ప్రథమ స్కంధః : ఏకాదశోఽధ్యాయః -11
1-11-1
సూత ఉవాచ
ఆనర్తాన్ స ఉపవ్రజ్య స్వృద్ధాంజనపదాన్ స్వకాన్ .
దధ్మౌ దరవరం తేషాం విషాదం శమయన్నివ
1-11-2
స ఉచ్చకాశే ధవలోదరో
దరోఽప్యురుక్రమస్యాధరశోణశోణిమా .
దాధ్మాయమానః కరకంజసంపుటే
యథాబ్జఖండే కలహంస ఉత్స్వనః
1-11-3
తముపశ్రుత్య నినదం జగద్భయభయావహం .
ప్రత్యుద్యయుః ప్రజాః సర్వా భర్తృదర్శనలాలసాః
1-11-4
తత్రోపనీతబలయో రవేర్దీపమివాదృతాః .
ఆత్మారామం పూర్ణకామం నిజలాభేన నిత్యదా
1-11-5
ప్రీత్యుత్ఫుల్లముఖాః ప్రోచుర్హర్షగద్గదయా గిరా .
పితరం సర్వసుహృదమవితారమివార్భకాః
1-11-6
నతాః స్మ తే నాథ సదాంఘ్రిపంకజం
విరించవైరించ్యసురేంద్రవందితం .
పరాయణం క్షేమమిహేచ్ఛతాం పరం
న యత్ర కాలః ప్రభవేత్పరః ప్రభుః
1-11-7
భవాయ నస్త్వం భవ విశ్వభావన
త్వమేవ మాతాథ సుహృత్పతిః పితా .
త్వం సద్గురుర్నః పరమం చ దైవతం
యస్యానువృత్త్యా కృతినో బభూవిమ
1-11-8
అహో సనాథా భవతా స్మ యద్వయం
త్రైవిష్టపానామపి దూరదర్శనం .
ప్రేమస్మితస్నిగ్ధనిరీక్షణాననం
పశ్యేమ రూపం తవ సర్వసౌభగం
1-11-9
యర్హ్యంబుజాక్షాపససార భో భవాన్
కురూన్ మధూన్ వాథ సుహృద్దిదృక్షయా .
తత్రాబ్దకోటిప్రతిమః క్షణో భవేద్రవిం
వినాక్ష్ణోరివ నస్తవాచ్యుత
1-11-10
(కథం వయం నాథ చిరోషితే త్వయి
ప్రసన్నదృష్ట్యాఖిలతాపశోషణం .
జీవేమ తే సుందరహాసశోభిత-
మపశ్యమానా వదనం మనోహరం
ఇతి చోదీరితా వాచః ప్రజానాం భక్తవత్సలః .
శృణ్వానోఽనుగ్రహం దృష్ట్యా వితన్వన్ ప్రావిశత్పురీం
1-11-11
మధుభోజదశార్హార్హకుకురాంధకవృష్ణిభిః .
ఆత్మతుల్యబలైర్గుప్తాం నాగైర్భోగవతీమివ
1-11-12
సర్వర్తుసర్వవిభవపుణ్యవృక్షలతాశ్రమైః .
ఉద్యానోపవనారామైర్వృతపద్మాకరశ్రియం
1-11-13
గోపురద్వారమార్గేషు కృతకౌతుకతోరణాం .
చిత్రధ్వజపతాకాగ్రైరంతః ప్రతిహతాతపాం
1-11-14
సమ్మార్జితమహామార్గరథ్యాపణకచత్వరాం .
సిక్తాం గంధజలైరుప్తాం ఫలపుష్పాక్షతాంకురైః
1-11-15
ద్వారి ద్వారి గృహాణాం చ దధ్యక్షతఫలేక్షుభిః .
అలంకృతాం పూర్ణకుంభైర్బలిభిర్ధూపదీపకైః
1-11-16
నిశమ్య ప్రేష్ఠమాయాంతం వసుదేవో మహామనాః .
అక్రూరశ్చోగ్రసేనశ్చ రామశ్చాద్భుతవిక్రమః
1-11-17
ప్రద్యుమ్నశ్చారుదేష్ణశ్చ సాంబో జాంబవతీసుతః .
ప్రహర్షవేగోచ్ఛ్వసితశయనాసనభోజనాః
1-11-18
వారణేంద్రం పురస్కృత్య బ్రాహ్మణైః ససుమంగలైః .
శంఖతూర్యనినాదేన బ్రహ్మఘోషేణ చాదృతాః .
ప్రత్యుజ్జగ్మూ రథైర్హృష్టాః ప్రణయాగతసాధ్వసాః
1-11-19
వారముఖ్యాశ్చ శతశో యానైస్తద్దర్శనోత్సుకాః .
లసత్కుండలనిర్భాతకపోలవదనశ్రియః
1-11-20
నటనర్తకగంధర్వాః సూతమాగధవందినః .
గాయంతి చోత్తమశ్లోకచరితాన్యద్భుతాని చ
1-11-21
భగవాంస్తత్ర బంధూనాం పౌరాణామనువర్తినాం .
యథావిధ్యుపసంగమ్య సర్వేషాం మానమాదధే
1-11-22
ప్రహ్వాభివాదనాశ్లేషకరస్పర్శస్మితేక్షణైః .
ఆశ్వాస్య చాశ్వపాకేభ్యో వరైశ్చాభిమతైర్విభుః
1-11-23
స్వయం చ గురుభిర్విప్రైః సదారైః స్థవిరైరపి .
ఆశీర్భిర్యుజ్యమానోఽన్యైర్వందిభిశ్చావిశత్పురం
1-11-24
రాజమార్గం గతే కృష్ణే ద్వారకాయాః కులస్త్రియః .
హర్మ్యాణ్యారురుహుర్విప్రాః తదీక్షణమహోత్సవాః
1-11-25
నిత్యం నిరీక్షమాణానాం యదపి ద్వారకౌకసాం .
న వితృప్యంతి హి దృశః శ్రియో ధామాంగమచ్యుతం
1-11-26
శ్రియో నివాసో యస్యోరః పానపాత్రం ముఖం దృశాం .
బాహవో లోకపాలానాం సారంగాణాం పదాంబుజం
1-11-27
సితాతపత్రవ్యజనైరుపస్కృతః
ప్రసూనవర్షైరభివర్షితః పథి
పిశంగవాసా వనమాలయా బభౌ
ఘనో యథార్కోడుపచాపవైద్యుతైః
1-11-28
ప్రవిష్టస్తు గృహం పిత్రోః పరిష్వక్తః స్వమాతృభిః .
వవందే శిరసా సప్త దేవకీప్రముఖా ముదా
1-11-29
తాః పుత్రమంకమారోప్య స్నేహస్నుతపయోధరాః .
హర్షవిహ్వలితాత్మానః సిషిచుర్నేత్రజైర్జలైః
1-11-30
అథావిశత్స్వభవనం సర్వకామమనుత్తమం .
ప్రాసాదా యత్ర పత్నీనాం సహస్రాణి చ షోడశ
1-11-31
పత్న్యః పతిం ప్రోష్య గృహానుపాగతం
విలోక్య సంజాతమనోమహోత్సవాః .
ఉత్తస్థురారాత్సహసాసనాశయాత్సాకం
వ్రతైర్వ్రీడితలోచనాననాః
1-11-32
తమాత్మజైర్దృష్టిభిరంతరాత్మనా
దురంతభావాః పరిరేభిరే పతిం .
నిరుద్ధమప్యాస్రవదంబునేత్రయోర్విలజ్జతీనాం
భృగువర్య వైక్లవాత్
1-11-33
యద్యప్యసౌ పార్శ్వగతో రహోగతస్తథాపి
తస్యాంఘ్రియుగం నవం నవం .
పదే పదే కా విరమేత తత్పదాచ్చలాపి
యచ్ఛ్రీర్న జహాతి కర్హిచిత్
1-11-34
ఏవం నృపాణాం క్షితిభారజన్మనా-
మక్షౌహిణీభిః పరివృత్తతేజసాం .
విధాయ వైరం శ్వసనో యథానలం
మిథో వధేనోపరతో నిరాయుధః
1-11-35
స ఏష నరలోకేఽస్మిన్నవతీర్ణః స్వమాయయా .
రేమే స్త్రీరత్నకూటస్థో భగవాన్ ప్రాకృతో యథా
1-11-36
ఉద్దామభావపిశునామలవల్గుహాస-
వ్రీడావలోకనిహతో మదనోఽపి యాసాం .
సమ్ముహ్య తాపమజహాత్ప్రమదోత్తమాస్తా
యస్యేంద్రియం విమథితుం కుహకైర్న శేకుః
1-11-37
తమయం మన్యతే లోకో హ్యసంగమపి సంగినం .
ఆత్మౌపమ్యేన మనుజం వ్యాపృణ్వానం యతోఽబుధః
1-11-38
ఏతదీశనమీశస్య ప్రకృతిస్థోఽపి తద్గుణైః .
న యుజ్యతే సదాఽఽత్మస్థైర్యథా బుద్ధిస్తదాశ్రయా
1-11-39
తం మేనిరేఽబలా మూఢాః స్త్రైణం చానువ్రతం రహః .
అప్రమాణవిదో భర్తురీశ్వరం మతయో యథా
1-11-40
ఇతి శ్రీమద్భాగవతే మహాపురాణే పారమహంస్యాం సంహితాయాం ప్రథమస్కంధే
నైమిషీయోపాఖ్యానే శ్రీకృష్ణద్వారకాప్రవేశో నామైకాదశోఽధ్యాయః