షష్ఠ స్కంధః : ద్వాదశోఽధ్యాయః -12
6-12-1
ఋషిరువాచ
ఏవం జిహాసుర్నృప దేహమాజౌ
మృత్యుం వరం విజయాన్మన్యమానః .
శూలం ప్రగృహ్యాభ్యపతత్సురేంద్రం
యథా మహాపురుషం కైటభోఽప్సు
6-12-2
తతో యుగాంతాగ్నికఠోరజిహ్వ-
మావిధ్య శూలం తరసాసురేంద్రః .
క్షిప్త్వా మహేంద్రాయ వినద్య వీరో
హతోఽసి పాపేతి రుషా జగాద
6-12-3
ఖ ఆపతత్తద్విచలద్గ్రహోల్కవ-
న్నిరీక్ష్య దుష్ప్రేక్ష్యమజాతవిక్లవః .
వజ్రేణ వజ్రీ శతపర్వణాచ్ఛినద్భుజం
చ తస్యోరగరాజభోగం
6-12-4
ఛిన్నైకబాహుః పరిఘేణ వృత్రః
సంరబ్ధ ఆసాద్య గృహీతవజ్రం .
హనౌ తతాడేంద్రమథామరేభం
వజ్రం చ హస్తాన్న్యపతన్మఘోనః
6-12-5
వృత్రస్య కర్మాతిమహాద్భుతం
తత్సురాసురాశ్చారణసిద్ధసంఘాః .
అపూజయంస్తత్పురుహూతసంకటం
నిరీక్ష్య హా హేతి విచుక్రుశుర్భృశం
6-12-6
ఇంద్రో న వజ్రం జగృహే విలజ్జితశ్చ్యుతం
స్వహస్తాదరిసన్నిధౌ పునః .
తమాహ వృత్రో హర ఆత్తవజ్రో
జహి స్వశత్రుం న విషాదకాలః
6-12-7
యుయుత్సతాం కుత్రచిదాతతాయినాం
జయః సదైకత్ర న వై పరాత్మనాం .
వినైకముత్పత్తిలయస్థితీశ్వరం
సర్వజ్ఞమాద్యం పురుషం సనాతనం
6-12-8
లోకాః సపాలా యస్యేమే శ్వసంతి వివశా వశే .
ద్విజా ఇవ శిచా బద్ధాః స కాల ఇహ కారణం
6-12-9
ఓజః సహో బలం ప్రాణమమృతం మృత్యుమేవ చ .
తమజ్ఞాయ జనో హేతుమాత్మానం మన్యతే జడం
6-12-10
యథా దారుమయీ నారీ యథా యంత్రమయో మృగః .
ఏవం భూతాని మఘవన్నీశతంత్రాణి విద్ధి భోః
6-12-11
పురుషః ప్రకృతిర్వ్యక్తమాత్మా భూతేంద్రియాశయాః .
శక్నువంత్యస్య సర్గాదౌ న వినా యదనుగ్రహాత్
6-12-12
అవిద్వానేవమాత్మానం మన్యతేఽనీశమీశ్వరం .
భూతైః సృజతి భూతాని గ్రసతే తాని తైః స్వయం
6-12-13
ఆయుః శ్రీః కీర్తిరైశ్వర్యమాశిషః పురుషస్య యాః .
భవంత్యేవ హి తత్కాలే యథానిచ్ఛోర్విపర్యయాః
6-12-14
తస్మాదకీర్తియశసోర్జయాపజయయోరపి .
సమః స్యాత్సుఖదుఃఖాభ్యాం మృత్యుజీవితయోస్తథా
6-12-15
సత్త్వం రజస్తమ ఇతి ప్రకృతేర్నాత్మనో గుణాః .
తత్ర సాక్షిణమాత్మానం యో వేద న స బధ్యతే
6-12-16
పశ్య మాం నిర్జితం శక్ర వృక్ణాయుధభుజం మృధే .
ఘటమానం యథాశక్తి తవ ప్రాణజిహీర్షయా
6-12-17
ప్రాణగ్లహోఽయం సమర ఇష్వక్షో వాహనాసనః .
అత్ర న జ్ఞాయతేఽముష్య జయోఽముష్య పరాజయః
6-12-18
శ్రీశుక ఉవాచ
ఇంద్రో వృత్రవచః శ్రుత్వా గతాలీకమపూజయత్ .
గృహీతవజ్రః ప్రహసంస్తమాహ గతవిస్మయః
6-12-19
ఇంద్ర ఉవాచ
అహో దానవ సిద్ధోఽసి యస్య తే మతిరీదృశీ .
భక్తః సర్వాత్మనాఽఽత్మానం సుహృదం జగదీశ్వరం
6-12-20
భవానతార్షీన్మాయాం వై వైష్ణవీం జనమోహినీం .
యద్విహాయాసురం భావం మహాపురుషతాం గతః
6-12-21
ఖల్విదం మహదాశ్చర్యం యద్రజఃప్రకృతేస్తవ .
వాసుదేవే భగవతి సత్త్వాత్మని దృఢా మతిః
6-12-22
యస్య భక్తిర్భగవతి హరౌ నిఃశ్రేయసేశ్వరే .
విక్రీడతోఽమృతాంభోధౌ కిం క్షుద్రైః ఖాతకోదకైః
6-12-23
శ్రీశుక ఉవాచ
ఇతి బ్రువాణావన్యోన్యం ధర్మజిజ్ఞాసయా నృప .
యుయుధాతే మహావీర్యావింద్రవృత్రౌ యుధాంపతీ
6-12-24
ఆవిధ్య పరిఘం వృత్రః కార్ష్ణాయసమరిందమః .
ఇంద్రాయ ప్రాహిణోద్ఘోరం వామహస్తేన మారిష
6-12-25
స తు వృత్రస్య పరిఘం కరం చ కరభోపమం .
చిచ్ఛేద యుగపద్దేవో వజ్రేణ శతపర్వణా
6-12-26
దోర్భ్యాముత్కృత్తమూలాభ్యాం బభౌ రక్తస్రవోఽసురః .
ఛిన్నపక్షో యథా గోత్రః ఖాద్భ్రష్టో వజ్రిణా హతః
6-12-27
కృత్వాధరాం హనుం భూమౌ దైత్యో దివ్యుత్తరాం హనుం .
నభోగంభీరవక్త్రేణ లేలిహోల్బణజిహ్వయా
6-12-28
దంష్ట్రాభిః కాలకల్పాభిర్గ్రసన్నివ జగత్త్రయం .
అతిమాత్రమహాకాయ ఆక్షిపంస్తరసా గిరీన్
6-12-29
గిరిరాట్ పాదచారీవ పద్భ్యాం నిర్జరయన్ మహీం .
జగ్రాస స సమాసాద్య వజ్రిణం సహవాహనం
6-12-30
మహాప్రాణో మహావీర్యో మహాసర్ప ఇవ ద్విపం .
వృత్రగ్రస్తం తమాలక్ష్య సప్రజాపతయః సురాః .
హా కష్టమితి నిర్విణ్ణాశ్చుక్రుశుః సమహర్షయః
6-12-31
నిగీర్ణోఽప్యసురేంద్రేణ న మమారోదరం గతః .
మహాపురుషసన్నద్ధో యోగమాయాబలేన చ
6-12-32
భిత్త్వా వజ్రేణ తత్కుక్షిం నిష్క్రమ్య బలభిద్విభుః .
ఉచ్చకర్త శిరః శత్రోర్గిరిశృంగమివౌజసా
6-12-33
వజ్రస్తు తత్కంధరమాశువేగః
కృంతన్ సమంతాత్పరివర్తమానః .
న్యపాతయత్తావదహర్గణేన
యో జ్యోతిషామయనే వార్త్రహత్యే
6-12-34
తదా చ ఖే దుందుభయో వినేదు-
ర్గంధర్వసిద్ధాః సమహర్షిసంఘాః .
వార్త్రఘ్నలింగైస్తమభిష్టువానా
మంత్రైర్ముదా కుసుమైరభ్యవర్షన్
6-12-35
వృత్రస్య దేహాన్నిష్క్రాంతమాత్మజ్యోతిరరిందమ .
పశ్యతాం సర్వలోకానామలోకం సమపద్యత
6-12-36
ఇతి శ్రీమద్భాగవతే మహాపురాణే పారమహంస్యాం సంహితాయాం
షష్ఠస్కంధే వృత్రవధో నామ ద్వాదశోఽధ్యాయః