పోతన తెలుగు భాగవతము

సప్తమ స్కంధః : ప్రథమోఽధ్యాయః - 1

• Print
• Email
• Share on FaceBook
• Share on Twitter

7-1-2
న హ్యస్యార్థః సురగణైః సాక్షాన్నిఃశ్రేయసాత్మనః .
నైవాసురేభ్యో విద్వేషో నోద్వేగశ్చాగుణస్య హి

7-1-3
ఇతి నః సుమహాభాగ నారాయణగుణాన్ ప్రతి .
సంశయః సుమహాన్ జాతస్తద్భవాంశ్ఛేత్తుమర్హతి

7-1-4
శ్రీశుక ఉవాచ
సాధు పృష్టం మహారాజ హరేశ్చరితమద్భుతం .
యద్భాగవతమాహాత్మ్యం భగవద్భక్తివర్ధనం

7-1-5
గీయతే పరమం పుణ్యమృషిభిర్నారదాదిభిః .
నత్వా కృష్ణాయ మునయే కథయిష్యే హరేః కథాం

7-1-6
నిర్గుణోఽపి హ్యజోఽవ్యక్తో భగవాన్ ప్రకృతేః పరః .
స్వమాయాగుణమావిశ్య బాధ్యబాధకతాం గతః

7-1-7
సత్త్వం రజస్తమ ఇతి ప్రకృతేర్నాత్మనో గుణాః .
న తేషాం యుగపద్రాజన్ హ్రాస ఉల్లాస ఏవ వా

7-1-8
జయకాలే తు సత్త్వస్య దేవర్షీన్ రజసోఽసురాన్ .
తమసో యక్షరక్షాంసి తత్కాలానుగుణోఽభజత్

7-1-9
జ్యోతిరాదిరివాభాతి సంఘాతాన్న వివిచ్యతే .
విదంత్యాత్మానమాత్మస్థం మథిత్వా కవయోఽన్తతః

7-1-10
యదా సిసృక్షుః పుర ఆత్మనః పరో
రజః సృజత్యేష పృథక్ స్వమాయయా .
సత్త్వం విచిత్రాసు రిరంసురీశ్వరః
శయిష్యమాణస్తమ ఈరయత్యసౌ

7-1-11
కాలం చరంతం సృజతీశ ఆశ్రయం
ప్రధానపుంభ్యాం నరదేవ సత్యకృత్ .
య ఏష రాజన్నపి కాల ఈశితా
సత్త్వం సురానీకమివైధయత్యతః .
తత్ప్రత్యనీకానసురాన్ సురప్రియో
రజస్తమస్కాన్ ప్రమిణోత్యురుశ్రవాః

7-1-12
అత్రైవోదాహృతః పూర్వమితిహాసః సురర్షిణా .
ప్రీత్యా మహాక్రతౌ రాజన్ పృచ్ఛతేఽజాతశత్రవే

7-1-13
దృష్ట్వా మహాద్భుతం రాజా రాజసూయే మహాక్రతౌ .
వాసుదేవే భగవతి సాయుజ్యం చేదిభూభుజః

7-1-14
తత్రాసీనం సురఋషిం రాజా పాండుసుతః క్రతౌ .
పప్రచ్ఛ విస్మితమనా మునీనాం శృణ్వతామిదం

7-1-15
యుధిష్ఠిర ఉవాచ
అహో అత్యద్భుతం హ్యేతద్దుర్లభైకాంతినామపి .
వాసుదేవే పరే తత్త్వే ప్రాప్తిశ్చైద్యస్య విద్విషః

7-1-16
ఏతద్వేదితుమిచ్ఛామః సర్వ ఏవ వయం మునే .
భగవన్నిందయా వేనో ద్విజైస్తమసి పాతితః

7-1-17
దమఘోషసుతః పాప ఆరభ్య కలభాషణాత్ .
సంప్రత్యమర్షీ గోవిందే దంతవక్త్రశ్చ దుర్మతిః

7-1-18
శపతోరసకృద్విష్ణుం యద్బ్రహ్మ పరమవ్యయం .
శ్విత్రో న జాతో జిహ్వాయాం నాంధం వివిశతుస్తమః

7-1-19
కథం తస్మిన్ భగవతి దురవగ్రాహధామని .
పశ్యతాం సర్వలోకానాం లయమీయతురంజసా

7-1-20
ఏతద్భ్రామ్యతి మే బుద్ధిర్దీపార్చిరివ వాయునా .
బ్రూహ్యేతదద్భుతతమం భగవాంస్తత్ర కారణం

7-1-21
శ్రీశుక ఉవాచ
రాజ్ఞస్తద్వచ ఆకర్ణ్య నారదో భగవానృషిః .
తుష్టః ప్రాహ తమాభాష్య శృణ్వత్యాస్తత్సదః

7-1-22
నారద ఉవాచ
నిందనస్తవసత్కారన్యక్కారార్థం కలేవరం .
ప్రధానపరయో రాజన్నవివేకేన కల్పితం

7-1-23
హింసా తదభిమానేన దండపారుష్యయోర్యథా .
వైషమ్యమిహ భూతానాం మమాహమితి పార్థివ

7-1-24
యన్నిబద్ధోఽభిమానోఽయం తద్వధాత్ప్రాణినాం వధః .
తథా న యస్య కైవల్యాదభిమానోఽఖిలాత్మనః .
పరస్య దమకర్తుర్హి హింసా కేనాస్య కల్ప్యతే

7-1-25
తస్మాద్వైరానుబంధేన నిర్వైరేణ భయేన వా .
స్నేహాత్కామేన వా యుంజ్యాత్కథంచిన్నేక్షతే పృథక్

7-1-26
యథా వైరానుబంధేన మర్త్యస్తన్మయతామియాత్ .
న తథా భక్తియోగేన ఇతి మే నిశ్చితా మతిః

7-1-27
కీటః పేశస్కృతా రుద్ధః కుడ్యాయాం తమనుస్మరన్ .
సంరంభభయయోగేన విందతే తత్సరూపతాం

7-1-28
ఏవం కృష్ణే భగవతి మాయామనుజ ఈశ్వరే .
వైరేణ పూతపాప్మానస్తమాపురనుచింతయా

7-1-29
కామాద్ద్వేషాద్భయాత్స్నేహాద్యథా భక్త్యేశ్వరే మనః .
ఆవేశ్య తదఘం హిత్వా బహవస్తద్గతిం గతాః

7-1-30
గోప్యః కామాద్భయాత్కంసో ద్వేషాచ్చైద్యాదయో నృపాః .
సంబంధాద్వృష్ణయః స్నేహాద్యూయం భక్త్యా వయం విభో

7-1-31
కతమోఽపి న వేనః స్యాత్పంచానాం పురుషం ప్రతి .
తస్మాత్కేనాప్యుపాయేన మనః కృష్ణే నివేశయేత్

7-1-32
మాతృష్వసేయో వశ్చైద్యో దంతవక్త్రశ్చ పాండవ .
పార్షదప్రవరౌ విష్ణోర్విప్రశాపాత్పదాచ్చ్యుతౌ

7-1-33
యుధిష్ఠిర ఉవాచ
కీదృశః కస్య వా శాపో హరిదాసాభిమర్శనః .
అశ్రద్ధేయ ఇవాభాతి హరేరేకాంతినాం భవః

7-1-34
దేహేంద్రియాసుహీనానాం వైకుంఠపురవాసినాం .
దేహసంబంధసంబద్ధమేతదాఖ్యాతుమర్హసి

7-1-35
నారద ఉవాచ
ఏకదా బ్రహ్మణః పుత్రా విష్ణోర్లోకం యదృచ్ఛయా .
సనందనాదయో జగ్ముశ్చరంతో భువనత్రయం

7-1-36
పంచషడ్ఢాయనార్భాభాః పూర్వేషామపి పూర్వజాః .
దిగ్వాససః శిశూన్ మత్వా ద్వాఃస్థౌ తాన్ ప్రత్యషేధతాం

7-1-37
అశపన్ కుపితా ఏవం యువాం వాసం న చార్హథః .
రజస్తమోభ్యాం రహితే పాదమూలే మధుద్విషః .
పాపిష్ఠామాసురీం యోనిం బాలిశౌ యాతమాశ్వతః

7-1-38
ఏవం శప్తౌ స్వభవనాత్పతంతౌ తైః కృపాలుభిః .
ప్రోక్తౌ పునర్జన్మభిర్వాం త్రిభిర్లోకాయ కల్పతాం

7-1-39
జజ్ఞాతే తౌ దితేః పుత్రౌ దైత్యదానవవందితౌ .
హిరణ్యకశిపుర్జ్యేష్ఠో హిరణ్యాక్షోఽనుజస్తతః

7-1-40
హతో హిరణ్యకశిపుర్హరిణా సింహరూపిణా .
హిరణ్యాక్షో ధరోద్ధారే బిభ్రతా సౌకరం వపుః

7-1-41
హిరణ్యకశిపుః పుత్రం ప్రహ్లాదం కేశవప్రియం .
జిఘాంసురకరోన్నానా యాతనా మృత్యుహేతవే

7-1-42
సర్వభూతాత్మభూతం తం ప్రశాంతం సమదర్శనం .
భగవత్తేజసా స్పృష్టం నాశక్నోద్ధంతుముద్యమైః

7-1-43
తతస్తౌ రాక్షసౌ జాతౌ కేశిన్యాం విశ్రవఃసుతౌ .
రావణః కుంభకర్ణశ్చ సర్వలోకోపతాపనౌ

7-1-44
తత్రాపి రాఘవో భూత్వా న్యహనచ్ఛాపముక్తయే .
రామవీర్యం శ్రోష్యసి త్వం మార్కండేయముఖాత్ప్రభో

7-1-45
తావేవ క్షత్రియౌ జాతౌ మాతృష్వస్రాత్మజౌ తవ .
అధునా శాపనిర్ముక్తౌ కృష్ణచక్రహతాంహసౌ

7-1-46
వైరానుబంధతీవ్రేణ ధ్యానేనాచ్యుతసాత్మతాం .
నీతౌ పునర్హరేః పార్శ్వం జగ్మతుర్విష్ణుపార్షదౌ

7-1-47
యుధిష్ఠిర ఉవాచ
విద్వేషో దయితే పుత్రే కథమాసీన్మహాత్మని .
బ్రూహి మే భగవన్ యేన ప్రహ్లాదస్యాచ్యుతాత్మతా

7-1-48
ఇతి శ్రీమద్భాగవతే మహాపురాణే పారమహంస్యాం సంహితాయాం
సప్తమస్కంధే ప్రహ్లాదచరితోపక్రమే ప్రథమోఽధ్యాయః (1)