పోతన తెలుగు భాగవతము

పోతన తెలుగు భాగవతము

ప్రథమ స్కంధః : దశమోఽధ్యాయః -10

1-10-1
శౌనక ఉవాచ
హత్వా స్వరిక్థస్పృధ ఆతతాయినో
యుధిష్ఠిరో ధర్మభృతాం వరిష్ఠః .
సహానుజైః ప్రత్యవరుద్ధభోజనః
కథం ప్రవృత్తః కిమకారషీత్తతః

1-10-2
సూత ఉవాచ
వంశం కురోర్వంశదవాగ్నినిర్హృతం
సంరోహయిత్వా భవభావనో హరిః .
నివేశయిత్వా నిజరాజ్య ఈశ్వరో
యుధిష్ఠిరం ప్రీతమనా బభూవ హ

1-10-3
నిశమ్య భీష్మోక్తమథాచ్యుతోక్తం
ప్రవృత్తవిజ్ఞానవిధూతవిభ్రమః .
శశాస గామింద్ర ఇవాజితాశ్రయః
పరిధ్యుపాంతామనుజానువర్తితః

1-10-4
కామం వవర్ష పర్జన్యః సర్వకామదుఘా మహీ .
సిషిచుః స్మ వ్రజాన్ గావః పయసోధస్వతీర్ముదా

1-10-5
నద్యః సముద్రా గిరయః సవనస్పతివీరుధః .
ఫలంత్యోషధయః సర్వాః కామమన్వృతు తస్య వై

1-10-6
నాధయో వ్యాధయః క్లేశా దైవభూతాత్మహేతవః .
అజాతశత్రావభవన్ జంతూనాం రాజ్ఞి కర్హిచిత్

1-10-7
ఉషిత్వా హాస్తినపురే మాసాన్ కతిపయాన్ హరిః .
సుహృదాం చ విశోకాయ స్వసుశ్చ ప్రియకామ్యయా

1-10-8
ఆమంత్ర్య చాభ్యనుజ్ఞాతః పరిష్వజ్యాభివాద్య తం .
ఆరురోహ రథం కైశ్చిత్పరిష్వక్తోఽభివాదితః

1-10-9
సుభద్రా ద్రౌపదీ కుంతీ విరాటతనయా తథా .
గాంధారీ ధృతరాష్ట్రశ్చ యుయుత్సుర్గౌతమో యమౌ

1-10-10
వృకోదరశ్చ ధౌమ్యశ్చ స్త్రియో మత్స్యసుతాదయః .
న సేహిరే విముహ్యంతో విరహం శార్ఙ్గధన్వనః

1-10-11
సత్సంగాన్ముక్తదుఃసంగో హాతుం నోత్సహతే బుధః .
కీర్త్యమానం యశో యస్య సకృదాకర్ణ్య రోచనం

1-10-12
తస్మిన్ న్యస్తధియః పార్థాః సహేరన్ విరహం కథం .
దర్శనస్పర్శసంలాపశయనాసనభోజనైః

1-10-13
సర్వే తేఽనిమిషైరక్షైస్తమనుద్రుతచేతసః .
వీక్షంతః స్నేహసంబద్ధా విచేలుస్తత్ర తత్ర హ

1-10-14
న్యరుంధన్నుద్గలద్బాష్పమౌత్కంఠ్యాద్దేవకీసుతే .
నిర్యాత్యగారాన్నోఽభద్రమితి స్యాద్బాంధవస్త్రియః

1-10-15
మృదంగశంఖభేర్యశ్చ వీణాపణవగోముఖాః .
ధుంధుర్యానకఘంటాద్యా నేదుర్దుందుభయస్తథా

1-10-16
ప్రాసాదశిఖరారూఢాః కురునార్యో దిదృక్షయా .
వవృషుః కుసుమైః కృష్ణం ప్రేమవ్రీడాస్మితేక్షణాః

1-10-17
సితాతపత్రం జగ్రాహ ముక్తాదామవిభూషితం .
రత్నదండం గుడాకేశః ప్రియః ప్రియతమస్య హ

1-10-18
ఉద్ధవః సాత్యకిశ్చైవ వ్యజనే పరమాద్భుతే .
వికీర్యమాణః కుసుమై రేజే మధుపతిః పథి

1-10-19
అశ్రూయంతాశిషః సత్యాస్తత్ర తత్ర ద్విజేరితాః .
నానురూపానురూపాశ్చ నిర్గుణస్య గుణాత్మనః

1-10-20
అన్యోన్యమాసీత్సంజల్ప ఉత్తమశ్లోకచేతసాం .
కౌరవేంద్రపురస్త్రీణాం సర్వశ్రుతిమనోహరః

1-10-21
స వై కిలాయం పురుషః పురాతనో
య ఏక ఆసీదవిశేష ఆత్మని .
అగ్రే గుణేభ్యో జగదాత్మనీశ్వరే
నిమీలితాత్మన్ నిశి సుప్తశక్తిషు

1-10-22
స ఏవ భూయో నిజవీర్యచోదితాం
స్వజీవమాయాం ప్రకృతిం సిసృక్షతీం .
అనామరూపాత్మని రూపనామనీ
విధిత్సమానోఽనుససార శాస్త్రకృత్

1-10-23
స వా అయం యత్పదమత్ర సూరయో
జితేంద్రియా నిర్జితమాతరిశ్వనః .
పశ్యంతి భక్త్యుత్కలితామలాత్మనా
నన్వేష సత్త్వం పరిమార్ష్టుమర్హతి

1-10-24
స వా అయం సఖ్యనుగీతసత్కథో
వేదేషు గుహ్యేషు చ గుహ్యవాదిభిః .
య ఏక ఈశో జగదాత్మలీలయా
సృజత్యవత్యత్తి న తత్ర సజ్జతే

1-10-25
యదా హ్యధర్మేణ తమోధియో నృపా
జీవంతి తత్రైష హి సత్త్వతః కిల .
ధత్తే భగం సత్యమృతం దయాం యశో
భవాయ రూపాణి దధద్యుగే యుగే

1-10-26
అహో అలం శ్లాఘ్యతమం యదోః కులమహో
అలం పుణ్యతమం మధోర్వనం .
యదేష పుంసామృషభః శ్రియః పతిః
స్వజన్మనా చంక్రమణేన చాంచతి

1-10-27
అహో బత స్వర్యశసస్తిరస్కరీ
కుశస్థలీ పుణ్యయశస్కరీ భువః .
పశ్యంతి నిత్యం యదనుగ్రహేషితం
స్మితావలోకం స్వపతిం స్మ యత్ప్రజాః

1-10-28
నూనం వ్రతస్నానహుతాదినేశ్వరః
సమర్చితో హ్యస్య గృహీతపాణిభిః .
పిబంతి యాః సఖ్యధరామృతం ముహుర్వ్రజస్త్రియః
సమ్ముముహుర్యదాశయాః

1-10-29
యా వీర్యశుల్కేన హృతాః స్వయంవరే
ప్రమథ్య చైద్యప్రముఖాన్ హి శుష్మిణః .
ప్రద్యుమ్నసాంబాంబసుతాదయోఽపరా
యాశ్చాహృతా భౌమవధే సహస్రశః

1-10-30
ఏతాః పరం స్త్రీత్వమపాస్తపేశలం
నిరస్తశౌచం బత సాధు కుర్వతే .
యాసాం గృహాత్పుష్కరలోచనః పతిర్న
జాత్వపైత్యాహృతిభిర్హృది స్పృశన్

1-10-31
ఏవంవిధా గదంతీనాం స గిరః పురయోషితాం .
నిరీక్షణేనాభినందన్ సస్మితేన యయౌ హరిః

1-10-32
అజాతశత్రుః పృతనాం గోపీథాయ మధుద్విషః .
పరేభ్యః శంకితః స్నేహాత్ప్రాయుంక్త చతురంగిణీం

1-10-33
అథ దూరాగతాన్ శౌరిః కౌరవాన్ విరహాతురాన్ .
సన్నివర్త్య దృఢం స్నిగ్ధాన్ ప్రాయాత్స్వనగరీం ప్రియైః

1-10-34
కురుజాంగలపాంచాలాన్ శూరసేనాన్ సయామునాన్ .
బ్రహ్మావర్తం కురుక్షేత్రం మత్స్యాన్ సారస్వతానథ

1-10-35
మరుధన్వమతిక్రమ్య సౌవీరాభీరయోః పరాన్ .
ఆనర్తాన్ భార్గవోపాగాచ్ఛ్రాంతవాహో మనాగ్ విభుః

1-10-36
తత్ర తత్ర హ తత్రత్యైర్హరిః ప్రత్యుద్యతార్హణః .
సాయం భేజే దిశం పశ్చాద్గవిష్ఠో గాం గతస్తదా

1-10-37
ఇతి శ్రీమద్భాగవతే మహాపురాణే పారమహంస్యాం సంహితాయాం ప్రథమస్కంధే
శ్రీకృష్ణద్వారకాగమనం నామ దశమోఽధ్యాయః