యద్వ్యాజహార వివశో నామ స్వస్త్యయనం హరేః

6-2-8
ఏతేనైవ హ్యఘోనోఽస్య కృతం స్యాదఘనిష్కృతం .
యదా నారాయణాయేతి జగాద చతురక్షరం

6-2-9
స్తేనః సురాపో మిత్రధ్రుగ్ బ్రహ్మహా గురుతల్పగః .
స్త్రీరాజపితృగోహంతా యే చ పాతకినోఽపరే

6-2-10
సర్వేషామప్యఘవతామిదమేవ సునిష్కృతం .
నామవ్యాహరణం విష్ణోర్యతస్తద్విషయా మతిః

6-2-11
న నిష్కృతైరుదితైర్బ్రహ్మవాదిభి
స్తథా విశుద్ధ్యత్యఘవాన్ వ్రతాదిభిః .
యథా హరేర్నామపదైరుదాహృతై-
స్తదుత్తమశ్లోకగుణోపలంభకం

6-2-12
నైకాంతికం తద్ధి కృతేఽపి నిష్కృతే
మనః పునర్ధావతి చేదసత్పథే .
తత్కర్మనిర్హారమభీప్సతాం హరే-
ర్గుణానువాదః ఖలు సత్త్వభావనః

6-2-13
అథైనం మాపనయత కృతాశేషాఘనిష్కృతం .
యదసౌ భగవన్నామ మ్రియమాణః సమగ్రహీత్

6-2-14
సాంకేత్యం పారిహాస్యం వా స్తోభం హేలనమేవ వా .
వైకుంఠనామగ్రహణమశేషాఘహరం విదుః

6-2-15
పతితః స్ఖలితో భగ్నః సందష్టస్తప్త ఆహతః .
హరిరిత్యవశేనాహ పుమాన్ నార్హతి యాతనాం

6-2-16
గురూణాం చ లఘూనాం చ గురూణి చ లఘూని చ .
ప్రాయశ్చిత్తాని పాపానాం జ్ఞాత్వోక్తాని మహర్షిభిః

6-2-17
తైస్తాన్యఘాని పూయంతే తపోదానజపాదిభిః .
నాధర్మజం తద్ధృదయం తదపీశాంఘ్రిసేవయా

6-2-18
అజ్ఞానాదథవా జ్ఞానాదుత్తమశ్లోకనామ యత్ .
సంకీర్తితమఘం పుంసో దహేదేధో యథానలః

6-2-19
యథాగదం వీర్యతమముపయుక్తం యదృచ్ఛయా .
అజానతోఽప్యాత్మగుణం కుర్యాన్మంత్రోఽప్యుదాహృతః

6-2-20
శ్రీశుక ఉవాచ
త ఏవం సువినిర్ణీయ ధర్మం భాగవతం నృప .
తం యామ్యపాశాన్నిర్ముచ్య విప్రం మృత్యోరమూముచన్

6-2-21
ఇతి ప్రత్యుదితా యామ్యా దూతా యాత్వా యమాంతికే .
యమరాజ్ఞే యథా సర్వమాచచక్షురరిందమ

6-2-22
ద్విజః పాశాద్వినిర్ముక్తో గతభీః ప్రకృతిం గతః .
వవందే శిరసా విష్ణోః కింకరాన్ దర్శనోత్సవః

6-2-23
తం వివక్షుమభిప్రేత్య మహాపురుషకింకరాః .
సహసా పశ్యతస్తస్య తత్రాంతర్దధిరేఽనఘ

6-2-24
అజామిలోఽప్యథాకర్ణ్య దూతానాం యమకృష్ణయోః .
ధర్మం భాగవతం శుద్ధం త్రైవిద్యం చ గుణాశ్రయం

6-2-25
భక్తిమాన్ భగవత్యాశు మాహాత్మ్యశ్రవణాద్ధరేః .
అనుతాపో మహానాసీత్స్మరతోఽశుభమాత్మనః

6-2-26
అహో మే పరమం కష్టమభూదవిజితాత్మనః .
యేన విప్లావితం బ్రహ్మ వృషల్యాం జాయతాఽఽత్మనా

6-2-27
ధిఙ్ మాం విగర్హితం సద్భిర్దుష్కృతం కులకజ్జలం .
హిత్వా బాలాం సతీం యోఽహం సురాపామసతీమగాం

6-2-28
వృద్ధావనాథౌ పితరౌ నాన్యబంధూ తపస్వినౌ .
అహో మయాధునా త్యక్తావకృతజ్ఞేన నీచవత్

6-2-29
సోఽహం వ్యక్తం పతిష్యామి నరకే భృశదారుణే .
ధర్మఘ్నాః కామినో యత్ర విందంతి యమయాతనాః

6-2-30
కిమిదం స్వప్న ఆహోస్విత్సాక్షాద్దృష్టమిహాద్భుతం .
క్వ యాతా అద్య తే యే మాం వ్యకర్షన్ పాశపాణయః

6-2-31
అథ తే క్వ గతాః సిద్ధాశ్చత్వారశ్చారుదర్శనాః .
వ్యమోచయన్ నీయమానం బద్ధ్వా పాశైరధో భువః

6-2-32
అథాపి మే దుర్భగస్య విబుధోత్తమదర్శనే .
భవితవ్యం మంగలేన యేనాత్మా మే ప్రసీదతి

6-2-33
అన్యథా మ్రియమాణస్య నాశుచేర్వృషలీపతేః .
వైకుంఠనామగ్రహణం జిహ్వా వక్తుమిహార్హతి

6-2-34
క్వ చాహం కితవః పాపో బ్రహ్మఘ్నో నిరపత్రపః .
క్వ చ నారాయణేత్యేతద్భగవన్నామ మంగలం

6-2-35
సోఽహం తథా యతిష్యామి యతచిత్తేంద్రియానిలః .
యథా న భూయ ఆత్మానమంధే తమసి మజ్జయే

6-2-36
విముచ్య తమిమం బంధమవిద్యాకామకర్మజం .
సర్వభూతసుహృచ్ఛాంతో మైత్రః కరుణ ఆత్మవాన్

6-2-37
మోచయే గ్రస్తమాత్మానం యోషిన్మయ్యాఽఽత్మమాయయా .
విక్రీడితో యయైవాహం క్రీడామృగ ఇవాధమః

6-2-38
మమాహమితి దేహాదౌ హిత్వా మిథ్యార్థధీర్మతిం .
ధాస్యే మనో భగవతి శుద్ధం తత్కీర్తనాదిభిః

6-2-39
శ్రీశుక ఉవాచ
ఇతి జాతసునిర్వేదః క్షణసంగేన సాధుషు .
గంగాద్వారముపేయాయ ముక్తసర్వానుబంధనః

6-2-40
స తస్మిన్ దేవసదన ఆసీనో యోగమాశ్రితః .
ప్రత్యాహృతేంద్రియగ్రామో యుయోజ మన ఆత్మని

6-2-41
తతో గుణేభ్య ఆత్మానం వియుజ్యాత్మసమాధినా .
యుయుజే భగవద్ధామ్ని బ్రహ్మణ్యనుభవాత్మని

6-2-42
యర్హ్యుపారతధీస్తస్మిన్నద్రాక్షీత్పురుషాన్ పురః .
ఉపలభ్యోపలబ్ధాన్ ప్రాగ్వవందే శిరసా ద్విజః

6-2-43
హిత్వా కలేవరం తీర్థే గంగాయాం దర్శనాదను .
సద్యః స్వరూపం జగృహే భగవత్పార్శ్వవర్తినాం

6-2-44
సాకం విహాయసా విప్రో మహాపురుషకింకరైః .
హైమం విమానమారుహ్య యయౌ యత్ర శ్రియః పతిః

6-2-45
ఏవం స విప్లావితసర్వధర్మా
దాస్యాః పతిః పతితో గర్హ్యకర్మణా .
నిపాత్యమానో నిరయే హతవ్రతః
సద్యో విముక్తో భగవన్నామ గృహ్ణన్

6-2-46
నాతః పరం కర్మనిబంధకృంతనం
ముముక్షతాం తీర్థపదానుకీర్తనాత్ .
న యత్పునః కర్మసు సజ్జతే మనో
రజస్తమోభ్యాం కలిలం తతోఽన్యథా

6-2-47
య ఏవం పరమం గుహ్యమితిహాసమఘాపహం .
శృణుయాచ్ఛ్రద్ధయా యుక్తో యశ్చ భక్త్యానుకీర్తయేత్

6-2-48
న వై స నరకం యాతి నేక్షితో యమకింకరైః .
యద్యప్యమంగలో మర్త్యో విష్ణులోకే మహీయతే

6-2-49
మ్రియమాణో హరేర్నామ గృణన్ పుత్రోపచారితం .
అజామిలోఽప్యగాద్ధామ కిం పునః శ్రద్ధయా గృణన్

6-2-50
ఇతి శ్రీమద్భాగవతే మహాపురాణే పారమహంస్యాం సంహితాయాం
షష్ఠస్కంధే అజామిలోపాఖ్యానే ద్వితీయోఽధ్యాయః