ప్రథమ స్కంధః : అష్టాదశోఽధ్యాయః =18
1-18-1
సూత ఉవాచ
యో వై ద్రౌణ్యస్త్రవిప్లుష్టో న మాతురుదరే మృతః .
అనుగ్రహాద్భగవతః కృష్ణస్యాద్భుతకర్మణః
1-18-2
బ్రహ్మకోపోత్థితాద్యస్తు తక్షకాత్ప్రాణవిప్లవాత్ .
న సమ్ముమోహోరుభయాద్భగవత్యర్పితాశయః
1-18-3
ఉత్సృజ్య సర్వతః సంగం విజ్ఞాతాజితసంస్థితిః .
వైయాసకేర్జహౌ శిష్యో గంగాయాం స్వం కలేవరం
1-18-4
నోత్తమశ్లోకవార్తానాం జుషతాం తత్కథామృతం .
స్యాత్సంభ్రమోఽన్తకాలేఽపి స్మరతాం తత్పదాంబుజం
1-18-5
తావత్కలిర్న ప్రభవేత్ప్రవిష్టోఽపీహ సర్వతః .
యావదీశో మహానుర్వ్యామాభిమన్యవ ఏకరాట్
1-18-6
యస్మిన్నహని యర్హ్యేవ భగవానుత్ససర్జ గాం .
తదైవేహానువృత్తోఽసావధర్మప్రభవః కలిః
1-18-7
నానుద్వేష్టి కలిం సమ్రాట్ సారంగ ఇవ సారభుక్ .
కుశలాన్యాశు సిద్ధ్యంతి నేతరాణి కృతాని యత్
1-18-8
కిం ను బాలేషు శూరేణ కలినా ధీరభీరుణా .
అప్రమత్తః ప్రమత్తేషు యో వృకో నృషు వర్తతే
1-18-9
ఉపవర్ణితమేతద్వః పుణ్యం పారీక్షితం మయా .
వాసుదేవకథోపేతమాఖ్యానం యదపృచ్ఛత
1-18-10
యా యాః కథా భగవతః కథనీయోరుకర్మణః .
గుణకర్మాశ్రయాః పుంభిః సంసేవ్యాస్తా బుభూషుభిః
1-18-11
ఋషయ ఊచుః
సూత జీవ సమాః సౌమ్య శాశ్వతీర్విశదం యశః .
యస్త్వం శంససి కృష్ణస్య మర్త్యానామమృతం హి నః
1-18-12
కర్మణ్యస్మిన్ననాశ్వాసే ధూమధూమ్రాత్మనాం భవాన్ .
ఆపాయయతి గోవిందపాదపద్మాసవం మధు
1-18-13
తులయామ లవేనాపి న స్వర్గం నాపునర్భవం .
భగవత్సంగిసంగస్య మర్త్యానాం కిముతాశిషః
1-18-14
కో నామ తృప్యేద్రసవిత్కథాయాం
మహత్తమైకాంతపరాయణస్య .
నాంతం గుణానామగుణస్య జగ్ముర్యోగేశ్వరా
యే భవపాద్మముఖ్యాః
1-18-15
తన్నో భవాన్ వై భగవత్ప్రధానో
మహత్తమైకాంతపరాయణస్య .
హరేరుదారం చరితం విశుద్ధం
శుశ్రూషతాం నో వితనోతు విద్వన్
1-18-16
స వై మహాభాగవతః పరీక్షి-
ద్యేనాపవర్గాఖ్యమదభ్రబుద్ధిః .
జ్ఞానేన వైయాసకిశబ్దితేన
భేజే ఖగేంద్రధ్వజపాదమూలం
1-18-17
తన్నః పరం పుణ్యమసంవృతార్థ-
మాఖ్యానమత్యద్భుతయోగనిష్ఠం .
ఆఖ్యాహ్యనంతాచరితోపపన్నం
పారీక్షితం భాగవతాభిరామం
1-18-18
సూత ఉవాచ
అహో వయం జన్మభృతోఽద్య హాస్మ
వృద్ధానువృత్త్యాపి విలోమజాతాః .
దౌష్కుల్యమాధిం విధునోతి శీఘ్రం
మహత్తమానామభిధానయోగః
1-18-19
కుతః పునర్గృణతో నామ తస్య
మహత్తమైకాంతపరాయణస్య .
యోఽనంతశక్తిర్భగవాననంతో
మహద్గుణత్వాద్యమనంతమాహుః
1-18-20
ఏతావతాలం నను సూచితేన
గుణైరసామ్యానతిశాయనస్య .
హిత్వేతరాన్ ప్రార్థయతో విభూతి-
ర్యస్యాంఘ్రిరేణుం జుషతేఽనభీప్సోః
1-18-21
అథాపి యత్పాదనఖావసృష్టం
జగద్విరించోపహృతార్హణాంభః .
సేశం పునాత్యన్యతమో ముకుందాత్కో
నామ లోకే భగవత్పదార్థః
1-18-22
యత్రానురక్తాః సహసైవ ధీరా
వ్యపోహ్య దేహాదిషు సంగమూఢం .
వ్రజంతి తత్పారమహంస్యమంత్యం
యస్మిన్నహింసోపశమః స్వధర్మః
1-18-23
అహం హి పృష్టోఽర్యమణో భవద్భిరాచక్ష
ఆత్మావగమోఽత్ర యావాన్ .
నభః పతంత్యాత్మసమం పతత్త్రిణస్తథా
సమం విష్ణుగతిం విపశ్చితః
1-18-24
ఏకదా ధనురుద్యమ్య విచరన్ మృగయాం వనే .
మృగాననుగతః శ్రాంతః క్షుధితస్తృషితో భృశం
1-18-25
జలాశయమచక్షాణః ప్రవివేశ తమాశ్రమం .
దదర్శ మునిమాసీనం శాంతం మీలితలోచనం
1-18-26
ప్రతిరుద్ధేంద్రియప్రాణమనోబుద్ధిముపారతం .
స్థానత్రయాత్పరం ప్రాప్తం బ్రహ్మభూతమవిక్రియం
1-18-27
విప్రకీర్ణజటాచ్ఛన్నం రౌరవేణాజినేన చ .
విశుష్యత్తాలురుదకం తథాభూతమయాచత
1-18-28
అలబ్ధతృణభూమ్యాదిరసంప్రాప్తార్ఘ్యసూనృతః .
అవజ్ఞాతమివాత్మానం మన్యమానశ్చుకోప హ
1-18-29
అభూతపూర్వః సహసా క్షుత్తృట్భ్యామర్దితాత్మనః .
బ్రాహ్మణం ప్రత్యభూద్బ్రహ్మన్ మత్సరో మన్యురేవ చ
1-18-30
స తు బ్రహ్మఋషేరంసే గతాసుమురగం రుషా .
వినిర్గచ్ఛన్ ధనుష్కోట్యా నిధాయ పురమాగమత్
1-18-31
ఏష కిం నిభృతాశేషకరణో మీలితేక్షణః .
మృషాసమాధిరాహోస్విత్కిం ను స్యాత్క్షత్రబంధుభిః
1-18-32
తస్య పుత్రోఽతితేజస్వీ విహరన్ బాలకోఽర్భకైః .
రాజ్ఞాఘం ప్రాపితం తాతం శ్రుత్వా తత్రేదమబ్రవీత్
1-18-33
అహో అధర్మః పాలానాం పీవ్నాం బలిభుజామివ .
స్వామిన్యఘం యద్దాసానాం ద్వారపానాం శునామివ
1-18-34
బ్రాహ్మణైః క్షత్రబంధుర్హి గృహపాలో నిరూపితః .
స కథం తద్గృహే ద్వాఃస్థః సభాండం భోక్తుమర్హతి
1-18-35
కృష్ణే గతే భగవతి శాస్తర్యుత్పథగామినాం .
తద్భిన్నసేతూనద్యాహం శాస్మి పశ్యత మే బలం
1-18-36
ఇత్యుక్త్వా రోషతామ్రాక్షో వయస్యాన్ ఋషిబాలకః .
కౌశిక్యాప ఉపస్పృశ్య వాగ్వజ్రం విససర్జ హ
1-18-37
ఇతి లంఘితమర్యాదం తక్షకః సప్తమేఽహని .
దంక్ష్యతి స్మ కులాంగారం చోదితో మే తతద్రుహం
1-18-38
తతోఽభ్యేత్యాశ్రమం బాలో గలే సర్పకలేవరం .
పితరం వీక్ష్య దుఃఖార్తో ముక్తకంఠో రురోద హ
1-18-39
స వా ఆంగిరసో బ్రహ్మన్ శ్రుత్వా సుతవిలాపనం .
ఉన్మీల్య శనకైర్నేత్రే దృష్ట్వా స్వాంసే మృతోరగం
1-18-40
విసృజ్య తం చ పప్రచ్ఛ వత్స కస్మాద్ధి రోదిషి .
కేన వా తే ప్రతికృతమిత్యుక్తః స న్యవేదయత్
1-18-41
నిశమ్య శప్తమతదర్హం నరేంద్రం
స బ్రాహ్మణో నాత్మజమభ్యనందత్ .
అహో బతాంహో మహదద్య తే కృత-
మల్పీయసి ద్రోహ ఉరుర్దమో ధృతః
1-18-42
న వై నృభిర్నరదేవం పరాఖ్యం
సమ్మాతుమర్హస్యవిపక్వబుద్ధే .
యత్తేజసా దుర్విషహేణ గుప్తా
విందంతి భద్రాణ్యకుతోభయాః ప్రజాః
1-18-43
అలక్ష్యమాణే నరదేవనామ్ని
రథాంగపాణావయమంగ లోకః .
తదా హి చౌరప్రచురో వినంక్ష్య-
త్యరక్ష్యమాణోఽవివరూథవత్క్షణాత్
1-18-44
తదద్య నః పాపముపైత్యనన్వయం
యన్నష్టనాథస్య వసోర్విలుంపకాత్ .
పరస్పరం ఘ్నంతి శపంతి వృంజతే
పశూన్ స్త్రియోఽర్థాన్ పురుదస్యవో జనాః
1-18-45
తదాఽఽర్యధర్మశ్చ విలీయతే నృణాం
వర్ణాశ్రమాచారయుతస్త్రయీమయః .
తతోఽర్థకామాభినివేశితాత్మనాం
శునాం కపీనామివ వర్ణసంకరః
1-18-46
ధర్మపాలో నరపతిః స తు సమ్రాట్బృహచ్ఛ్రవాః .
సాక్షాన్మహాభాగవతో రాజర్షిర్హయమేధయాట్ .
క్షుత్తృట్ శ్రమయుతో దీనో నైవాస్మచ్ఛాపమర్హతి
1-18-47
అపాపేషు స్వభృత్యేషు బాలేనాపక్వబుద్ధినా .
పాపం కృతం తద్భగవాన్ సర్వాత్మా క్షంతుమర్హతి
1-18-48
తిరస్కృతా విప్రలబ్ధాః శప్తాః క్షిప్తా హతా అపి .
నాస్య తత్ప్రతికుర్వంతి తద్భక్తాః ప్రభవోఽపి హి
1-18-49
ఇతి పుత్రకృతాఘేన సోఽనుతప్తో మహామునిః .
స్వయం విప్రకృతో రాజ్ఞా నైవాఘం తదచింతయత్
1-18-50
ప్రాయశః సాధవో లోకే పరైర్ద్వంద్వేషు యోజితాః .
న వ్యథంతి న హృష్యంతి యత ఆత్మాగుణాశ్రయః
1-18-51
ఇతి శ్రీమద్భాగవతే మహాపురాణే పారమహంస్యాం సంహితాయాం ప్రథమస్కంధే
విప్రశాపోపలంభనం నామాష్టాదశోఽధ్యాయః