పోతన తెలుగు భాగవతము

పోతన తెలుగు భాగవతము

ప్రథమ స్కంధః : షష్ఠోఽధ్యాయః -6

1-6-1
సూత ఉవాచ
ఏవం నిశమ్య భగవాన్ దేవర్షేర్జన్మ కర్మ చ .
భూయః పప్రచ్ఛ తం బ్రహ్మన్ వ్యాసః సత్యవతీసుతః

1-6-2
వ్యాస ఉవాచ
భిక్షుభిర్విప్రవసితే విజ్ఞానాదేష్టృభిస్తవ .
వర్తమానో వయస్యాద్యే తతః కిమకరోద్భవాన్

1-6-3
స్వాయంభువ కయా వృత్త్యా వర్తితం తే పరం వయః .
కథం చేదముదస్రాక్షీః కాలే ప్రాప్తే కలేవరం

1-6-4
ప్రాక్కల్పవిషయామేతాం స్మృతిం తే సురసత్తమ .
న హ్యేష వ్యవధాత్కాల ఏష సర్వనిరాకృతిః

1-6-5
నారద ఉవాచ
భిక్షుభిర్విప్రవసితే విజ్ఞానాదేష్టృభిర్మమ .
వర్తమానో వయస్యాద్యే తత ఏతదకారషం

1-6-6
ఏకాత్మజా మే జననీ యోషిన్మూఢా చ కింకరీ .
మయ్యాత్మజేఽనన్యగతౌ చక్రే స్నేహానుబంధనం

1-6-7
సాస్వతంత్రా న కల్పాఽఽసీద్యోగక్షేమం మమేచ్ఛతీ .
ఈశస్య హి వశే లోకో యోషా దారుమయీ యథా

1-6-8
అహం చ తద్బ్రహ్మకులే ఊషివాంస్తదపేక్షయా .
దిగ్దేశకాలావ్యుత్పన్నో బాలకః పంచహాయనః

1-6-9
ఏకదా నిర్గతాం గేహాద్దుహంతీం నిశి గాం పథి .
సర్పోఽదశత్పదా స్పృష్టః కృపణాం కాలచోదితః

1-6-10
తదా తదహమీశస్య భక్తానాం శమభీప్సతః .
అనుగ్రహం మన్యమానః ప్రాతిష్ఠం దిశముత్తరాం

1-6-11
స్ఫీతాంజనపదాంస్తత్ర పురగ్రామవ్రజాకరాన్ .
ఖేటఖర్వటవాటీశ్చ వనాన్యుపవనాని చ

1-6-12
చిత్రధాతువిచిత్రాద్రీనిభభగ్నభుజద్రుమాన్ .
జలాశయాంఛివజలాన్నలినీః సురసేవితాః

1-6-13
చిత్రస్వనైః పత్రరథైర్విభ్రమద్భ్రమరశ్రియః .
నలవేణుశరస్తంబకుశకీచకగహ్వరం

1-6-14
ఏక ఏవాతియాతోఽహమద్రాక్షం విపినం మహత్ .
ఘోరం ప్రతిభయాకారం వ్యాలోలూకశివాజిరం

1-6-15
పరిశ్రాంతేంద్రియాత్మాహం తృట్పరీతో బుభుక్షితః .
స్నాత్వా పీత్వా హ్రదే నద్యా ఉపస్పృష్టో గతశ్రమః

1-6-16
తస్మిన్నిర్మనుజేఽరణ్యే పిప్పలోపస్థ ఆస్థితః .
ఆత్మనాఽఽత్మానమాత్మస్థం యథాశ్రుతమచింతయం

1-6-17
ధ్యాయతశ్చరణాంభోజం భావనిర్జితచేతసా .
ఔత్కంఠ్యాశ్రుకలాక్షస్య హృద్యాసీన్మే శనైర్హరిః

1-6-18
ప్రేమాతిభరనిర్భిన్నపులకాంగోఽతినిర్వృతః .
ఆనందసంప్లవే లీనో నాపశ్యముభయం మునే

1-6-19
రూపం భగవతో యత్తన్మనఃకాంతం శుచాపహం .
అపశ్యన్ సహసోత్తస్థే వైక్లవ్యాద్దుర్మనా ఇవ

1-6-20
దిదృక్షుస్తదహం భూయః ప్రణిధాయ మనో హృది .
వీక్షమాణోఽపి నాపశ్యమవితృప్త ఇవాతురః

1-6-21
ఏవం యతంతం విజనే మామాహాగోచరో గిరాం .
గంభీరశ్లక్ష్ణయా వాచా శుచః ప్రశమయన్నివ

1-6-22
హంతాస్మింజన్మని భవాన్ న మాం ద్రష్టుమిహార్హతి .
అవిపక్వకషాయాణాం దుర్దర్శోఽహం కుయోగినాం

1-6-23
సకృద్యద్దర్శితం రూపమేతత్కామాయ తేఽనఘ .
మత్కామః శనకైః సాధు సర్వాన్ ముంచతి హృచ్ఛయాన్

1-6-24
సత్సేవయాదీర్ఘయా తే జాతా మయి దృఢా మతిః .
హిత్వావద్యమిమం లోకం గంతా మజ్జనతామసి

1-6-25
మతిర్మయి నిబద్ధేయం న విపద్యేత కర్హిచిత్ .
ప్రజాసర్గనిరోధేఽపి స్మృతిశ్చ మదనుగ్రహాత్

1-6-26
ఏతావదుక్త్వోపరరామ తన్మహద్భూతం
నభోలింగమలింగమీశ్వరం .
అహం చ తస్మై మహతాం మహీయసే
శీర్ష్ణావనామం విదధేఽనుకంపితః

1-6-27
నామాన్యనంతస్య హతత్రపః పఠన్
గుహ్యాని భద్రాణి కృతాని చ స్మరన్ .
గాం పర్యటంస్తుష్టమనా గతస్పృహః
కాలం ప్రతీక్షన్ విమదో విమత్సరః

1-6-28
ఏవం కృష్ణమతేర్బ్రహ్మన్నసక్తస్యామలాత్మనః .
కాలః ప్రాదురభూత్కాలే తడిత్సౌదామనీ యథా

1-6-29
ప్రయుజ్యమానే మయి తాం శుద్ధాం భాగవతీం తనుం .
ఆరబ్ధకర్మనిర్వాణో న్యపతత్పాంచభౌతికః

1-6-30
కల్పాంత ఇదమాదాయ శయానేఽమ్భస్యుదన్వతః .
శిశయిషోరనుప్రాణం వివిశేఽన్తరహం విభోః

1-6-31
సహస్రయుగపర్యంత ఉత్థాయేదం సిసృక్షతః .
మరీచిమిశ్రా ఋషయః ప్రాణేభ్యోఽహం చ జజ్ఞిరే

1-6-32
అంతర్బహిశ్చ లోకాంస్త్రీన్ పర్యేమ్యస్కందితవ్రతః .
అనుగ్రహాన్మహావిష్ణోరవిఘాతగతిః క్వచిత్

1-6-33
దేవదత్తామిమాం వీణాం స్వరబ్రహ్మవిభూషితాం .
మూర్చ్ఛయిత్వా హరికథాం గాయమానశ్చరామ్యహం

1-6-34
ప్రగాయతః స్వవీర్యాణి తీర్థపాదః ప్రియశ్రవాః .
ఆహూత ఇవ మే శీఘ్రం దర్శనం యాతి చేతసి

1-6-35
ఏతద్ధ్యాతురచిత్తానాం మాత్రాస్పర్శేచ్ఛయా ముహుః .
భవసింధుప్లవో దృష్టో హరిచర్యానువర్ణనం

1-6-36
యమాదిభిర్యోగపథైః కామలోభహతో ముహుః .
ముకుందసేవయా యద్వత్తథాత్మాద్ధా న శామ్యతి

1-6-37
సర్వం తదిదమాఖ్యాతం యత్పృష్టోఽహం త్వయానఘ .
జన్మకర్మరహస్యం మే భవతశ్చాత్మతోషణం

1-6-38
సూత ఉవాచ
ఏవం సంభాష్య భగవాన్నారదో వాసవీసుతం .
ఆమంత్ర్య వీణాం రణయన్ యయౌ యాదృచ్ఛికో మునిః

1-6-39
అహో దేవర్షిర్ధన్యోఽయం యత్కీర్తిం శార్ఙ్గధన్వనః .
గాయన్ మాద్యన్నిదం తంత్ర్యా రమయత్యాతురం జగత్

1-6-40
ఇతి శ్రీమద్భాగవతే మహాపురాణే పారమహంస్యాం సంహితాయాం ప్రథమస్కంధే
వ్యాసనారదసంవాదే షష్ఠోఽధ్యాయః