పోతన తెలుగు భాగవతము

పోతన తెలుగు భాగవతము

ప్రథమ స్కంధః : చతుర్దశోఽధ్యాయః -14

1-14-1
సూత ఉవాచ
సంప్రస్థితే ద్వారకాయాం జిష్ణౌ బంధుదిదృక్షయా .
జ్ఞాతుం చ పుణ్యశ్లోకస్య కృష్ణస్య చ విచేష్టితం

1-14-2
వ్యతీతాః కతిచిన్మాసాస్తదా నాయాత్తతోఽర్జునః .
దదర్శ ఘోరరూపాణి నిమిత్తాని కురూద్వహః

1-14-3
కాలస్య చ గతిం రౌద్రాం విపర్యస్తర్తుధర్మిణః .
పాపీయసీం నృణాం వార్తాం క్రోధలోభానృతాత్మనాం

1-14-4
జిహ్మప్రాయం వ్యవహృతం శాఠ్యమిశ్రం చ సౌహృదం .
పితృమాతృసుహృద్భ్రాతృదంపతీనాం చ కల్కనం

1-14-5
నిమిత్తాన్యత్యరిష్టాని కాలే త్వనుగతే నృణాం .
లోభాద్యధర్మప్రకృతిం దృష్ట్వోవాచానుజం నృపః

1-14-6
యుధిష్ఠిర ఉవాచ
సంప్రేషితో ద్వారకాయాం జిష్ణుర్బంధుదిదృక్షయా .
జ్ఞాతుం చ పుణ్యశ్లోకస్య కృష్ణస్య చ విచేష్టితం

1-14-7
గతాః సప్తాధునా మాసా భీమసేన తవానుజః .
నాయాతి కస్య వా హేతోర్నాహం వేదేదమంజసా

1-14-8
అపి దేవర్షిణాఽఽదిష్టః స కాలోఽయముపస్థితః .
యదాత్మనోఽఙ్గమాక్రీడం భగవానుత్సిసృక్షతి

1-14-9
యస్మాన్నః సంపదో రాజ్యం దారాః ప్రాణాః కులం ప్రజాః .
ఆసన్ సపత్నవిజయో లోకాశ్చ యదనుగ్రహాత్

1-14-10
పశ్యోత్పాతాన్ నరవ్యాఘ్ర దివ్యాన్ భౌమాన్ సదైహికాన్ .
దారుణాన్ శంసతోఽదూరాద్భయం నో బుద్ధిమోహనం

1-14-11
ఊర్వక్షిబాహవో మహ్యం స్ఫురంత్యంగ పునః పునః .
వేపథుశ్చాపి హృదయే ఆరాద్దాస్యంతి విప్రియం

1-14-12
శివైషోద్యంతమాదిత్యమభిరౌత్యనలాననా .
మామంగ సారమేయోఽయమభిరేభత్యభీరువత్

1-14-13
శస్తాః కుర్వంతి మాం సవ్యం దక్షిణం పశవోఽపరే .
వాహాంశ్చ పురుషవ్యాఘ్ర లక్షయే రుదతో మమ

1-14-14
మృత్యుదూతః కపోతోఽయములూకః కంపయన్ మనః .
ప్రత్యులూకశ్చ కుహ్వానైరనిద్రౌ శూన్యమిచ్ఛతః

1-14-15
ధూమ్రా దిశః పరిధయః కంపతే భూః సహాద్రిభిః .
నిర్ఘాతశ్చ మహాంస్తాత సాకం చ స్తనయిత్నుభిః

1-14-16
వాయుర్వాతి ఖరస్పర్శో రజసా విసృజంస్తమః .
అసృగ్వర్షంతి జలదా బీభత్సమివ సర్వతః

1-14-17
సూర్యం హతప్రభం పశ్య గ్రహమర్దం మిథో దివి .
ససంకులైర్భూతగణైర్జ్వలితే ఇవ రోదసీ

1-14-18
నద్యో నదాశ్చ క్షుభితాః సరాంసి చ మనాంసి చ .
న జ్వలత్యగ్నిరాజ్యేన కాలోఽయం కిం విధాస్యతి

1-14-19
న పిబంతి స్తనం వత్సా న దుహ్యంతి చ మాతరః .
రుదంత్యశ్రుముఖా గావో న హృష్యంత్యృషభా వ్రజే

1-14-20
దైవతాని రుదంతీవ స్విద్యంతి హ్యుచ్చలంతి చ .
ఇమే జనపదా గ్రామాః పురోద్యానాకరాశ్రమాః .
భ్రష్టశ్రియో నిరానందాః కిమఘం దర్శయంతి నః

1-14-21
మన్య ఏతైర్మహోత్పాతైర్నూనం భగవతః పదైః .
అనన్యపురుషశ్రీభిర్హీనా భూర్హతసౌభగా

1-14-22
ఇతి చింతయతస్తస్య దృష్టారిష్టేన చేతసా .
రాజ్ఞః ప్రత్యాగమద్బ్రహ్మన్ యదుపుర్యాః కపిధ్వజః

1-14-23
తం పాదయోర్నిపతితమయథాపూర్వమాతురం .
అధోవదనమబ్బిందూన్ సృజంతం నయనాబ్జయోః

1-14-24
విలోక్యోద్విగ్నహృదయో విచ్ఛాయమనుజం నృపః .
పృచ్ఛతి స్మ సుహృన్మధ్యే సంస్మరన్ నారదేరితం

1-14-25
యుధిష్ఠిర ఉవాచ
కచ్చిదానర్తపుర్యాం నః స్వజనాః సుఖమాసతే .
మధుభోజదశార్హార్హసాత్వతాంధకవృష్ణయః

1-14-26
శూరో మాతామహః కచ్చిత్స్వస్త్యాస్తే వాథ మారిషః .
మాతులః సానుజః కచ్చిత్కుశల్యానకదుందుభిః

1-14-27
సప్త స్వసారస్తత్పత్న్యో మాతులాన్యః సహాత్మజాః .
ఆసతే సస్నుషాః క్షేమం దేవకీప్రముఖాః స్వయం

1-14-28
కచ్చిద్రాజాఽఽహుకో జీవత్యసత్పుత్రోఽస్య చానుజః .
హృదీకః ససుతోఽక్రూరో జయంతగదసారణాః

1-14-29
ఆసతే కుశలం కచ్చిద్యే చ శత్రుజిదాదయః .
కచ్చిదాస్తే సుఖం రామో భగవాన్ సాత్వతాం ప్రభుః

1-14-30
ప్రద్యుమ్నః సర్వవృష్ణీనాం సుఖమాస్తే మహారథః .
గంభీరరయోఽనిరుద్ధో వర్ధతే భగవానుత

1-14-31
సుషేణశ్చారుదేష్ణశ్చ సాంబో జాంబవతీసుతః .
అన్యే చ కార్ష్ణిప్రవరాః సపుత్రా ఋషభాదయః

1-14-32
తథైవానుచరాః శౌరేః శ్రుతదేవోద్ధవాదయః .
సునందనందశీర్షణ్యా యే చాన్యే సాత్వతర్షభాః

1-14-33
అపి స్వస్త్యాసతే సర్వే రామకృష్ణభుజాశ్రయాః .
అపి స్మరంతి కుశలమస్మాకం బద్ధసౌహృదాః

1-14-34
భగవానపి గోవిందో బ్రహ్మణ్యో భక్తవత్సలః .
కచ్చిత్పురే సుధర్మాయాం సుఖమాస్తే సుహృద్వృతః

1-14-35
మంగలాయ చ లోకానాం క్షేమాయ చ భవాయ చ .
ఆస్తే యదుకులాంభోధావాద్యోఽనంతసఖః పుమాన్

1-14-36
యద్బాహుదండగుప్తాయాం స్వపుర్యాం యదవోఽర్చితాః .
క్రీడంతి పరమానందం మహాపౌరుషికా ఇవ

1-14-37
యత్పాదశుశ్రూషణముఖ్యకర్మణా
సత్యాదయో ద్వ్యష్టసహస్రయోషితః .
నిర్జిత్య సంఖ్యే త్రిదశాంస్తదాశిషో
హరంతి వజ్రాయుధవల్లభోచితాః

1-14-38
యద్బాహుదండాభ్యుదయానుజీవినో
యదుప్రవీరా హ్యకుతోభయా ముహుః .
అధిక్రమంత్యంఘ్రిభిరాహృతాం బలాత్సభాం
సుధర్మాం సురసత్తమోచితాం

1-14-39
కచ్చిత్తేఽనామయం తాత భ్రష్టతేజా విభాసి మే .
అలబ్ధమానోఽవజ్ఞాతః కిం వా తాత చిరోషితః

1-14-40
కచ్చిన్నాభిహతోఽభావైః శబ్దాదిభిరమంగలైః .
న దత్తముక్తమర్థిభ్య ఆశయా యత్ప్రతిశ్రుతం

1-14-41
కచ్చిత్త్వం బ్రాహ్మణం బాలం గాం వృద్ధం రోగిణం స్త్రియం .
శరణోపసృతం సత్త్వం నాత్యాక్షీః శరణప్రదః

1-14-42
కచ్చిత్త్వం నాగమోఽగమ్యాం గమ్యాం వాఽసత్కృతాం స్త్రియం .
పరాజితో వాథ భవాన్ నోత్తమైర్నాసమైః పథి

1-14-43
అపి స్విత్పర్యభుంక్థాస్త్వం సంభోజ్యాన్ వృద్ధబాలకాన్ .
జుగుప్సితం కర్మ కించిత్కృతవాన్ న యదక్షమం

1-14-44
కచ్చిత్ప్రేష్ఠతమేనాథ హృదయేనాత్మబంధునా .
శూన్యోఽస్మి రహితో నిత్యం మన్యసే తేఽన్యథా న రుక్

1-14-45
ఇతి శ్రీమద్భాగవతే మహాపురాణే పారమహంస్యాం సంహితాయాం ప్రథమస్కంధే
యుధిష్ఠిరవితర్కో నామ చతుర్దశోఽధ్యాయః