పోతన తెలుగు భాగవతము

సప్తమ స్కంధః : ఏకాదశోఽధ్యాయః - 11

• Print
• Email
• Share on FaceBook
• Share on Twitter

7-11-2
యుధిష్ఠిర ఉవాచ
భగవన్ శ్రోతుమిచ్ఛామి నృణాం ధర్మం సనాతనం .
వర్ణాశ్రమాచారయుతం యత్పుమాన్ విందతే పరం

7-11-3
భవాన్ ప్రజాపతేః సాక్షాదాత్మజః పరమేష్ఠినః .
సుతానాం సమ్మతో బ్రహ్మంస్తపోయోగసమాధిభిః

7-11-4
నారాయణపరా విప్రా ధర్మ గుహ్యం పరం విదుః .
కరుణాః సాధవః శాంతాస్త్వద్విధా న తథాపరే

7-11-5
నారద ఉవాచ
నత్వా భగవతేఽజాయ లోకానాం ధర్మహేతవే .
వక్ష్యే సనాతనం ధర్మం నారాయణముఖాచ్ఛ్రుతం

7-11-6
యోఽవతీర్యాత్మనోంఽశేన దాక్షాయణ్యాం తు ధర్మతః .
లోకానాం స్వస్తయేఽధ్యాస్తే తపో బదరికాశ్రమే

7-11-7
ధర్మమూలం హి భగవాన్ సర్వవేదమయో హరిః .
స్మృతం చ తద్విదాం రాజన్ యేన చాత్మా ప్రసీదతి

7-11-8
సత్యం దయా తపః శౌచం తితిక్షేక్షా శమో దమః .
అహింసా బ్రహ్మచర్యం చ త్యాగః స్వాధ్యాయ ఆర్జవం

7-11-9
సంతోషః సమదృక్సేవా గ్రామ్యేహోపరమః శనైః .
నృణాం విపర్యయేహేక్షా మౌనమాత్మవిమర్శనం

7-11-10
అన్నాద్యాదేః సంవిభాగో భూతేభ్యశ్చ యథార్హతః .
తేష్వాత్మదేవతాబుద్ధిః సుతరాం నృషు పాండవ

7-11-11
శ్రవణం కీర్తనం చాస్య స్మరణం మహతాం గతేః .
సేవేజ్యావనతిర్దాస్యం సఖ్యమాత్మసమర్పణం

7-11-12
నృణామయం పరో ధర్మః సర్వేషాం సముదాహృతః .
త్రింశల్లక్షణవాన్ రాజన్ సర్వాత్మా యేన తుష్యతి

7-11-13
సంస్కారా యదవిచ్ఛిన్నాః స ద్విజోఽజో జగాద యం .
ఇజ్యాధ్యయనదానాని విహితాని ద్విజన్మనాం .
జన్మకర్మావదాతానాం క్రియాశ్చాశ్రమచోదితాః

7-11-14
విప్రస్యాధ్యయనాదీని షడన్యస్యాప్రతిగ్రహః .
రాజ్ఞో వృత్తిః ప్రజాగోప్తురవిప్రాద్వా కరాదిభిః

7-11-15
వైశ్యస్తు వార్తావృత్తిశ్చ నిత్యం బ్రహ్మకులానుగః .
శూద్రస్య ద్విజశుశ్రూషా వృత్తిశ్చ స్వామినో భవేత్

7-11-16
వార్తా విచిత్రా శాలీనయాయావరశిలోంఛనం .
విప్రవృత్తిశ్చతుర్ధేయం శ్రేయసీ చోత్తరోత్తరా

7-11-17
జఘన్యో నోత్తమాం వృత్తిమనాపది భజేన్నరః .
ఋతే రాజన్యమాపత్సు సర్వేషామపి సర్వశః

7-11-18
ఋతామృతాభ్యాం జీవేత మృతేన ప్రమృతేన వా .
సత్యానృతాభ్యాం జీవేత న శ్వవృత్త్యా కథంచన

7-11-19
ఋతముంఛశిలం ప్రోక్తమమృతం యదయాచితం .
మృతం తు నిత్యయాచ్ఞా స్యాత్ప్రమృతం కర్షణం స్మృతం

7-11-20
సత్యానృతం చ వాణిజ్యం శ్వవృత్తిర్నీచసేవనం .
వర్జయేత్తాం సదా విప్రో రాజన్యశ్చ జుగుప్సితాం .
సర్వవేదమయో విప్రః సర్వదేవమయో నృపః

7-11-21
శమో దమస్తపః శౌచం సంతోషః క్షాంతిరార్జవం .
జ్ఞానం దయాచ్యుతాత్మత్వం సత్యం చ బ్రహ్మలక్షణం

7-11-22
శౌర్యం వీర్యం ధృతిస్తేజస్త్యాగ ఆత్మజయః క్షమా .
బ్రహ్మణ్యతా ప్రసాదశ్చ రక్షా చ క్షత్రలక్షణం

7-11-23
దేవగుర్వచ్యుతే భక్తిస్త్రివర్గపరిపోషణం .
ఆస్తిక్యముద్యమో నిత్యం నైపుణ్యం వైశ్యలక్షణం

7-11-24
శూద్రస్య సన్నతిః శౌచం సేవా స్వామిన్యమాయయా .
అమంత్రయజ్ఞో హ్యస్తేయం సత్యం గోవిప్రరక్షణం

7-11-25
స్త్రీణాం చ పతిదేవానాం తచ్ఛుశ్రూషానుకూలతా .
తద్బంధుష్వనువృత్తిశ్చ నిత్యం తద్వ్రతధారణం

7-11-26
సమ్మార్జనోపలేపాభ్యాం గృహమండలవర్తనైః .
స్వయం చ మండితా నిత్యం పరిమృష్టపరిచ్ఛదా

7-11-27
కామైరుచ్చావచైః సాధ్వీ ప్రశ్రయేణ దమేన చ .
వాక్యైః సత్యైః ప్రియైః ప్రేమ్ణా కాలే కాలే భజేత్పతిం

7-11-28
సంతుష్టాలోలుపా దక్షా ధర్మజ్ఞా ప్రియసత్యవాక్ .
అప్రమత్తా శుచిః స్నిగ్ధా పతిం త్వపతితం భజేత్

7-11-29
యా పతిం హరిభావేన భజేచ్ఛ్రీరివ తత్పరా .
హర్యాత్మనా హరేర్లోకే పత్యా శ్రీరివ మోదతే

7-11-30
వృత్తిః సంకరజాతీనాం తత్తత్కులకృతా భవేత్ .
అచౌరాణామపాపానామంత్యజాంతేవసాయినాం

7-11-31
ప్రాయః స్వభావవిహితో నృణాం ధర్మో యుగే యుగే .
వేదదృగ్భిః స్మృతో రాజన్ ప్రేత్య చేహ చ శర్మకృత్

7-11-32
వృత్త్యా స్వభావకృతయా వర్తమానః స్వకర్మకృత్ .
హిత్వా స్వభావజం కర్మ శనైర్నిర్గుణతామియాత్

7-11-33
ఉప్యమానం ముహుః క్షేత్రం స్వయం నిర్వీర్యతామియాత్ .
న కల్పతే పునః సూత్యై ఉప్తం బీజం చ నశ్యతి

7-11-34
ఏవం కామాశయం చిత్తం కామానామతిసేవయా .
విరజ్యేత యథా రాజన్నాగ్నివత్కామబిందుభిః

7-11-35
యస్య యల్లక్షణం ప్రోక్తం పుంసో వర్ణాభివ్యంజకం .
యదన్యత్రాపి దృశ్యేత తత్తేనైవ వినిర్దిశేత్

7-11-36
ఇతి శ్రీమద్భాగవతే మహాపురాణే పారమహంస్యాం సంహితాయాం
సప్తమస్కంధే యుధిష్ఠిరనారదసంవాదే సదాచారనిర్ణయో
నామైకాదశోఽధ్యాయః