సప్తమ స్కంధః : చతుర్థోఽధ్యాయః - 4
7-4-1
నారద ఉవాచ
ఏవం వృతః శతధృతిర్హిరణ్యకశిపోరథ .
ప్రాదాత్తత్తపసా ప్రీతో వరాంస్తస్య సుదుర్లభాన్
7-4-2
బ్రహ్మోవాచ
తాతేమే దుర్లభాః పుంసాం యాన్ వృణీషే వరాన్ మమ .
తథాపి వితరామ్యంగ వరాన్ యదపి దుర్లభాన్
7-4-3
తతో జగామ భగవానమోఘానుగ్రహో విభుః .
పూజితోఽసురవర్యేణ స్తూయమానః ప్రజేశ్వరైః
7-4-4
ఏవం లబ్ధవరో దైత్యో బిభ్రద్ధేమమయం వపుః .
భగవత్యకరోద్ద్వేషం భ్రాతుర్వధమనుస్మరన్
7-4-5
స విజిత్య దిశః సర్వా లోకాంశ్చ త్రీన్ మహాసురః .
దేవాసురమనుష్యేంద్రాన్ గంధర్వగరుడోరగాన్
7-4-6
సిద్ధచారణవిద్యాధ్రానృషీన్ పితృపతీన్ మనూన్ .
యక్షరక్షఃపిశాచేశాన్ ప్రేతభూతపతీనథ
7-4-7
సర్వసత్త్వపతీన్ జిత్వా వశమానీయ విశ్వజిత్ .
జహార లోకపాలానాం స్థానాని సహ తేజసా
7-4-8
దేవోద్యానశ్రియా జుష్టమధ్యాస్తే స్మ త్రివిష్టపం .
మహేంద్రభవనం సాక్షాన్నిర్మితం విశ్వకర్మణా .
త్రైలోక్యలక్ష్మ్యాయతనమధ్యువాసాఖిలర్ద్ధిమత్
7-4-9
యత్ర విద్రుమసోపానా మహామారకతా భువః .
యత్ర స్ఫాటికకుడ్యాని వైదూర్యస్తంభపంక్తయః
7-4-10
యత్ర చిత్రవితానాని పద్మరాగాసనాని చ .
పయఃఫేననిభాః శయ్యా ముక్తాదామపరిచ్ఛదాః
7-4-11
కూజద్భిర్నూపురైర్దేవ్యః శబ్దయంత్య ఇతస్తతః .
రత్నస్థలీషు పశ్యంతి సుదతీః సుందరం ముఖం
7-4-12
తస్మిన్ మహేంద్రభవనే మహాబలో
మహామనా నిర్జితలోక ఏకరాట్ .
రేమేఽభివంద్యాంఘ్రియుగః సురాదిభిః
ప్రతాపితైరూర్జితచండశాసనః
7-4-13
తమంగ మత్తం మధునోరుగంధినా
వివృత్తతామ్రాక్షమశేషధిష్ణ్యపాః .
ఉపాసతోపాయనపాణిభిర్వినా
త్రిభిస్తపోయోగబలౌజసాం పదం
7-4-14
జగుర్మహేంద్రాసనమోజసా స్థితం
విశ్వావసుస్తుంబురురస్మదాదయః .
గంధర్వసిద్ధా ఋషయోఽస్తువన్
ముహుర్విద్యాధరాశ్చాప్సరసశ్చ పాండవ
7-4-15
స ఏవ వర్ణాశ్రమిభిః క్రతుభిర్భూరిదక్షిణైః .
ఇజ్యమానో హవిర్భాగానగ్రహీత్స్వేన తేజసా
7-4-16
అకృష్టపచ్యా తస్యాసీత్సప్తద్వీపవతీ మహీ .
తథా కామదుఘా ద్యౌస్తు నానాశ్చర్యపదం నభః
7-4-17
రత్నాకరాశ్చ రత్నౌఘాంస్తత్పత్న్యశ్చోహురూర్మిభిః .
క్షారసీధుఘృతక్షౌద్రదధిక్షీరామృతోదకాః
7-4-18
శైలా ద్రోణీభిరాక్రీడం సర్వర్తుషు గుణాన్ ద్రుమాః .
దధార లోకపాలానామేక ఏవ పృథగ్గుణాన్
7-4-19
స ఇత్థం నిర్జితకకుబేకరాడ్ విషయాన్ ప్రియాన్ .
యథోపజోషం భుంజానో నాతృప్యదజితేంద్రియః
7-4-20
ఏవమైశ్వర్యమత్తస్య దృప్తస్యోచ్ఛాస్త్రవర్తినః .
కాలో మహాన్ వ్యతీయాయ బ్రహ్మశాపముపేయుషః
7-4-21
తస్యోగ్రదండసంవిగ్నాః సర్వే లోకాః సపాలకాః .
అన్యత్రాలబ్ధశరణాః శరణం యయురచ్యుతం
7-4-22
తస్యై నమోఽస్తు కాష్ఠాయై యత్రాత్మా హరిరీశ్వరః .
యద్గత్వా న నివర్తంతే శాంతాః సన్న్యాసినోఽమలాః
7-4-23
ఇతి తే సంయతాత్మానః సమాహితధియోఽమలాః .
ఉపతస్థుర్హృషీకేశం వినిద్రా వాయుభోజనాః
7-4-24
తేషామావిరభూద్వాణీ అరూపా మేఘనిఃస్వనా .
సన్నాదయంతీ కకుభః సాధూనామభయంకరీ
7-4-25
మా భైష్ట విబుధశ్రేష్ఠాః సర్వేషాం భద్రమస్తు వః .
మద్దర్శనం హి భూతానాం సర్వశ్రేయోపపత్తయే
7-4-26
జ్ఞాతమేతస్య దౌరాత్మ్యం దైతేయాపసదస్య చ .
తస్య శాంతిం కరిష్యామి కాలం తావత్ప్రతీక్షత
7-4-27
యదా దేవేషు వేదేషు గోషు విప్రేషు సాధుషు .
ధర్మే మయి చ విద్వేషః స వా ఆశు వినశ్యతి
7-4-28
నిర్వైరాయ ప్రశాంతాయ స్వసుతాయ మహాత్మనే .
ప్రహ్లాదాయ యదా ద్రుహ్యేద్ధనిష్యేఽపి వరోర్జితం
7-4-29
నారద ఉవాచ
ఇత్యుక్తా లోకగురుణా తం ప్రణమ్య దివౌకసః .
న్యవర్తంత గతోద్వేగా మేనిరే చాసురం హతం
7-4-30
తస్య దైత్యపతేః పుత్రాశ్చత్వారః పరమాద్భుతాః .
ప్రహ్లాదోఽభూన్మహాంస్తేషాం గుణైర్మహదుపాసకః
7-4-31
బ్రహ్మణ్యః శీలసంపన్నః సత్యసంధో జితేంద్రియః .
ఆత్మవత్సర్వభూతానామేకః ప్రియసుహృత్తమః
7-4-32
దాసవత్సన్నతార్యాంఘ్రిః పితృవద్దీనవత్సలః .
భ్రాతృవత్సదృశే స్నిగ్ధో గురుష్వీశ్వరభావనః .
విద్యార్థరూపజన్మాఢ్యో మానస్తంభవివర్జితః
7-4-33
నోద్విగ్నచిత్తో వ్యసనేషు నిఃస్పృహః
శ్రుతేషు దృష్టేషు గుణేష్వవస్తుదృక్ .
దాంతేంద్రియప్రాణశరీరధీః సదా
ప్రశాంతకామో రహితాసురోఽసురః
7-4-34
యస్మిన్ మహద్గుణా రాజన్ గృహ్యంతే కవిభిర్ముహుః .
న తేఽధునాపిధీయంతే యథా భగవతీశ్వరే
7-4-35
యం సాధుగాథాసదసి రిపవోఽపి సురా నృప .
ప్రతిమానం ప్రకుర్వంతి కిముతాన్యే భవాదృశాః
7-4-36
గుణైరలమసంఖ్యేయైర్మాహాత్మ్యం తస్య సూచ్యతే .
వాసుదేవే భగవతి యస్య నైసర్గికీ రతిః
7-4-37
న్యస్తక్రీడనకో బాలో జడవత్తన్మనస్తయా .
కృష్ణగ్రహగృహీతాత్మా న వేద జగదీదృశం
7-4-38
ఆసీనః పర్యటన్నశ్నన్ శయానః ప్రపిబన్ బ్రువన్ .
నానుసంధత్త ఏతాని గోవిందపరిరంభితః
7-4-39
క్వచిద్రుదతి వైకుంఠచింతాశబలచేతనః .
క్వచిద్ధసతి తచ్చింతాహ్లాద ఉద్గాయతి క్వచిత్
7-4-40
నదతి క్వచిదుత్కంఠో విలజ్జో నృత్యతి క్వచిత్ .
క్వచిత్తద్భావనాయుక్తస్తన్మయోఽనుచకార హ
7-4-41
క్వచిదుత్పులకస్తూష్ణీమాస్తే సంస్పర్శనిర్వృతః .
అస్పందప్రణయానందసలిలామీలితేక్షణః
7-4-42
స ఉత్తమశ్లోకపదారవిందయో-
ర్నిషేవయాకించనసంగలబ్ధయా .
తన్వన్ పరాం నిర్వృతిమాత్మనో ముహు-
ర్దుఃసంగదీనాన్యమనఃశమం వ్యధాత్
7-4-43
తస్మిన్ మహాభాగవతే మహాభాగే మహాత్మని .
హిరణ్యకశిపూ రాజన్నకరోదఘమాత్మజే
7-4-44
యుధిష్ఠిర ఉవాచ
దేవర్ష ఏతదిచ్ఛామో వేదితుం తవ సువ్రత .
యదాత్మజాయ శుద్ధాయ పితాదాత్సాధవే హ్యఘం
7-4-45
పుత్రాన్ విప్రతికూలాన్ స్వాన్ పితరః పుత్రవత్సలాః .
ఉపాలభంతే శిక్షార్థం నైవాఘమపరో యథా
7-4-46
కిముతానువశాన్ సాధూంస్తాదృశాన్ గురుదేవతాన్ .
ఏతత్కౌతూహలం బ్రహ్మన్నస్మాకం విధమ ప్రభో .
పితుః పుత్రాయ యద్ద్వేషో మరణాయ ప్రయోజితః
7-4-47
ఇతి శ్రీమద్భాగవతే మహాపురాణే పారమహంస్యాం సంహితాయాం
సప్తమస్కంధే ప్రహ్లాదచరితే చతుర్థోఽధ్యాయః