సప్తమ స్కంధః : చతుర్దశోఽధ్యాయః - 14
7-14-1
యుధిష్ఠిర ఉవాచ
గృహస్థ ఏతాం పదవీం విధినా యేన చాంజసా .
యాతి దేవఋషే బ్రూహి మాదృశో గృహమూఢధీః
7-14-2
నారద ఉవాచ
గృహేష్వవస్థితో రాజన్ క్రియాః కుర్వన్ గృహోచితాః .
వాసుదేవార్పణం సాక్షాదుపాసీత మహామునీన్
7-14-3
శృణ్వన్ భగవతోఽభీక్ష్ణమవతారకథామృతం .
శ్రద్దధానో యథాకాలముపశాంతజనావృతః
7-14-4
సత్సంగాచ్ఛనకైః సంగమాత్మజాయాత్మజాదిషు .
విముచ్యేన్ముచ్యమానేషు స్వయం స్వప్నవదుత్థితః
7-14-5
యావదర్థముపాసీనో దేహే గేహే చ పండితః .
విరక్తో రక్తవత్తత్ర నృలోకే నరతాం న్యసేత్
7-14-6
జ్ఞాతయః పితరౌ పుత్రా భ్రాతరః సుహృదోఽపరే .
యద్వదంతి యదిచ్ఛంతి చానుమోదేత నిర్మమః
7-14-7
దివ్యం భౌమం చాంతరీక్షం విత్తమచ్యుతనిర్మితం .
తత్సర్వముపయుంజాన ఏతత్కుర్యాత్స్వతో బుధః
7-14-8
యావద్భ్రియేత జఠరం తావత్స్వత్వం హి దేహినాం .
అధికం యోఽభిమన్యేత స స్తేనో దండమర్హతి
7-14-9
మృగోష్ట్రఖరమర్కాఖుసరీసృప్ఖగమక్షికాః .
ఆత్మనః పుత్రవత్పశ్యేత్తైరేషామంతరం కియత్
7-14-10
త్రివర్గం నాతికృచ్ఛ్రేణ భజేత గృహమేధ్యపి .
యథాదేశం యథాకాలం యావద్దైవోపపాదితం
7-14-11
ఆశ్వాఘాంతేఽవసాయిభ్యః కామాన్ సంవిభజేద్యథా .
అప్యేకామాత్మనో దారాం నృణాం స్వత్వగ్రహో యతః
7-14-12
జహ్యాద్యదర్థే స్వప్రాణాన్ హన్యాద్వా పితరం గురుం .
తస్యాం స్వత్వం స్త్రియాం జహ్యాద్యస్తేన హ్యజితో జితః
7-14-13
కృమివిడ్భస్మనిష్ఠాంతం క్వేదం తుచ్ఛం కలేవరం .
క్వ తదీయరతిర్భార్యా క్వాయమాత్మా నభశ్ఛదిః
7-14-14
సిద్ధైర్యజ్ఞావశిష్టార్థైః కల్పయేద్వృత్తిమాత్మనః .
శేషే స్వత్వం త్యజన్ ప్రాజ్ఞః పదవీం మహతామియాత్
7-14-15
దేవాన్ ఋషీన్ నృభూతాని పితౄనాత్మానమన్వహం .
స్వవృత్త్యాగతవిత్తేన యజేత పురుషం పృథక్
7-14-16
యర్హ్యాత్మనోఽధికారాద్యాః సర్వాః స్యుర్యజ్ఞసంపదః .
వైతానికేన విధినా అగ్నిహోత్రాదినా యజేత్
7-14-17
న హ్యగ్నిముఖతోయం వై భగవాన్ సర్వయజ్ఞభుక్ .
ఇజ్యేత హవిషా రాజన్ యథా విప్రముఖే హుతైః
7-14-18
తస్మాద్బ్రాహ్మణదేవేషు మర్త్యాదిషు యథార్హతః .
తైస్తైః కామైర్యజస్వైనం క్షేత్రజ్ఞం బ్రాహ్మణానను
7-14-19
కుర్యాదాపరపక్షీయం మాసి ప్రౌష్ఠపదే ద్విజః .
శ్రాద్ధం పిత్రోర్యథావిత్తం తద్బంధూనాం చ విత్తవాన్
7-14-20
అయనే విషువే కుర్యాద్వ్యతీపాతే దినక్షయే .
చంద్రాదిత్యోపరాగే చ ద్వాదశీశ్రవణేషు చ
7-14-21
తృతీయాయాం శుక్లపక్షే నవమ్యామథ కార్తికే .
చతసృష్వప్యష్టకాసు హేమంతే శిశిరే తథా
7-14-22
మాఘే చ సితసప్తమ్యాం మఘారాకాసమాగమే .
రాకయా చానుమత్యా వా మాసర్క్షాణి యుతాన్యపి
7-14-23
ద్వాదశ్యామనురాధా స్యాచ్ఛ్రవణస్తిస్ర ఉత్తరాః .
తిసృష్వేకాదశీ వాఽఽసు జన్మర్క్షశ్రోణయోగయుక్
7-14-24
త ఏతే శ్రేయసః కాలా నృణాం శ్రేయోవివర్ధనాః .
కుర్యాత్సర్వాత్మనైతేషు శ్రేయోఽమోఘం తదాయుషః
7-14-25
ఏషు స్నానం జపో హోమో వ్రతం దేవద్విజార్చనం .
పితృదేవనృభూతేభ్యో యద్దత్తం తద్ధ్యనశ్వరం
7-14-26
సంస్కారకాలో జాయాయా అపత్యస్యాత్మనస్తథా .
ప్రేతసంస్థా మృతాహశ్చ కర్మణ్యభ్యుదయే నృప
7-14-27
అథ దేశాన్ ప్రవక్ష్యామి ధర్మాదిశ్రేయ ఆవహన్ .
స వై పుణ్యతమో దేశః సత్పాత్రం యత్ర లభ్యతే
7-14-28
బింబం భగవతో యత్ర సర్వమేతచ్చరాచరం .
యత్ర హ బ్రాహ్మణకులం తపోవిద్యాదయాన్వితం
7-14-29
యత్ర యత్ర హరేరర్చా స దేశః శ్రేయసాం పదం .
యత్ర గంగాదయో నద్యః పురాణేషు చ విశ్రుతాః
7-14-30
సరాంసి పుష్కరాదీని క్షేత్రాణ్యర్హాశ్రితాన్యుత .
కురుక్షేత్రం గయశిరః ప్రయాగః పులహాశ్రమః
7-14-31
నైమిషం ఫాల్గునం సేతుః ప్రభాసోఽథ కుశస్థలీ .
వారాణసీ మధుపురీ పంపా బిందుసరస్తథా
7-14-32
నారాయణాశ్రమో నందా సీతారామాశ్రమాదయః .
సర్వే కులాచలా రాజన్ మహేంద్రమలయాదయః
7-14-33
ఏతే పుణ్యతమా దేశా హరేరర్చాశ్రితాశ్చ యే .
ఏతాన్ దేశాన్ నిషేవేత శ్రేయస్కామో హ్యభీక్ష్ణశః .
ధర్మో హ్యత్రేహితః పుంసాం సహస్రాధిఫలోదయః
7-14-34
పాత్రం త్వత్ర నిరుక్తం వై కవిభిః పాత్రవిత్తమైః .
హరిరేవైక ఉర్వీశ యన్మయం వై చరాచరం
7-14-35
దేవర్ష్యర్హత్సు వై సత్సు తత్ర బ్రహ్మాత్మజాదిషు .
రాజన్ యదగ్రపూజాయాం మతః పాత్రతయాచ్యుతః
7-14-36
జీవరాశిభిరాకీర్ణ ఆండకోశాంఘ్రిపో మహాన్ .
తన్మూలత్వాదచ్యుతేజ్యా సర్వజీవాత్మతర్పణం
7-14-37
పురాణ్యనేన సృష్టాని నృతిర్యగృషిదేవతాః .
శేతే జీవేన రూపేణ పురేషు పురుషో హ్యసౌ
7-14-38
తేష్వేషు భగవాన్ రాజంస్తారతమ్యేన వర్తతే .
తస్మాత్పాత్రం హి పురుషో యావానాత్మా యథేయతే
7-14-39
దృష్ట్వా తేషాం మిథో నృణామవజ్ఞానాత్మతాం నృప .
త్రేతాదిషు హరేరర్చా క్రియాయై కవిభిః కృతా
7-14-40
తతోఽర్చాయాం హరిం కేచిత్సంశ్రద్ధాయ సపర్యయా .
ఉపాసత ఉపాస్తాపి నార్థదా పురుషద్విషాం
7-14-41
పురుషేష్వపి రాజేంద్ర సుపాత్రం బ్రాహ్మణం విదుః .
తపసా విద్యయా తుష్ట్యా ధత్తే వేదం హరేస్తనుం
7-14-42
నన్వస్య బ్రాహ్మణా రాజన్ కృష్ణస్య జగదాత్మనః .
పునంతః పాదరజసా త్రిలోకీం దైవతం మహత్
7-14-43
ఇతి శ్రీమద్భాగవతే మహాపురాణే పారమహంస్యాం సంహితాయాం
సప్తమస్కంధే సదాచారనిర్ణయో చతుర్దశోఽధ్యాయః